Mateo 23

1Henyihaha Yesu bakwile kwi kibumbu kia bantu na kwi bana-be-ba-bukishi’shi: 2Bafundji-ba-Mikanda na Bafadiseo abashalā ha kishalelo kia Mosesa. 3Biabia bioso bia benulungula kukita, nwibikite, anka tanulondanga bikitshino biabo, mwanda’bo abākulā, anka tabakitā. 4Mwanda abānya bita bi bushito, bi bukoho ha kutwala; abebitulu ha mahampa a bantu, anka’bo (ba na bene) tabakyebe kwibisanyisha sunga na munwe wabo umune. 5Anka bikitshino biabo bioso biabakitshi mbia kutadibwa na bantu: abatamishā nfalakatele yabo, abatamishā namu masasala a bifwalwa biabo; 6abasehelā na mbalo yineme ha bidibwabia-kusehela, na bishalelo bia ku mpala mu bitumbwilo; 7na kwimunwa ku maboko mu bisalwe, na kutemunwa na bantu’shi: Labi, Labi, 8Anka’nwe tanukuminanga kwitaminwa bu Labi; mwanda umunenka nfumwenu nyi Kidisitu, n’anwe nwi bana ba muntu umune. 9Tanwitanyinanga muntu a ha nsenga bu nshenu; mwanda umune nshenu E mwiilu. 10Tanwitanyinanga namu bu banfumu, mwanda umune nfumwenu, E Kidisitu. 11Anka yawa mukile bukata munkatshi mwenu, ekale bu mufubi enu. 12Muntu oso aketumbisha e na mwinyi akaheleshwa; e namu akehelesha akatumbishibwa.

13Anka mpombo kwanudi Bafundji-ba-Mikanda, na Bafadiseo, bansesa! mwanda anushitshila bantu ku Bufumu bwa mwiilu: mwanda tanutwele mwanka anwe bana bene, na baba abakyebe kutwela mwanka anwibaheleshā. 14Mpombo kwanudi Bafundji-ba-Mikanda na Bafadiseo, bansesa! mwanda anufinā mashibo a bana bakashi-ba-bafwe, na kuteka nteko yila mwanda wa bunsesa bwenu: binyibiabia anukatambula kuhoneshibwa kukila bukata (ku kimu). 15Mpombo kwanudi Bafundji-ba-Mikanda, bansesa! mwanda anwifunyā hoso ha mema, na lia mahia, mwanda wa kwalula muntu’mune ku luhese lwenu, na hanubamwalula, anumwikasha bu mwan’a Ngehena mwinukile bubi misusa yibidi. 16Mpombo kwanudi, balomboshi ba bampofu, anwakula’shi: Ese atshihi ku ntempelo mutshiho’shi, kwi bu bisumanga; anka ese atshihi kilonda kia nsahabu kia mu ntempelo, e na kishio. 17Anwe balotakane na bampofu; a nkinyi kikile bukata, kilonda kia nsahabu’nyi, su ntempelo ayihatulusha selelee kilonda kia nsahabu. 18Ese namu atshihi ku kihayilo kia milambu’shi: ki bu bisumanga; anka ese atshihi mulambu utentekwe hanka, e bahīla ’mwanda. 19Anwe balotakane na bampofu: nkinyi kikile bukatā, mulambu’nyi, su kihayilo kia mulambu akihatulusha selelee mulambu? 20Binyibiabia ese muntu akatshihi kihayilo kia mulambu, biabia batshihila ku kia, mpaa na ku bitentekwe bioso bi hanka. 21Ese namu akatshihi ku ntempelo, batshihila ku’ya (ntempelo) mpaa, na yawa ashala mwanka. 22Yawa namu akatshihi kwiilu batshihila ku luhun’ānsulu lw’Efile-Mukulu, na kwi’wa ashalā hanka. 23Mpombo kwanudi Bafundji-ba-Mikanda na Bafadiseo, bansesa! mwanda anulambula ki’ekumi kia mutshi wa kyēnyēnyi, na kia luenyi, na kia kikotshi, anka nubalekye yaya myanda yikile bukata ya mukanda-wa-bishila’shi, kutshiba kwa myanda, na ya lusa, na ya lukuluhilo; yino’nyi yibadi yibenuhwandjikile kukitwa, na kushī kuleka yikwabo yishīyikitwe. 24Anwe balomboshi bampofu, anukakamina ha kumina keshi; ngamedia anumuhitumuna, 25Mpombo kwanudi Bafundji-ba-Mikanda na Bafadiseo, bansesa! mwanda anutoshā ha mbidi hasha ha kihulu na ha luanda, anka munda ’muule na bunyenanyi na kukishakisha (kwa myanda). 26(Obe) Mufadiseo mpofu, banda kutosha kwibedi munda mwa kihulu na mwa luanda’shi, hasha ha’bio mbitoshwe namu. 27Mpombo kwanudi Bafundji-ba-Mikanda na Bafadiseo, bansesa! mwanda nwi bahwandjikile bu mashama atoshwe soo, hanundu ahamweka buwa bukalabale, anka munda muule na mifufwa ya bafwe, na kushūla kwa bishila koso. 28Anka hamune anwe namu anumweka ku mpala kwa bantu bu balulame, anka munda mwenu ’muule ndaa na bunsesa na kushiula kwa bishila. 29Mpombo kwanudi Bafundji-ba-Mikanda na Bafadiseo, bansesa; mwanda anwibakisha bilele bia batemuki, anulengye mashama abalulame; 30anwakula namu’shi: Su tubekele mu mafuku a bashyetukulu, tatubadia kulombana n’abo ha mwanda wa mase a batemuki, ooo, 31Binyibiabia nwi tumonyi kwanudi anwe bana bene’shi; nwibana b’abāabayihayilabatemuki. 32Biabia nukumbashei kihimu kia bashenu. 33Anwe manyoka, na tunkwatamanwi twa manyoka, anwiuku na minyi mwa kuhanda ku kuhoneshibwa kwa Ngehena?

34Henyihaha nenutumina batemuki na basha binangu, na Bafundji-ba-Mikanda; bamo b’āba anukebayiha, na kwibahudika ku mutshi uhingakane; bangi namu anukebakuhila mu bitumbwilo bienu, na kwibamwesha malwa ku kibalo ku kibalo. 35Biabia mase oso abantu balulame abasumbukilwe hashi, afiki hanudi, kubanga ku mase a Abele badi mululame, mpaa na kufisha ku mase a Sakadiya mwan’a Balakiasa, winyi anubaihayile hankatshi ha ntempelo na kihayilo kia mulambu. 36Binyibinyi nenulungula’shi: Bino bioso abikafiki ha tunkwatamanwi tuno. 37A Yelusalema, Yelusalema, (obe) waihā batemuki, ōsā babakutumina mabwe, misusa yinga yinadia kukongola banab’obe, bu amukongwela nsolo bana be mushi mwa mbaba ye, anka’nwe tanwi bakyebele’nwe, ooo! 38Talai nshibo yenu yibenulekyelwa musadi. 39Mwand’ami nenulungula’shi: Tanuka’mono dimonyi mpaa n’ahanukākula’shi: Yaw’ā mwabi ngiuafiki mwishina dia Yehowa.

বর্তমানে নির্বাচিত:

Mateo 23: NTLK52

হাইলাইট

কপি