Yoane 5

Louweso loa boto nda lyaa lia Betesata

1Mbisa yamao yaäkä Elambɔ ya BaYuda la Yesu akɛndɛ̈kɛ̈ Yelusaleme. 2Nda bokenge wa Yelusaleme to, tina la liongo lia bɛkɔkɔ, loaaka lyaa lia balia eliatangomökö nda lioi lia BaYuda mbo Betesata, la yaäka la balɛlɛ bɔɔmwi ba batalɛ omao. 3Nda balɛlɛ ana likama lia bato ba kambo loingakala se, bako eba etuku, l’eba bikoti, l’ebalɛmbɛti. 5Boto ɔmɔi loyala nde amao oyaäkä la lokambo miaka kama isatɔ la bonanɛi. 6Yesu lɔɛnɛ inde ani aingal’inde se ina, la aluwäk’Inde mbo asoumwa mbile yumwa ongoma, Inde loonga lande mbo— ¿Olɛmbi nde ndɔɔlɔ bosäsu? 7Boto wa lokambo lomutoel’Inde mbo— Bwana, iti la boto bota’mi nda lyaa ani liela lia balia litoya, atɔkɛ’mi omao boto wasi atokwela’mi oso. 8Yesu loonga lande mbo— Emalaka, ilaka tange yaɛ, tangwaka. 9Lisasaya inde losäsesomo, inde loila tange yande, inde lotangwaka.

Lise lia Yenga

Lise-ao liäkä nde elia Yenga. 10Eokao BaYuda loonga la boto oyasäsesomökö mbo— Louse ende lise lia Yenga la lotiengane laɛ ndoilaka tange yaɛ. 11Nde inde lomutola lau mbo— Oyasäsoliki’mi, nd’aongi lami mbo— Ilaka tange yaɛ, tangwaka. 12Iyo lofel’inde mbo— ¿Boto ndai oyaongi laɛ mbo— Ilaka tange yaɛ, tangwaka? 13Nde inde oyasäsesomökö atialuwäkä imɔ Inde, eoka Yesu loengwa bokamu wa bato omao.

14Mbisa yamao, Yesu looshana lande nda Ndakɔ ya Mungu, Inde loonga lande mbo— Tɛnɛ ngo, ososäsesomo, okelëk’imɔ bobe, mbo loasɔ lolongela loo la owau, lotawɛlɛmɛ end’aɛ. 15Boto lɔkɛ la inde lokambesa BaYuda mbo ale ko Yesu oyasäsesik’inde. 16Eokao BaYuda loakola ndokongola Yesu eoka atokelaka njasɔ-bi la lise lia Yenga.

17Nde Yesu lomutoel’iyo mbo— Sango wami akokelaka likuwa liande, la Imi imɔ ikokeli likuwa liami. 18Eoka ya baoi-ba to BaYuda lookel’Inde yɛmɛ yool’Inde, yoeta eya oso, inga eoka asotefola liti lia Yenga kongo, nde simbi to eoka atangi nde Mungu mbo Sango wande, anyo aenganesi Inde angɛnɛ la Mungu.

19Yesu lomutoel’iyo to mbo— Wewe, wewe, itoonga lanu mbo Wana angokɔkɔlɔ okela loasɔ angolɔmoi ko Inde angɛnɛ, sakolo ko yao eyɛni Inde mbo Sango nd’akeli yao; eoka yao ebitokelaka Sango, Wana nd’atokela imɔ ko yao.

Lioi lia Yesu eoka ya liwawi la liwa

20Sango asoniya Wana la atɔɛnɛsɛ Wana bitotina ebitokelak’Inde angɛnɛ la ɛnɛsɛkɛ Wana bekeeli yolongela-bi mbo ino omwaleke. 21Kwa atotɛmwɛse Sango ebawäkä la atofaef’iyo liwawi liasi, ko ongoma Wana atofaka liwawi ende bato ebakasangek’Inde ofa liao. 22Ati to Sango oyatoatela boto njasɔ, nde asofa Wana isosha sha liati lia njasɔ, 23mbo batotina baliteseke Wana, kwani atolites’iyo olitesa Sango angɛnɛ. Oyaitolitesa Wana, ambo aitolitesa Sango oyatomäkä Wana.

24Wewe, wewe, itoonga lanu mbo oyatoka lioi liami la oyatolendelo Inde oyatomäkä’mi, ambo asɔɔlɔ liwawi lia loiko la atilaɔtɛkɛ nda liati, kongo ko asosokwa nda liwa okaɔtɔ nda liwawi. 25Wewe, wewe, itoonga lanu mbo mbile eyaka nde, eingo esoya kwani eyetokaka ebawi nde limiki lia Wana wa Mungu, la iyo ebatoka belayalaka la liwawi. 26Kwa Sango to ayali ngɛnɛ wa liwawi, ongoma imɔ asofaefa Wana isosha shoyala ngɛnɛ wa liwawi; 27la Sango asofaef’Inde imɔ isosha shoataka njasɔ eoka Inde nd’ayali Wana wa Boto. 28Omwalëke eloasɔ-lo, eoka la mbile eyekayeke, batotina ebayali nda sai, belokaka limiki liande, 29la belatɛmwaka nda liwa okaɔtɔ nda loiko, bako bakelaki ba olau, nde bakelaki ba bobe belatɛmwaka ko ndofomo se.

Likɔchi lia lioi lia Yesu

30Imi angɛnɛ itikɔkɔlɛ ndokela loasɔ ango lomɔi; ko ani atoka’mi, itoata ongoma, la liataki liami liengani nde, eoka iitofumba ndokelaka ko lisangi liami, kangä lisangi liande oyatomäkä’mi. 31Eya to mbo yetaka inango shami angɛnɛ, ambo inango shami siitokulyomo mbo wewe; 32Wasi nd’atota inango eoka yami, la Imi nd’aluwi mbo inango esitot’Inde eoka yami, shende wewe. 33Ino watomäkä ende Yoane, la inde lotaka inango sha wewe, 34nde likulyi elisolɛmbɛ’mi liti elia bato, nde iongi nde lioi-li lia Yoane mbo buwesomoko. 35Inde ayaläka nde faka eyonganäkä foi la bolangalangu la ino watalɛmbɛ̈kɛ̈ ndoyaimwa ko mbile ɛmɔi la bolangalangu wande.

36Nde Imi nd’ayali la inango sholonga esha Yoane, eoka likuwa eliafäkä Mungu efa’mi mbo yɔlɔlɛsɛkɛ liao, liao kongo elikokela’mi oko kwani, liao lile inango mbo Sango nd’atomäkä’mi. 37La oyatomäkä’mi ako Sango, Inde nd’atota inango loasɔ loami. Otioke limiki liande, otiɛnɛ bɔfɔnɔ wande, 38la lioi liande litiingale nda betema yanu eoka otiimel’Inde oyatomomökö lande.

39Ototangakela kasa ya Mungu, eoka otangi nde mbo bɔsɛlɛkɛ nde Liwawi ko la yao, kongo ko yao bitotaka inango loasɔ loami; 40nde ino otilɛmbɛ ndoya ende’mi mbo bɔɔlɛkɛ Liwawi.

41Lokuku loa bato, itikulye loao. 42Iluwi nde mbo ino oti la losamɔ loa Mungu nda betema yanu. 43Isoya ko nda lina lia Sango wami, nde otinyangele’mi; wasi nde koya nda lina liande angɛnɛ, ani ino konyangela nde ona. 44¿Ino nd’atokɔkɔlɔ ndoimela la moni, ani otokulya liineli lia baina lanu, kongo ko otiluke liineli elitosokwa ko ende Mungu Ɔmwitoto? 45Otangëke mbo Imi nd’atof’ino se oso wa Sango, ende ko Mɔsɛ oyatof’ino se, la osokɛsɛkɛ tɔɛli twanu ko end’inde kongo. 46Eya to mbo wimeläkä nde Mɔsɛ, ani osoimela Imi, eoka inde nd’asɔnɔ̈kɔ̈ loaso loami nda Kasa. 47¿Eya to mbo otiimele eyasonɔ̈kɔ̈ inde, ani ino koimela ebami baoi la moni?

বর্তমানে নির্বাচিত:

Yoane 5: NTKE58

হাইলাইট

কপি