Matthieu 12

Jésus nê wan hazu *swe ɔmtɛ

(Mc 2.23-28; Lc 6.1-5)

1Ha ngimɔ ɛngi Jésus gɔna ha zang fɔ kpalmɔ ha swe ɔmtɛ. Nɛ wɔ dea hio *wan-yambimɔ pɛa, nɛ mbwa bhio ma kpalmɔ yɔng. 2Ka hio *Farizien zɔka mɛgi, mbwa tɔa ha Jésus: «Pangay, hio wan-yambimɔ pɛ mɛ ha dea mɔ ka *mbonga pɛ ɔ tɔa nde, ɛ ade yo ha swe ɔmtɛ na.»

3Jésus kiforo wen ha mbwa: «Ɛnɛ tɛ tɔl mɔ ka David nɛ hio wi pɛa bade ha ngimɔ ka mbwa dungɔ nɛ wɔ, na nde? 4A lea twa Sɔ hinɛ hio wi pɛa, nɛ mbwa yɔnga mampa ka ɛ haa nɛ sadaka kari, ngase ka mbonga tɔa nde, ma gele wi tuka mbwa ayɔng yo na, kanɛ hio wan-hasadaka sɔna. 5Hio wan-hasadaka ha dea tom ha zang *gasa twa Sɔ ha swe ɔmtɛ fin. Ngase ɛngi kita lɛm ba mbwa na. Bo nê ɛnɛ tɔla mɛgi ha zang mbonga pɛ Moïse, na nde? 6Ma, mi tɔ ha ɛnɛ nde, mi hakɛ nɛ zioa pen gasa twa Sɔ. 7Sɔ tɔa ha takarata pɛa: ‹Mi ngoya nde, ɛnɛ ade kobhe tɛ wi, bo nê sadaka na.› Ka bo se nde, ɛnɛ aing gotoa, ki ɛnɛ tɛ gɔn kita sungiri nɛ hio wan-ngabhala nu na. 8Mi, *Bewei pɛ Wi nê wan hazu swe ɔmtɛ.»

Jésus kpasasa wan-yɔmba kɔ

(Mc 3.1-6; Lc 6.6-11)

9Ka Jésus pena haki, a lea ha ma *twa gɔ Sɔ. 10Haki ma wi ang nɛ yɔmba kɔ. Hio ma wi ka dungɔ ha kio wal mɛ fundi Jésus, ana wɛnɛ: «*Mbonga pɛ ɔ haa wal nde, ɛ akpasisi wan-zɛlɛ ha *swe ɔmtɛ nde?» 11Nɛ Jésus kiforo wen ha mbwa: «Ha soko ɛnɛ, ka ma wi nɛ ndanga sami ndang sɔna, nɛ ka sami ɛngɛ teka ha zang kɔ ha swe ɔmtɛ, wɛnɛ lɛm gbosisi wɛnɛ ha dɛl, na nde? 12Ma, bo nɛ wi nɛ zioa pen sami, na nde? Mɛgi mbonga pɛ ɔ ha wal mɛ de dedemɔ ha swe ɔmtɛ.»

13Nɛ Jésus tɔa ha wan-yɔmba kɔ: «Yafifi kɔ mɛ!» Wɛnɛ yafafa, nɛ kɔ wa kiforo nɛ dedea tuka mbinga. 14Nɛ hio *Farizien ndɔng gboa nɛ bhɔngiri wen nde, mbwa agbɛ Jésus.

Jésus nê wan-tom ka Sɔ weka

15Ka Jésus ingɔ wen ɛngɛ, a laka bhandi ɛngi gde. Giliwi ndara wɛnɛ, nɛ a kpasasa hio wan-zɛlɛ fɛt. 16Nɛ wɛnɛ mboa nu mbwa nɛngaya nde, ka mbwa agbasi wɛnɛ na. 17A dea mɛgi hazu lɛmsiri wen ka Sɔ batɔ se nɛ wal nu *wan-tɔkuliwen Esaïe:

18«Wi ɛngɛ nê wan-tom pɔm ka mi weka, mi ngoya wɛnɛ gdang nɛ mi de totɛ tɛ wa. Mi begde *Nzɔy-Sɔtɛ pɔm ha zu wa, nɛ wɛnɛ beosi nzeng wal deamɔ ha hio kandɔ ka bo nê *zuife na.

19Wɛnɛ lɛm gdɔri nɛ mɔy hinɛ hio wi na. Nɛ a lɛm tɔ wen nɛ ngagɛl ha zang dɛl na.

20Wɛnɛ lɛm gbin mɔka wi ka dung tuka suo sisongo na. Nɛ a lɛm bisi mɔka wi ka dung tuka bebe we lamba na. A bede mɛgi kanɛ wɛnɛ danga zu hio wi nde, mbwa amɛkiri nzeng wal deamɔ pɛ Sɔ.

21Nɛ hio kandɔ fɛt, begde tazu mbwa ha tɛ wa.»

Jésus kpasasa wan-gdɔka nu

(Mc 3.22-30; Lc 11.14-23)

22Hapata ɛ kuo ma wi tɛnɛ ha pɛ Jésus. Wɛnɛ nê wan-gdɔka li nɛ wan-gdɔka nu hazu gdanga sɔtɛ ha zang tɛ wa. Jésus kpasasa wi ɛngɛ, nɛ wɛnɛ angara zɔka mɔ nɛ wola mɔ. 23Mɛgi hio giliwi yaksa nɛ mbwa tɔa: «Wi kɛ bo nê *Bewei pɛ David na nde?»

24Ma, ka hio *Farizien zea hio wi ha tɔa mɛgi, mbwa tɔa: «Wi kɛ lɛm yin gdanga sɔtɛ sɔna nɛ ngatɛ pɛ *Satan, wan-zu hio gdanga sɔtɛ.»

25Ma, Jésus ingɔ takaramɔ pɛ mbwa nɛ wɛnɛ tɔa ha mbwa: «Kandɔ fɛt ka kɛtini soko betukili. Nɛ le nɛ nugala fɛt ka kɛtini soko lɛm bhɔn na. 26Ka Satan yin Satan, yo osi nde, a kɛtana soko tɛ wa nɛ pɛa tɛ. Mɛgi kongakandɔ pɛa bebhɔn fin mɛng? 27Nɛ ka bo se nde, mi ayin hio gdanga sɔtɛ nɛ wal ngatɛ pɛ wan-zu gdanga sɔtɛ, hio wi pɛ ɛnɛ yin pɛ mbwa nɛ ngatɛ pɛ o? Mɛgi yo nê mbwa nɛ pɛ mbwa tɛ ka osi nde, ɛnɛ tɔa wen dalo. 28Ma, ka mi yin gdanga sɔtɛ nɛ ngatɛ pɛ *Nzɔy-Sɔtɛ pɛ Sɔ, yo osi nde, *Kongakandɔ pɛ Sɔ hɔa ha soko ɛnɛ kari.

29«Wanzu lɛma le twa pɛ ngawi nɛ kay hio toy pɛa mɛng? Sɔna ka wɛnɛ sanga ngawi ɛngɛ sɔngsi ing, ki wɛnɛ bekay toy pɛa.

30«Wi ka bo hinɛ mi na, wɛnɛ sungiri mi. Nɛ wi ka ndɛm mɔ hinɛ mi na, wɛnɛ ha panzaka mɔ. 31Mɛgi, mi tɔ ha ɛnɛ nde, Sɔ lɛma bisi *sɛmbɔ pɛ hio *wan-de gdangamɔ nɛ pɛ hio wan-fɛngsi wɛnɛ fɛt. Ma, Sɔ lɛm bisi sɛmbɔ pɛ wan-fɛngsi Nzɔy-Sɔtɛ na. 32Nɛ ka ma wi tɔ gdanga wen sungiri mi, *Bewei pɛ Wi, Sɔ lɛma ha *tiso ha wɛnɛ. Ma, ka ma wi tɔ gdanga wen sungiri Nzɔy-Sɔtɛ, Sɔ lɛm ha tiso ha wɛnɛ na. Ngase ha nzan ɛngɛ, ngase ha mbombe nzan ka betɛ.»

Te hinɛ wayaa

(Lc 6.43-45)

33«Ka te nɛ dedea, wayaa bedung nɛ dedea. Nɛ ka te nɛ gdangaa, wayaa bedung fin nɛ gdangaa. Hazu ɛ ing te nɛ wal wayaa. 34Ɛnɛ, kul pɛ da gɔk! Ɛnɛ nê gdanga wi, mɛgi ɛnɛ lɛm tɔ dede wen ndang na. Hazu wi tɔ sɔna nɛ wen mɔ, ka don zang sila wa. 35Dede wi gbosisi nɛ dedemɔ ka don zang sila wa. Nɛ gdanga wi gbosisi nɛ gdangamɔ ka don zang sila wa. 36Ma, mi tɔ ha ɛnɛ nde, ha swe kita pɛ Sɔ, hio wi betɔ olo nu mbwa hazu tum wen fɛt ka mbwa batɔ. 37Lɛm nɛ wal wolamɔ pɛ mɛ, Sɔ beba mɛ tuka *nzeng wi, mana a begɔn kita ba mɛ.»

Hio wi ana *mɔweka

(Mc 8.11-12; Lc 11.29-32)

38Hapata, hio ma *wan-osi mbonga nɛ hio ma *Farizien tɔa ha Jésus: «Wan-osimɔ, ɔ ngoya nde, mɛ ade ma mɔweka ka osi nde, yo nê Sɔ ka tomsi mɛ.»

39Jésus kiforo wen ha mbwa: «Hio wi mɔ ngimɔ ɛngɛ nɛ gdangaa! Mbwa bo nɛ mboazu ha li Sɔ na, ma, mbwa ha ana mɔweka. Sɔ lɛm de ma mɔweka ha mbwa fin na, kanɛ mɔweka pɛ *wan-tɔkuliwen Jonas. 40Gbesi tuka Jonas dea yala tar ha zang gasa kɔyɔ, mi, *Bewei pɛ Wi, bede fin yala tar ha si nu. 41Ha swe kita pɛ Sɔ, hio wi mɔ kandɔnu Ninive begu bin tɛ, nɛ mbwa bekɛ wen sungiri hio wi mɔ ngimɔ ɛngɛ. Hazu hio wi mɔ Ninive kiforo sila mbwa, ka mbwa zea bulowen pɛ Jonas. Ma, mi ka dung hakɛ, mi pena Jonas. 42Nɛ *kongapora mɔ bhoko mɔ kandɔnu Saba fin begu bin tɛ, nɛ a bekɛ wen sungiri hio wi mɔ ngimɔ ɛngɛ. Hazu wɛnɛ guotɛ nɛyɛa tɛ ha zea wen mbaramɔ pɛ Salomon. Ma, mi ka dung hakɛ, mi pena Salomon.»

Gdanga sɔtɛ ka gboa ha tɛ wi, lɛma kifiri fin

(Lc 11.24-26)

43«Ka ma gdanga sɔtɛ gboa ha tɛ ma wi, a bendoti ha kpɛnu hazu ki bhandi ɔmtɛ. Nɛ ka wɛnɛ kpa bhandi na, 44a betɔ nde, a bekifiri ha mɔa bhandi pɛa. Nɛ ka wɛnɛ kiforo, a kpaa zang twaa nɛ gomboa nɛ saa, ka ɛ bhɔksa nɛdedea. 45A benɛ nɛ sa hio gdanga sɔtɛ mɔrkɔ zanga bwa, ka dung nɛ gdangaa pen wɛnɛ. Mbwa bekifiri gbesi nɛ de le ha zang tɛ wi kɛ. Hapata, dungɔ pɛ wi ɛngɛ tɛ bo nɛ gdangaa pen mɔ sɔngsi. Yo bedung gbesi nɛ hio gdanga wi mɔ ngimɔ ɛngɛ.»

Hio ya nɛ nana mɛ Jésus

(Mc 3.31-35; Lc 8.19-21)

46Ka Jésus boka ha wolamɔ ha hio giliwi, nana wa nɛ hio ya wa hɔa tɛ dung ha dɛl. Mbwa kio wal mɛ wolmɔ ha wɛnɛ. 47Ma wi tɔa ha Jésus: «Nana mɛ nɛ hio ya mɛ hakɛ ha dɛl. Mbwa ngoya wolmɔ ha mɛ.» 48Nɛ Jésus kiforo wen ha wi ɛngɛ: «O nê nana mi nɛ hio ya mi, o nde?» 49Nɛ wɛnɛ osa kɔ ha tɛ hio *wan-yambimɔ pɛa, nɛ tɔa: «Ɛnɛ zɔk, nana mi nɛ hio ya mi hakɛ. 50Hazu wi ka de mɔ ka Bafa mi ha zang ngɔn ngoya, wɛnɛ nê ya mi mɔ bewei, mɔ bebhoko, nɛ nana mi.»

বর্তমানে নির্বাচিত:

Matthieu 12: NTGBY

হাইলাইট

কপি