GENESIS 11
11
Béíbel hoolyéegi kin wót'ááh yí'áii
1Áko nahasdzáán t'áá si'ą́ą́ nít'éé' bikáa'gi saad bee yádajiłti'ígíí t'ááłá'í nít'éé'. 2Áko áádóó ha'a'aahdę́ę́' joonéełgo Sháínar kéyahgi honíteel léi' bik'ízhnínáago ákwii kéédahojit'į́į́ nít'éé'. 3Áádóó áda'ahizhdoo'niid, Haa'íshą' hashtł'ish ádadiilníiłgo t'áá íiyisí dadiilt'is. Áko hashtł'ish sit'éego tsé silį́'ígíí áádóó łeejin dijé'ígíí bił adazh'niitł'in. 4Áko ánáádazhdoo'niid, Haa'íshą' kin haal'áago áádóó kin wót'ááh yí'áago yá bich'į' niní'áago ádadiilnííł, kót'éego yízhí ayóó át'éii bee nihi'dójíigo ádadiilnííł, áko nahasdzáán bikáa'gi doo da'níłts'ą́ą́'góó nihiidiildah da. 5Áko Bóhólníihii éí diné ba'áłchíní éí kin haal'áii índa kin wót'ááh yí'áii yindaash'nishígíí jidínóoł'įįł biniyé hadahojííle'. 6Áko Bóhólníihii ádííniid, Shoo, diné t'ááłá'í danilį́, áádóó saad t'ááłá'íígíí yee yádaałti', áko díí yaa nídiikai lá, áádóó ha'át'íhígíida deinízingo doo ch'ééh ádeidooł'įįł da lá. 7Haa'íshą' hatahjį' bidadiikah, áko hats'ą́ą́' hazaad ał'ąą át'éego bee yádajiłti'go doo ałk'idazh'diitįįh da dooleeł. 8Áko Bóhólníihii éí nahasdzáán bikáá' da'níłts'ą́ą́'góó tadzooskaigo áhoolaa, áko kin haal'áago ádajilééh yę́ę t'óó bik'izdeeskai. 9Áko Béíbel#11:9 Béíbel jiníigo Hííbrew k'ehjígo hoł dahóółąąd jinínígi át'éego diits'a'. hoosye', háálá Bóhólníihii ákwii hazaad ał'ąą át'éego bee yádajiłti'go áhoolaa, áádóó Bóhólníihii éí nahasdzáán bikáá' da'níłts'ą́ą́'góó tadzooskaigo áhoolaa.
Shem bits'ą́ą́dóó adideezhchíinii
(1Chr. 1:24-27)
10Díí Shem ba'áłchíní náás da'ahílchíihii danilį́: Shem neeznádiin honááhaigo tó nahwéskaidóó naaki nááhaigo Arfáksad há yizhchį́. 11Shem éí Arfáksad há yizhchį́į́dóó bik'ijį' jiináago ashdladi neeznádiin honínáánááhaígíí biyi' haye'ké índa hatsi'ké há niheezhchį́.
12Arfáksad jiináago tádiindóó ba'aan ashdla' honááhaigo Shíílah há yizhchį́. 13Arfáksad éí Shíílah há yizhchį́į́dóó bik'ijį' jiináago dį́įdi neeznádiindóó ba'aan táá' honínáánááhaígíí biyi' haye'ké índa hatsi'ké há niheezhchį́.
14Shíílah jiináago tádiin honááhaigo Ííber há yizhchį́. 15Shíílah éí Ííber há yizhchį́į́dóó bik'ijį' jiináago dį́įdi neeznádiindóó ba'aan táá' honínáánááhaígíí biyi' haye'ké índa hatsi'ké há niheezhchį́.
16Ííber jiináago tádiindóó ba'aan dį́į́' honááhaigo Pííleg há yizhchį́. 17Áko Ííber éí Pííleg há yizhchį́į́dóó bik'ijį' jiináago dį́įdi neeznádiindóó ba'aan tádiin honínáánááhaígíí biyi' haye'ké índa hatsi'ké há niheezhchį́.
18Pííleg jiináago tádiin honááhaigo Ríyu há yizhchį́. 19Áko Pííleg éí Ríyu há yizhchį́į́dóó bik'ijį' jiináago naakidi neeznádiindóó ba'aan náhást'éí honínáánááhaígíí biyi' haye'ké índa hatsi'ké há niheezhchį́.
20Ríyu jiináago tádiindóó ba'aan naaki honááhaigo Síírag há yizhchį́. 21Ríyu éí Síírag há yizhchį́į́dóó bik'ijį' jiináago naakidi neeznádiindóó ba'aan tsosts'id honínáánááhaígíí biyi' haye'ké índa hatsi'ké há niheezhchį́.
22Síírag jiináago tádiin honááhaigo Néíhor há yizhchį́. 23Áko Síírag éí Néíhor há yizhchį́į́dóó bik'ijį' jiináago naakidi neeznádiin honínáánááhaígíí biyi' haye'ké índa hatsi'ké há niheezhchį́.
24Néíhor jiináago naadiin náhást'éí honááhaigo Tíírah há yizhchį́. 25Áádóó Néíhor éí Tíírah há yizhchį́į́dóó bik'ijį' jiináago neeznádiindóó ba'aan náhást'éíts'áadah honínáánááhaígíí biyi' haye'ké índa hatsi'ké há niheezhchį́.
26Áádóó Tíírah jiináago tsosts'ídiin honááhaigo Éíbram áádóó Néíhor índa Héíran há niheezhchį́.
Tíírah bits'ą́ą́dóó adideezhchíinii
27Díí Tíírah ba'áłchíní náás da'ahílchíihii danilį́: Tíírah éí Éíbram áádóó Néíhor índa Héíran há niheezhchį́, áko Héíran éí Lat há yizhchį́. 28Kaldíya dine'é bikéyah biyi' ho'dizhchį́ yę́ęgi Er kin haal'áadi Héíran éí hazhé'é Tíírah t'áá bítséedi dadziztsą́. 29Éíbram áádóó Néíhor t'áá ájíłah hwe'asdzą́ą́ hazlį́į́': Éíbram hwe'asdzą́ą́ éí Sérai wolyé, áádóó Néíhor hwe'asdzą́ą́ éí Mílkah wolyé, éí Héíran yitsi' nilį́; Héíran éí Mílkah áádóó Ískah bizhé'é jílį́į́ nít'éé'. 30Nidi Sérai doo ałchíígóó ba'áłchíní doo hólǫ́ǫ da.
31Áko Tíírah éí haye' Éíbram índa Héíran yę́ę biye', hanálí Lat, áádóó hazháá'áád Sérai éí haye' Éíbram be'asdzą́ą́ nilį́įgo t'áá ła' bizhi'ee dashdiikai; Kaldíya dine'é bikéyahgi Er kin haal'áádóó Kéínan kéyahgóó joonéełgo t'áá Héíran kin haal'áagi jinínáago ákwii kéédahojit'į́į́ nít'éé'. 32Áko Tíírah bíídíiską́ą́dóó naakidi neeznádiindóó ba'aan ashdla' binááhaigo Héírangi daaztsą́.
বর্তমানে নির্বাচিত:
GENESIS 11: NVJOB
হাইলাইট
শেয়ার
কপি
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
