Zan 3
3
Yesu ta Nikodɛme
1Zunu ɠila ge ɠɛni ná, daaseigi ga Nikodɛme, é ɠɛni ga Zuifuiti ta-ɠundiɠii ta, naa ʋoluma é ɠɛni Faliziɛinti ta-ɓɔgi zu. 2É ʋaani Yesu ʋɔ bɛ ga kpidii, é ɠɛ ma: «Kalamɔn, gi kwɛni ga GALA ka é è leʋegai ga è gi ɠala, tɔɔzei nu nɔpɛ ge la zooga é ʋa laavɔɔ vai niiti kɛ, è ti ɠɛɛzu, ni GALA ge la ma nu ʋa.» 3Yesu ɠɛni ma: «Gè bo è ma ga gaamai, ni nui la zɔlɔɔni ʋolu ga niinɛ, é la ɠaazulaa GALA ná-masadai ma.»
4Nikodɛme ɠɛni ma: «Nui ɠa zoo zɔlɔɔsu ɠale ʋolu ga niinɛ, siɛgi zu pɔlɔzaɠagai la? Tama é la ʋaazu lɔɔzu dee ɠoozu ʋolu, é ʋa zɔlɔɔ kɛlɛ?» 5Yesu gooɠaaʋoteni, é ɠɛ ma: «Gè bo è ma ga gaamai, nu la lɔa GALA ná-masadai zu, ni é la zɔlɔɔni ga ziɛi ta Zɛnvu Ɲadegai. 6Zɔi sɔlɔɔgai ga kpusɛi maaʋele, naa ɠa ga kpusɛi. Zɔi ma é zɔlɔɔsu ga Zɛnvu Ɲadegai maaʋele, naa ɠa ga zɛnvui. 7Naa mina ɠɛ ga kulafiliba è ʋɛ, ga tɛi gè ɠɛa è ma: ‹Kɛni wo zɔlɔɔ ʋolu ga niinɛ.› 8Fiilɛi ɠa ɠulazu, ʋɛ ná nɛai bɛ, è ɗa gooi mɛni, kɛlɛ è la seɠezu ɠwɛɛ, è la ɓalaa diizu ɠwɛɛ. Ʋele nɔ ɠana ɓalaa é la ga naama nui nii sɔlɔɔgai ga Zɛnvu Ɲadegai.»
9Nikodɛme ɠɛni ma: «Naama vai ɠa zoo ɠɛɛzu ɠale?» 10Yesu ɠɛ ma: «Ɗa ga kalamɔn wola nii tɔɠɔɠulaai Izilayɛle yooi zu, ɗɔun è la niima vaiti kwɛɛ? 11Gè bo è ma ga gaamai, nii gi kwɛni ɠɛzɛɠɛzɛ, naa ɠa gi bosu, nii gi kaai ga ɠaazu, naa ɠa gi ma zeele wooi veezu. Wa ma, wo la pɔ wo ʋa yeezei gá-zeele wooi wu. 12Ni nà zooi ma vaiti bona, wo ma wo la laani da, siɛgi zu gè geeɠɔlɔgi zu vaiti bosu la wo ma, wa la naa la ɠale? 13Tɔɔzei nu nɔpɛ ge la dɛ lɛɛni geeɠɔlɔgi zu, kɛni Nu ná-Doun Zunui, nii seɠeai ná, é yei. 14Moize kaali ʋaaɠulabai ɓɛtɛni ga kɔlu ɓɔigi, é sɛlɛ gului ʋa teʋebai zu. Ʋele nɔ ɠana ɓalaa Nu ná-Doun Zunui ɠa zɛlɛ da, 15naa ɠa a kɛ nu nɔpɛ a ɠidaaleʋe ma, ma nu ɠa ɠɔoɠɔ zɛnvui zɔlɔɔ.
16«Mazɔlɔɔ GALA ge eteai nɛa ʋɛ, eyɛsu é ná-Doun Zunu ɠila kpegi vea, naa ɠa a kɛ nu nɔpɛ a la da, naa undaa mina ʋili, kɛlɛ é ɠɔoɠɔ zɛnvui zɔlɔɔ. 17Tɔɔzei GALA ge la ná-Doun Zunui leʋeni eteai zu ga é eteai ʋeelala, kɛlɛ nii a kɛ eteai kizogi zɔlɔɔ ga maaʋele. 18Zɔi nɔpɛ é laazu tɔun da, peelalazu nɔpɛ ge la naa ʋa. Kɛlɛ zɔi é la kɛɛni é ʋa la da, naama nui ɓega ga peelalai zɔlɔɔ, tɔɔzei é la laani GALA Doun Zunu ɠila kpegi la. 19Nii é ga peelalai naa ɠa ga: Wozakalagi ʋaaʋɛ eteai zu, kɛlɛ kpidii nɛɛʋɛ nuɓusɛiti bɛ, é leʋe wozakalagi ʋa, tɔɔzei ta-ɠɛɛwotiiti ɲɔuʋɛ. 20Tɔɔzei wozakalagi wɔinzeɠeʋɛ faa ɲɔu ɠɛ nui ma, é la ɗa ɠɛ pɔ ga é ʋa wozakalagi ɠa, nii a kɛ ná-kɛɛwotiiti ti mina ɠula kɛlɛma. 21Kɛlɛ zɔi é ziɛzu ga gaamai, naa ɠa ɗa ʋa wozakalagi ɠa, nii a kɛ ɛsɛ pɛ ge ka kpezekele ga nii pɛ é kɛɛzu, toɠa ti ɠɛɛzu ta-ɠilibalai zu ta GALA.»
Zan ta Yesu
22Naa ʋoluma, Yesu liini Zudé yooi zu ta ná-kaladopoiti, é yeeɠɛɠala ɠɛɛni miná ta naati, é ɗa ɓatizei wo. 23Zan ɓalaagi ɠɛni ɓatizei wosu Enɔn, Salime ɠobaʋɛ, mazɔlɔɔ ziɛi wola mɔinni miná. Nu mɔinmɔin ge ɠɛni ʋaazu ná, ti ɓatize fai ma. 24Mazɔlɔɔ naama ziɛgi zu, ti la ɠɛni dɛ Zan ʋilini kasoi ɠa.
25Yeeta Zan ná-kaladopoi tanigaa ti maaɠaali lɔɔzeini ta Zuifui taɠili, é ʋilɛ ɲade fai ma ɠɛɛwotiiti fai ʋa. 26Ti liini Zan ʋɔ bɛ, ti ɠɛ ma: «Kalamɔn, zunui nii é ɠɛni è ɠoba Zuludɛn ʋoluʋelei, è ɠɛni zeele wooi wosu bɛ, toɠa ɓalaa ɓatizei wosu, ɛsɛ pɛ ka liizu pɔ bɛ.»
27Zan ti wooɠaaʋoteni, é ɠɛ ma: «Nu nɔpɛ ge la zooga ani nɔpɛ sɔlɔɔsu, é ɠula naa ʋolu, nii GALA ge feai ma nu ya. 28Wa ɓɔɠɔi wa ga naama zeelei ga gè ɠɛa bosu ɠɔ, gè ɠɛ ma: ‹Nà lɛi gè ʋa ɠɛ ga Kilista, kɛlɛ nɔ̀un, tèʋegɛ tuɠɔ.› 29Anzazinigi ɠa nɔnɔ ga anzai. Anzazinigi bɔɔlai ɠa ga naa, nii é losu koba, é ɗa woilo gooi ma, anzazinigi wooi mɛnigai ɠa daave ga koozunɛɛi. Naa ɠɛɠala ɠoozunɛɛi ɠa é bɛ̀, tama nà-koozunɛɛi laazeeliʋɛ na, niima ziɛgi zu. 30Kɛni tɔun maa iɲɔgi ɗa wɔɔlɔ, nɔ̀un maa iɲɔgi maa ɗa yei.
31«Zɔi seɠeai geeɠɔlɔgi zu, naa ɠa ti pɛ maazu. Zɔi é ga zooi ma gelei, naa ɠiliʋɛ zooi ʋa, ta zooi ma vaiti ka é ti wosu. Zɔi seɠeai geeɠɔlɔgi zu, [naa ɠa ti pɛ maazu.]#3:31 Wooi niiti ti [ ] kpaku felegɔiti zɔɠɔzu, naati ti la sɛʋɛ wɔlɔmai tanigaa zu. 32Toɠa naama zeele wooi wosu nii tɔ ɓɔɠɔi é kaai, ta é mɛnigai, tama nu nɔpɛ ge la ná-zeele wooi zeɠezu ga gaama. 33Zɔi nɔpɛ a yeezei ná-zeele wooi wu, naama nui ɠa dɛɛzu ga gaamai ɠa GALA ge bosu. 34Tɔɔzei GALA ná-nu leʋegai ɠa GALA ɓɔɠɔi laawooiti nɔ wosu, mazɔlɔɔ GALA ge ná-Zɛnvui veeʋɛ zea, é la yeewu nɔpɛ zɛni. 35Ɠɛɛɠɛi ná-Doun Zunui nɛɛʋɛ ʋɛ, é anii pɛ dɔ naa ná-zobogi wu. 36Zɔi nɔpɛ a la Doun Zunui la, ɠɔoɠɔ zɛnvui ɠa naa ya. Kɛlɛ zɔi é la kɛɛni é ʋa la da, zɛnvui la naa ya, kɛlɛ GALA ná-ziiɠaawanai ɠa yɛ ma nui ma.»
বর্তমানে নির্বাচিত:
Zan 3: GDZ
হাইলাইট
শেয়ার
কপি
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
