Matthieu 3
3
Bulowen pɛ *Jean wan-gdumsiwi
(Mc 1.1-8; Lc 3.1-18; Jn 1.19-28)
1Ha ngimɔ ɛngi Jean wan-gdumsiwi gbasa tɛ wa. A bulo wen ha kpɛnu mɔ Judée, 2nɛ tɔa: «Ɛnɛ akifiri sila ɛnɛ, hazu *Kongakandɔ Ngɔn tɛ bo sanga nɛ ɛnɛ.»
3Yo nê wɛnɛ ka *wan-tɔkuliwen Esaïe batɔ wen pɛa, a tɔa:
«Ma wi he mbela nɛ ngagɛl ha kpɛnu nde,
‹Ɛnɛ bhɔngiri mbango pɛ *Kongawan,
ɛnɛ yolsi hio bhɛtɛ-bhɛtɛ wal pɛa!›»
4Jean yola la ka ɛ dea nɛ bumɔtɛ sari, ka ɛ sa nde samo. A yola pɛrɛng kotu. A dungɔ ha yɔnga gdɔlɔ nɛ nɔ gɔlɔ. 5Mɛgi hio wi mɔ gasa le Jérusalem, mɔ kandɔnu Judée nɛ mɔ pɛtɛ li Jourdain fɛt tɛa ha pɛa. 6Nɛ ka mbwa gbasa gdangamɔ pɛ mbwa, Jean gdumso mbwa ha li Jourdain.
7Hio *Farizien nɛ hio *Sadusien tɛa fin nɛdɔka nde, Jean agdumsi mbwa ha li. Ma, wɛnɛ tɔa ha mbwa: «Ɛnɛ, kul pɛ da gɔk! Ngambi pɛ Sɔ tɛ bo sanga-sanga! O ha osi ha ɛnɛ nde, ɛnɛ lɛma kpɔy ha yo, o nde? 8Ɛnɛ de dede mɔ ka osi nde, ɛnɛ kiforo sila ɛnɛ! 9Nɛ ɛnɛ akarsi lukoso tɛ nde, Abraham nê ngbabafa ɛnɛ! Hazu Sɔ lɛma kifiri hio ta ndɔng gde nɛ hio bezang pɛ Abraham. 10Ɛ gdea kpe ha gunte kari, te ndang ndang fɛt ka way dede waya na, ɛ begɔn yo pi ha we. 11Pɔm, mi gdumsi ɛnɛ ha li hazu osi nde, ɛnɛ kiforo sila. Ma, wi kɛ ka betɛ ha pata mi, wɛnɛ nɛ gasaa pen mi. Mi bo nɛ zioa hazu bul pɛl nakala pɛa na. A begdumsi ɛnɛ ha zang *Nzɔy-Sɔtɛ nɛ ha zang we. 12Wɛnɛ tɛ bo sanga mɛ pɛfi kpalmɔ pɛa. Hapata a besasisi bhandi pɛfi mɔ. A bewesiri hongbongbo kpalmɔ gde ha zang gulo, nɛ a bebesisi sara ha we ka bisi na.»
Jean gdumso Jésus ha li
(Mc 1.9-11; Lc 3.21-22)
13Mɛgi Jésus guotɛ ha Galile nɛ ha pɛ Jean ha li Jourdain hazu nde, Jean agdumsi wɛnɛ. 14Ma, Jean ngoya dola wɛnɛ, a tɔa: «Yo nê mɛ, Jésus, ka lɛma gdumsi mi ha li. Nɛ mɛ tɛ ha pɔm mɛng?»
15Ma, Jésus kiforo wen ha wɛnɛ: «Ka mɛ atakiri tɛ sising na! Hazu dea nde, ɔ ade mɛgi mɛ lɛmsiri mɔ fɛt ka Sɔ ngoya.» Mɛgi Jean mɛkara wen pɛa, 16nɛ gdumso wɛnɛ. Ka Jésus gboa ha li, liswe gboa long, nɛ wɛnɛ zɔka *Nzɔy-Sɔtɛ pɛ Sɔ ha ziloa tuka gbakuli tɛ dung ha zu wa. 17Ma gɛl gboa ha liswe nɛ tɔa: «Wi kɛ nê bewei pɔm ka mi ngoya gdang. Wɛnɛ gdea totɛ ha sila mi.»
বর্তমানে নির্বাচিত:
Matthieu 3: NTGBY
হাইলাইট
শেয়ার
কপি
Want to have your highlights saved across all your devices? Sign up or sign in
© Societe Biblique en Centrafrique
