Luka 11

Yesu osambizya molombela

(Mt 6:9-15; 7:7-11)

1Nsita iyakine Yesu enzolombela pa malo payakine. Pecisilizya, msambili wake muyakine emusenga kuti, “Asikulu, tisambizyeni kulomba, ngani Yohane esambizya asambili ŵake.”

2Yesu elaŵila kuti, “Pamulomba mwakuti,

‘Atata,

zina yanu ituŵishiwe.

Ufumu wanu uwele.

3Mutipe lelo cakulya casu ca lelo.

4Mutilekelele viyipa vasu,

pakuti nase soti tulekelela aliyense woticimwila.

Musazomezye kuti tiyezyewe.’”

5Eŵawuzya soti kuti, “Ni ŵani mwa mwewo akuya ku ngʼanda ya muyake pakati pa usiku, nomuwuzya kuti, ‘Wewo muyangu, nizyamikeko mikate itatu. 6Kwafwika wotemweka wangu, ali pa ulwendo, lomba niliye cakuti ningamupe.’

7“Koma wa mu ngʼanda mwala noyasuka kuti, ‘Osanivuta, navalako kale ku mulyango, nipo newo na ŵana ŵangu, talala kale ningaukelini soti kuti nikupe mkate.’ 8Cendi nulaŵilisha kuti awuke nomupa, osati cikomo ca wotemweka wake, koma cikomo ca nthina ya wala munthu osenga, nipo azeamupe vonse valiye.

9“Tetyo, nukuwuzyani kuti: Sengani nipo azeakupeni. Sakilani nipo mufwane. Konkhoshani, nipo azeakuvulilenkoni. 10Pala munthu aliyense osenga, niye opokela, osakila, niye ofwana, nipo wamene okonkhosha, niye ovuliliwa.

11“Ni ŵani mwa mwewo aziwisi, mwana wake akasenga saŵi, mu malo momupa saŵi yeve omupa njoka? 12Keno akasenga lungu, yeve nomupa cinkhanila? 13Tetyo, keno mwewo, noyipa kwanu uku, muziŵa kupa ŵana ŵanu vitwalo viweme, nanji Atata ŵa Kululu, angakangiwe tyani kutwala Mzimu Mtuŵa kwa ŵala oŵasenga?”

Yesu na Belezebule

(Mt 12:22-30; Mk 3:20-27)

14Nsiku iyakine Yesu enzofumya ciŵanda colesha munthu kulaŵila. Ciŵanda cala pecefuma, munthu enzolaŵilalini etatika kulaŵila, mwakuti ŵanthu anyinji enze pamene apo ekanganishiwa ngako. 15Koma ayakine mwa ŵeve elaŵila kuti, “Nikufumila kwa Belezebule, mkulu wa viŵanda, kwakufumya mphamvu yofumyila viŵanda.” 16Ayakine popangwa kumuyesa, emusenga kuti aŵawoneshe ciziŵikilo cokanganisha cofumila Kululu.

17Koma Yesu eziŵa malingililo ŵawo, tetyo eŵawuzya kuti, “Ŵanthu ŵa mu ufumu uliwonse akatatika kuwukilana, ufumu ŵala usila. Nipo mu banja akatatika kukangana banja yala yupasuka. 18Nipo keno ŵa Satana otatika kuwukilana, ufumu wake ungakose tyani? Pala mwewo mukuti newo nufumya viŵanda na mphamvu ya Belezebule. 19Keno newo nufumya viŵanda na mphamvu ya Belezebule, nga asambili wanu ovifumya na mphamvu ya ŵani? Ni cikomo cake asambili ŵanu niye ŵatiazekupinguleni kuti nimwe woyifya. 20Koma keno newo nufumya viŵanda na mphamvu ya Mulungu, niye kuti Ufumu wa Mulungu wawela pali mwewo.

21“Munthu wotangʼa keno olonda ngʼanda yake ali na vida va nkhondo, katundu wake unkhala wocingiliziŵa kwa akawalala. 22Koma pakawela muyakine wa mphamvu zinyinji, nocimfya, olonda vida venzomekelapo, noyaŵanisha katundu wamene ŵapoka.

23“Munthu wosakatizyana na newo, niye kuti osushana nane. Nipo wosaniyavya kuwunganisha, niye kuti yeve ni womwazya.”

Ciŵanda cowelela mu munthu

(Mt 12:43-45)

24“Ciŵanda cikafuma mu munthu, cuyenda–yenda ku malo kuliye manzi, kusakila ku malo kopumulilako. Keno cuŵafwanalini, culaŵila kuti, ‘Nuwelela ku ngʼanda kwangu kwenifuma.’ 25Tetyo, cikafwika, cufwana mu ngʼanda mwala muli mopyela na mowamya luweme. 26Pamene apo cutola viŵanda viyakine visanu na viŵili, vupula cove, nipo vonse vuloŵa nonkhazikika mwamene umo. Tetyo, unkhalo wa munthu wala ukuŵa uyipa kupula unkhalo wake wotatika.”

Kulemela kwendi

27Yesu penzolaŵila ivi, mwanakazi muyakine pakati pa ŵanthu anyinji ŵala ekweza malizu nomuwuzya kuti, “Ni woshukishiwa mwanakazi emuvyalani nomunyoshani.”

28Koma Yesu elaŵila kuti, “Woshukishiwa ngako ni ŵanthu akumvwa Malizu ŵa Mulungu nocita vakulaŵila.”

Ŵanthu osenga ciziŵikilo cokanganisha

(Mt 12:38-42; Mk 8:12)

29Ŵanthu penzopakila–pakila, Yesu etatika kulaŵila kuti, “Ŵanthu ŵa luko ino ni ayipa, opangwa kuwona ciziŵikilo cokanganisha. Koma aciwonelini ciziŵikilo ico, kufumyako cala ca Mneneli Yona. 30Ngani Yona wala enze ciziŵikilo ku ŵanthu ŵa ku Ninive, tetyo soti Mwana wa Munthu azaŵe ciziŵikilo ku ŵanthu ŵa luko ino. 31Pa nsiku ya cipingulo mfumukazi ya ku mmwela yala ikawuke pamo na ŵanthu ŵa luko ino, noŵasusha. Pala yeve ifumila ku nsilililo ya calo ca pansi kuzokumvwa volaŵila va nzelu va mfumu Solomoni. Nipo pano pali wopula Solomoni. 32Pa nsiku yopingula ŵanthu ŵa ku Ninive ŵala azeawuke pamo na ŵanthu ŵa luko ino, noŵasusha. Pala eyaluka mtima, pecimvwa kuŵilizya kwa Yona. Pano pali wopula Yona wamene.

Nyale ya muŵili

(Mt 5:15; 6:22-23)

33“Munthu akayasha nyale, oyiyikalini mu cipinda ca pansi keno kuyivwinikila na nongo. Koma oyiyika pa malo powonekela, kuti ŵanthu oloŵa mu ngʼanda mwala awone kuŵala kwake. 34Menso ŵako niye nyale yosanikila muŵili wako. Keno menso ŵako ali luweme, mu muŵili mwako monse mukuŵa kuŵala. Koma keno menso ŵako alilini luweme, muŵili wako wonse unkhala mu mfinzi. 35Cenjelani kuti kuŵala kuli mwa wewo kosati kuyaluke mfinzi. 36Keno kuŵala kuŵa mu muŵili monse, paliye mfinzi paliponse, apo muŵili wonse unkhale woŵala, ngani mwayusanikila nyale noŵala kwake.”

Yesu okalipila Afalisi na kaswili ŵa Matetulo

(Mt 23:1-36; Mk 12:38-40; Lk 20:45-47)

37Yesu pecisilizya kulaŵila, Mfalisi muyakine emuyita kuti akalye naye. Tetyo, Yesu eloŵa mu ngʼanda nonkhala polyela. 38Mfalisi wala ekanganishiwa powona kuti Yesu etatika kulya osakonkha mwambo wawo wosamba mu manja.

39Koma Asikulu emuwuzya kuti, “Mwewo Afalisi musuka kunja kwa nthumo na mbale, koma mkati nimwe wozula na vakuzitemwa na viyipa. 40Nimwe ŵanthu opusa! Kansi Mulungu wamene epanga va kunja, ni yevelini epanga soti va mkati? 41Potwala vaulele ku wozingwa, mutwala vamene vili mkati, niye pamene apo vanu vonse vunkhala vituŵa.

42“Muli na shamu, mwewo Afalisi, cikomo mutwala ca kumi ca tumbuto tonunkhila, ca tumbuto twa mu dimba twa mtundu uliwonse. Koma muyikakolini mtima kucita cilungamo, keno kutemwa Mulungu. Eee, mutwale cendi ca kumi kwa Mulungu, koma mwenzowamila kucita ivi osasiya viyakine. 43Muli na shamu, mwewo Afalisi, cikomo mutemwa mipando ya mcinzi mu kacisi wa Ayuda, nipo kuti ŵanthu awokupani moni mwa mcinzi pa misika. 44Muli na shamu, cikomo muli ngani manda osaziŵika, ŵamene ŵanthu wokandapo osaziŵa kanthu.”

45Tetyo, kaswili muyakine wa Matetulo elaŵila kuti, “Asambizyi, mukatatika kulaŵila voteti, mutafulila soti pamo na sewo.”

46Yesu elaŵila kuti, “Muli na shamu soti mwewo akaswili ŵa Matetulo, cikomo mutakulisha ŵanthu katundu wosawusha kuwutakula, pamene mwewo muŵayavyalini na patontho kumo.

47“Muli na shamu, cikomo mumanga vipilala va aneneli, pamene na makolo ŵanu ŵa macezo mwipaya aneneli ŵamene awo. 48Apo musimikizya kuti muzomelezya nchito za makolo ŵanu, pakuti ŵeve epaya aneneli ŵamene awo, mwewo mwenzomanga vipilala vawo. 49Ni cikomo cake nzelu ya Mulungu iciti, ‘Niwatumizyile aneneli na nthumi, koma ŵanthu azeapaye ayakine pali ŵeve, notamanisha ayakine.’ 50Motetyo, luko ya lomba izeiŵe na mlandu cikomo ca aneneli wonse epayiwa kufuma calo ca pansi pecilengewa, 51kutatikila kupayiwa kwa Abelo, mpaka kupayiwa kwa Zakaliya ŵamene epayiwila pa mbali pa guwa pa nthangu pa Ngʼanda ya Mulungu. Ni cendi nulaŵilisha kuti luko ya makono izaŵe na mlandu cikomo ca opayiwa ŵala.

52“Muli na shamu, mwewo akaswili ŵa Matetulo, cikomo mwilonda tanthauzo yovulila ŵanthu nzelu. Koma mwewo muliyoloŵe, nipo mwisinkhilizya enzopangwa kuloŵa.”

53Yesu pecifuma mu ngʼanda mwala, Asambizyi ŵa Matetulo pamo na Afalisi etatika ku mutinkha nomupanikizya na makonsho anyinji, 54colinga cawo cenze comutapa mu kamwa.

বর্তমানে নির্বাচিত:

Luka 11: GMN

হাইলাইট

কপি