Pédáesh 9
9
Gón Nuhá ahd o paymán
1Hodáyá Nuh o áiay chokk barkat dát o gwashtant: “Chokk o bar kanét o gésh bebét o donyáyá porr kanét. 2Zeminay sajjahén haywán, ásmánay sajjahén báli morg, sajjahén lápkassh o daryáay sajjahén máhig shomay tors o bimmay chérá bant. É sajjahén shomay dastá dayag butagant. 3Har sorendah ke sáhi mán ent, shomay waráka bit o anchó ke man shomárá sabzag dátagant, nun har chizza dayán. 4Bale á góshtá hechbar mawarét ke áiá zend, bezán hón mán ent.#9:4 Hón zenday neshán ent o tánke hón mán, gósht warag mabit. 5Harkas ke shomay hóná beréchit o sáhá begipt, man cha áiá hesába gerán. Cha har haywáná hesába gerán o cha har ensáná. Cha hamá mardomá hesába gerán ke dega mardoméá koshit, chéá ke mardom brát ant.
6Harkas ensánéay hóná beréchit,
áiay hón ham ensánéay dastá réchaga bit,
chéá ke Hodáyá ensán
wati sheklá addh kortag.
7Nun shomá, chokk o bar kanét o zeminay sará gésh bebét,
zeminay sará sheng o tálán o géshá cha gésh bebét.”
8Gorhá Hodáyá gón Nuh o áiay chokkán ke Nuhay hamráh atant, gwasht: 9“Nun man gón shomá o gón shomay randi naslán ahd o paymáné kanán. 10Gón har sahdárá ke shomay kerrá ent, báli morg, dalwat o wakshién haywán o har yakk chizzéá ke gón shomá cha bójigá dar átkag, gón zeminay hamok sahdárá ham é ahd o paymáná kanán. 11Man gón shomá wati é ahd o paymáná kanán ke dega baré sajjahén sahdár cha hár o tuppánay ápá bérána nabant; dega hechbar choshén háré nayayt ke sajjahén zeminá wayrán bekant.”
12Hodáyá gwasht: “É hamá ahd o paymánay nesháni ent ke man, wati o shomay o hamá sajjahén sahdáráni nyámá bandagá án ke gón shomá gón ant. É pa sajjahén áyókén naslán ahd o paymáné. 13Man wati sanj#9:13 Sanj, bezán drinn, rangi kamán ke hawrá rand ásmáná záhera bit o rang rang ent., jambaráni tahá ér kortag o é, mani o zeminay nyámá butagén ahd o paymánay neshánia bit. 14Harwahd ke man zeminay sarborá jambara kárán o sanj ham jambaráni tahá záhera bit, 15gorhá wati é ahd o paymánay yátá kapán ke mani o shomay o har tahray sajjahén sahdáráni nyámá ent. Nun áp hechbar chó hára nakant ke sajjahén sahdárán tabáh bekant. 16Harwahd ke sanj jambaráni tahá záhera bit, mania gendán o hamá abadmánén ahd o paymánay yátá kapán ke mane Hodá o zeminay har tahray sajjahén sahdáráni nyámá butag.” 17Hodáyá gón Nuhá gwasht: “Esh ent hamá ahd o paymánay nesháni ke man, wati o zeminay sajjahén sahdáráni nyámá bastag.”
Nuhay sayén chokk
18Nuhay chokk cha bójigá dar átkant, Sám o Hám o Yápet. Hám Kanhánay pet at. 19É sayén Nuhay chokk atant o cha hameshán mardom sajjahén zeminay sará sheng o tálán butant.
20Nuhá kesht o keshár bendát kort o anguri bágé addhi kort. 21Hamé anguray sharábi wárt, malár but o gedánay tahá jándar but. 22Kanhánay pet Hámá, wati pet jándará dist o wati doén brát ke dhanná atant, hál dátant. 23Sám o Yápetá kabáhé zort, wati kópagáni sará ér kort o poshtokái shotant o wati petay jándariesh póshént. Áyáni dém ángor at o wati petay jándariesh nadist.
24Wahdé Nuh cha sharábay malárá dar átk, zánti mani kasterén bachakká gón man ché kortag, 25gwashti:
“Kanháná nálat bát.
Wati brátáni golámáni golám bát.”
26Nuhá gwasht:
“Hodáwandá satá bát, Sámay Hodáyá.
Kanhán, Sámay golám bát.
27Hodá zeminá pa Yápetá práhter kanát.
Yápet, Sámay gedánáni tahá jahmenend bát o
Kanhán, áiay golám bát.”
28Cha hárá rand Nuhá dega say sad o panjáh sál omr kort. 29Nuhá sarjamiá noh sad o panjáh sál omr kort o mort.
বর্তমানে নির্বাচিত:
Pédáesh 9: HPKB
হাইলাইট
শেয়ার
কপি
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
