Yoane 1

1Ebaeli edaka kanga a bobanga mɛnɛ. Ebaeli edaka na Njambe. Ebaeli edaka Njambe. 2Iyo adaka na Njambe a bobanga mɛnɛ. 3Iyo akɔ leka losusu boya. Pɛpɛ nongo eka emɔci edi, yena edi yo pɛ bokɔ. 4Bomɔ bodaka a tei ende, na bomɔ bomina bodaka bohu bobato. 5Bohu bohoa a tei emodidi na modidi moigbokeja bohu.

6Njambe aloma moto, kombe ende Yoane. 7Iyo adoa bo adae motati, a bojebeja bato a mojɔ mobohu, bo bato basusu badi bojima oko na nde. 8Iyo mɛnɛ aidaka bohu bomina. Adoa oko bo adae motati obohu. 9Bohu bomina bodaka bohu bosoti, na bodoa a ngondo a bopa bato basusu bohu. 10Iyo adaka a ngondo, oko ngondo ekɔ yo; ngondo ko eimojeba. 11Adoa a ngando ende mɛnɛ; bato bande mɛnɛ ko baimosɔ. 12Ibaya ko bamosɔ, oko baya bamojimeaka, yo abapa kpaci bo badae bana baNjambe. 13Ibo baibotama nongo na makia, isa na bolulea bomokuku, isa na bolulea bomoto; babotama oko na Njambe.

14Ebaeli ekindoa moto, na yo ayeyoa a tei esu; aluma na monganji na Soti. Iso bonɛ ekumu ende, ekumu eMwana-sɔmi omɔci yona odonga ai Sango. 15Yoane adaka motati onde. Iyo abala a mojɔ monde bo, Yana abala mbi bo, Iyona okɛkɛ adoe ngɔngɔ jimbi anɔi mbi, mojɔ bo yo adaka oko mbi napetakini da,—edi oko yo. 16Iso basusu bosɔkɔ monganji monde, monganji oko na bonɛtɔ. 17Mibeko mibakeama oko na Mose. Yesu Masiya ko adoa na monganji na Soti. 18Pɛpɛ nongo moto onɛ Njambe; Mwana-sɔmi omɔci ko yona odi a bupa boSango amobolojai ai so.

Tati eYoane

19Tati eYoane edi yeye. BaYuda baYelusalema baloma bakina nganga na BaLewi ai yo na lihɔjɔ bo, Wɛ odi nda? 20Yoane ajima, pɛ nongo bongana; ajima oko bo aditi Masiya. 21Oko boa, bamohɔjɔ bo, Odi ko nda? Odi Elia? Iyo abala bo, Naditi nongo yo. Bamohɔjɔ koko bo, Odi motɔndɔi yona? Iyo asɔmbeja bo, Pɛpɛ. 22Oko boa babala na nde bo, Odi nda? Jebeja so a mojɔ mowɛ mɛnɛ, bo botɔndɔe bato baya balomi so. 23Yoane abala bo, Mbi nadi,

Kɔpi emoto yona obekoaka a esika bo,

Tangbojani njea eKumu;

O abala motɔndɔi Yisaya.

24Bakina baya balomama ai yo badaka BaPalusi. 25Ibo bamohɔjɔ bo, Isa oditi Masiya, na oditi Elia, na oditi motɔndɔi, #1.25 obokeaka odindejaka.obatisaka mojɔ moye? 26Yoane abasɔmbeja bo, Mbi nabatisaka a madiba; okina ko adi a tei enu na otamojebakani. 27Iyo akɛkɛ adoe ngɔngɔ jimbi, na mbi nabɔngiti bo nacingoe mokɔli mosapata jinde. 28Mojɔ mu modaka a Betania, a dɔngɔ ditongo diYoladene, a esika ebatisaka Yoane.

29Yana ahoa busa, Yoane anɛ Yesu akadoe ai yo, na abekoa bo, Anjani Mwana-Bata oNjambe yona odongejaka bobe bongondo! 30Yana abalabi mbi bo, Okina moto akɛkɛ adoe ngɔngɔ jimbi yona odi boso bombi, mojɔ bo yo adaka oko mbi nadakini, nabalabi oko a mojo monde. 31Mbi mɛnɛ naimojebaka; endele ko mbi nadoi bo namobolojae ai Yisalaele oko na batisimo a madiba. 32Na Yoane atɔndɔ koko bo, Mbi nani Mwembo mokadonge oho Diko o ekɔmɛli esungu, na mobakami ai yo. 33Mbi naimojebaka mbi mɛnɛ; yona olomani ko bo nabatise a madiba, abala na mbi bo, Okanɛ Mwembo mokatite na mokabakame ai moto, edi oko yo yona abatisaka a Mwembo Mosɛnɔke. 34Mbi namoni mbi mɛnɛ, na natɔndɔkɔ na soti bo Iyo adi Mwana ’Njambe.

Bacigami Baboso

35Ahoa koko busa, Yoane adaka ami na bacingami bande babae. 36Iyo anɛ Yesu akadale, na abala bo, Anjani Mwana-Bata oNjambe! 37Bacingami ba babae baka bikenge bibala Yoane, na bakimana Yesu. 38Yesu ahekoa, na anɛ bo bacingi ngɔngɔ jinde. Abala na bu bo, Epalaka no nde? Bamosɔmbeja bo, Labi, (cina emina edi Mokoja) osamaka jɔ? 39Iyo abala na bu bo, Doani okanjeni. Oko boa bakɛ, na banɛ esika edaka yo; na badika na nde busa bomina, mojɔ bo edaka isa quatre heures na dea. 40Andalea, mwanange ’Simona Pɛtɛlo, adaka okina obu babae baya baka ebaeli eYoane na bakimana Yesu. 41Iyo akɛ nduki emwangwa ’nde Simona bokpa, na abala na nde bo, Iso bobolojai Masiya (cina emina edi Klisto). 42Adoa na nde ai Yesu. Yesu amonja, na abala na nde bo, Wɛ odi Simona, mwana oJona. Kombe ewɛ êda Kepa (cina emina edi Pɛtɛlo—Litai).

43Ahoa koko busa, Yesu adaka na mokano a bokɛ a Galile. Atana Pilipo, na abala na nde bo, Cingama na mbi. 44Pilipo adaka moto oBetesaida, ngando eAndalea na Pɛtɛlo. 45Pilipo aduka Natanaele, na abala na nde bo, Mose asɔnɔ a Mibeko, na batɔndɔi basɔnɔ pongono, a mojɔ mookina moto; iso bomobolojai, oko Yesu oNasaleta, mwana oYosepa. 46Natanaele amosɔmbeja bo, Ekina eka epele edi bomana a Nasaleta? Pilipo abala na nde bo, Doa okanje 47Yesu anɛ Natanaele akadoe ai yo, na abala a mojɔ monde bo, Anjani MoYisalaele osoti! Poloso editi nongo a tei ende. 48Natanaele abala na nde bo, Wɛ ojebi mbi na ye? Yesu amosɔmbeja bo, Mbi nanɛki wɛ yana adaki wɛ a cine elikɔkɔ, yana adaki Pilipo pɛ bopeta bea wɛ. 49Natanaele amosɔmbeja bo, Labi, wɛ odi Mwana oNjambe. Odi Kumu oYisalaele. 50Yesu abala na nde bo, Ojimaka mojɔ bo natɔndɔi wɛ bo nani wɛ a cina elikɔkɔ? Odi bonɛ ngando jia jinɔi jiji. 51Abala na nde koko bo, Soti mɛnɛ, mbi natɔndɔkɔ no bo ônɛni Diko bwase, na babwɛnji-baDiko bakawee na bakatite a diko diMwana ’Moto.

বর্তমানে নির্বাচিত:

Yoane 1: NTNG61

হাইলাইট

কপি