Jɔn 16

1“Kakë acä ke lɛ̈k week, ke we cïï röt bï dak ciëën. 2We bïï kɔc cieec ë ɣööt ke Nhialic yiic, yeka kööl abɔ̈, kööl bï raan näk week e lueel ë yepiɔ̈u an, looi ka ke Nhialic. 3Ku kakë abïk ke luöi week, në kuny kuc kek Wäär, ayïk ɛn. 4Ku kakë acä ke lɛ̈k wek: na miäk, acï köölden ɣëët, ke we bï wenïïm tak nɔn cän ke lɛ̈k week.

Luɔi de Wëidït

Ku kakë akɛ̈n ke lɛ̈k week wään tueŋ, luɔi nuö yɛn wokë week. 5Ku ënɔɔnë, yɛn jël la të nu raan ë toc ɛn, ku acïn raan tök ë weyiic raan thiëc ɛn an, ee tënou le yïn thïn? 6Ku nɔn cän ee kakë lɛ̈k wek, ke we ye piɔ̈ɔ̈th guɔ dhiau aläl. 7Ku ee yic en lɛ̈k week ayadäŋ an, jäl jäl ɛn ade naamde tëde week: na cä jël, ke Raan ee kɔc riit piɔ̈ɔ̈th acïï bï bɛ̈n tëde week, ku të jäl ɛn, abä tuöc week. 8Ku yen, të cï en bɛ̈n, abï kɔc ke piny nɔm jɔ̈ɔ̈ny në këde kërac, ku në këde piathëpiɔ̈u, ku në këde guiëërëlöŋ: 9në këde kërac, luɔi reec kek a gam, 10në këde piathëpiɔ̈u, luɔi jäl ɛn la tëde Wäär, ke we cïï a bï bɛ tïŋ, 11në këde guiëërëlöŋ, luɔi cï löŋ de bɛ̈ny ceŋ pinyë nɔm thök ë guiëër.

12“Yɛn de kajuëc ŋoot ka bä lɛ̈k week, ku acäkï ke duëër lëu ë muk ënɔɔnë. 13Ku të cï Raanë bɛ̈n, yen aye Wëi yic, yen abï we wat të nu yic ëbɛ̈n: ku acïï bï jam në këde yenhde, na de kë ye piŋ, yen abï aa lueel: ku abï we nyuöth käŋ, ka bï tïc wadäŋ. 14Abï ya tɔ yök dhuëëŋ: abï këdï nööm, ku jɔ nyuöth week. 15Ka nu ë Wäär cin ayek kakï kedhie: yen aa luɛɛl ɛn en an, abï këdï nööm, ku jɔ nyuöth week.

Jiɛthëpiɔ̈u ku Miɛtëpiɔ̈u

16“Tëthiinakäŋ, ke we cïï ya bï tïŋ, ku na ëlë tëthiinakäŋ, ke we bï ya tïŋ, luɔi jäl ɛn la tëde Wäär.”

17Ago kɔc kɔ̈k ee kɔckɛn ë piööcë gokï röt thiëëc kapäc an, “Ee käŋö kë lëk wook? An, tëthiinakäŋ, ke we cïï ya bï tïŋ, ku an, Na ëlë tëthiinakäŋ, ke we bï ya tïŋ, ‘ku ee luɔi jäl ɛn la tëde Wäär?’ 18Agokï lueel an, ee käŋö kë lueel an, ‘Tëthiinakäŋ? Akucku yen kë lueel!’

19Aŋic Yecu nɔn kɔɔr kek luɔi thiëëc kek en, go ke yɔ̈ɔ̈k an, “Week luɔpkï röt wapäc në kë cä lueel an, ‘Tëthiinakäŋ, ke we cïï ya bï tïŋ na ëlë tëthiinakäŋ, ke we bï ya tïŋ?’ 20Wek yɔ̈ɔ̈k ë yic an: We bï dhiau abäk dhuöör, ku kɔc ke pinynɔm abïk piɔ̈ɔ̈th miɛt: ku we bï piɔ̈ɔ̈th rac, ku rac de wepiɔ̈ɔ̈th abï rɔ puk abï aa miɛtëpiɔ̈u. 21Tik, të kɔɔr en dhiëth, ee piɔ̈u dhiau nɔn cï köölde bɛ̈n: ku të cï en däk, ka cïï tuöcdepiɔ̈u wën be tak, në biäk de miɛt cï en piɔ̈u miɛt luɔi cï raan dhiëëth ë piny nɔm. 22Ku week aya, we de dhiën ë wepiɔ̈ɔ̈th ënɔɔnë: ku we bä bɛ tïŋ, aguɔkï piɔ̈ɔ̈th miɛt, ku miɛt ë wepiɔ̈ɔ̈th acïn raan bï e nyaai tëde week.

23“Ku ëköölë acïn kë bä wek a luɔp. Wek yɔ̈ɔ̈k ë yic an, Të de yen kë bäk lip tëde Wäär në rinkï, ka bï gäm week. 24Aɣet cï ënɔɔnë acïn kë cäk lip në rinkï: yak lip, ke we bï aa miɔɔc, aguɔkï piɔ̈ɔ̈th miɛt abäk piɔ̈ɔ̈th a yum.

Tiëm ë Piny nɔm

25Kakë acä ke lɛ̈k week ë kɛ̈ŋ yiic: ku kööl abɔ̈, kööl cän bï bɛ jam wokë week ë kɛ̈ŋ, we bä guiëër ka ke Wäär ë gɔk. 26Ëköölë, ke we bï lip ë rinkï: ku acä lɛ̈k week nɔn bän Wäär lɔ̈ŋ ë biäkdun. 27Wäär guöp anhiaar week, luɔi nhiaar wek ɛn, ku luɔi cä wek a gam nɔn ë bä yɛn tëde Nhialic. 28Yɛn ë bɔ̈ tëde Wäär, bä ë piny nɔm: ku ënɔɔnë, yɛn be piny nɔm nyääŋ piny, la tëde Wäär.

29Ago kɔckɛn ë piööcë lueel an, “Andï, yïn luel jam agɔk ënɔɔnë, acie kääŋ yen luel. 30Ënɔɔnë aŋicku ëgɔk nɔn ŋic yïn käŋ kedhie, ku acïn kë bï raan bɛ thiëc yïn: kënë yen a gɛm wok yïn nɔn ë bï yïn tëde Nhialic.”

31Go Yecu bɛ̈ɛ̈r an, “Cäk gam ënɔɔnë? 32Wɔikï, kööl abɔ̈, yeka bɔ̈yë ënɔɔnë, kööl bï we thiäi wei, lɔ ŋɛk tëde ku lɔ ŋɛk tëde, ku nyääŋkï ya piny yatök: ku yɛn cïï tɔ̈u a tök, luɔi nu Wäär kekë ɛn. 33Kakë acä ke lɛ̈k week, ke we bï dɛ mät ë yayic. Në piny nɔm ke we bï dɛ këtuc ee we dhal: riɛtkï wepiɔ̈ɔ̈th tei! Yɛn ë piny nɔm tiaam.”

বর্তমানে নির্বাচিত:

Jɔn 16: dip-JPB

হাইলাইট

কপি