Psalmyn 17
17
PSAL. 17.
Exaudi, Domine.
1Eaisht rish cairys my chooish, O Hiarn, smooinee er my accan:
as clasht rish my phadjer, nagh vel goll magh ass meillyn molteyragh.
2Lhig da’n vriwnys ayms cheet magh veih dt’enish:
as lhig da dty hooillyn jeeaghyn er shen ny ta cairal.
3T’ow er phrowal as er ronsaghey my chree ayns imbagh ny hoie; t’ow er my hirrey magh as cha vow veg yn olkys ayn-ym:
son ta mee dy-slane kiarit nagh jean-ym foill lesh my hengey.
4Kyndagh rish obbraghyn deiney ta jeant noi goan dty veillyn:
ta mee er reayll mee hene veih raaidyn y stroider.
5Cumm uss seose my immeeaght ayns dty raaidyn:
nagh jean my chesmadyn skyrraghtyn.
6Ta mee er n’eamagh ort, O Yee, son nee oo m'y chlashtyn:
cromm dty chleaysh hym, as eaisht rish my ghoan.
7Soilshee dty chenjallys-ghraihagh er-skyn-insh, uss yn Saualtagh ocsyn ta coyrt nyn dreishteil ayn-yd:
veih nyn lheid ocsyn as ta shassoo noi dty laue yesh.
8Jean m'y reayll myr clagh ny sooilley:
follee mee fo scaa dty skainyn.
9Veih’n vee-chrauee ta dy my voirey:
ta my noidyn chionney orrym er dy-chooilley cheu dy ghoaill ersooyl my vioys.
10T’ad dooint ayns y reuïd oc hene:
as ta’n beeal oc loayrt reddyn mooaralagh.
11T’ad lhie farkiaght ayns y raad ain er dy-chooilley cheu:
chyndaa nyn sooillyn sheese gys y thalloo.
12Myr y lion ta jollyssagh er e heilg:
as myr y lion aeg ta lhie gyn-yss ayns ynnydyn follit.
13Seose, Hiarn, cur e haaseyn mow, as ceau sheese eh:
livrey m’annym veih’n vee-chrauee, ta myr cliwe ayns dty laue;
14Veih deiney dty laue, O Hiarn, veih ny deiney, ta mee gra, as veih’n drogh heihll:
ta’n toghyr oc ’sy vea shoh, ny builg oc t’ow dy lhieeney lesh dty verchys follit.
15Ta cloan oc lurg nyn aigney:
as t’ad faagail ny ta er-mayrn jeh nyn merchys da nyn lhuight.
16Agh er my hon’s, nee’m fakin dt’eddin ayns cairys:
as tra nee’m doostey seose lurg dty chaslys, yioym yn slane soylley jeh.
বর্তমানে নির্বাচিত:
Psalmyn 17: PS1765
হাইলাইট
শেয়ার
কপি
Want to have your highlights saved across all your devices? Sign up or sign in
maintained by the British and Foreign Bible Society