Zɛnɛse 17
17
Núu seɛɛ kpono-mɛi ƃa Gbanaŋ-wooi maa ŋɛi-kɛ-maai
1Tãi Eberaŋ è kɛ̀ la a kóraŋ buu lɔ́ɔlu mɛi náaŋ káo lɔ́ɔlu mɛi náaŋ, Yâwɛɛ è pà bɔ́ ǹyɛɛ mai, “Ńyãa ƃa Ŋ̀wála-wâla kélee Ɣalai. Ŋ́oo mɛni ítûa a zãa ŋɛ́i-túɛ. Í kɛ́ a núu sãa. Ísɔŋ fé kɛ̀ yâ. 2Ŋa pâi kpanaŋ-woo kɛ̂i kwa yá kúloai, ǹyaŋ ŋa pâi ísuui su kɛ̂tɛi.” 3Nya ƃe Eberaŋ è pɛ̀lɛ ǹɔii ma Ɣâla ǹyɛɛ mai, 4“Ŋákpanaŋ-wooi káa íyêei. Ƃa pâi kɛ̂i a lɔii-ŋuŋ támaa ǹâŋ. 5Ílaa fé ŋɔ́nɔ pâi kɛ̂i a Eberaŋ. Kɛ́lɛ ílaa a pâi kɛ̂i a Eberaɣɛ̃ɛ. Kpɛ́ni fêi, ŋa íkɛ a lɔii-ŋuŋ támaa ǹâŋ. 6Ŋa pâi íƃûu ƃôi a ŋánaa. Lɔii-ŋuŋ támaa da pâi kúlai ísuui su. Kâloŋ támaa dí kúla íkponôi.
7“Ŋákpanaŋ-wooi a pâi kɛ̂i kwa yá kúloai. A pâi máŋ kɛ̂i kúloai kwa ísuui nyii pâi lɛ̀ɛi ípôlui da díwɔ suui wɔlɔ-wɔlɔ da wɔlɔ-wɔlɔ. Ŋa pâi kɛ̂i a Íɣâla da ísuui nyii pâi lɛ̀ɛi ípôlui Ŋɔɣâla. 8Ŋ̀ɔ̃ya lɔii ŋí íkaa mai, nyii gáa a Keena lɔii kéleei, ŋa pâi dɛ̂ɛi ípɔ, ŋá dɛ́ɛ ísuui pɔ́ nyii pâi lɛ̀ɛi ípôlui. A pâi kɛ̂i a kápɔɔ wɔlɔ-wɔlɔ da wɔlɔ-wɔlɔ. Ǹyaŋ ŋa pâi kɛ̂i a Díɣâla.”
9Nya ƃe Ɣâla è mò Eberaɣɛ̃ɛ ma ǹyɛɛi, “A kɛ̀ a yá, ƃa pâi ŋákpanaŋ-wooi ŋaa-see kɛ̂i. Ísuui é ŋaa-see kɛ́ ípôlu ma, é seri dísuui kóyaŋ ma. 10Ŋákpanaŋ-wooi ká nyii fɛ̂ɛ é lɛ́ɛ íkili ŋá kwa yá kúloai da ísuui nyii pâi lɛ̀ɛi ípôlu mai. Fɛ̂ɛ dí zinâai kélee sée kpono-mɛi. 11Ǹyaŋ nyíŋi a pâi kɛ̂i a gbanaŋ-wooi maa ŋɛi-kɛ-maa nyii gáa kwa yá kúloai. 12Surɔ̂ŋ-loo kélee da maa sɔlɔ ƃô kásuui sui fɛ̂ɛ dí zee kpono-mɛi tãi a kɛ̀ la a fólo lɔ́ɔlu mɛi saaƃa, maa sɔlɔ ƃoɔɔ pôlu mà. Kpaa máŋ a kɛ̀ dí ǹyá a sɛŋ-kao ŋɔ̃ya yêei nyii vé kásuui sui, fɛ̂ɛ nɔ́ dízee kpono-mɛi. 13Zurɔ̂ŋ-looi kélee da maa sɔlɔ ƃô kápɛrɛi mu kpaa máŋ ká ǹyá a sɛŋ-kaoi, fɛ̂ɛ dí dísee kpono-mɛi. Mɛni ma ŋákpanaŋ-wooi a pâi kɛ̂i káyêei a wɔlɔ-wɔlɔ da wɔlɔ-wɔlɔ kpanaŋ-woo. 14Surɔ̂ŋ kélee vé kpɛtɛ níi, da pâi gulâi ŋɔnûai sáma, kpɛ́ni fêi, vé ŋákpanaŋ-woo ŋaa-see kɛ́ ní.”
15Nya ƃe Ɣâla è mò Eberaɣɛ̃ɛ ma ǹyɛɛi, “A kɛ̀ a ínɛnîi Serai, ífe ŋɔ́nɔ dòli a Serai, kɛ́lɛ ǹáa a pâi kɛ̂i a Seera. 16Ŋa pâi lûwa lâai mà, ŋá lóŋ-surɔ̂ŋ tɛ́ɛ bɔ́ naa pôlu ma. Ŋa pâi lûwa lâai ma. Ǹyaŋ a pâi kɛ̂i a lɔii-ŋuŋ támaa ǹee. Kâloŋ támaa dí kúla gbonôi.”
17Nya ƃe Eberaɣɛ̃ɛ è ŋuŋ ma pìlaŋ é ɣɛ́lɛ é mó goi-pere, ǹyɛɛi, “Kóraŋ ŋuŋ tɔnɔ (100) kpakolo a pɔ̂ri lóŋ maa sɔlɔ ƃôi? Seera nyii gáa a kóraŋ buu lɔ́ɔlu mɛi náaŋ, a pɔ̂ri lóŋ maa sɔlɔ ƃôi?” 18Eberaɣɛ̃ɛ è mò Ɣâla ma ǹyɛɛ, “Tɔɔ Isimai é kɛ́ a ŋ́gɔ̃liŋ nâmu.”
19Kɛ́lɛ Ɣâla è mò ma ǹyɛɛi, “Kpaa. Kɛ́lɛ ínɛnîi Seera a pâi lóŋ-surɔ̂ŋ maa sɔlɔ ƃôi. Ǹáa sée a Aise (zu-kulai ƃa a ɣɛ́lɛ). Ŋa pâi ŋákpanaŋ-wooi kɛ̂i ǹyêei, nyii pâi kɛ̂i a wɔlɔ-wɔlɔ kpanaŋ-woo kwa ŋɔsuui nyii pâi lɛ̀ɛi bôlu mai kúloai. 20À kɛ̀ a Isimai, ŋá íwoo mɛ̀ni m̀ɛni ma. Gáa, ŋa pâi lûwa láai ma, é ƃûu ƃó, ŋɔsuui su é kɛ́tɛ. A pâi kɛ̂i a kâloŋ puu káo feerɛ ǹâŋ. Ǹyaŋ ŋa pâi gɛ̂i a lɔii-ŋuŋ kɛ́tɛ mɛi-nuu. 21Kɛ́lɛ ŋa pâi ŋákpanaŋ-woo kɛ̂i Aise yêei, nyii Seera a pâi maa sɔlɔ ƃôi yɛ̂ a góraŋ tí ŋɔtãi kɛ́ɛ ŋíi.” 22Tãi Ɣâla è kpɛ̀ɛ la a lónoɔɔ Eberaɣɛ̃ɛ pɔ́i, Ɣâla è lì.
23Nya ƃe Eberaɣɛ̃ɛ è ǹóŋ Isimai sìɣe da ǹúɛ-ŋai kélee dí dímaa sɔlɔ ƃô ŋɔpɛ́rɛi mui é pɛ́lɛ nyii-ŋai dîa è díyâ a sɛŋ-kaoi, da zinâa-nɛyâai kélee kɛ̀ ŋɔpɛ́rɛi mui, é dísee kpono-mɛi a maa ɣelei tí yɛ̂ɛ berei Ɣâla è mò la mai. 24Eberaɣɛ̃ɛ è kɛ̀ a kóraŋ buu lɔ́ɔlu mɛi náaŋ káo lɔ́ɔlu mɛi náaŋ dí lɛ́ɛ zeei kpono-mɛi. 25Ǹóŋ Isimai è kɛ̀ a kóraŋ puu káo saaƃa dí lɛ́ɛ zeei kpono-mɛi. 26Maa ɣele tɔnɔi tí dí Eberaɣɛ̃ɛ da ǹóŋ Isimai dísee kpono-mɛi. 27Dí dísee kpono-mɛi da ŋɔpɛ́rɛi mu-sinaai kélee é pɛ́lɛ nyii-ŋai dîa dí dímaa sɔlɔ ƃô ŋɔpɛ́rɛi mui da nyii-ŋai è díyà a sɛŋ-kao ŋɔ̃ya-ŋa yêei.
বর্তমানে নির্বাচিত:
Zɛnɛse 17: KWB
হাইলাইট
শেয়ার
কপি
Want to have your highlights saved across all your devices? Sign up or sign in
