ZEKARIAH 13
13
1Halabangso arni David akhei lapen Jerusalem asor aphan halatum apap pen lapen kangthirthe pen kechamjisi lang amek ingpupo.
2Lapen muluk a-Hemphu pulo, halabangso arni Ne det angbong pen amen-heihei pavedetpo; lasi halatum kaita cheparnonedetpo; lapen Ne det angbong pen montri atum lapen kangthirthe akarjong phlungpo. 3Lapen jongsi anut kaprek montri ason cheklang lote api apo laphan kechopathe atum laphan pupo, “Nang reng nangne, athe Hemphu amen pen nang chobei alam ningjelo;” Lapen api apo laphan kechopathe atum bangso abang kemontri un ahut laphan tokbop po. 4Halabangso arni abangphutin kemontri abang kethek-long ason kemontriji therakpo, kepamanghuji aphan angmi keding ape che-um-edetpo, 5bonta la pupo, “Ne montri kali, ne ke sai ketiki abang; pima ne riso ahut penta longle ne cherailong-lo.” 6Lapen mane abang laphan “Nangnung halahei amek kopilo?” Pu arjulote, “Lahei amek nejirpo ahemsi long-lo,” pu thakpo.
Arnam Abiresak Kevi Aphan Kepathiji Bida Ketho
7Thurnon, O nokjir, Ne biresak kevi atum abe thurnon,
Ne dung karjap abang abe thurnon,
pu muluk a-Hemphu-si kepulo.
“Biresak kevi abangphan areng pasonon,
anke biresak atum pratjampo;
Ne bihek-hak atum abethurpo.#Mat 26.31; Mar 14.27
8 Hemphu pulo, ‘Det adang an phanthom angbong pen phanni virsi thipo,
lapen phanthom pen ephan si rengchotji.
9Lapen la phanthom pen ephan Ne me angkang along phrinsi langpo,
lapen halatum aphan rup kepangthir ason pangthirpo,
lapen ser asat kelang asonsi halatum aphan langpo.
Halatum Ne men aphan hangpo,
lapen Ne halatum aphan thakpo.’ ”
Ne pupo, “Halatum Nerat asolo,”
lapen halatum pupo,
“Hemphu ne-Arnamlo.”
Currently Selected:
ZEKARIAH 13: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
