LUKI 24

Ziizɛ wu‐ziɣi ʋai saa ya

1Tei sa é ɣɛni ga Laali ʋolo subu‐zubu, ŋazaitiɛ te liini kabai la. Te liini ga gulu yiɛ wũ‐nɛɛ‐nɛɛgi na te maʋaa ɣavele ƃɛtɛni. 2Te wɛlɛni kwɔtii va kili‐kiligɛi é ziɣi kaba yeɣei la. 3Kɛ̀ tei te lɔɔni kaba yeɣei zu, tɛ lɛ wɛlɛni de maliɣii Ziizɛ mawomai va. 4Tei dɛ nɔ te ɣɛni pɔ̃ɔ é vile fai nii va, zunu felegɔ vaani te lo te woba seɣei é ɣɛ te ma gwala yiɛ ʋolo pani‐pani. 5Ŋazaitiɛ te ɣɛi ma sa luozu te vɛɛni zuwãvɛ, zinaitiɛ te ɣɛni te ma, “Zɛƃɛi é kɛɛ wo ʋulu nui ɣaa ziɛzu pomaa zaama? 6Ɛ́ lɛ vɛ. É wu ziɣia saa ya. A ɣi zɛ su ga velei é boni la wiɛ kɛ́i ma dɛ Geealali. 7Na ɣa ga kɛni ta nu ƃuse lui yee la faa yowũ‐ɣɛɛ vea ya te kpako gului ma é wu ziɣi saa ya ga foloi sava kelei.” 8Natiɛ wɔ te ɣi ge looni sa Ziizɛ woitiɛ zu. 9Tei sa te ziɣini kabai la te gale ma te li, te fai niitiɛ ɣaazɔ zu wuloni kala dopo puugɔ kai ɣilagi ma é vɛɛ nui matai zɔitiɛ ɣaazɔ va. 10Ŋazaitiɛ ƃɔɔ te ɣɛni ga Meele Mɛdaliini, Jowana, ta Jĩi dee Meele, ŋazai zɔitiɛ te vɛɛ sa te va. Ta ɣa te fai nii woni Ziizɛ na keelaitiɛ ma. 11Kɛ̀ woi niitiɛ te maʋaa wuloai ɣɛ nɔ te ɣaazu ga kwele. Tɛ lɛ ŋɛni siɣini ga gaama. 12Kɛ̀ Pite wu ziɣini é ƃize é li kaba laavɛ. Tei é maa vɛɛni yíɛ wɛlɛ kaba yeɣei zu va, é wɛlɛni gbazagi va ŋɛni ta ƃɔnɔ gɛ lɛ ŋɛni na. É liini sa wulu wɔ pɛlɛ wu, fai nii é ɣɛɛni piligɛi ma ga ki‐gaa‐ziɛ.

Ziizɛ ƃɔɛni pulu ʋea felegɔ wɔ Ɛmeea ʋelei ma

13Ʋoloi ƃɔɔƃɔɔgi Ziizɛ wu ziɣini la saa ya, pulu veaitiɛ felegɔ te ɣɛni liizu taa ta zu daa ga Ɛmeea. É ziɣi Yɛlusulɛɛ é li na ɔ́ zoo é ɣɛ ga ɣalava saagɔ ziɛ‐wo‐su. 14Te ɣɛni ɣɛpɛzu ɣii wɔ é vile fai ɣaazɔ va é ɣɛɛni. 15Tei te ɣɛni yɛpɛzu tiɛ wuu‐zu ʋaa wo ɣiini ma, Ziizɛ tɔ ɣagi lɔtɔni te va ta tiɛni te li sa. 16Kɛ̀ te ɣaazu laa wulugɛi ɣɛ ga te gaa ɣa ga Ziizɛ ve. 17Ziizɛ ɣɛ te ma, “Zɛƃɛ yɛpɛ ɣa ga nii wo puuzu wiɛ li?” Te lo sa kpɛ te ɣaazu maa wõiyai. 18Te ɣilagi nii daa ɣɛ ga Keliɛpɛ é gaa woteni é ɣɛ ma,“? Yà ɣilekpu nɔ ɣa è ga wɛ̃ɛ nii é Yɛlusulɛɛ ɛ́ lɛ faitiɛ wɛ̃ni te ɣɛɛ siɛgi nii zu?” 19Ziizɛ ɣɛ te ma, “Fai zɛƃɛni?” Te ɣɛ ma, “Faitiɛ te vilegɛi Nazɔi Yiizɛ va nii é ɣɛni ga Gala daa woo‐wo nu zée zu ƃai Gala gaazu ta numaitiɛ ɣaazɔ kɛ́ɛ ʋaitiɛ zu ta dáa woi. 20Na ɣa ga velei da laa‐ʋaale gwalaitiɛ ƃɔga de maazu veaitiɛ te tevega la ga saa ʋai yɛ ma te kpako sa pɛɛ‐pulu wulu likpii ma. 21Kɛ̀ gé ɣi kɛɛvɛ ba ga towa é vaazu Yezɔitiɛ wũ maa wosu. Na pɛ ka wulo na ba, fai nii ɣɛi ma maʋoloi sava kelei ɣa sa. 22Tɔwɔ ŋazaitiɛ taniga te gé zaama te faa ta woga gíɛ é gé ɣaazu laa ʋe. Te ɣɛɛvɛ kabai la ga zubu‐zubu. 23Tɔwɔ tɛ lɛ wɛlɛni Ziizɛ mawomai va. Na ɣa ɣɛɛ na te vaani wulu tiɛ bo ga ná wuuni te ɣaazu te wɛlɛ Gala ta ɣeelaa va natiɛ tiɛ bo te ma ga Ziizɛ yɛʋui ɣa zéea. 24Taitiɛ gá tiɛni gé ɣɛni ŋada ɣila te taniga te liini kabai la te wɛlɛ na va. Nii ŋazaitiɛ te boni tɔ nɔ ɣa te pɛtɛni su. Kɛ̀ tɛ lɛ Ziizɛ vɛtɛni.” 25É ɣɛ te ma, “Ee! Wa ʋaa ɣaa ɣaazu ƃaavɛ! Nii Gala daa woo‐wo beaitiɛ te boga siɣizu ƃaavɛ wiɛ ga gaama! 26?Ɛ́ lɛ ŋɛni ga fai é pele ma ga Kolai laa nɔwɔ wo ŋɛ na, na ɣa ɣɛɛ na é lɛ ná bɔɔlɔlai maazu?” 27Tɔɔ zei ƃɔɔ Mooze va é li sa Gala daa woo‐wo beaitiɛ ɣaazɔ wɔ, nii nɛpɛ te boni Gala kɔlɔi ɣaazɔ zu é vile tɔ ɣagi va, é te pɛ su‐wulo‐zuvɛ lɛɛni ga tiɛ.

28Te lɔtɔni sa tai na va te ɣɛni liizu su. Ziizɛ ƃɔɔ ʋaa wulo ga yá ɣɛ vaazu liizu ga yee luo vele. 29Kɛ̀ te maa nɛɛnɛni tiɛ ɣɛ ma, “A de ŋii vɛ, ƃɔvɛlaale kpɔkɔ ɣa sa ziitizu, foloi wala liai sa.” Na ma é lɛɛni pɛlɛi wu ga ta tiɛni te ŋii na. 30Tei ta tiɛni te ɣɛni laa miizu, é kpoolo‐ʋɔi ziɣini é Gala feli é su ɣale‐ɣale é fe te ya. 31Te ɣaazu ziɣi sa ma te kwɛ̃ɛ ga tɔ ve. Tɔwɔ é yɛ̃ɛlɛ sa te ɣaazu. 32Te ɣɛni ɣii ma, “Kɛ̀bɛ de ɣi daa ɣɛni wodozu tei é ɣɛni ƃɔɛzu de wɔ pelei ma yíɛ Gala kɔlɔi zu ʋai veli de ma, kɛlɛi?” 33Te wu ziɣi sa nɔ na maziɛgi zu te li wulu Yɛlusulɛɛ. Te wɛlɛni kala dopo puugɔ kai ɣilagi va te ɣaa lɛi ba ŋada ɣila é vɛɛ zɔitiɛ va ta tiɛni te ɣɛni na. 34Natiɛ te ɣɛ te ma, “De maliɣii wu ziɣia ga ƃɔɔƃɔɔ su! É wuloa Saimɔ ɣaazu!” 35Nii sa é ɣɛɛni ga tiɛ pelei ma te bo te ma ta velei Ziizɛ maʋaa ɣaa wodoni la ga tiɛ kpooloi zu‐ɣale‐ɣale pele ma bɛ́.

Ziizɛ wuloni ná kala dopoitiɛ ɣaazu

36Tei sa te ɣɛni fai nii wosu, Ziizɛ tɔ ɣagi é vaani é lo te zaama. É ɣɛ te ma, “Zii‐laa ɣa ɣɛ wo ya fãa.” 37Kɛ̀ te zu ƃɛdɛni te va tiɛ luo tiɛ ka ga gɔʋɛ ɣa te pɛtɛga. 38Ziizɛ wɔ ge ɣɛni te ma, “Zɛƃɛi é kɛɛ wo yii yiɛ wo lowa? Zɛƃɛi é kɛɛ sakpe giɛ vili wo yiitiɛ zu? 39A wɛlɛ zèetiɛ va ta kɔ̀wɔitiɛ wo gaa ɣa ga nà ƃɔwɔi nà ve. A ʋowũ bà wo kwɛ̃ɛ. Toku ge zei ga gɔʋɛ mazuo lɛ ma ɔ́ nɔ ɣɛ ga maɣai ɣɛ su ga velei wo pɛ̀tɛsu la màzuo mà màɣai sù. 40Tei sa é nii woni, é yeetiɛ lɛɛni ga tiɛ ta kɔwɔitiɛ. 41Tɔwɔ tei ƃɔɔ nɔ tɛ lɛ ŋɛni siɣi vele ɣaazu ga gaama kuu‐zu‐nɛɛ vɛ piligɛi te ma ga ki‐gaa‐ziɛ, Ziizɛ ɣɛni te ma,“? Ŋɛni ta nɛpɛ ka wo ya vɛ ga nu mi?” 42Te feza‐mɔ maƃuo ʋeeni zéea. 43Tɔwɔ é siɣi sa é mi te ɣaazu ma.

44É ɣɛ sa te ma, “Gòitiɛ ɣa gè te woni wo ma kɛ̀i ma wo woba. Na ɣa ga niitiɛ te wonɛi Gala kɔlɔi zu é vile bà kɛni ta leve ma. Natiɛ ta ga Mooze na tɔgi, Gala daa woo‐wo beaitiɛ woi é vɛɛ Gala daa‐maa‐lɛɛ wui zu woi va.” 45É te ɣi daa wodoni sa na mavele ma ga te Gala kɔlɔi zu woitiɛ ɣaa ɣa. 46É ɣɛ sa te ma, “Vele ɣa ponɛi la. Na ɣa ga nui Gala zee ƃakogɛi ba ga é ɣɛ ga masa, na ɣa ga Kolai, kɛni é laa nɔwɔ wo. Na ɣa ɣɛɛ na é wu ziɣi saa ya foloi sava kelei ma. 47Na ɣa ɣɛɛ na nu wulu‐ɣaa‐ʋe fai faa yowũ zu‐ʋaa‐yɛ fai, kɛni te ma Ɣala goi ɣa wo zii pɛ ma ná daa‐zeigi zu. Tɔɔ ɣa zei Yɛlusulɛɛ é yɛsu é lii la. 48Wa ga fai niitiɛ te mazeelea. 49A wɛlɛ! Nii kèea é wo ɣi toga la gà tevesu wo wɔ vɛ. Kɛ̀ a yɛ Yɛlusulɛɛ lai zu é yɛsu gaa‐ƃai é wulozu wo wũ maazu é yii wo ma ga yogbo.”

Gala ge lɛɛni ga Ziizɛ gee‐zuʋɛ

50Ziizɛ loni te luo é yɛsu ƃɔɔ te ziiti Bɛtani. É yeetiɛ lɛ sa gee zu é tuuyiɛ loo te ma. 51Kɛ́i ma sa tuuyiɛi loozu te ma, é ziɣini te woba Gala ge lɛɛ la gee‐zuvɛ. 52Te vɛɛni kɔwɔ wu. Te li sa wulu Yɛlusulɛɛ ga kuu‐zu‐nɛɛ ƃakpa wala. 53Te ɣɛni Gala‐feli wɔta walai wu wɔ tiɛ Gala daa maa lɛ.

বর্তমানে নির্বাচিত:

LUKI 24: DN1971

হাইলাইট

কপি