Tobit 11
11
CAB. 11
1Lurg ny reddyn shoh, hie Tobias roish cur moylley da Jee, son dy dug eh er y yurnah dy heet lesh, as faagail bannaght ec Reguel as Edna e ven, hie eh er e hoshiaght derrey hayrn ad er-gerrey gys Nineve.
2Eisht dooyrt Raphael rish Tobias, Shione dhyt, vraar, kys daag oo dt’ayr:
3Lhig dooin siyr ’yannoo roish y ven ayd, as yn thie y chiartaghey.
4As, gow ayns dty laue gall yn eeast. Myr shen hie ad roue, as hie’n moddey geiyrt orroo.
5Nish va Anna ny soie jeeaghyn magh lesh y raad son e mac.
6As tra scri ee eh cheet, dooyrt ee rish e ayr, Cur-my-ner, ta dty vac cheet, as y dooinney hie marish.
7Eisht dooyrt Raphael, Ta fys aym, Hobias, dy noshil dt’ayr e hooillyn.
8Shen-y-fa ooillee uss e hooillyn lesh y gall, as guint lesh shen, nee eh rubbey, as tuittee yn vaneid ersooyl, as hee eh oo.
9Eisht roie Anna magh, as huitt ee er mwannal e mac, as dooyrt ee, Fakin dy vel mee er akin uss, my vac, veih’n traa shoh magh ta mish booiagh dy gheddyn baase; as cheayn ad ny-neesht.
10Hie Tobit myrgeddin magh lesh cheu’n dorrish, as huitt eh: agh roie e vac huggey,
11As ghow eh greim er e ayr: as hug eh struge jeh’n gall er sooillyn e ayrey, gra, bee dy yien mie, my ayr.
12As tra ghow e hooillyn toshiaght dy ve gonnagh, rub eh ad;
13As ren y bolg speeiney ersooyl veih corneilyn e hooillyn: as tra honnick eh e vac, huitt eh er y wannal echey.
14As hie eh, as dooyrt eh, Bannit t’ou uss, O Yee as bannit ta dt’ennym son dy bragh, as bannit ta ooilley dt’ainlyn casherick:
15Son t’ou er smaghtaghey, as er ghoaill chymmey jeem: son cur-my-ner, ta mee fakin my vac Tobias. As hie e vac stiagh goaill boggey, as dinsh eh da e ayr ny reddyn mooarey v’er daghyrt da ayns Media.
16Eisht hie Tobit magh quail e ven-chleuin ec giat Nineve, goaill boggey as moylley Jee: as adsyn ren fakin eh goll, ghow ad yindys mirrilagh, er-yn-oyr as dy row eh er gheddyn e hoilshey.
17Agh hug Tobit booise kiongoyrt roo, son dy row Jee er n’yannoo myghin er. As tra haink eh er gerrey gys Sara e ven-chleuin, vannee eh ee, gra, Shee dy vea my inneen: bannit dy row Jee, t’er choyrt lesh hooin oo, as bannit dy row dt’ayr as dty voir. As va boggey fud whilleen jeh e vraaraghyn as va ec Nineve.
18As haink Achiacharus, as Nasbas mac e vraar:
19As va bannish Hobias er ny reayll shiaght laa lesh boggey mooar.
বর্তমানে নির্বাচিত:
Tobit 11: YNAPBR
হাইলাইট
শেয়ার
কপি
Want to have your highlights saved across all your devices? Sign up or sign in
© Yn Cheshaght Ghailckagh 1979, 2017
© Manx Gaelic Society 1979, 2017