ZEKARIAH 1
1
Hemphu Amethang Arat Aphan Alanglinat Kechevoithuji Aphan Kehang
1Darias recho kecho hini aningkan nerkep achiklo, Berekiah asopo mate Iddo asupo Jekariah montri along Hemphu ase vangsi pulo,#Ezr 4.24—5.1; 6.14 2“Rat aphan kepathanjisi Jekariah aphan pulo: nangtum aphusar atum aphan Jakongkethe Hemphu aning thipik-lo. 3La apotsi nang halatum aphan punon, Muluk a-Hemphu lasonsi pulo: Nelong nang chiruihurnon, pusi muluk a-Hemphu pulo, lapen Neta nangtum along vangthupo pusi muluk a-Hemphu pulo. 4Nangphusar atum ason cheplangri, aphrang amontri atum halatum aphan hang-olo, ‘Muluk a-Hemphu lasonsi pulo, nangtum kehingno atovar lapen kehingno akam pen che-onon.’ Bonta halatum ano chedende mate ne arjuje, pusi Hemphu pulo 5Nangphusar atum, halatum konatsi do? Lapen montri atum, halatum kaike aphan rengverloma? 6Bonta Ne Neban atum atheke Ne montri atum aphan kepitekang alam lapen Ne keparaitang aron-heihei halatum, nangphusar atum chekok-kedet loma? Lasi halatum aning chiruilo lapen pulo, muluk a-Hemphu etum atovar-heihei lapen akam-heihei keklemji kematha asonthotsi Alangli etum aphan klemtang-lo.”
Montri Losei Heihei Akethek-long
7Darias recho kecho hini aningkan Shebat, kre-isi achiklo, niphai 24 arni, Hemphu ase Iddo asopo Berekiah, asopo Jekariah montri along vangsi pulo, 8“Ne ajosi thek-long-lo, lapen chininon, inut amontri losei ake-ang ardonlo! Alangli mir-herai arong-heihei angbong arjapdingsi do, lapen Alangli nung anat losei ke-ang erring lapen losei kelok ta do.”#Kepa 6.2-8 9Ansi ne pulo, “Lahei kopilo?” Nelipen kechingki apherangke neliphan pulo, “Lahei kopi piloma, neli nangliphan nang paklangpo.” 10Lasi mir-herai arong-heihei angbong karjapding abang neliphan thak-lo, “Hemphu la-heihei pirthe kepalangtoi atumlo.” 11Lapen halatum mir-herai arong-heihei angbong karjapding Hemphu apherangke aphan pulo, “Netum pirthe lang-et-lo, lapen chini iktha, kadokave pirthe adang ing-samri pensi dolo.” 12Lapen Hemphu apherangke pulo, “O muluk a-Hemphu, ni ko-ansi Nangli Jerusalem lapen Judah arongsopi-heihei aputhak jinsosedet poma, lahei aphan Nangli ningkethi ningkan throksi kep dotang-lo?” 13Lapen nelipen kechingki apherangke aphan Hemphu kangjinso lapen lamdok pen thak-lo. 14Lasi neliphan kechingki apherangke neliphan pulo, “Ase pathera hangnon, muluk a-Hemphu lasonsi pulo; Ne Jerusalem aphan lapen Zaion aphan ningdukpik-lo. 15Lapen dorengme adet atum aphan neningthilo; pima Ne chersosi ningthichot bonta halatum an sose Ne monit atum aphan phangnolo. 16La apotsi, Hemphu lasonsi pulo, Ne kangjinso pensi Jerusalem anat chevoithulo, Hadak Ne hemthepi kimpo pusi muluk a-Hemphu pulo, lapen kepun-i arri Jerusalem aputhak hingdetpo. 17Ase pathera hangthunon, muluk a-Hemphu lasonsi pulo: Ne rong-sopi-heihei puthot keplang-kephi pensi paplengsetpo, lapen Hemphu Zaion aning pangsampo, lapen Jerusalem aphan ingvaithupo.”
Chainong Anu-heihei Akethek-long
18Neli ingphun chingthursi lang-lo lapen thek-long-lo, lapen chini iktha, anu hongphli dolo! 19Lapen neli nelipen kechingki apherangke aphan pulo, “Lahei kopilo?” Lapen alangli nethak-lo, “Lahei anu-ke Judah, Israel lapen Jerusalem aphan kepapratsei atum lo.” 20Ansi Hemphu neliphan banghini ahemai paklang-lo. 21Lapen neli pulo, “Lahei atum kopi keklemjisi kevang-lo?” Alangli thak-lo lahei anu-ke Judah atum aphan kepapratsei atumlo, lapen ajok badu amonit ta aphu chingthurthedet-lo, lapen latum ke halatum aphan kepaphereji lapen Judah atum kepapratsei-jisi Judah adet aphan anu kechirung adet-heihei anu kepavirjisi vang-lo.
Currently Selected:
ZEKARIAH 1: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
