LUKI 18

Sakpegi é ʋile po ŋazai ʋa ta faa‐wo‐bo nui

1Ziizɛ sakpe sɔɔni ga é dɛ ga numaitiɛ ga kɛni ta yɛ Gala felizu wɔ te ʋii mɛ lɛ ƃɛ. 2É ɣɛni tea, “Faa‐wo‐bo nu ɣɛni taa ta zu nii ɛ́ lɛ ƃega luo Gala ba ɔ́ nɔ ɣɛ ga wũfe‐ma ɣɛ zéea nu ʋaa ma. 3Tɔwɔ po ŋaza ta ɣɛni tai na zu nii zini gɛ lɛ ŋɛni bɛ́. Po ŋazai nii vɛɛni ga vaa pɔ́ nɔ kelẽi yíɛ ɣɛ ma, ‘Nui nii kpɔɛi gé yɔɔzu gá tɔ, kɛ fai ziɣi mà é yɛ má.’ 4Faa‐wo‐bo nui sakpeni dɛ ga ta wolo zu wooza. Kɛ̀ é boni ɣigi zu ga ná yee luo vele é ɣɛ tea, ‘Velei ƃalaa gɛ̀ lɛ lua la Gala ba ɔ́ nɔ ɣɛ ga gè wũfe nu ma, 5tei tɔwɔ po ŋazai nii ƃoeizu dà, gà fai ziɣizu bá. Na laale tɔ vaazu gwàla ƃɔlɔzu ga páa vele pɔ̀ nɔ kelẽi.’ ” 6De maliɣii ɣɛnii tea, “A nii mɛni tele‐bo tuo‐wo tala ʋaa‐wo‐bo nui boni. 7?Nà mu ka é ɣɛɛzu, Gala ka ɛ́ lɛ fai ziɣia niitiɛ va é yee ƃakoga te va, na ɣa ga niitiɛ ta ɣɛ wɔlɔzu ma kpidi vɛɛ folo va? ?Towaa fai nii ɣɛɛ ʋai maa nɛkɛ? 8Gè bo wiɛ, towaa faa ziɣi te va ga su ʋilea.? Nà pɛ ge ɣɛɛvɛ, ani nu ƃuse lui ɣa vaa na, towaa wɛlɛ zee‐la‐ma va numaa ya zui ɣa?”

Sakpegi é vile Favilesii va ta gɔmɛti naʋolo‐wulo nui

9Ziizɛ sakpegi nii zɔɔni nui taniga ma niitiɛ te laani ga ƃɔɔ ga ta ga tele‐bo tuo‐wo bea te ɣaazu wudɛ sa zɔitiɛ maazu. É ɣɛni tea, 10“Nu felegɔ liini Gala‐feli wɔta walai wu Gala felizu. Gila ge ɣɛni ga Favilesi, gilagi ga gɔmɛti naʋolo‐wulo nu. 11Favilesii wu ziɣini é lo yíɛ Gala feli ŋɛ ni ɣigi zu yíɛ ɣɛ tea, ‘Gala, è mama ga tei gɛ̀ lɛ wuloni ga numai zɔitiɛ te ga woia bea, tele‐bo tala vea, wɛ̃ɛ‐ziɛ‐bo bea, ɔɔ velei ƃalaa kani‐kulo nui nii la. 12Gà vilida ɣɛ zi su fele dɔwɔ zu. Ŋɛnii nɛpɛ gà sɔlɔ wo gà gaa wɛɛ su puu gè sei‐zu gila fe è ya.’ 13Kɛ̀ gɔmɛti naʋolo‐wulo nui ɣɛni loni woozala. Ɛ́ lɛ ƃega ɣaazu lɛ ʋɔlɔ ƃalaa gee zu, kɛ̀ é yee vɛɛni yii ma yíɛ ɣɛ tea, ‘Gala, gàazu‐maa‐wõi ɣa, gà ga faa yowũ‐ɣɛɛ nu.’ 14Gè bo wiɛ, nui nii mu ka é liini wɔ pɛlɛ wu maa wuai, kɛ̀ zɔi laale. Ƃɔvɛlaale nui nɛpɛ yá ƃɔɔ ʋaa wɔɔlɔ, manui ɣa yii bu. Nui nɛpɛ ɛ́ lɛ ƃɔɔ ʋaa wɔɔlɔɔ, manui ɣa wɔɔlɔ.”

Ziizɛ tuuyiɛ looni lopaa woloitiɛ ma

15Numaitiɛ te ɣɛni vaazu ga duuyɛ̃ga ƃalaa pɛ ga Ziizɛ yee ʋowũ te va. Tei ná kala dopoitiɛ te wɛlɛni na va, te yii ɣaa wãlani te ma. 16Kɛ̀ Ziizɛ te lilini ga te li pɔ́ vɛ yíɛ ɣɛ tea, “A ƃe lopaitiɛ va te va wo mɛ lɛ ƃesa te luo. Ƃɔvɛlaale te ɣavelei ɣa Gala na masadai te ʋaa ma. 17Gè bo wiɛ ga gaama, nui nɛpɛ ɛ́ lɛ yee zeiya Gala na masadai wu ga velei lopo wolo ɣa kɛɛ la, manui lɛ wɔlɔ‐wɔlɔ lɛɛ na.”

Kpɛtɛ nui

18Maazu‐ʋaa‐wo‐bo nu ta Ziizɛ ɣaa zaɣa kɛɛni é ɣɛ ma, “Kala‐mɔɔ vagɔi, zɛƃɛ ɣa gà kɛ gè zɛʋui nii zɔlɔ wo kwɛ̃ɛ gɛ lɛ ba?” 19Ziizɛ ɣɛ ma, “Zɛƃɛi é kɛɛ yìɛ tìli ga nu vagɔ? Nu ta nɛpɛ gɛ lɛ ga nu vagɔ é wulo Gala tɔ ɣilekpu pulu. 20È Gala na tɔgitiɛ wɛ̃ni. Natiɛ ta ga: Yài è ga ŋaza keea nu ɔɔ yài è ga zini‐bɛ nu, mɛ lɛ wɛ̃ɛ zo. Mɛ lɛ nu vaa. Mɛ lɛ wũmɔ wo. Mɛ lɛ zɛɛ ʋaa zeele woo ʋe. Wũfe è ɣeea ma ta è lee.” 21Zunui ƃɔɔ ɣɛ Ziizɛ ma, “Gà nii ɣaazɔ ɣɛɛzu é ziɣi ƃɔɔ nà lopo wolo ʋolo ma.” 22Tei Ziizɛ nii mɛnini, é ɣɛni ma, “Faa ɣila ka ɛ̀ lɛ dɛ kɛɛni. Ŋɛnii ɣaazɔ é è ya te zɔ̃wɔ wulo è mazɔ̃wɔi ɣaa wɛɛ maa‐wõi vea vɛ è weli ka ɣɛ Gala ta. Yà na ɣɛɛ na, è va sa è vile pùlu.” 23Kɛ̀ tei é nii mɛnini maa wõini, toku ge zei ga kpɛtɛi ɣɛ ga tamaa.

24Ziizɛ wɛlɛni sa ba é ɣɛ tea, “Niitiɛ te ƃɛtɛi tɔ ga fai kpaanagɛi ga te lɛ Gala na masadai zu! 25Ƃɔvɛlaale tɔ ga faa ʋii‐ƃɛɛ suo ƃakpai nii ʋaa ma daa ga “keeamɔ” ga é leve siɣile wũ su é leve kpɛtɛ nu lɛɛ ʋaa va Gala na masadai zu.” 26Taitiɛ te mɛnini te ɣɛni tea, “Ƃɛi mu ka a wulo su?” 27Kɛ̀ Ziizɛ ɣɛni te ma, “Fai nii pele lɛ na ɔ́ zolowo nu ƃuse ya tɔ ga solowo faa Gala zeea.” 28Pite zɛba sa é ɣɛ Ziizɛ ma, “Wɛlɛ! Gé ƃega gá vɛlɛitiɛ va gé vile è wulu.” 29Ziizɛ ɣɛ te ma, “Gè bo wiɛ ga gaama, nu nɛpɛ gɛ lɛ ƃega ná pɛlɛ va ɔɔ ŋazai ɔɔ deɣei ƃɔga diɛ ɔɔ kaa veaitiɛ ɔɔ dea Gala na masadai mazaƃu ma, 30manui ɔ́ ƃe tamaa maa zɔlɔ wosu siɛgi nii zu. Na ɣa ɣɛɛ na siɛgi é vaazu vaazu manui zɛʋui nii zɔlɔ wo kwɛ̃ɛ gɛ lɛ ba.”

Ziizɛ faa woni wɔnɔ é vile ná saa ʋai va

31Tei Ziizɛ wuloni ga kala dopo puugɔ kai felegɔitiɛ numai zɔitiɛ zaama, é ɣɛni te ma, “A wɛlɛ! A da liizu Yɛlusulɛɛ. Na ɣa ɣɛɛ na fai nɛpɛgi ponɛi Gala daa woo‐wo beaitiɛ vɛ Gala kɔlɔi zu é vile nu ƃuse lui va ta leve ma. 32Toku ge zei ga ta vaazu zée laazu zii ƃalaagitiɛ ya. Na ɣa ɣɛɛ na ta ŋɛɛ wulo su te gaazu‐ƃaala‐ƃaala tuo wo da tiɛ laa yiɛ wu má. 33Ta dowa te paa. Tɔwɔ folo felegɔ ɣa leve na sava kelei, towaa wu ziɣi.” 34Kɛ̀ kala dopoitiɛ tɛ lɛ fai nii ta nɛpɛ gaa ɣaani. Fai nii loowugɛi ɣɛ te va. Tɛ lɛ su‐wulo‐zu ɣaa ɣaani.

Ziizɛ é feli‐wo nui valoni

35Tei Ziizɛ ɣɛni lɔtɔsu Jɛlikoo lai va, gaazu‐wuu nu ta ɣɛni zeini pelei woba yíɛ feli wo. 36Tei é kpɔgi woo mɛnini tiɛ leve ba, é gaa‐zaɣa‐kɛɛ woni ga te su‐wulo‐zuvɛ lɛɛ la. 37Te bo ma te ɣɛ ma, “Nazɔi Yiizɛ ɣa levesu.” 38Yíɛ sa bo ga doba yíɛ ɣɛ tea, “Deeve dui Ziizɛ, gàazu‐maa‐wõi ɣa!” 39Niitiɛ te ɣɛni ná luo te goi leveni gá tiɛ bo ma ga é na ɣɛ ƃu. Kɛ̀ é lobani é leve minɛ va yíɛ ɣɛ tea, “Deeve dui, gàazu‐maa‐wõi ɣa!” 40Ziizɛ lo sa é bo ga te vaa la pɔ́ vɛ. Tei é lɔtɔni Ziizɛ va, nà gaa zaɣa kɛɛni é ɣɛ ma, 41“Zɛƃɛ ɣa è wõini gè kɛ yìɛ?” É ɣɛ ma, “Màliɣii, kɛ gè wɛlɛ wɔnɔ.” 42Ziizɛ ɣɛ ma, ‘Ƃe ba è ɣaazuvɛ ziɣi ma. Yà yee‐la‐mai ɣa é è valoa.” 43Gaazuvɛ ziɣi sa ma ga maa ʋilea. É vile Ziizɛ wulu yíɛ Gala daa maa lɛ. Tei nui ɣaazɔ ná vɛtɛni, te Gala daa maa lɛɛni.

বর্তমানে নির্বাচিত:

LUKI 18: DN1971

হাইলাইট

কপি