Ibeb 6
6
Unye-ibot ebilene
1Ike mgbọ okije, ebilene mîbene ikimumana me linyọn̄. Mîmaan̄ si owuwa bọn ebibaan̄ inyi ema. 2Bọn ebirieen̄ Awaji ekpọkpọ bọn ebibaan̄ ebilene eboon̄be, mè imun̄ ibe ke mîjijan. Ema enenigobo ebi ema emabe me lek bọn ebibaan̄ cha ido me lek nwa. 3Okumugwem onenitumu ibe, “Efuuk n̄a#6:3 Me usem Iburu, ikọ yi si ìsibi ‘Ekwukwu n̄a.’ ìkpoyaka ikup ibia me emen ene isi ire mgbọ geelek, mije, ene ìre akpalek ikike eyi kpofukbe ugwem. Usen ugwem kan̄ me linyọn̄ keyi ìkpojọn̄ọ iraka efit acha mè akọp iba.”
4Bene me mgbọ ya nyi isi, ebi ujọn̄ọ ile, ìkpọkpọ ijot isi ichak mè inye lek enenen, òwa me linyọn̄. Ife chi ere bọn echi bọn ebirieen̄ Awaji eboon̄be me owot bọn ebibaan̄ ebilene cha. Ema si ere ebi usọ akọn̄ ebi eriọọn̄be erieen̄ me ukot ikaan̄.
5Okumugwem onenimun̄ ibe ke inu ikpak ebilene îwa enenen me linyọn̄, mè imun̄ si ibe ke otutuuk ekiket ejit kiban̄ mgbọ geelek ìre gaalek ijo ijo. 6Mije keya, Okumugwem ofefieek ejit enenen ibe ke ọmọ îrom ebilene igwook me linyọn̄. Inu ya otatap ọmọ unaan̄ igak ejit. 7Eya orọ, Okumugwem onenitumu ifieek ibe, “Mâchep otutuuk ebilene ebi nrombe isan̄a kpai me linyọn̄, mè ichep si otutuuk anam, mè otutuuk inu geelek òkinyinyọnọ me ijọn̄, mè otutuuk ebi kè unọn òwulu me inyọn̄, mije, înaan̄ emi ubọk nrombe otutuuk inu cha.” 8Ire, Nuwa gaalek ke Okumugwem obele ejit me lek.
Mfufuk owot iman kè Nuwa melek uji ọfọ înamabe
9Mfufuk owot iman kè Nuwa ìje ikeyi:
Nuwa ìre ogwu ata irọrọ. Me etete ebi ukot kan̄, ọmọ gaalek ore ogwu ìkarọ inu geege ìlọ. Nuwa îje ijaan̄ melek Awaji. 10Nuwa ìbon ibot bọn ebirieen̄ ita. Ema ìre Sem, mè Am, mè Jefet.
11Isan̄a me lek kè Nuwa, otutuuk ebilene me linyọn̄ efafiat isan̄a kpai me isi Awaji. Ikeya si ke inu afa ema ekirọ ojot otutuuk linyọn̄. 12Awaji okpọkpọ, mè imun̄ ibe ke otutuuk linyọn̄ îfiat isan̄a kpai, mije, otutuuk ebilene me linyọn̄ mîfiat lek kiban̄ isan̄a kpai. 13Awaji onenitumu inyi Nuwa ibe, “Me lek n̄a, okputut ugwem otutuuk ebilene me linyọn̄ yi îre, mije, bak me lek kiban̄, inu afa ìjojot otutuuk linyọn̄. Mije keyi, emi m̀bagbagbaan̄ ema melek otutuuk linyọn̄ me lek kan̄ ichep isan̄a mgbọ yaage. 14Eya orọ, owu sa uti siperes nama ikpele uji ọfọ, mè tap owuwa agwut me emen, mè sa ulobo agba ofifit chọkọ kana otutuuk lek, emen mè udun̄. 15Ikeyi ke obonama uji ya. Ujọn̄ọ kan̄ ìbore akọp ejit jaaba mè go, sà uwele kan̄ obore akọp mè ejit iba mè agbagba otubọk ini. Ubene kan̄ ìbore ejit jaaba mè agbagba otubọk ini. 16Tap nruruk òbebene iso agbagba otubọk iba kat kana ebek me irak ochichit kan̄, inyi utoon̄ ikiraka inin̄. Nama uji ya inyọn̄ ita, mè tap isotu ge me agba owot. 17Emi me lek n̄a mâsa mun̄ ile ichep otutuuk inu geelek òkifuuk efuuk me linyọn̄ yi. Otutuuk inu geelek òkup me linyọn̄ yi mêkwaan̄ ita kpai. 18Ire, mârọ inyan̄a-ibot n̄a melek kwun̄. Owu, melek nwa kwun̄, mè bọn kwun̄ ebirieen̄, mè ebi nwa kiban̄, mênin̄ uji ọfọ ya. 19Titen̄e inu geelek òkifuuk efuuk òkup me linyọn̄ iba iba, orie mè uman, tap me uji ọfọ ya, mè egọọk owu ekup, inyi ekakwaan̄. 20Chieen̄ unọn geelek, orie ge mè uman ge, mè chieen̄ anam geelek, orie ge mè uman ge, mè chieen̄ inu geelek òkinyinyọnọ me ijọn̄, orie ge mè uman ge, mêje inigọọk owu inin̄ me emen uji ọfọ ya, inyi ema ekakwaan̄ ìta. 21Titen̄e si otutuuk chieen̄ inorie geelek echi ebilene mè anam ekirie tap me emen uji ọfọ ya, mè titiin̄ sun̄. Echichi môre inorie inyi enyi melek anam cha.”
22Nuwa orọrọ otutuuk inu cha geelek iso, ike Awaji onyibe ida ibe ọmọ irọ.
বর্তমানে নির্বাচিত:
Ibeb 6: Obolo
হাইলাইট
শেয়ার
কপি
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
