ማቲዎሴ 8

ዑፃ ኬስካ ዶርዓሢና ዓዺንቴ ዓሢኮ ፖዒፆ

(ማር. 1፥40-45፤ ሉቃ. 5፥12-16)

1ዬሱሴ ዹካ''ፓ ኬዴ'' ዎዶ''ና ሚርጌ ዴሬ ዒዛ ጊንፆ ሙኬኔ። 2ዬኖና ፔቴ'' ዑስካ ኬስካ ዶርዓ ዓርቄ ዓሲስኬይ ዬሱሴ ኮይላ'' ሙኪ ባሊቲና ሳዓ ሎኦማዖ፦ «ጎዳሢዮ! ኔ ኮዔቴ ታና ጌኤሻ''ኒ ዳንዳዓኔ!» ጌዔኔ።

3ዬሱሴ ዒዛኮ ዑፆ ዓርቃዖ፦ «ጌኤሽኬ! ኔ ጌኤሽካንዳጉዲ ታ ኮዔኔ» ጋዓዛ ዬይ ዓሢ ቤዞና ዶርዓሢዳፓ ዻቂ ጌኤሽኬኔ። 4ዬካፓ ዬሱሴ፥ ዬኖ ዶርዔሎይዳፓ ዻቂ ጌኤሽኬ ዓሢም፦ «ሃያ ባኮ ዖኦማኣ ኬኤዚፖ፤ ጋዓንቴ ሃሢ ዓኣዺጋፓ ኔኤኒ ጌኤሽኬሢ ቄኤሳሢም ዻዌ፤ ሃሣ ቢያሢም ማርካ ማዓንዳጉዲ ኔኤኮ ዶርዓሢዳፓ ፖዒፆ ዛሎ'' ሙሴ ዓይሤ ዒንጎ ባኮ ፆኦሲም ዒንጌ» ጌዔኔ። #ሌዊ. ዓኬ 14፥1-32።

ፄኤቶ ፖኦሊሶ ዓይሣሢኮ ጉሙርቂፆ

(ሉቃ. 7፥1-10)

5ዬካፓ ዬሱሴ ቂፒርናሆሜ ካታሞ ጌላዛ ፄኤታ ፖኦሊሴ ዓይሣ፥ ፔቴ'' ሮሜ ዓጪ ዓሲስኬይ ዒዛ ኮይላ'' ሙካዖ፦ 6«ጎዳሢዮ! ታኣኮ ማዻሢ ሓርጊንቲ ዎቢ፥ ሚርጌ ሜታዺ ጋራ ላሂ ዓኣኔ፤ ታና ማኣዴ''» ጌዒ ሺኢቄኔ፤

7ዬሱሴ ማሃዖ፦ «ታ ዒዛ ሙኪ ፓሣንዳኔ» ጌዔኔ።

8ፖኦሊሶ ዓይሣሢ ጋዓንቴ፦ «ጎዳሢዮ! ታ ማኣሪ ኔ ጌላኒ ታ ጊኢጋ ዓሲቱዋሴ፤ ዬያሮ ሃካ ዓኣዖ ፔቴ'' ባኣዚ'' ጌዔ፤ ታኣኮ ማዻሢ ፖዓንዳኔ፤ 9ታኣኒ ታ ቶኦኪና ዎይሣ ዓሲም ዓይሢንታያ ሓሣ ታ ዴማ''፥ ታኣም ዓይሢንታ ፖኦሊሴ ዓኣኔ፤ ዔያቶይዳፓ ፔቴ''ሢ ‹ዴንዴ!› ታ ጋዓዛ ዴዴንዳኔ፤ ባጋሢ ሃሣ ‹ሃኒ ዬዔ!› ታ ጋዓዛ ሙካኔ፤ ታኣም ማዻሢ ‹ሃያ ታኣም ማዼ!› ታ ጋዓዛ ዒ ማማዻኔ» ጌዔኔ።

10ዬሱሴ ዬያ ዋይዜ ዎዶ''ና ዲቃቲ ሄርሻዖ ዒዛና ዎላ'' ዓኣዻ ዓሶ ኮይላ''፦ «ጎኔ ታ ዒንሢም ጋዓኔ፤ ሃያጉዴ ዼኤፒ ጉሙርቂሢ ዓኣ ዓሲ ፔቴ''ታዖ፥ ዒስራዔኤሌይዳኣ ማዖም ታ ዴንቂባኣሴ። 11ዔሩዋቴ፤ ሚርጌ ዓሲ ዓባ'' ኬስካ ዛሎ''ና ጌላ ዛሎ''ናይዳፓ ሙኪ ዓብራሃሜና ዪሳኣቄና ሃሣ ያይቆኦቤና ዎላ'' ጫሪንጮ ካኣቱሞይዳ ሙዓኒ ዴዓንዳኔ። #ሉቃ. 13፥29። 12ጫሪንጮ ካኣቱሞም ጊኢጊንቴያታዖ ዙሎ'' ዹሞ ቤዛ ኬኤሪንታንዳይ ዓኣኔ። ዬካ ዬና ዓሳ ዬኤኪ ዓቺ ዻዓንዳኔ» ጌዔኔ። #ዒሲ. 49፥12፤ 59፥19፤ ሚል. 1፥11፤ ዓይኑ. 107፥3፤ ማቲ. 22፥13፤ 25፥30፤ ሉቃ. 13፥28። 13ዬካፓ ዬሱሴ ፄኤቶ ፖኦሊሶ ዓይሣሢም፦ «ዴንዴ፥ ኔ ጉሙርቄሢጉዲ ማዖንጎ» ጌዔኔ። ዬያ ዓሢኮ ማዻሢ ዬማ''ና ፖፖዔኔ።

ዬሱሴ ሚርጌ ሃርጌ ዓሶ ፓሤሢ

(ማር. 1፥29-34፤ ሉቃ. 4፥38-41)

14ዒማ''ና ዬሱሴ ጲፂሮሴ ማኣሪ ጌላዖ፥ ጲፂሮሴኮ ባይሳ ቆፂንቲ ላሂ ዓኣንቴ ዴንቂ፥ 15ዒዞኮ ኩጮ ዒ ካኣማዛ ቤዞና ቆሣ ዒዞኮ ሃይቄም ዔቂ ዒዛ ሾኦቺንሤኔ። 16ዬካፓ ሳዓ ዓማዛ፥ ዓሳ ፑርታ ዓያና ዓርቄ ሚርጌ ሃርጌ ዓሲ ዬሱሴ ኮይላ'' ዔኪ ሙካዛ «ኬስኬ» ጌይሢና ሌሊ ፑርቶ ዓያኖ ኬሴ''ም ሃርጊንቴ ዓሳ ቢያ ፖዔኔ። 17ዬያይዲፆና ፆኦሲ ማሊፆ ኬኤዛ ዒሲያሴ ዛሎ''ና፦ «ዒዚ ኑኡኮ ዶርዓሢ ዔኪ ኑጊዳፓ ዳኬኔ» ጌይንቴሢ ኩሜ''ኔ። #ዒሲ. 53፥4።

ዬሱሴ ጊንሢ ሃንቲሢ ዔኪሳ ሜቶ

(ሉቃ. 9፥57-62)

18ዬሱሴ ሚርጌ ዓሲ ዒዛ ኮይላ'' ቡኪ ዓኣሢ ዛጋዖ ዒዛኮ ጊንፆ ሃንታዞንሢ ባዞ''ኮ ሶ ሱኮ ፒንቃንዳጉዲ ዓይሤኔ። 19ዒማ''ና ፔቴ'' ሙሴ ዎጎ ዔርዛ ዓሲ ዒዛ ባንሢ ሙካዖ፦ «ዔርዛሢዮ! ኔ ዓኣዻ ቤዞ ቢያ ታ ኔኤና ዓኣዻንዳኔ» ጌዔኔ።

20ዬሱሴ ማሃዖ፦ «ዉኡካሢኮ ዎርቆ ዔቴ፤ ካፖኮ ሃሣ ማኣሪ ዓኣኔ። ዓሲ ናዓሢ ጋዓንቴ ላሂ ሃውሻንዳ ቤሲታዖ ባኣሴ» ጌዔኔ።

21ዒዛኮ ጊንፆ ሃንታዞንሢዳፓ ፔቴ''ይ፦ «ጎዳሢዮ! ቤርታዺ ታ ዴንዲ ታ ዓዴ ሃይቄም ዱኡኪ ሙኮም» ጌዔኔ።

22ዬሱሴ ማሃዖ፦ «ኔኤኒ ታ ጊንፆ ሙኬ፤ ሃይቄ ዓሳ ሃይቄ ዓሶ ዱኡካንዳጉዲ ሃሼ''» ጌዔኔ።

ዬሱሴኮ ባዞ'' ጉዳሢ ጎሪ''ፆ

(ማር. 4፥35-41፤ ሉቃ. 8፥22-25)

23ዬካፓ ዬሱሴ ዒዛኮ ጊንፆ ሃንታዞንሢና ዎላ'' ዋኣፆና ፒንቆ ጎንጎ ቶጊ ዴንዴኔ፤ 24ዬማና ዔርቲባኣ ዼኤፒ ባዚ'' ጉዳ ዔቂ፥ ዋኣፆና ፒንቆ ጎንጌሎ ዋኣፆ ኩንሢ፥ ዔኤዺሳኒ ዑኪ ሜታሴኔ፤ ዬሱሴ ጋዓንቴ ዒማ''ና ጊንዒ ዓኣኔ። 25ዒዛኮ ጊንፆ ሃንታ ናኣታ'' ዒዛ ጴቻዖ፦ «ጎዳሢዮ! ኑ ኩዴኔ፥ ኑና ዓውሴ» ጌዔኔ።

26ዬሱሴ ዒማ''ና፦ «ሓይ ዒንሢ ጉሙርቂፃ ፓጬ ዓሳ፥ ዓይጎሮ ዒንሢ ሃያይዲ ዒጊጬይ!» ጋዓዖ፥ ዔቂ ዢባሮና ዼኤፖ ጉዳሢና ጎሬም ቤዞና ቢያ ባካ ዚቲዮ ጌዔኔ።

27ዓሳ ጋዓንቴ ሚርጌና ዲቃቲ ሄርሻዖ፦ «ሃይ ዢባሮንታ ባዞ''ንታ ቢያ ዓይሢንታሢ ዎዚጉዴ ዓሲዳይ?» ጌዔኔ።

ፑርታ ዓያና ዓርቄ ላምዖ ዓሶኮ ዻቂፆ

(ማር. 5፥1-20፤ ሉቃ. 8፥26-39)

28ዬሱሴ ጌሊላ ባዞ''ና ፒንቂ ጌርሴኖኔ ዓጮ'' ሙካዛ ዒኢካ ፑርታ ዓያና ዓርቄ ላምዖ ዓሲ ዱኡፒ ካይዚዳፓ ኬስኪ ዒዛና ካኣሜኔ፤ ዬንሢ ሚርጌና ፑርታ ዓሲ ማዔሢሮ ዓይጎ ዓሲያ ዬኖ ጎይፆና ዓኣዻኒ ዳንዳዑዋያኬ። 29ዔያታ፦ «ፆኦሲ ናዓሢዮ! ኑኡና ዎላ'' ኔኤኮ ዓይጌ ዓኣይ? ዎዳ'' ሄሉ''ዋንቴ ኔ ኑና ሜታሳኒ ሙኪያ?» ጌዒ ጌዒ ዒላቴኔ። #ሱኡጎ. ማ 11፥12፤ 2ሳሙ. 16፥10።

30ዔያታ ዓኣ ቤዛፓ ዻካ'' ሃኬ ቤሲዳ ቆሎ ጉዱንሢ ዺቢ ሄንቃኔ። 31ፑርቶ ዓያኖንሢ ዬሱሴ ኮራ፦ «ኔ ኑና ኬሳ''ያ ማዔቴ፥ ሃሴኬ ጉዱንፆይዳ ኑ ጌላንዳጉዲ ኑና ዓይሤ» ጌዒ ዒዛ ሺኢቄኔ።

32ዬሱሴያ፦ «ዴንዱዋቴ!» ጋዓዛ፥ ፑርቶ ዓያኖንሢ ዓሶንሢዳፓ ኬስኪ ጉዱንፆይዳ ጌላዛ፥ ጉዱንፃ ቢያ ዔያታ ሄንቃ ማጎ ዓጮይዳፓ ዲርጊ ባዞ''ይዳ ጌሊ ሙይንቴኔ። 33ጉዱንፆ ሄንቃ ናኣታ'' ጳሽኪ ካታሞ ዴንዳዖ፥ ማዔ ባኮ ቢያ ሃሣ ፑርቶ ዓያኖና ዓርቂንቴ ዓሶንሢዳኣ ማዺንቴ ባኮ ኬኤዜኔ። 34ዬካፓ ካታሞ ዓሳ ጉቤ ዬሱሴ ዛጋኒ ካታማፓ ሙኪ ዒዛ ዴንቃዖ ዔያቶኮ ዓጫ''ፓ ዒ ኬስኪ ዓኣዻንዳጉዲ ዒዛ ሺኢቄኔ።

বর্তমানে নির্বাচিত:

ማቲዎሴ 8: MNT

হাইলাইট

কপি