KEYUM KERO 4
4
Kain Lang Abel Bínyi
1Méélamdem Adam bí Ibme mimepe kénbo surongem, Ib bí koo gela Kainme odola poto, “Ngo Ruutum ke igullok amiko paato.” 2Lekoda bí Kainke bíro Abelme olentoku. Abel bí mérem kaabomna amikuai delokke Kain bí amonglo arík ina amikuai. 3Longe bojéko irodem Kain bí arík lokke siipí-siiyé kídíem Ruutumke keralo amanpe bomato. 4Abelkom otí-ogo genam mér kídílok pala, gaiyalumna adín, delokke oob kídíem bomaato. Ruutum bí Abelke aman kídídem toríksuto. 5Idola Kainke aman kídídem, bí toríksumato. Delo Kain yagorupe marla bík migmue tuglíngkai. 6Delo Ruutum bí Kainme ííto, “No kape mardun? Nok migmo nappange kape língkan? 7No ai-kampope itomílo kape nom toríksumayén? No ai-kampope imamílo paabe lamgélo kadung delokke paabde nom mííbomdung; idola no deme ruutumpe aido.”
8Kainbí agíke bíro Abelme aríklo gíbosudope tomla, bínyike aríklo gíbosudungem, Abelke mirolpe Kainbí irepla agí bírosudem mokasuto.
9Delo Ruutum bí Kainme ííto, “Nok bíro Abel bí ingkolo?”
Bí poyansuto, “Ngo kénmang, ngo ngok bíroem kaabomnía?”
10Delo Ruutum bí poto, “No ingkokoda iton? Amolok nokke bíro lokke iyyie ngokkíng kapsadung. 11Nokke alaglok, nokke bíroke iyyiem toríksuna among delok nom monpakdung, kapeila supak no béélíknam amikope ikai. 12Edílo no arík iyédí, de nom arda biyimayé. No tani amongso dungko-dakko kayimana dugnyokna amipe iyé.”
13Kainbí Ruutum me poto, “Ngokke ajéngsi ngok gelanamem pemílo tebegyangkai. 14Arope no ngome amosokke monpak lendung delokke nok migmo keralok ngo runyok getíyé. Ngo dungko-dakko kamana dugnyokgoona amikope tani amongso ila, sékodí ngokke dugtíílo ngome kaaríksula iyéne de ngom mokayé.”
15Delo Ruutum bí poto, “Depe imayé, sékodí Kainme mokayéne, bím dekena arelokke adu kíníd kokai edoem rayéku.” Delo Ruutum bí sékote Kainme mokamadope bíkkíng iyodko ilíkto. 16Delo Kainbí Ruutum ke keralok gílen langkula Eden lokke sanggodan Nod amolo duuto.
Kainke Otíng-oyine
17Kainbí bík mimem kénla, mimede koo gela Inokme olento. Bí doolung luuneko ilenla delok amínem bík oo Inokke amínpe mínlíkto. 18Inokbí Iradme olento, Iradbí Mehujaelke abupe ito. Delokke Mehujaelbí Methusaelke abue delokke Methusaelbí Lamekke abupe ito.
19Lamek mime annyiko bomto, mimekon lokke amíne Adah delokke akonke Jilla. 20Adah bí Jabelme oto. Bí tombulo duula tani bomnam simon-siliem bomgeyalumna abupe ito. 21Bík bíro amíne Jubal, bí miri lukolo konggangem batlíkla, tapungem ilíkla ilen gebona abupe ito. 22Jilla bí Tubal Kainme oto. Bí arem, pitol, delokke atí atína ekurang mona amipe ituai, Tubal Kainke bírmeme Naamah emtuai.
23Lamek bík mime kídíem poto,
“Adah lang Jilla nonyi ngok agomem tattola;
Lamekke mime nonyi ngok ponamem tattola.
Ngome amikone tarí moketnam legape,
delokke yaaméde kídnam legape,
ngo amidem mokato.”
24“Kainme lemkínídko edo rayémílo,
arope Lamekme lemying kíníd kolang
lemkínídko, mokanadem edo rayé.”
25Adam bí bík méngem kénríksula, bí Seth emnam ooko otoku. Kapeila bí sikepe manto, “Kainbí mokanam legape, Abelke ayanpe Shédíbí ngom ooko bitoku.” 26Sethte ooko ola bím Inosh emla amín mínto. Delo longe delo ami kídíe Ruutum ke amínem mínlenla kumsukai.
বর্তমানে নির্বাচিত:
KEYUM KERO 4: adiBSI
হাইলাইট
শেয়ার
কপি
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
