Genesis 11
11
Nasiqsruġviŋa Babylon
1Taimani, iñupayaaŋich nunam atausił̣hiñamik uqausiqaŋarut ativlutiglu uqaluŋich. 2Iglaullaġmiŋ kivanmun, tikiñŋarut natiġnaamun Babylonia-mi aasii inillakłutiŋ tavruŋa. 3Avanmun uqautinagutiŋarut, “Ki! Igluqpaksranik qikunik savakta suliasii igalugich siqquqsiḷġataġlugich.” Tavraasii igluliuġutiksraniŋarut qikunik anŋunmik nipirrusiqł̣ugich. 4Uqallagniqsut, “Ki, aasii iniqpaliuqta nasiqsruġviḷigaamik tikiḷḷugu qiḷak, iḷisimanaqsiyumauq kiutilaaptinnik aasii siamisugruŋiḷḷuta sumulliqaa nunami.”
5Tavraasii Atanġum tautugiaŋagaa nunaaqqiḷiaŋat nasiqsruġviglu nappaqtaŋat, 6aasii uqallaktuq, “Tavraukua, ukua iñuich atautchiigurut uqausiqaġmivḷutik atausimik; tavra taamna aullaqisaagusiññaqtuq savaaġiyumaaqtaŋannun. Tavra susupayaaġumiŋ isumamiktun surġaġniaqtut! 7Atqaġlutauvagut alapititchaqtuġlakput uqausiŋat kaŋiqsisillaiġumaut avanmun.” 8Atanġum siamitinŋaniġaich sumulliqaa nunamun, tavraasii aġiuŋagaat nunaaqqiḷiaqtik. 9Nunaaqqim atiġiŋagaa Babylon, qanukkii tavrani Atanġum kaŋiqsiḷḷaiqsinŋagaat uqausiḷḷaaŋat avanmun iñupayaat, tavraŋŋa aasii siamitinŋagaich sumulliqaa nunami.#11.9 Hebrew-t uqaluŋanni “Babylon” taiñiŋa itqayaqtuq uumatun “kaŋiqsiutillaiġñiq.”
Kiŋuvaaŋich Shem-gum
(1 Chronicles 1.24-27)
10Ukua uvva kiŋuvaaŋich Shem-gum. Malġuk ukiuk pianiŋmagnik uliqpaqqaaqtillugu, Shem ukiunikkami tallimakipiatun (100), iġñiqaŋaruq Arpachshad-mik. 11Iñuuvsaaŋaruq 500-tun iñugiaktigiruani ukiuni aasii allanik miqłiqsivsaaŋaruq.
12Arpachshad ukiunikkami iñuiññaq akimiatun (35), iġñiqaŋaruq Shelah-mik. 13Iñuuvsaaŋaruq 403-tun iñugiaktigiruani ukiuni aasii allanik miqłiqsivsaaŋaruq.
14Shelah ukiunikkami iñuiññaq qulitun (30), iġñiqaŋaruq Eber-mik. 15Iñuuvsaaŋaruq 403-tun iñugiaktigiruani ukiuni aasii allavsaanik miqłiqsivsaaŋaruq.
16Eber ukiunikkami iñuiññaq akimiaġutaiḷatun (34), iġñiqaŋaruq Peleg-mik. 17Iñuuvsaaŋaruq 430-tun iñugiaktigiruani ukiuni aasii allanik miqłiqsivsaaŋaruq.
18Peleg ukiunikkami iñuiññaq qulitun (30), iġñiqaŋaruq Reu-mik. 19Iñuuvsaaŋaruq 209-tun iñugiaktigiruani ukiuni aasii allanik miqłiqsivsaaŋaruq.
20Reu ukiunikkami iñuiññaq qulit malġuktun (32), iġñiqaŋaruq Serug-mik. 21Iñuuvsaaŋaruq 207-tun iñugiaktigiruani ukiuni aasii allavsaanik miqłiqtuqavsaaqłuni.
22Serug ukiunikkami iñuiññaq qulitun (30), iġñiqaŋaruq Nahor-mik. 23Iñuuvsaaŋaruq 200-tun iñugiaktigiruani ukiuni aasii allanik miqłiqsivsaaŋaruq.
24Nahor ukiunikkami iñuiññaq quliŋŋuġutaiḷatun (29), iġñiqaŋaruq Terah-mik. 25Iñuuvsaaŋaruq 119-tun iñugiaktigiruani ukiuni aasii allanik miqłiqsivsaaŋaruq.
26Terah ukiunikkami piŋasukipiaq qulitun (70), iġñiqaŋaruq Abram-mik, Nahor-mik, Haran-miglu.
Kiŋuvaaŋich Terah-m
27Ukua kiŋuvaaġigaich Terah-m, aapauruam Abram-mun, Nahor-mun, Haran-mullu. Haran aapaŋa Lot-gum, 28aasii Haran tuquŋaruq iñuguġvigmiñi Ur-mi Babylonia-miittuami, iñuupkaqtillugusuli aapani. 29Abram-gum tuvaaqasiutiŋagaa Sarai, aasii Nahor tuvaaqasiŋaruq Milcah-mik, panigiraŋanik Haran-gum, aapaummiruaqtauq Iscah-mun#11.29 Taimani iluaġiŋagaat tuvaaqatiaqaġnik iḷamignik.. 30Sarai miqłiqsiḷaiñŋaruq.
31Terah-m kaluqługu iġñini Abram, tutaaluniḷu Lot, iġñiġuruaq Haran-mun, ukuaniḷu Sarai, Abram tuvaaqataa aullaŋaruq nunaaqqiŋanniñ Ur-m Babylonia-miittuam Canaan-muksaqłutiŋ. Haran-muaglaaġamik aasii tavrani iñuuniagaqsivḷutiŋ. 32Terah tuquŋaruq tavrani ukiuqtutilaanikłuni 205-tun.
বর্তমানে নির্বাচিত:
Genesis 11: INUPIAQ
হাইলাইট
শেয়ার
কপি
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
