Genesis 25
25
Allat Kiŋuvaaŋich Abraham-gum
(1 Chronicles 1.32, 33)
1Abraham allamik aġnamik tuvaaqatiniŋaruq, atiqaqtuamik Keturah-mik. 2Qitunġiŋagaa Zimran-mik, Jokshan-mik, Medan-mik, Midian-mik, Ishbak-mik, Shuah-miglu. 3Jokshan aapagigaa Sheba-vlu Dedan-guvlu, kiŋuvaaġigaich Dedan-miut Asshurim-miut, Letushim-miut, Leummim-miullu. 4Midian-guvli iġñiŋich Ephah-lu, Epher-lu, Hanoch-lu, Abida-lu, suli Eldaah. Iluqaġmiŋ taapkua Keturah-m kiŋuvaaġigaich.
5Abraham-gum qaiñŋagaich supayaurat ilaata pigirani Isaac-mun; 6aglaan iñuuŋŋaġmi, aitchuutiqaŋaruq iġñiŋiñun allat nuliaġiraġmi. Tavraasii tamatkua iġñiġirani aullaqtinŋagaich kivaliñaamiittuamun nunamun, aullaqtinŋagaich iġñimiñiñ Isaac-miñ.
Tuqumman Abraham Iḷuviġmarruglu
7-8Abraham tuquŋaruq ukiunigataqłuni 175-tun. Iñuuqpaŋaruq kaŋŋił̣ł̣ugu iñuuniagniñi utuqqaliḷġataqłuni. Tuqukami itqatigiyyaŋagaich nanmiñiq iḷani. 9Iġñiŋiksa Isaac-guvlu Ishmael-guvlu iḷuviŋagaak qaiġusugmun Machpelah-mi, qaniŋani Mamre-m nunagiŋaraŋanun Ephron iġñiŋata Zohar-m Hit-miuguruam. 10#Gn 23.3-16.Taamna nuna Abraham-gum tauqsiaġiŋaraŋa Hit-miuguruaniñ; iluqatik Abraham-lu tuvaaqatiŋalu Sarah iḷuviŋagaik tavruŋa. 11Tuquaniŋamman Abraham, God-im piḷḷuatautiqaqtinŋagaa iġñiŋa Isaac, iñuuniaqtuaq qaniŋani Beer Lahai Roi-m, Negev-miittuam.
Kiŋuvaaŋich Ishmael
(1 Chronicles 1.28-31)
12Uvva ukua kiŋuvaaŋich Ishmael-gum, iġñiġiraa Abraham-gum. Ishmael-gum aakaŋa Egypt-miu Hagar, kivgaŋa Sarah-m. 13Ishmael ukuniŋa iġñiqaqtuaq, agliusimarut aniñiŋanniñ: Nebaioth, Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Naphish, Kedemah-lu. 16Taapkua maŋŋuġiŋagaich qulit malġuktun (12) iñugiaktigiruat maŋŋuuruat, atiŋiññik atchiŋagaich nunaaqqiḷḷaaŋich nullaaġaġviŋiḷḷu. 17Ishmael 137-tun ukiunikłuni tuquŋaruq. Tuqukami itqatigiyyaŋagaich nanmiñiq iḷani. 18Kiŋuvaaŋich Ishmael-gum iñuuniaŋarut nunami akunġagni Havilah-vlu Shur-vlu, kivaliñaaŋani Egypt-gum Assyria-muksaġiami. Iñuuniaŋarut ilimiktigun nayuutisuŋił̣ł̣utiŋ allanun kiŋuvaaġiraŋiñun Abraham-gum.
Esau-lu Jacob-lu Animmagnik
19Una quliaqtuaguruq Abraham-gum iġñiŋagun Isaac-kun. 20Isaac malġukipiatun (40) ukiuqaŋaruq tuvaaqasiqami Rebekah-mik, panianik Bethuel-gum (Aramean-guruamik Mesopotamia-miumik) aniqataanik Laban-gum. 21Rebekah qitunġiḷaił̣ł̣uni, Isaac-gum aŋaiyyutigiŋagaa Ataniġmun. Atanġum kiuniġaa aŋaiyyutaa, aasii Rebekah siŋaiyauvluni malġigñik. 22Aniŋaiñŋaġmiŋ, ayyaktuutiŋaruk avanmun illiaŋaniillaġmiŋ. Uqallaktuq, “Summan imña tainnasiq nalautpa uvamnun?” Ataniġmukłuni apiġiŋagaa iḷitchuġisukłuni.
23 #
Ro 9.12. Atanġum uqallautigaa,
“Malġuk uvva nunaqpaguġniaqtuak iḷugniittuk;
Iġñiñiaqtutin akiḷḷiġiigñiaqtuagnik.
Igḷua suaŋŋałhaaġniaqtuq;
Aŋayukłium savautiniaġaa nukaqłiuruaq.”
24Iġñiviksrani tikiñman, iġñiŋaruq malġigñik. 25Sivulliuruam uviñiŋa kaviŋaruq, iluqaniḷu timaa nusaqtuvluni, aasii tainnamik atchiŋagaat Esau-mik#25.25 Hebrew-t uqaluŋanni “Esau” sivuniqaġugnaqtuq “Nusaqtuumik.”. 26Tuglia anikami tigummiqpaŋagaa Esau-m kimmiŋa, tavraasii atchiġaat Jacob-mik#25.26 Hebrew-t uqaluŋanni Jacob-gum taiñiŋa itqayaqtuq uumatun: “Kimmik.”. Isaac ukiuqtutilaaqaŋaruq piŋasukipiatun (60) animmagnik.
Esau-m Tunigaa Aŋayukłiuvluni Kiŋuvaannaktaaksrani
27Nukatpiaġruuk agliruk, Esau aŋuniayuqsiruq, siḷami aniiḷḷatuvluni, aglaan Jacob qiñuiñŋaruq aimmiḷḷatuvluniḷu. 28Isaac-gum piqpagiŋagaa Esau, qanukkii niġiḷḷatuvluni aŋuraŋiññik, aglaan Rebekah-vli piqpagiŋagaa Jacob.
29Uvlut iḷaŋanni Jacob suuliuqtillugu, Esau aiŋaruq aŋuniaġiaŋaruaq. Kaapaluksimaruaq. 30Aasii uqallakłuni Jacob-mun, “Iigaqsiruŋauvva; aitchuŋŋa tavraŋŋa kaviqsaamik suuliaġniñ.” (Tainnaqłuni atchiŋagaat Edom-mik, sivuniqaqtuamik “kaviqsaamik.”)
31Jacob-gum kiugaa, “Aitchuġniaġikpiñ aŋayukłiuvlutin kiŋuvaannaktaaksran qaitkupku uvamnun.”
32Esau uqallaktuq, “Kiami! Uvva tuquaqsiruŋa; suunnauniaġmiruaq una aŋayukłiuvluŋa kiŋuvaannaktaaksraġa?”
33 #
He 12.16. Jacob-gum kiugaa, “Unniqsuqłiiqqaaġluŋa qaiññiaġniḷugu aŋayukłiuvlutin kiŋuvaannaktaaksrautin uvamnun.”
Esau unniqsuqłiiŋaruq aasii qaił̣ł̣ugu aŋayukłiuvluni kiŋuvaannaktaaksrautikkaluani Jacob-mun. 34Tavraasii Jacob-gum punniksriñŋagaa suumiglu. Niġiŋaruq imiqłuniḷu aasii makiłłuni aullaŋaruq. Tainna tavra Esau-m suuŋiḷaġiŋagaa aŋayukłiuvluni kiŋuvaannaktaaksrautikkaluani.
বর্তমানে নির্বাচিত:
Genesis 25: INUPIAQ
হাইলাইট
শেয়ার
কপি
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
