ꠁꠘ꠆ꠎꠤꠟ ৩: ꠟꠥꠇ 24

ꠝꠃꠔꠞ ꠛꠣꠖꠦ ꠎꠤꠘ꠆ꠖꠣ ꠅꠁꠟꠣ ꠢꠎꠞꠔ ꠁꠍꠣ (২৪:১-৫৩)

ꠢꠎꠞꠔ ꠁꠍꠣ ꠎꠤꠘ꠆ꠖꠣ ꠅꠀꠞ ꠡꠣꠇ꠆ꠇꠤ-ꠙꠞꠝꠣꠘ

1ꠅꠃ ꠛꠦꠐꠤꠘ꠆ꠔꠦ ꠎꠦꠔꠣ ꠀꠔꠞ-ꠉꠥꠟꠣꠙ ꠔꠤꠀꠞ ꠇꠞꠍꠟꠣ, ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠈꠥꠛ ꠍꠛꠞꠦ ꠔꠣꠞꠣ ꠅꠔꠣ ꠟꠁꠀ, ꠁꠍꠣꠞ ꠇꠄꠛꠞꠞ ꠇꠣꠘ꠆ꠖꠣꠔ ꠀꠁꠟꠣ। 2ꠀꠁꠀ ꠖꠦꠈꠟꠣ, ꠇꠄꠛꠞꠞ ꠝꠥꠈꠞ ꠙꠣꠔ꠆ꠔꠞꠈꠣꠘ ꠢꠞꠣꠁꠟ ꠅꠁꠉꠦꠍꠦ। 3ꠖꠦꠈꠤꠀ ꠔꠣꠞꠣ ꠇꠄꠛꠞꠞ ꠜꠤꠔꠞꠦ ꠢꠣꠝꠣꠁꠀ ꠖꠦꠈꠂꠘ, ꠁꠍꠣꠞ ꠟꠣꠡ ꠔ ꠇꠄꠛꠞꠅ ꠘꠣꠁ। 4ꠔꠦꠃ ꠔꠣꠞꠣ ꠌꠤꠘ꠆ꠔꠣꠔ ꠙꠠꠤꠉꠦꠟꠣ। ꠅꠃ ꠡꠝꠄ ꠗꠟꠣ ꠌꠇꠌꠇꠣ ꠇꠣꠙꠠ ꠚꠤꠘ꠆ꠘ ꠖꠥꠁꠎꠘ ꠀꠁꠀ ꠔꠣꠞꠣꠞ ꠇꠣꠘ꠆ꠖꠣꠔ ꠃꠛꠣꠁꠟꠣ। 5ꠄꠞꠣꠞꠦ ꠖꠦꠈꠤꠀ ꠛꠦꠐꠤꠘ꠆ꠔꠦ ꠒꠞꠣꠁꠀ ꠝꠣꠕꠣ ꠘꠥꠀꠁꠟꠤꠟꠣ। ꠅꠃ ꠖꠥꠁꠅꠎꠘꠦ ꠔꠣꠞꠣꠞꠦ ꠇꠁꠟꠣ, “ꠅꠉ, ꠔꠥꠝꠤꠔꠣꠁꠘ ꠎꠤꠘ꠆ꠖꠣꠞꠦ ꠇꠦꠘꠦ ꠝꠥꠞ꠆ꠖꠣ ꠅꠇꠟꠞ ꠝꠣꠎꠦ ꠀꠁꠀ ꠔꠥꠇꠣꠁꠞꠣꠄ? 6ꠔꠣꠁꠘ ꠔ ꠅꠘꠅ ꠘꠣꠁ, ꠔꠣꠁꠘ ꠎꠤꠘ꠆ꠖꠣ ꠅꠁꠉꠦꠍꠂꠘ। ꠔꠣꠁꠘ ꠉꠣꠟꠤꠟꠅ ꠕꠣꠇꠔꠦ ꠔꠥꠝꠞꠣꠞ ꠉꠦꠍꠦ ꠇꠤꠔꠣ ꠇꠁꠍꠟꠣ, ꠝꠘꠅ ꠇꠞꠤꠀ ꠖꠦꠈꠅ। 7ꠔꠣꠁꠘ ꠇꠁꠍꠟꠣ ꠘꠣ ꠘꠤ, ꠛꠤꠘ-ꠀꠖꠝꠞꠦ ꠘꠣꠚꠞꠝꠣꠘ ꠝꠣꠘꠡꠞ ꠀꠔꠅ ꠗꠞꠣꠁ ꠖꠦꠅꠀ ꠅꠁꠛ। ꠔꠣꠘꠞꠦ ꠍꠟꠤꠛꠅ ꠟꠐꠇꠣꠁꠀ ꠎꠣꠘꠦ ꠝꠣꠞꠣ ꠅꠁꠛ, ꠅꠁꠟꠦ ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠛꠣ?”

8ꠅꠈꠣꠘ ꠢꠥꠘꠔꠦꠃ ꠁꠍꠣꠞ ꠀꠉꠞ ꠇꠕꠣ ꠅꠇꠟ ꠔꠣꠞꠣꠞ ꠝꠘꠅ ꠅꠁꠉꠦꠟ। 9ꠔꠣꠞꠣ ꠇꠛꠞꠡ꠆ꠕꠣꠘ ꠕꠣꠇꠤ ꠚꠤꠞꠤꠀ ꠉꠤꠀ, ꠢꠃ ꠄꠉꠣꠞꠅ ꠎꠘ ꠍꠣꠢꠣꠛꠤꠞꠦ ꠀꠞ ꠛꠣꠇꠤ ꠢꠇꠟꠞ ꠉꠦꠍꠦ ꠈꠛꠞ ꠎꠣꠘꠣꠁꠟꠣ। 10ꠝꠉꠖꠤꠟꠤꠘꠤ ꠝꠞꠤꠅꠝ, ꠁꠃꠢꠣꠘ꠆ꠘꠣ, ꠁꠀꠇꠥꠛꠞ ꠝꠣ ꠝꠞꠤꠅꠝ ꠀꠞ ꠔꠣꠞꠣꠞ ꠟꠉꠦ ꠎꠦꠔꠣ ꠛꠦꠐꠤꠘ ꠀꠍꠟꠣ, ꠄꠞꠣ ꠢꠇꠟꠦ ꠉꠤꠀ ꠁ ꠈꠛꠞ ꠇꠁꠟꠣ। 11ꠅꠁꠟꠦ ꠎꠦꠞꠣ ꠁꠔꠣ ꠢꠥꠘꠟꠣ, ꠄꠞꠣ ꠝꠘꠅ ꠇꠞꠟꠣ ꠁꠔꠣ ꠘꠤꠌꠄ ꠛꠣꠎꠦ ꠝꠣꠔ, ꠁꠔꠣ ꠛꠦꠐꠤꠘ꠆ꠔꠞ ꠝꠣꠔ ꠔꠣꠞꠣ ꠄꠇꠤꠘ ꠇꠞꠟꠣ ꠘꠣ। 12ꠅꠁꠟꠦ ꠙꠤꠔꠞ ꠖꠃꠠꠣꠁꠀ ꠇꠄꠛꠞꠞ ꠇꠣꠘ꠆ꠖꠣꠔ ꠉꠦꠟꠣ। ꠉꠤꠀ ꠃꠘ꠆ꠖꠣ ꠅꠁꠀ ꠖꠦꠈꠟꠣ, ꠈꠣꠟꠤ ꠇꠣꠚꠘꠈꠣꠘ ꠙꠠꠤ ꠞꠁꠍꠦ। ꠁꠔꠣ ꠖꠦꠈꠤꠀ ꠔꠣꠁꠘ ꠔꠣꠁꠎ꠆ꠎꠥꠛ ꠛꠘꠤꠀ ꠚꠤꠞꠔ ꠀꠁꠟꠣ।

ꠖꠥꠁꠎꠘ ꠡꠣꠉꠞꠤꠖꠦ ꠎꠤꠘ꠆ꠖꠣ ꠁꠍꠣꠞꠦ ꠖꠦꠈꠟꠣ

13ꠅꠃ ꠖꠤꠘꠃ ꠖꠥꠁꠎꠘ ꠡꠣꠉꠞꠤꠖ ꠎꠦꠞꠥꠎꠣꠟꠦꠝ ꠕꠣꠇꠤ ꠡꠣꠔ ꠝꠣꠁꠟ ꠖꠥꠞꠁ ꠁꠝꠥꠀꠍ ꠘꠣꠝꠞ ꠄꠇ ꠉꠣꠃꠔ ꠎꠣꠅꠀꠔ ꠀꠍꠟꠣ। 14ꠙꠕꠅ ꠔꠣꠞꠣ ꠅꠔꠣ ꠛꠦꠙꠣꠞ ꠅꠇꠟ ꠟꠁꠀꠃ ꠝꠣꠔꠤ ꠝꠣꠔꠤ ꠎꠣꠁꠞꠣ। 15ꠔꠣꠞꠣ ꠝꠣꠔꠅ ꠞꠁꠍꠂꠘ ꠅꠃ ꠡꠝꠄ ꠀꠈꠔꠣꠃ ꠁꠍꠣ ꠘꠤꠎꠦ ꠔꠣꠞꠣꠞ ꠇꠣꠘ꠆ꠖꠣꠔ ꠀꠁꠀ ꠄꠇꠟꠉꠦ ꠀꠐꠣ ꠗꠞꠟꠣ। 16ꠅꠁꠟꠦ ꠔꠣꠞꠣꠞ ꠌꠈꠥꠔ ꠍꠣꠐꠣ ꠟꠣꠉꠤ ꠉꠦꠍꠤꠟ, ꠔꠣꠞꠣ ꠁꠍꠣꠞꠦ ꠖꠦꠈꠤꠀꠅ ꠌꠤꠘꠟꠣ ꠘꠣ। 17ꠁꠍꠣꠄ ꠔꠣꠞꠣꠞꠦ ꠎꠤꠇꠣꠁꠟꠣ, “ꠀꠐꠤ ꠀꠐꠤ ꠀꠙꠘꠣꠞꠣ ꠁꠔꠣ ꠇꠤꠔꠣꠞ ꠛꠣꠔꠌꠤꠔ ꠇꠞꠞꠣ?” ꠁꠈꠣꠘ ꠢꠥꠘꠤꠀ ꠄꠞꠣ ꠝꠥꠈ ꠛꠦꠎꠣꠞ ꠇꠞꠤ ꠃꠛꠣꠁ ꠉꠦꠟꠣ। 18ꠄꠞꠝꠣꠎꠦ ꠇꠤꠟꠤꠅꠚꠣꠍ ꠘꠣꠝꠦ ꠄꠇꠎꠘꠦ ꠁꠍꠣꠞꠦ ꠇꠁꠟꠣ, “ꠀꠙꠘꠦꠃ ꠄꠇꠝꠣꠔ꠆ꠞ ꠎꠘ, ꠎꠦꠁꠘ ꠢꠥꠘꠍꠂꠘ ꠘꠣ ꠁ ꠇꠄꠖꠤꠘꠦ ꠎꠦꠞꠥꠎꠣꠟꠦꠝꠅ ꠇꠤꠔꠣ ꠊꠐꠤꠍꠦ?”

19ꠁꠍꠣꠄ ꠔꠣꠞꠣꠞꠦ ꠎꠤꠇꠣꠁꠟꠣ, “ꠇꠤꠔꠣ ꠊꠐꠤꠍꠦ ꠛꠣ?” ꠔꠣꠞꠣ ꠇꠁꠟꠣ, “ꠘꠣꠍꠣꠞꠔꠞ ꠁꠍꠣꠞꠦ ꠟꠁꠀ ꠎꠔꠔꠣ ꠊꠐꠤꠍꠦ। ꠔꠣꠁꠘ ꠔ ꠀꠟ꠆ꠟꠣꠞ ꠘꠛꠤ, ꠔꠣꠘ ꠝꠥꠈꠞ ꠎꠛꠣꠘ ꠀꠞ ꠇꠣꠝꠦ-ꠇꠣꠎꠦ ꠀꠟ꠆ꠟꠣꠞ ꠘꠎꠞꠅ ꠀꠞ ꠢꠇꠟ ꠝꠣꠘꠡꠞ ꠌꠈꠥꠔꠅ ꠈꠥꠛ ꠔꠣꠇ꠆ꠇꠔꠤ ꠀꠞ ꠝꠞꠔꠥꠛꠣꠀꠟꠣ ꠘꠛꠤ ꠀꠍꠟꠣ। 20ꠀꠝꠞꠣꠞ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠔꠣꠘꠞꠦ ꠎꠣꠘꠦ ꠝꠣꠞꠣꠞ ꠟꠣꠉꠤ ꠞꠥꠝꠣꠘ ꠅꠇꠟꠞ ꠀꠔꠅ ꠗꠞꠣꠁꠀ ꠖꠤꠟꠣꠁꠟꠣ, ꠔꠣꠞꠣ ꠔꠣꠘꠞꠦ ꠘꠤꠀ ꠍꠟꠤꠛꠞ ꠃꠙꠞꠦ ꠎꠣꠘꠦ ꠝꠣꠞꠤꠟꠤꠍꠦ। 21ꠅꠁꠟꠦ ꠀꠝꠞꠣꠞ ꠀꠡꠣ ꠀꠍꠤꠟ, ꠔꠣꠁꠘ ꠛꠘꠤ ꠁꠍꠞꠣꠁꠟꠞꠦ ꠀꠎꠣꠖ ꠇꠞꠛꠣ। ꠀꠁꠎ ꠔꠤꠘ ꠖꠤꠘ ꠅꠁꠟ ꠁ ꠊꠐꠘꠣ ꠊꠐꠤꠍꠦ। 22ꠀꠞ ꠀꠝꠞꠣꠞ ꠟꠉꠞ ꠇꠄꠎꠘ ꠛꠦꠐꠤ ꠝꠣꠘꠡꠦ ꠀꠁꠀ ꠀꠝꠞꠣꠞꠦ ꠔꠣꠁꠎ꠆ꠎꠥꠛ ꠛꠣꠘꠣꠁꠟꠤꠍꠂꠘ। ꠔꠣꠞꠣ ꠈꠥꠛ ꠍꠛꠞꠦ ꠁꠍꠣꠞ ꠇꠄꠛꠞꠅ ꠉꠦꠍꠟꠣ, 23ꠉꠤꠀ ꠖꠦꠈꠍꠂꠘ, ꠔꠣꠘ ꠟꠣꠡ ꠘꠣꠁ। ꠔꠣꠞꠣ ꠚꠤꠞꠔ ꠀꠁꠀ ꠇꠁꠟꠣ, ꠔꠣꠞꠣ ꠚꠤꠞꠤꠡ꠆ꠔꠣꠞ ꠖꠞꠡꠘ ꠙꠣꠁꠍꠂꠘ, ꠀꠞ ꠚꠤꠞꠤꠡ꠆ꠔꠣ ꠅꠇꠟꠦ ꠔꠣꠞꠣꠞꠦ ꠇꠁꠍꠂꠘ, ꠁꠍꠣ ꠎꠤꠘ꠆ꠖꠣ ꠀꠍꠂꠘ। 24ꠛꠣꠖꠦ ꠀꠝꠞꠣꠞ ꠟꠉꠦ ꠎꠣꠞꠣ ꠀꠍꠟꠣ, ꠔꠣꠞꠣꠞ ꠝꠣꠎꠦꠅ ꠇꠦꠃ ꠇꠦꠃ ꠇꠄꠛꠞꠅ ꠉꠤꠀ ꠖꠦꠈꠟꠣ, ꠛꠦꠐꠤꠘ꠆ꠔꠞ ꠇꠕꠣꠃ ꠢꠣꠍꠣ, ꠁꠍꠣꠞ ꠟꠣꠡ ꠇꠄꠛꠞꠅ ꠘꠣꠁ।”

25ꠢꠇꠟꠔꠣ ꠢꠥꠘꠤꠀ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠙꠘꠣꠞꠣ ꠔ ꠇꠥꠘ꠆ꠔꠣꠃ ꠛꠥꠎꠂꠘ ꠘꠣ। ꠀꠙꠘꠣꠁꠘ꠆ꠔꠞ ꠖꠤꠟ ꠅꠟꠣ ꠅꠡꠣꠠ ꠛꠘꠤꠉꠦꠍꠦ ꠘꠤ? ꠀꠟ꠆ꠟꠣꠞ ꠘꠛꠤ ꠅꠇꠟꠦ ꠎꠦꠔꠣ ꠛꠣꠔꠣꠁꠀ ꠉꠦꠍꠂꠘ, ꠅꠔꠣꠞꠦꠅ ꠀꠙꠘꠣꠞꠣ ꠄꠇꠤꠘ ꠇꠞꠞꠣ ꠘꠣ। 26ꠘꠛꠤ ꠅꠇꠟꠦ ꠇꠁꠍꠂꠘ ꠘꠣ ꠘꠤ, ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠀꠟ-ꠝꠍꠤꠄ ꠖꠥꠈ-ꠝꠍꠤꠛꠔ ꠡꠁꠎ꠆ꠎ ꠇꠞꠤꠀ ꠢꠣꠞꠤ ꠔꠣꠘ ꠎꠣꠟꠣꠟ ꠀꠞ ꠉꠃꠞꠛ ꠢꠣꠍꠤꠟ ꠇꠞꠛꠣ?” 27ꠛꠣꠖꠦ ꠔꠣꠁꠘ ꠝꠥꠍꠣ ꠘꠛꠤꠞ ꠔꠃꠞꠣꠔ ꠇꠤꠔꠣꠛ ꠕꠣꠇꠤ ꠡꠥꠞꠥ ꠇꠞꠤꠀ, ꠢꠇ꠆ꠇꠟ ꠘꠛꠤꠞ ꠇꠤꠔꠣꠛꠞ ꠝꠣꠎꠦ ꠔꠣꠘ ꠛꠦꠙꠣꠞꠦ ꠎꠔꠔꠣ ꠟꠦꠈꠣ ꠀꠍꠦ, ꠅꠔꠣ ꠔꠣꠞꠣꠞꠦ ꠛꠥꠎꠣꠁꠟꠣ।

28ꠀꠞ ꠎꠦ ꠉꠣꠃꠔ ꠎꠣꠁꠔꠣ ꠇꠞꠤ ꠔꠣꠞꠣ ꠞꠅꠀꠘꠣ ꠖꠤꠍꠟꠣ, ꠢꠃ ꠉꠣꠃꠞ ꠇꠣꠘ꠆ꠖꠣꠔ ꠀꠁꠟꠦ ꠁꠍꠣꠄ ꠀꠞꠅ ꠖꠥꠞꠁ ꠎꠣꠅꠀꠞ ꠜꠣꠛ ꠖꠦꠈꠣꠁꠟꠣ। 29ꠅꠁꠟꠦ ꠔꠣꠞꠣ ꠈꠥꠛ ꠝꠤꠘꠔ-ꠇꠣꠎ꠆ꠎꠤ ꠇꠞꠤꠀ ꠔꠣꠘꠞꠦ ꠇꠁꠟꠣ, “ꠅꠈꠘ ꠔ ꠛꠦꠁꠟ ꠉꠦꠍꠦꠉꠤ, ꠢꠣꠁꠘ꠆ꠎꠣ ꠅꠁꠎꠣꠞ, ꠔꠦ ꠞꠣꠁꠔꠈꠣꠘ ꠀꠙꠘꠦ ꠀꠝꠞꠣꠞ ꠉꠦꠍꠦ ꠞꠁ ꠎꠣꠃꠇ꠆ꠇꠣ।” ꠅꠃ ꠔꠣꠁꠘ ꠞꠅꠀꠞ ꠟꠣꠉꠤ ꠛꠣꠠꠤꠔ ꠢꠣꠝꠣꠁꠟꠣ। 30ꠛꠣꠖꠦ ꠎꠦꠛꠟꠣ ꠈꠣꠘꠤꠔ ꠛꠁꠟꠣ, ꠅꠃ ꠡꠝꠄ ꠁꠍꠣꠄ ꠞꠥꠐꠤ ꠟꠁꠀ ꠐꠥꠇꠞꠣꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠔꠣꠞꠣꠞꠦ ꠖꠤꠟꠣ। 31ꠔꠦꠃ ꠔꠣꠞꠣꠞ ꠌꠃꠈ ꠈꠥꠟꠤꠉꠦꠟ, ꠔꠣꠞꠣ ꠁꠍꠣꠞꠦ ꠌꠤꠘꠤꠟꠤꠟꠣ। ꠌꠤꠘꠣꠞ ꠟꠉꠦ ꠟꠉꠦꠃ ꠔꠣꠁꠘ ꠄꠞꠣꠞ ꠉꠦꠍ ꠕꠣꠇꠤ ꠀꠃꠠꠤ ꠖꠤꠟꠣꠁꠟꠣ। 32ꠛꠣꠖꠦ ꠔꠣꠞꠣ ꠄꠇꠦ-ꠅꠁꠘ꠆ꠘꠞꠦ ꠇꠁꠟꠣ, “ꠙꠕꠅ ꠎꠦꠛꠟꠣ ꠔꠣꠁꠘ ꠀꠝꠞꠣꠞ ꠟꠉꠦ ꠛꠣꠔꠌꠤꠔ ꠇꠞꠍꠟꠣ, ꠀꠝꠞꠣꠞꠦ ꠀꠟ꠆ꠟꠣꠞ ꠇꠣꠟꠣꠝ ꠛꠥꠎꠣꠁꠀ ꠖꠤꠍꠟꠣ, ꠢꠃ ꠡꠝꠄ ꠀꠝꠞꠣꠞ ꠖꠤꠟꠞ ꠝꠣꠎꠦ ꠄꠇ ꠄꠡꠇꠤ ꠙꠄꠖꠣ ꠅꠁꠍꠤꠟ ꠘꠣ ꠘꠤ?”

33ꠟꠉꠦ ꠟꠉꠦ ꠔꠣꠞꠣ ꠖꠥꠁꠅꠎꠘ ꠛꠣꠞ ꠅꠁꠀ ꠎꠦꠞꠥꠎꠣꠟꠦꠝ ꠀꠁꠟꠣ। ꠀꠁꠀ ꠢꠃ ꠄꠉꠣꠞꠅ ꠎꠘ ꠍꠣꠢꠣꠛꠤ ꠀꠞ ꠛꠣꠇꠤ ꠢꠇ꠆ꠇꠟꠞꠦ ꠄꠇꠈꠣꠘꠅ ꠛꠅꠀꠔ ꠙꠣꠁꠟꠣ। 34ꠔꠣꠞꠣ ꠅꠘꠅ ꠛꠁꠀ ꠅꠔꠣ ꠝꠣꠔꠤꠞꠣ, ꠢꠎꠞꠔ ꠁꠍꠣ ꠀꠍꠟꠦꠃ ꠎꠤꠘ꠆ꠖꠣ ꠅꠁꠉꠦꠍꠂꠘ, ꠎꠤꠘ꠆ꠖꠣ ꠅꠁꠀ ꠍꠣꠁꠝꠘ-ꠙꠤꠔꠞꠞꠦ ꠖꠦꠈꠣ ꠖꠤꠍꠂꠘ। 35ꠅꠃ ꠡꠝꠄ ꠢꠃ ꠖꠥꠁꠅꠎꠘꠦꠅ ꠄꠞꠣꠞꠦ ꠇꠁꠟꠣ, ꠙꠕꠞ ꠝꠣꠎꠦ ꠔꠣꠞꠣ ꠇꠤꠟꠣ ꠁꠍꠣꠞ ꠖꠦꠈꠣ ꠙꠣꠁꠟꠣ, ꠞꠥꠐꠤ ꠐꠥꠇꠞꠣꠁꠛꠣꠞ ꠡꠝꠄ ꠇꠤꠟꠣ ꠔꠣꠘꠞꠦ ꠌꠤꠘꠟꠣ, ꠁꠔꠣ ꠢꠇꠟꠔꠣ ꠎꠣꠘꠣꠁꠟꠣ।

ꠎꠤꠘ꠆ꠖꠣ ꠁꠍꠣꠞꠦ ꠢꠇꠟ ꠡꠣꠉꠞꠤꠖꠦ ꠖꠦꠈꠟꠣ

36ꠍꠣꠢꠣꠛꠤ ꠅꠇꠟꠦ ꠔ ꠅꠔꠣ ꠟꠁꠀ ꠛꠣꠔꠌꠤꠔ ꠇꠞꠞꠣ, ꠅꠃ ꠡꠝꠄ ꠀꠈꠔꠣꠃ ꠁꠍꠣ ꠘꠤꠎꠦ ꠅꠘꠅ ꠀꠁꠀ ꠔꠣꠞꠣꠞ ꠝꠣꠎꠈꠣꠘꠅ ꠃꠛꠣꠁꠀ ꠇꠁꠟꠣ, “ꠀꠍꠍꠣꠟꠣꠝꠥ ꠀꠟꠣꠁꠇꠥꠝ।” 37ꠔꠣꠘꠦ ꠖꠦꠈꠤꠀ ꠔꠣꠞꠣ ꠈꠥꠛ ꠒꠞꠣꠁꠉꠦꠟꠣ, ꠝꠘꠅ ꠇꠞꠟꠣ ꠜꠥꠔ ꠀꠁꠍꠦ। 38ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠅꠔ ꠅꠡ꠆ꠕꠤꠞ ꠅꠁꠉꠦꠟꠣꠄ ꠇꠦꠘꠦ? ꠇꠦꠘꠦ ꠔꠥꠝꠞꠣꠞ ꠖꠤꠟꠅ ꠡꠘ꠆ꠖꠄ ꠢꠣꠝꠣꠁꠟ? 39ꠀꠝꠣꠞ ꠀꠔ-ꠙꠣꠅ ꠜꠣꠟꠣꠝꠘ꠆ꠔꠦ ꠖꠦꠈꠅ, ꠖꠦꠈꠅ ꠘꠣ, ꠁ ꠔ ꠀꠝꠤ। ꠀꠝꠣꠞꠦ ꠀꠔꠣꠁꠀ ꠖꠦꠈꠅ, ꠜꠥꠔꠞ ꠔ ꠀꠝꠣꠞ ꠟꠣꠈꠣꠘ ꠀꠒ꠆ꠒꠤ-ꠝꠣꠋꠡ ꠘꠣꠁ।” 40ꠅꠈꠣꠘ ꠇꠁꠀ ꠔꠣꠁꠘ ꠘꠤꠎꠞ ꠀꠔ-ꠙꠣꠅ ꠔꠣꠞꠣꠞꠦ ꠖꠦꠈꠣꠁꠟꠣ। 41ꠅꠁꠟꠦ ꠔꠣꠞꠣ ꠔꠣꠘꠦ ꠖꠦꠈꠤꠀ ꠅꠔ ꠛꠦꠡꠤ ꠈꠥꠡꠤ ꠅꠁꠟꠣ, ꠈꠥꠡꠤꠞ ꠌꠥꠐꠦ ꠛꠦꠖꠤꠡꠣ ꠛꠘꠤꠉꠦꠟꠣ, ꠇꠥꠘ꠆ꠔꠣ ꠛꠤꠡ꠆ꠛꠣꠡ ꠇꠞꠔꠣ ꠙꠣꠞꠟꠣ ꠘꠣ। ꠔꠦꠃ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠁꠘꠅ ꠈꠣꠁꠛꠣꠞ ꠇꠥꠘ꠆ꠔꠣ ꠀꠍꠦ ꠘꠤ?” 42ꠔꠣꠞꠣ ꠄꠇ ꠐꠥꠇꠞꠣ ꠛꠤꠞꠣꠘ ꠝꠣꠍ ꠔꠣꠘꠞꠦ ꠖꠤꠟꠣ। 43ꠅꠃ ꠝꠣꠍ ꠔꠣꠁꠘ ꠢꠇꠟꠞ ꠍꠣꠝꠘꠦ ꠈꠣꠁꠟꠣ।

44ꠈꠣꠁꠀ ꠄꠞꠣꠞꠦ ꠇꠁꠟꠣ, “ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠀꠍꠟꠣꠝ, ꠢꠃ ꠡꠝꠄ ꠔꠥꠝꠞꠣꠞꠦ ꠇꠁꠍꠟꠣꠝ ꠘꠣ ꠘꠤ, ꠝꠥꠍꠣ ꠘꠛꠤꠞ ꠔꠃꠞꠣꠔ ꠡꠞꠤꠚ, ꠘꠛꠤ ꠅꠇꠟꠞ ꠍꠢꠤꠚꠣ, ꠀꠞ ꠎꠛꠥꠞ ꠡꠞꠤꠚꠞ ꠝꠣꠎꠦ ꠎꠦꠔꠣ ꠟꠦꠈꠣ ꠀꠍꠦ, ꠁꠔꠣ ꠢꠇꠟꠔꠣ ꠘꠤꠌ꠆ꠌꠤꠔ ꠚꠟꠤꠛ।” 45ꠅꠈꠣꠘ ꠇꠁꠀ ꠢꠣꠞꠤ, ꠔꠣꠁꠘ ꠍꠣꠢꠣꠛꠤ ꠅꠇꠟꠞ ꠖꠤꠟꠞ ꠖꠥꠀꠞ ꠈꠥꠟꠤ ꠖꠤꠟꠣ, ꠎꠣꠔꠦ ꠀꠟ꠆ꠟꠣꠞ ꠇꠣꠟꠣꠝꠞ ꠝꠣꠘꠤ ꠄꠞꠣ ꠛꠥꠎꠔꠣ ꠙꠣꠞꠂꠘ। 46ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠞ ꠇꠣꠟꠣꠝꠅ ꠟꠦꠈꠣ ꠀꠍꠦ, ꠀꠟ-ꠝꠍꠤꠄ ꠛꠃꠔ ꠇꠑꠤꠘ ꠖꠥꠈ-ꠔꠇꠟꠤꠚ ꠙꠣꠁꠛꠣ, ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠔꠣꠁꠘ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠎꠤꠛꠣ। 47ꠎꠦꠇꠥꠘꠥ ꠝꠣꠘꠡꠦ ꠔꠣꠘ ꠘꠣꠝꠦ ꠔꠃꠛꠣ ꠇꠞꠟꠦ, ꠉꠥꠘꠣꠞ ꠝꠣꠚꠤ ꠝꠣꠉꠤꠟꠦ ꠝꠣꠚꠤ ꠙꠣꠁꠛ, ꠅꠃ ꠛꠄꠀꠘꠤ ꠎꠦꠞꠥꠎꠣꠟꠦꠝ ꠕꠣꠇꠤ ꠡꠥꠞꠥ ꠅꠁꠀ ꠀꠡ꠆ꠔꠣ ꠖꠥꠘꠤꠀꠞ ꠢꠇꠟ ꠎꠣꠔꠤꠞ ꠇꠣꠘꠅ ꠙꠃꠍꠣꠘꠤ ꠟꠣꠉꠛ। 48ꠔꠥꠝꠞꠣꠃ ꠁ ꠢꠇ꠆ꠇꠟꠔꠣꠞ ꠡꠣꠇ꠆ꠇꠤ। 49ꠀꠞ ꠢꠥꠘꠅ, ꠀꠝꠣꠞ ꠛꠣꠔꠥꠘꠤ ꠛꠣꠚꠦ ꠎꠦꠔꠣ ꠖꠣꠘ ꠇꠞꠣꠞ ꠅꠀꠖꠣ ꠇꠞꠍꠂꠘ, ꠀꠝꠤ ꠁꠔꠣ ꠔꠥꠝꠞꠣꠞ ꠉꠦꠍꠦ ꠛꠦꠎꠤꠝꠥ। ꠅꠁꠟꠦ ꠛꠦꠢꠦꠡ꠆ꠔ ꠕꠣꠇꠤ ꠛꠟ-ꠔꠣꠇ꠆ꠇꠔ ꠘꠣ ꠙꠣꠅꠀ ꠙꠞ꠆ꠎꠘ꠆ꠔ, ꠔꠥꠝꠞꠣ ꠅꠃ ꠎꠦꠞꠥꠎꠣꠟꠦꠝꠅ ꠞꠁꠅ।”

ꠢꠎꠞꠔ ꠁꠍꠣꠞꠦ ꠛꠦꠢꠦꠡ꠆ꠔꠅ ꠔꠥꠟꠤꠀ ꠘꠦꠅꠀ ꠅꠁꠟ

50ꠛꠣꠖꠦ ꠁꠍꠣꠄ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠛꠣꠄꠔ-ꠀꠘꠤꠀ ꠉꠣꠃꠞ ꠝꠥꠈꠅ ꠉꠦꠟꠣ, ꠉꠤꠀ ꠔꠣꠁꠘ ꠀꠔ ꠔꠥꠟꠤꠀ ꠔꠣꠞꠣꠞꠦ ꠖꠥꠀ ꠖꠤꠟꠣ। 51ꠀꠞ ꠅꠃ ꠖꠥꠀꠞ ꠢꠣꠟꠔꠦꠃ ꠔꠣꠁꠘ ꠔꠣꠞꠣꠞ ꠉꠦꠍ ꠕꠘꠦ ꠀꠟꠉ ꠅꠁꠉꠦꠟꠣ, ꠔꠣꠘꠞꠦ ꠛꠦꠢꠦꠡ꠆ꠔꠅ ꠔꠥꠟꠤꠀ ꠘꠦꠅꠀ ꠅꠁꠟ। 52ꠔꠣꠞꠣ ꠢꠇꠟꠦ ꠔꠣꠘꠞꠦ ꠍꠁꠎꠖꠣ ꠇꠞꠤꠀ, ꠈꠥꠛ ꠈꠥꠡꠤ ꠅꠁꠀ ꠎꠦꠞꠥꠎꠣꠟꠦꠝꠅ ꠚꠤꠞꠔ ꠀꠁꠟꠣ। 53ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠝꠣꠎꠦ ꠢꠣꠝꠦꠡꠣ ꠀꠟ꠆ꠟꠣꠞ ꠢꠣꠝꠖ-ꠔꠣꠞꠤꠚ ꠇꠞꠣꠔ ꠞꠁꠟꠣ। ꠀꠝꠤꠘ॥

বর্তমানে নির্বাচিত:

ꠁꠘ꠆ꠎꠤꠟ ৩: ꠟꠥꠇ 24: sylN

হাইলাইট

কপি