Yoane 3

Yesu na Nikodemo

1Okina moto adaka MoPalusi kombe ende Nikodemo, mosuku oBaYuda. 2Iyo adoa ai Yesu na bulu. Abala na nde bo, Mokoja, iso bojebaka bo wɛ odi mokoja yona odonga ai Njambe; mojɔ bo Njambe amiti da na moto, atahɔnɔ bokɔ bimbete bikɔkɔ wɛ. 3Yesu amosɔmbeja bo, Mbi natɔndɔkɔ wɛ na soti mɛnɛ bo, Moto amiti botama koko, atanɛ nongo Bokumu boNjambe. 4Nikodemo amohɔjɔ bo, Moto akamea mobange, adi bobotama koko na ye? Adi bokwea koko a sɔpɔ jingwa’nde bo amobote koko? 5Yesu amosɔmbeja bo, Soti mɛnɛ, mbi natɔndɔkɔ wɛ bo, Moto amiti botama na madiba na Mwembo, atakwea nongo a Bokumu boNjambe. 6Mini mibotaka oko mini, na Mwembo mobotaka oko mwembo. 7T’okamoe oko mojɔ bo nabali na wɛ bo, Toma botama koko. 8Pwea ehweaka a esika epalaka yo. Okaka daka emina; otajehaka ko esika ehulaka pwea, na esika ekɛkɛ yo. Moto na moto yona obotama na Mwembo adi boa. 9Nikodemo abala na nde bo, Imu mojɔ môda bo? 10Yesu amosɔmbeja bo, Wɛ odi mokoja oYisalaele, na otacingeaka mijɔ mimina? 11Mbi natɔndɔkɔ wɛ na soti mɛnɛ bo, Iso bobalaka oko mijɔ mijebaka so, na botataka tati emijɔ minɛkɛ so; ino ko olonakani tati esu. 12Adi no pɛ bojima mijɔ mingondo mibalaka mbi, odini bojima na ye, nakatɔndɔ no mijɔ miDiko? 13Pɛpɛ nongo moto okɛ oho Diko. Mwana ’Moto ko yona odi na ngando ende oho Diko, yo ahula Diko. 14Na Mwana ’Moto âbakeama diko, o abakea Mose njɔ diko a lisobe, 15bo moto na moto yona omojimeaka asɛ bomɔ bua bodi na bosusu.

16Mojɔ bo Njambe apalaka ngondo na ngɛnjɔ yeye; apa Mwana’nde obotama omɔci pɛ, bo moto na moto yona omojimeaka asɛ bomɔ bua bodi na bosusu. 17Mojɔ bo, Njambe ailoma Mwana’nde a ngondo a bosambeja ngondo; amoloma bo ngondo ehele na nde. 18Moto akamojimea, atasamba nongo. Moto amiti mojimea, yo asamba eyou, cina bo aijima kombe eMwana ’Njambe obotama omɔci. 19Esambi edi oko yeye; bohu bodoa a ngondo, na bato bapalaka gbo oko modidi, mojɔ bo bikɔmɛli bibu bidi bibe. 20Mojɔ bo, isa moto adi na ekɔmɛli ebe, abangaka bohu; t’amanake nongo a bohu, bo mijɔ minde misaka boloa. 21Moto ko yona odi na ekɔmɛli esoti amanaka a bohu, na anejaka bo bikɔmɛli binde bihulaka ai Njambe.

Tati eYoane a Mojɔ moYesu

22Yesu akɛ na bacingami bande ngɔngɔ a likota liYuda. Ayeyoa na bu oho, na abatisa bato. 23Yoane adaka a Ainona, hulelu na Salima, a ehole emina, na yo abatisaka bato pongono, mojɔ bo madiba madaka manɛnɛ a esika emina; na bato banɛnɛ badoa bo babatisame. 24Yoane aipaka kwea a blɔkɔ a ehole emina. 25Bacingami baYoane babanga boboma kitɛ na okina MoYuda a ehole emina, a mojɔ moekɔmɛli ebosasɛnoja. 26Badoa ai Yoane, babala na nde bo, Mokoja, moto yona odaka na wɛ a dɔngɔ ditongo diYoladene abatisaka bato edɛye, na bato basusu bakɛkɛ oko ai yo; wɛ mɛnɛ omojima pongono na tati ewɛ. 27Yoane asɔmbeja bo, Moto amiti sɔ epeeli eDiko, atasɔ nongo eka. 28Ojebakani no bɛnɛ bo tati embi edaka bo, Mbi naditi Masiya; nalomami oko boso bonde. 29Edi oko momi obolongana yona osɔkɔ mwali. Mina’nde momi ko asepaka a boka ebaeli ende, na adi bo’ma mema bo amohokee. Sepi embi edi oko boa; edi enɛnɛ mɛnɛ. 30Iyo adi bohɛ monɛnɛ, mbi ko nadi botita.

Mwana ’Njambe

31Iyona odonga oho Diko anɔi bato basusu. Moto ongondo acingi oko na ngondo, na abalaka mijɔ mingondo. Iyona odonga oho Diko anɔi bato basusu mɛnɛ. 32Iyo anejaka oko ngando jinɛ yo na jika yo; pɛpɛ nongo moto ko ojimaka tati ende. 33Iyona ojimaka tati ende angamejaka mojɔ mu, bo Njambe adi soti. 34Mojɔ bo yona olomama na Njambe abalaka oko bikenge biNjambe, cina bo yo t’angɛke mwɛngi yana apaka yo Mwembo. 35Sango adi na ngɛnjɔ ai Mwana, na akina mijɔ misusu a mɔmɔ mande. 36Iyona ojimeaka Mwana adi na bomɔ na bosusu. Iyona ko olonaka bojimea Mwana atanɛ nongo bomɔ, na kɛnjɔ eNjambe edi oko ai yo.

বর্তমানে নির্বাচিত:

Yoane 3: NTNG61

হাইলাইট

কপি