Zan 9
9
Zunui ʋalo vai nii é zɔlɔɔni ga gaazuɠolei
1Yesu yɛni leʋesu, é zunu ɠila ka, nii é zɔlɔɔni ga gaazuɠolei. 2Ná-kaladopoiti ti gaazaɠani, ti ɠɛ ma: «Kalamɔn, lee vaa zu zunui nii zɔlɔɔgai ga gaazuɠolei? Tɔ ɓɔɠɔi ná-kotoi laazɔgi ʋe ɓaa, ɓaa sɔlɔɔ nuiti ta-ɠotoi laazɔgi ʋe?»
3Yesu ti wooɠaaʋoteni, é ɠɛ ma: «Tɔ ɓɔɠɔi ɓaa sɔlɔɔ nuiti ta-ɠoto laazɔ taade, kɛlɛ sɔlɔɔgɛ ga gaazuɠolei, nii a kɛ GALA ná-kɛɛwotiiti ti ɠula kɛlɛma ga tɔun maaʋele ɛsɛ pɛ bɛ. 4Kɛni ade naama nui ná-botii ɠɛ, nii é tèʋegai, siɛgi zu foloi ná la dɛ, tɔɔzei kpidii ɠa ʋaazu, názu nu nɔpɛ ge la mɔ zooga botii ɠɛɛzu. 5Ni nà dɛ eteai zu, nà ɠa gè ga eteai ná-wozakalagi.»
6Siɛgi zu Yesu naa woni la, é laaɗɛi ʋuuni zooi ma, é pɔlɔi ɠaayɔ ga daaɗɛi, é siɛ gaazuɠole nui ɠaazuʋɛ. 7Naa ʋoluma, é ɠɛni naa ma: «Li, è maagba Silowe kpoigi zu» (nii poluʋɛ ga «nii ti teʋegai»). Gaazuɠole nui liini, é maagba, é ɠaleni ma, é ɗa wozaɠa niina.
8Seiɲɔɠɔiti ta niiti ti ɠɛni kaazu pɔlɔma, é ɗa fali wo, naati ti ɠɛni ma: «Zunui nii lɛi é ɠɛa zeizu, é ɗa falii wo?» 9Tanigaa ti ɠɛni ɠɛɛzu ma: «Tɔ ɓɔɠɔɓɔɠɔgi ʋe!» Zɔiti ti ɗa ɠɛ ma: «Ɓa-o, tɔ laade, kɛlɛ baaɠulabai ta ʋe.» Kɛlɛ gaazuɠole nui ɓɔɠɔi ɠɛni ma: «Nà ɠiteɠite be.»
10Ti gaazaɠani, ti ɠɛ ma: «Naa ziɛʋɛ ɠale è-ɠaazuʋɛti seɠeai ma, è ɗa wozaɠa?» 11É ti wooɠaaʋoteni, é ɠɛ ma: «Zunui nii daaseigi ga Yesu, naa ɠa é pɔlɔi ɠaayɔga, é siɛ gàazuʋɛ, é zɛba é ɠɛ mà: ‹Li, è maagba Silowe kpoigi zu.› Dìiʋɛ, gè maagba, tama gaamago nɔ gàazuʋɛti ti zeɠe ma, gè ɗa wozaɠa.»
12Ti ɠɛni ma: «Mini ɠa zunui naa ná?» É ɠɛni ti ma: «Gè la ná ɠwɛni.»
Laavɔɔ vai ʋoluɠaiziɛ vai
13Ti liini ga zunui nii mɔungi é ɠɛni ga gaazuɠole nui, Faliziɛinti pɔ. 14Tama dooɠo foloi ta ɠa, Yesu pɔlɔi ɠaayɔni la, é siɛni la zunui ɠaazuʋɛ, gaazuzeɠema vai zu. 15Faliziɛinti ɓalaa ti gaazaɠani ga ʋelei gaazuʋɛ zeɠeai la ma. É ti wooɠaaʋoteni, é ɠɛ ma: «É pɔlɔ ɠaayɔgai ziɛʋɛ gàazuʋɛ, gè li, gè maagba, gàazuʋɛ zeɠe ma, gè ɗa wozaɠa.»
16Siɛgi zu Faliziɛinti ti naama wooi mɛnini da, tanigaa ti ɠɛni ɠɛɛzu ma: «Zunui naa la zeɠeni GALA pɔ, tɔɔzei é la dooɠo foloi maaɲɛɛzu.» Taɠiligaa ti ɗa ɠɛ ma: «Kotoba nui ɓɛ ɠa a zoo nii ɠɛɠala laavɔɔ vaiti kɛɛzu?» Zeeɠaaɠwɛɛi lɔɔni ti yɔɠɔzu. 17Ti zunui ɠaazaɠani, nii gaazuʋɛ zeɠeni ma, ti ɠɛ ma: «Ɗɔun, lee ɠa è bosu é ʋilɛ naama zunui ʋa, nii é è-ɠaazuʋɛ zeɠeai ma?» É ti wooɠaaʋoteni, é ɠɛ ma: «GALA goo wo nui ta ʋe.»
18Zuifuiti ta-ɠundiɠiiti ti la ɠɛni laani da ga zunui naa ɠaazuɠoleni, naa ʋoluma é ʋalo. Ti naa zɔlɔɔ nuiti tolini. 19Ti naati gaazaɠani, ti ɠɛ ma: «Wa ɠa wo-loun ga zunui nii? Gaama ʋe nɛi ga sɔlɔɔgɛ ga gaazuɠolei? Naa leʋegɛ ɠale mu, é wozaɠaazu niina?»
20Zunui naa zɔlɔɔ nuiti ti ɠɛni ti ma: «Gi kwɛni ga gi-loin ʋe, ta sɔlɔɔgɛ gaazuɠolei zu. 21Kɛlɛ gi la kwɛɛ ʋelei gaazuʋɛ zeɠeai la ma, gi la naama nui ɓalaa kwɛɛ nii é gaazuʋɛ zeɠeai ma. À tɔ ɓɔɠɔi ɠaazaɠa, tɔɔzei toɠa niina ga kpakolo, tɔ ɓɔɠɔi toɠa zoo é naa zuɠula wo ma, nii pilɛgai ba.» 22Zunui ná-nuiti ti naama wooiti boni, tɔɔzei ti ɠɛni luazu Zuifuiti ta-ɠundiɠiiti ba, mazɔlɔɔ naati ti deveni ga zɔi nɔpɛ a vaana bu ga Yesu ɠa é ga Kilista, ta naama nui ɓɛ GALA dɛbi ʋɛlɛi wu. 23Naa ɠa é kɛɛni, gaazuɠole nui zɔlɔɔ nuiti ti ɠɛɛni la ma: «À tɔ ɓɔɠɔi ɠaazaɠa, tɔɔzei toɠa niina ga kpakolo.»
24Faliziɛinti ti zunui lolini ná zeizu velesiɛi, nii gaazuʋɛ ɠɛa ɠoleni, ti ɠɛ ma: «Lɛbiyai ve GALA bɛ, gi kwɛni ga zunui nuu ɠa ga kotoba nu.» 25É ti wooɠaaʋoteni, é ɠɛ ma: «Ni kotoba nu ʋe, gè la naa ɠwɛɛ, kɛlɛ gè faa ɠila kwɛɛ, naa ɠa ga gàazuʋɛ ɠɛa ɠoleni, kɛlɛ niizu nà ga wozaɠa.»
26Ti gaazaɠani ʋolu, ti ɠɛ ma: «Lee ɠa é kɛai ga ɗe? É kɛɛʋɛ ɠale, é è-ɠaazuʋɛ zeɠe ma?» 27É ɠɛni ti ma: «Gè boga za wo ma, wo la woiloni dàawooi ma. Lee vaa zu mu wo ɠɛɛzu gè bo ʋolu? Wa pɔ niina wa ɓalaa, wo ɠɛ ga ná-kaladopoiti ɓaa?»
28Ti tɔɔzeini ga ti ɗa poomu, ti ɠɛ ma: «Ɗa ɠa è ga ná-kaladopoi, gɔun gá ga Moize ná-kaladopoiti. 29Gi kwɛni ga GALA ge ɓɔɛni Moize ʋɔ, kɛlɛ zɔi nii, gi la vɔlɔ seɠezu ɠwɛɛ!»
30Zunui naa ɠɛni ti ma: «Laavɔɔ vaa ɠa ga naa, wo bosu ga wo la seɠezu ɠwɛɛ, tama tɔ ɠa é gàazuʋɛ zeɠeai ma! 31Ɛsɛ pɛ ge kwɛni ga GALA ge la ɗa ga kotoba nuiti fali wooi ɠaaʋotega, kɛlɛ zɔi nɔpɛ é luazu GALA ba, ta é ɗa ziimai ɠɛ, toɠa ɗa naama nui wooɠaaʋote. 32Kaipa etea ɠulani, nu la dɛ mɛnini ga nui ta gaazuɠole nu ɠaazuzeɠea ma, nii sɔlɔɔgai ga gaazuɠolei. 33Ni zunui nuu la ɠɛni zeɠeni GALA pɔ bɛ, é la ɠɛni zooga é ʋa faa nɔpɛ kɛ.»
34Ti gooɠaaʋoteni, ti ɠɛ ma: «Ɗɛi é zo è zɔlɔɔ gee ma, è nɔ ɲɛgɛlɛin kotoi zu, ɗa ɠa é ɠɛɛzu è kala bo ga giye?» Ti kpɛɛni, ti kula etea ʋelei.
Gaazuɠole nu ɠiteiti
35Yesu mɛnini ga ti kpɛɛʋɛ. Naama ziɛgi zu ti ɠaani ta Yesu, naa ɠɛ ma: «È laa Nu ná-Doun Zunui la ɓaa?» 36É Yesu wooɠaaʋoteni, é ɠɛ ma: «Ɓɛ ɠa ga naa? Dɛɛ ga ze, Màliɠii, naa ɠa a kɛ gè la da.»
37Yesu ɠɛni ma: «È pɛtɛga ga è-ɠaazuɠɛzɛiti, tɔ ɠa é ga nui nii é ɓɔɛzu è ʋɔ.» 38Zunui ɠɛni ma: «Gè laa da, Màliɠii.» É nɔkɔni Yesu wu.
39Naa ʋoluma Yesu ɠɛni ma: «Nɔ̀un, pàaʋɛ niima eteai zu, nii a kɛ tukpɔi ɠaaleʋe, zɔiti ti ɠaazuɠoleai, naati ti wozaɠa, zɔiti ma ti wozaɠaazu, naati ti ɠɛ ga gaazuɠole nuiti.» 40Faliziɛin niiti ti ɠɛni koba ta ti naama wooi mɛnini, naati ti Yesu ɠaazaɠani, ti ɠɛ ma: «Gá ɓalaa gá ga gaazuɠole nuiti mu ɓaa?»
41Yesu ti wooɠaaʋoteni, é ɠɛ ma: «Ni wo ɠɛni ga gaazuɠole nuiti, wo la ɠɛni ɠɛa ga sɔba nu. Kɛlɛ wa ɠɛɛzu ma: ‹Gá wozaɠaazu,› naa maaʋele ma wa-ɠotoi ɠa yɛsu wo ʋa.»
বর্তমানে নির্বাচিত:
Zan 9: GDZ
হাইলাইট
শেয়ার
কপি
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
