Zan 12
12
Gulɔ maku nɛɛnɛgi ziɛ vai Yesu ma Ɓetani
(Matiyo 26:6-13; Maleke 14:3-9)
1Folo lɔzita yɛni Pake fɛtii ma yeeluɠɔ, Yesu liini Ɓetani, ʋɛ Lazaal ɠɛni ná, nii é zaani, Yesu buzeɠe, é kula saai ya. 2Ti kpɔkɔ laamii ɓɛtɛni ná bɛ, Maate ɠa é ɠɛni daamianigi ɠaaɠwɛɛzu, Lazaal ɠɛni naati saama, niiti ti ɠɛni daamii wosu ʋɔɔma ta Yesu. 3Naama ziɛgi zu, Mali gulɔ maku nɛɛnɛgi ma litɛlɛ ɠaaɠwɛsui zeɠeni, nii kpɛtɛai ga naale kiteɠitegi sɔngɔi ɓaai, é siɛ Yesu ɠɔɠɔiti ma, naa ʋoluma é kɔɠɔiti maaɓale ga nɔundeɠaiti. Pɛlɛi wuulaaveni ga maku nɛɛnɛgi.
4Yesu ná-kaladopoi gila, Zudase Isekaliyɔte, nii é ɠɛni ʋaazu yaavazu, naa ɠɛni ma naazu: 5«Lee vaa zu nu la ɓena gulɔ maku nɛɛnɛgi nuu ʋɔdi ga wali ɠae unsaʋagɔ (300), é ve bala nuiti zea?» 6É la ɠɛni naa wosu ga bala nui ma yiizoolɛ ɠa é ɠɛni ma, kɛlɛ é boni mazɔlɔɔ é ɠɛni ga unma nui, ta tɛi é ɠɛni ta-wali ɓɔlɔi zeɠezu, é ɓena walii zeɠe su, nii ti ɠɛni puuzu su.
7Kɛlɛ Yesu ɠɛni ma: «À zɛ ná dɔin! É gulɔ maku nɛɛnɛgi nii makɛni màaɠulu voloi ma vaa zu. 8Bala nuiti ta wo ʋa yeenɔpɛ, kɛlɛ nɔ̀un gè la ʋaazu yɛsu wo ʋa yeenɔpɛ.»
Lazaal ma yaavai
9Zuifu mɔinmɔin ge mɛnini ga Yesu ɠa Ɓetani. Ti ʋaani ná, kɛlɛ tɔ ɠila ná-faa nɔ la ɠɛni de, ti ʋaani ɓalaa Lazaal ɠaa vai ma, nii é buzeɠeni, é kula saai ya. 10Zalaɠa ɠula ɠundiɠiiti ti deveni ga ti Lazaal ɓalaa paa. 11Mazɔlɔɔ tɔun maaʋele ma, Zuifui ma mɔinmɔin ge ɠɛni zeɠezu ti ʋolu, ti ɗa ɠidaaleʋe Yesu ma.
Yesu lɛɛ vai Zeluzalɛme
(Matiyo 21:1-11; Maleke 11:1-11; Luke 19:28-40)
12Poluma voloi, bɛbɛ mɔinmɔin gola nii é ɠaalɛɛni ba fɛti vai ma, ti mɛnini ga Yesu ɠa pelei ma, é lɛ Zeluzalɛme. 13Ti dɔɔ laaiti seɠeni, ti ɠula, ti daaɠomi, ti ɗa ɠɛ ma: «Ozana!#12:13 Ozana: Maamusɛ wooi nii poluʋɛ ga «kizo fai ve». Maliɠii tuya loo naama nui ʋɛ, nii é ʋaazu daaseigi zu! GALA ge tuya loo Izilayɛle ná-masagi ʋɛ!»
14Yesu soovale ziʋoi ta ɠaani, é zei kɔma, eɠɛʋelei sɛʋɛai la GALA Sɛʋɛi zu ga:
15«Ee, Siyɔn nuɓusɛi, mina lua!
Wɛlɛ ɗa-masagi ʋa, é ʋaazu è ʋɔ,
é zeini soovale saai ma yiʋoi ɠɔma.»
16Naama ziɛgi zu Yesu ná-kaladopoiti ti la ɠɛni naama vaiti gaaɠaani, kɛlɛ siɛgi zu é lɛɛni la ná-lɛbiyai zu, ti-ɠi ge looni su ga naama vaiti ti zɛʋɛni ná-faa zu, tama ti zeelini ma kpae.
17Zɔiti pɛ ti ɠɛni Yesu ɠoba siɛgi zu é Lazaal lolini la ga é ɠula kabai zu, é buzeɠe, é kula saai ya, naati pɛ ti ɠɛni naa zuɠulazu, nii ti kaani. 18Bɛbɛi ɠɛni ʋaazu daaɠomisu, mazɔlɔɔ ti mɛnini ga é laavɔɔ vai naa ɠɛɛni. 19Faliziɛinti ti ɠɛni ɓɔɠɔ ma: «Wa kaazu, wo la mɔ zooga faa nɔpɛ kɛɛzu, ɛsɛ pɛ ge ʋilɛga tɔ ɠila nɔ ʋolu!»
Yesu saa vai wo fai
20Nui niiti ti ʋaani Zeluzalɛme GALA dɛbi vai ma, fɛti voloi, tanigaa ti ɠɛni ná, ti la ga Zuifua. 21Ti maaɓuɠani Filipe ʋa, nii é ɠɛni ga Ɓɛtesayida nui, Galilé yooi zu, ti ɠɛ ma: «Gá pɔ gi Yesu ɠaa.» 22Filipe liini, é bo Andelé ma, Andeléni ta Filipe ti li, ti bo Yesu ma.
23Naa ɠɛni ti ma: «Yeeɠɛɠalai zeelia ga Nu ná-Doun Zunui lɛ ná-lɛbiyai zu. 24Gè bo wo ma ga gaamai, ni molo ɠae nii nu fazasu zooi ma, é la zaani, ma ɠae ɠilagi naa nɔ ɠa a yɛ ná. Kɛlɛ ni toɠa zaana, toɠa ɗa gwaa mɔinmɔin bo. 25Zɔi nɔpɛ é ɠilizu kpaan tɔ ɓɔɠɔi yɛnvui ʋa, toɠa ʋala ma. Kɛlɛ zɔi é kpɔɠɔ yɛnvui wɔinzeɠezu niima eteai zu, zɛnvui ɠa yɛ zea eyɛsu ɠɔ. 26Zɔi é pɔ ga é botii ɠɛ bɛ̀, kɛni é ʋilɛ pòlu. Ʋɛ gè ɠɛɛzu ná, nà-botiɠɛ nui ɓalaa ka ɠɛ miná. Zɔi nɔpɛ é ɠɛɛzu ga nà-botiɠɛ nui, Kɛ̀ɛ ɠa unfema ve naama nui ʋɛ.
27«Niima yeeɠɛɠalai zìi ɠa ɓɔlɔzu, kɛlɛ lee ɠa nà bo? Gè ʋa ɠɛ ma: ‹Kɛ̀ɛ, kìzo niima yeeɠɛɠalai zu vai ma› ɓaa? Ɓa-o, tɔɔzei yeeɠɛɠalai nii zu vai ɠa é ga pàa ungi. 28Kɛ̀ɛ, ɗa-lɛbiyai ɠulana kɛlɛma.»
Naama ziɛgi zu woo ɠila ge ɠulani geeɠɔlɔgi zu, é ɠɛ ma: «Gè ɓega ga nà-lɛbiyai ɠula kɛlɛma, tama nà kulazu mɔnɔ ʋolu kɛlɛma.» 29Bɛbɛi niiti ti ɠɛni loni ná, ti naama wooi mɛnini, ti ɠɛni kaazu ga tona ɓunɛ gooi ʋe, tanigaa ti ɗa ɠɛ ma geezuɠeelai ta ɠa kpɔɛai pɔ.
30Kɛlɛ Yesu ɠɛni ti ma: «Nɔ̀un maaʋele laade niima wooi ʋa wo da, kɛlɛ wa ɠa wooi nii wogai wo ʋɛ. 31Eteai nii ná-tukpɔɠaaleʋe ziɛgi ɠa seeliai, zɔi é zeini eteai nii unda, naa ʋili ya ziɛgi ɠa seeliai. 32Nà ma, siɛgi zu gè zeɠezu la zooi ma, gè lɛ, nà nuɓusɛiti pɛ mɛɛn ɓɔɠɔ ma.» 33É ɠɛni naa wosu, é dɛɛ ʋelei é ʋaazu zaazu la.
34Bɛbɛi ɠɛni ma: «Tɔgi ɠa gi ɠalasu ga Kilista ɠa yɛsu vulua eyɛsu ɠɔ, lee vaa zu mu è ɠɛɛzu ma: ‹Kɛni Nu ná-Doun Zunui wuzeɠe, é lɛ›? Tɔun vɔlɔ, ɓɛ mu ka é ga Nu ná-Doun Zunui naa?»
35Yesu ti wooɠaaʋoteni, é ɠɛ ma: «Wozakalagi ɠa dɛ wo zaama yeeɠɛɠala go laawu. À ziɛ siɛgi zu wozakalagi wo ya la dɛ, naa ɠa a kɛ kpidii mina wo zo ga kulafilibai, tɔɔzei zɔi é ziɛzu kpidii zu, naama nui la kwɛɛ, ʋɛ é liizu ná. 36Siɛgi zu wozakalagi wo ya la, à ɠidaaleʋe wozakalagi ma, naa ɠa a kɛ wa ɓɔɠɔi wo ɠɛ ga wozakalagi ná-dointi.» Yesu ɓegai ma ga naama wooiti bo, é ɠulani ti zaama, é lɔɔɠu ti ʋa.
Zuifuiti zɛ fai ta-ladalalai zu
37Anɛɛ ni Yesu naama laavɔɔ vaa mɔinmɔingiti kɛɛni ti ɠaazu, ti la ɠɛni laani da pɛ. 38Ʋele ɠana naama wooi laazeelini la nii GALA goo wo nui Ezayi boni ma yeeluɠɔ ga:
«Màliɠii, ɓɛ ɠa é yeezeini ada-ɠeela wooi wu?
Ɓɛ ɠa Ɠɔoɠɔ GALAGI ná-zobogi lɛa la?»#12:38 Eza 53:1 bogɛ é zoloo Gɛlɛke woo zɛʋɛ wɔlɔmai ma.
39Lee vaa zu ti la ɓena ɠidaaleʋe? Ezayi nɔ ɠa mɔnɔ é naama wooɠaaʋotegi veezu ade ya, siɛgi zu é ɠɛni ma la: 40«GALA ge niima nuɓusɛiti kɛa ga gaazuɠole nuiti,
é ti ɠɛ ga kigaaza nuiti,
naa ɠa a kɛ ti ɠaazu mina wozaɠa,
ti-yii mina faa ɠaaɠa,
ti ʋa ɠale ma pɔ̀,
nii a kɛ gè ʋa ti ɠɛdɛ.»
41Naa ɠa Ezayi boni tɔɔzei é Yesu ná-lɛbiyai ɠaani, tama é ɓɔɛni é ʋilɛ ba.
42Anɛɛ naa ʋe, kundiɠiiti saama, nu mɔinmɔin ge ɠidaaleʋeni ma, kɛlɛ Faliziɛinti maaʋele ma, ti la ɠɛni ta-ɠidaaleʋei ɠulazu kɛlɛma, nii a kɛ ti mina ti ɓɛ GALA dɛbi ʋɛlɛi wu. 43Tɔɔzei nuɓusɛiti ta-maamusɛi nɛɛni ti ʋɛ, é leʋe GALA nɔnɔi ʋa.
Toligi é lo kidaaleʋei ʋa
44Yesu wooɠulani, é ɠɛ ma: «Zɔi nɔpɛ é laazu nɔ̀un da, nà lɛi é ʋa ɠidaaleʋe mà nɔ, kɛlɛ ma nui ɠidaaleʋeʋɛ naama nui ma, nii é tèʋegai. 45Zɔi ɓalaa é pɛ̀tɛsu, ma nui ɠa tèʋe nui ɓalaa ʋɛtɛsu. 46Pàaʋɛ ga gè ɠɛ ga wozakalagi eteai zu, nii a kɛ zɔi é laazu dà, naa la yɛga kpidii zu. 47Wooi niiti gè ti wosu, zɔi é ti mɛnisu, kɛlɛ é la ti zoni, nà lɛi gè ʋa ɠɛ ma nui ʋeelalazu, tɔɔzei gè la ʋaani eteai ʋeelala vaa ma, pàaʋɛ tɔun kizo fai ma. 48Nu nɔpɛ é ɠɛlɛzu bà, é ɠɛlɛ dàawooiti ba, naama nui ná-tukpɔ ɠaaleʋe nui ɠa ná. Wooiti gè ti wogai, naati ka ti ma nui ná-tukpɔi ɠaaleʋezu. 49Tɔɔzei niima wooiti gè ti wogai, gè la ti ɠulani ɠisu nà ɓɔɠɔi, kɛlɛ Kɛ̀ɛ nii é tèʋegai, naa ɠa é kpɔ̀ɛ ʋelei lɛa ga ze, ta kalagi nii maanɛai ga gè bo. 50Tama gè kwɛni ga nà-devei ɠa ɠɔoɠɔ zɛnvui veezu. Nii kpein gè bosu, nà bosu wooɠɛɠiladai zu, ʋelei Kɛ̀ɛ bogai la mà.»
বর্তমানে নির্বাচিত:
Zan 12: GDZ
হাইলাইট
শেয়ার
কপি
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
