MATHIU 2

Nihang Pen Kevang Kethek Kere Atum

1Herod recho arni ahut Judia adet Bethlehem arongsopisi Jisu pirthe hachelo. Lapen nihang anat pen kethek kere atum Jerusalem vangsi pulo, 2“Pirthe kehachemi, Jihudi atum arecho kodaksi doma? Pima nelitum alangli chiklolongso keklangcheng thek-long-lo, lapen alangliphan kangdukjisi nelitum vang-lo.”

3Herod recho labangso alam arjulongsi alangli lapen alanglilong Jerusalem asor anta aning siksakkoilo. 4Alangli det adang kurusar kethe lapen aron thekser atum aphan pangrumpetsi arjulo, “Khristo pirthe kehacheji adim kodakma?”

5Latum alangliphan thaksi pulo, “Ha Judia adet, Bethlehem arongsopi along. Pima ha montri ketok tekang lapuson helo;

6‘Judia adet a-Bethlehem,

nanglike Judia adet kedo arongsopi kethe hei hei angbong akebineilo, lapu kali;

pima nangli pen keja abang vangji,

alangli ne rat, Israel aphan pangriji.’ ”#Mik 5.2

7 # Hos 11.1 Ansi Herod kethek kere atum aphan hangjoisi halabangso achiklo-longso keklangcheng ahut alamjir arju pamelo. 8Lapen latum aphan ha Bethlehem toisi pulo, “Damra labangso a-oso aphan ridam pamenon. Lapen nanglitum la thekdam long-lote neli jokta damsi kardomkhrup thekji aphan neli long chevoira nethan thunon.” 9Latum recho alam arjudetsi damlo, lapen latum la keklangcheng ahut kethek-long achiklolongso latum aphrang aphrang damthusi hala oso kedo adim angdenchit an kele pen sangkok ketik ke dambomlo. 10Halatum chiklolongso thek-longsi aning arong parpik-lo. 11Latum hem lut damsi oso lapen apei Meri aphan thek-long-lo, lapen latum akengphu patongruisi alangliphan ardomlo. Ansi latum akhi atelup chepursi alangliphan ning keme pen ser, hijung aphik lapen kenempru ajangthu adan hei hei pilo. 12Lapen Herod along damthuri pu Arnam ahukum amang pen longthusi latum atovar kaprek pen amethang adet chevoijuilo.

Ijip Adet Kekat

13Latum chevoidet pen mamat Hemphu apherangke Joseph aphan amang pen cheklangsi pulo, “Thurra oso lapen apei aphan cheponra ha Ijip adet katnon, lapen neli nangliphan pupetik ke hadak-le donon; pima Herod ke kepavirjisi oso aphan riji dokdok-lo.” 14Alangli thursi ajo amat oso lapen apei aphan cheponsi Ijip adet kat-lo, 15lapen Herod thithetik an latum hadaksi dobomlo. Lake Hemphu pen ajok ha montri kepu tekang, “Neli neli sopo aphan Ijip adet pen hang-lo,” pu alam kechekokji aphanlo.

Bethlehem A-osomar Atum Aphan Kepathi

16Ansi kethek kere atum alangliphan pachereitang-lo pu chinisi Herod jasemet aning thilo, lapen alangli Bethlehem lapen adung arei kedo ningkan hini arta lapen ningkan hini pen kekom arta pinso a-osomar atum aphan kepavirkoiji ahukum pilo lake alangli alangli long kevang-akethek kere atum pen chiklolongso keklang alamjir karjulong ahut ateng pensi klemlo. 17Ansi Jeremiah montri kepu alam chekok-lo, atheke alangli pulo:

18“Ha Ramah angbong ne kechiru chernap ase arjulong-lo;

Rachel amethang asomar atum pen apot chiru chernap-lo;

alangli aning kepliji aning hanghelo,

athema halatum thikoilo.”#Jer 31.15

Ijip Adet Pen Nangkechevoi

19Herod thilot aphi Ijip adet Hemphu apherangke Joseph aphan amang pen cheklangsi pulo. 20“Thurra oso lapen apei aphan cheponra Israel adet chevoinon, pima kepathijisi oso aphan keri atum thitang-lo.” 21Lapen alangli thursi oso lapen apei aphan cheponsi Israel adet chevoilo.

22Bonta Arkelaus si apo Herod adular Judia adet recho cholo pu arju longsi alangli hadak kedamji pherelo. Lasi amang pen hukum kelong atengsi Galili adet damthulo. 23Alangli damsi Nazareth arongsopi dodamlo, atheke alangliphan “Nazareth asor pusi hangji” pu montri kepu alam ateng pachekok-lo.#Mar 1.24; Luk 2.39; Jon 1.45

Currently Selected:

MATHIU 2: KARBIBSI

Highlight

Copy