Psalmyn 37
37
EVENING PRAYER.
PSAL. 37.
Noli æmulari.
1Ny jean oo hene y heaghney er coontey ny mee-chrauee:
cha-moo jean uss troo mysh ny drogh-yantee.
2Son bee adsyn dy-gerrit giarit sheese myr y faiyr:
as er nyn vioghey myr y lhuss glass.
3Cur uss dty varrant er y Chiarn, as jean dy-mie:
jean cummal ayns y cheer, as bee oo dy firrinagh er dty yannoo magh.
4Gow taitnys ayns y Chiarn:
as ver eh dhyt yeearree dty chree.
5Treisht gys y Chiarn dty raad, as cur dty varrant er:
as ver eshyn lesh eh gy kione.
6Nee eh dty chairys y yannoo cha sollys as y soilshey:
as dty ghellal yeeragh myr y vun-laa.
7Cumm shickyr gys y Chiarn, as farkee dy-surransagh ersyn:
as ny lhig da sneih ve ort kyndagh rishyn ta’n seihll cheet lesh, noi’n dooinney ta jannoo lurg drogh choyrlyn.
8Scuirr veih corree, as faag voïd jymmoose:
ny bee er dty vrasnaghey, er aggle dy bee oo er dty ghreinaghey dy yannoo olk.
9Bee drogh-yantee er nyn astyrt ass ny fraueyn:
as adsyn ta dy-surransagh farkiaght er y Chiarn, yiow ad shoh eiraght ’sy cheer.
10Foast maghey tammylt beg, as bee’n mee-chrauee dy-bollagh ersooyl:
nee uss jeeaghyn son yn ynnyd echey, as bee eh er n’immeeaght.
11Agh yiow adsyn ta jeh spyrryd meen eiraght ayns y cheer:
as bee ad er nyn ooraghey ayns palchey dy hee.
12Ta’n vee-chrauee goaill coyrle noi’n dooinney ynrick:
as snaggeraght er lesh e eeacklyn.
13Cha jean y Chiarn agh craid jeh:
son t’eh er vakin dy vel y laa echey er-gerrey.
14Ta’n vee-chrauee er dayrn y cliwe, as er lhoobey nyn mhow:
dy lieggal sheese y boght as yn ymmyrchagh, as dy stroie ny lheid ocsyn ta jeh ymmyrkey yeeragh.
15Hed y cliwe oc trooid y chree oc hene:
as bee’n bow ocsyn er ny vrishey.
16Ta’n red fardalagh t’ec y dooinney cairagh:
ny share na berchys vooar ny mee-chrauee.
17Son bee roihaghyn ny mee-chrauee er nyn mrishey:
as ta’n Chiarn cummal seose yn sleih cairagh.
18Ta fys ec y Chiarn er laghyn y vooinjer chrauee:
as farree yn eiraght oc son dy-bragh.
19Cha bee ad seaghnit ayns yn earish ghaueagh:
as ayns ny laghyn dy ghenney bee dy-liooar oc.
20Er son ny mee-chrauee, nee ad cherraghtyn, as nee noidyn y Chiarn lheie ersooyl myr meeaylys eayin:
dy-feer, myr y jaagh bee ad eebrit ersooyl.
21Ta’n mee-chrauee goaill er eeasaght, as cha vel eh geeck:
agh ta’n dooinney cairagh erreeishagh as feoyltagh.
22Nee adsyn ta bannit dy Yee, vaghey ’sy cheer:
as adsyn t’eh er gheyrey vees astyrit ass ny fraueyn.
23Ta’n Chiarn goardrail kesmadyn y dooinney mie:
as jannoo e raad booisal da hene.
24Ga dy duitt eh, cha bee eh treigit:
son ta’n Chiarn dy chummal eh seose lesh e laue.
25Va mee aeg, as nish ta mee shenn:
as foast cha vaik mee rieau yn dooinney cairagh treigit, cha-moo e lhuight shooyl ny-dhieyn.
26Ta’n fer-cairagh dy-bragh myghinagh, as geeasaght:
as ta e lhuight er ny vannaghey.
27Chea veih olk, as jean shen ny ta mie:
as bee dty chummal foddey beayn.
28Son shynney lesh y Chiarn shen ny ta cairagh:
cha vel eh treigeil e vooinjer chrauee hene, agh t’ad er nyn goadey er son dy-bragh.
29Bee’n sleih neu-chairagh er nyn gerraghey:
er son sluight ny mee-chrauee, bee eh astyrit ass ny fraueyn.
30Nee’n vooinjer chairagh eiraght ’gheddyn ’sy cheer:
as vaghey ayn son dy-bragh.
31Ta beeall y fer-cairagh loayrt jeh creenaght:
as bee e hengey taggloo jeh briwnys.
32Ta leigh e Yee ayns e chree:
as cha jean e chesmadyn skyrraghtyn.
33Ta sooill ec y vee-chrauee er y fer-ynrick:
as t’eh shirrey oyr dy stroie eh.
34Cha vaag y Chiarn eh ayns e laue:
ny eh y gheyrey tra t’eh er ny vriwnys.
35Treisht uss ayns y Chiarn, as freill yn raad echey, as nee eh uss y vishaghey dy bee eiraght ayd ’sy cheer:
tra ta ny mee-chrauee cherraghtyn, nee oo shen y akin.
36Ta mish mee hene er vakin ny mee-chrauee ayns ard phooar:
as blaaghey myr billey glass bay.
37Hie mee shiaghey, as cur-my-ner, v’eh ersooyl:
vrie mee er y hon, agh cha row yn ynnyd echey raad erbee er ny gheddyn.
38Freill oo hene gyn loght, as cur tastey da’n red ta jeeragh:
son shen ver lesh shee gys dooinney ec y jerrey.
39Er son ny drogh-yantee, nee ad cherraghtyn cooidjagh:
as cronney ny mee-chrauee te, dy bee ad astyrit magh ec y jerrey.
40Agh ta saualtys y sleih cairagh cheet veih’n Chiarn:
ta myrgeddin yn niart oc ayns y traa dy heaghyn.
41As shassee yn Chiarn lioroo, as sauee eh ad:
nee eh ad y livrey veih ny mee-chrauee, as sauail ad, er yn oyr dy vel ad coyrt nyn dreishteil aynsyn.
বর্তমানে নির্বাচিত:
Psalmyn 37: PS1765
হাইলাইট
শেয়ার
কপি
Want to have your highlights saved across all your devices? Sign up or sign in
maintained by the British and Foreign Bible Society