LUK 18
18
Ahok-he Akangsai Abang
1Lapen latum kaiketa ning runhuphedet-ra ardomver nangji pu kethanjisi Jisu lamlir eson thanlo. 2“Erong arongsopi inut kangsai abang dolo; alangli Arnam aphan pherere lapen monit aphanta aman pipe. 3Lapen halabangso arongsopi angbong inut ahemepi alangli long vang versi pulo, ‘Nephan kekosor abang pen nepajoknon.’ 4Penang ahut an alangli la keklemji aning hanghe det-lo, bonta aphisi alangli amethang aning arlo chepulo, ‘Ne Arnam aphan pherere, lapen monit aphan aman pipe setta 5labangso ahemepi nephan pasungver apotsi ne alangliphan kepajokji aphan langpo. Jongsi ne klemklete alangli vangbomsi nephan pasiksak pikji!’”
6Lapen Hemphu pulo, “Hala kehingno akangsai abang kepu alam arjutha. 7Tangte nonke, Alangli methang amonit atum ajo, anerlota Alangliphan kechoningriver atum aphan Arnam abe dundedetsi ingsaise-detjima? Mate Alangli halatum aphan kerapji pader poma? 8Ne nangtum aphan nangpulang, Alangli abe dunsi ingsai dapprangji lapen halatum aphan pajokji. Bonta Monit a-Sopo kevangji ahut alangli pirthe athak kekroi longjima?”
Pharisi Lapen Midu Kerung Abang Alamlir
9Lapen amethang mamat mesen pu kechematha lapen bang aphan kehijim atum aphan Jisu labangso alamlirta thanlo, 10“Ahut isi bang hini amonit Kardomhemthepi arlo kardom damjisi damlo: inut ke Pharisi lapen inut ke midu kerung abang.
11“Pharisi achar arjapthersi ame-thang aphan chardom pilo, ‘O Arnam, neke bang atum ason thakthak, bang amar kethi, kechobei, mate beisa keklem abang kali apotsi ne nangphan nangchorolo. Ne nangphan nang-chorolo atheke, neke labangso amidu kerung abang asonta kali. 12Ne, erui angbong nini an humbomlo, lapen nemar kelong an angbong phan kep pen ephan nangphan pilo.’
13“Bonta midu kerung abang achar arjapsi lapen sining anat langhaihe-detsi aning chetengbomsi pulo, ‘O Arnam, neke papi abang, nephan ingjinsotha!’ ”
14Jisu puthulo, “Ne nangtum aphan nangpulang, la midu kerung abang aphan helo, lapen Pharisi abang aphan kali, hem kechevoi ahut ke Arnam angno dhoromi pusi lakha det-lo. Pima amethangsi kechepathe abang aphan pabihekji, lapen kechepabihek abangphutin aphan pathedetji.”#Mat 23.12; Luk 14.11
Jisu Osomar Atum Aphan Ahirjume Kepi
(Mat 19.13-15; Mar 10.17-31)
15Jisu kepa-otjisi manene atum osomar alangli long vanlo. Sangho atum halatum aphan thek longsi ingchek-lo, 16bonta Jisu osomar atum aphan hangsi pulo, “Osomar atum aphan nedung pavang longnon, latum aphan khangri, pima Arnam Arat ke lapuson atum arat-lo. 17Labangso alam ning chebi non! Oso ason thakthak Arnam Arat kedengde abang aling ke jonghe setta Arnam arat lutdun longledetji.”
Keplang-o Amonit
(Mat 19.16-30; Mar 10.17-31)
18Inut a-Jihudi keja abang Jisu aphan arjulo. “ O kemesen a-Thanbang, kejut un-e achethe kelongji aphan neli kopi klemvek nangji?”
19Jisu alangliphan pulo, “Nephan kopisi kemesen abang pule nehang loma? Arnam apar ke baduta kemesen abang ave. 20Nangli hukum an chinipet-lo, ‘Beisa akam klemri; Pran ke-en akam klemri; Chonghuri, kechobei pen badu aphanta adai nep-ri, nangpi nangpo aphan anong pathenon.’”#Keba 20.12-16; Keth 5.16-20
21Halabangso amonit thak-lo, “Neli oso chedap ahut penta la kadokave ahukum kroipetbomlo.”
22Jisu labangso alam arjulongsi alangliphan pulo, “Nangli eson klem nangjilang. Nangli mar do-an jor-et-ra keduk kelak atum aphan tangka pinon, lapen sining athak nangli khi do-oji; anke vang-ra neli phi phi nangdun non.” 23Bonta labangso alam arju longsi alangli ning dukparlo, pima alangli keplang-o abang-lo.
24Jisu alangliphan pulo, “Keplang-o atum Arnam Arat kelutji aphan ko-an akesung! 25Pima keplang-o amonit Arnam Arat kelut aparte, ka-ut ingprim arme kelut joimu.”
26Karjulong atum alangliphan pulo, “Mai! Ante matsi jokthekpoma?”
27Jisu thak-lo, “Monit ke-un-e akam Arnam klem un.”
28Lapen ke Pitor pulo, “Lang iktha! Nangli phi phi kedunjisi netum me-thang methang ahem che-o tang-lo.”
29Lapen Jisu halatum aphan pulo, “Ahok-lo, lapen ne nangtum aphan nangpulang, Arnam Arat pen apot ahem, mate apiso mate akortemar, mate api, apo mate asomar aphan che-o det-lo, 30tangte labangso akai kedo ahut long-oji, lapen mo kevangji akai alangli kejut ahut un-e achethe longji.”
Batai Kethom Aphong Jisu Amethang Kethiji Alam Kechethan
(Mat 20.17-19; Mar 10.32-34)
31Jisu la bang krehini asangho atum aphan cheponsi halatum aphan pulo, “Arjutha! Ili Jerusalem arlu dampo; hadak Monit a-Sopo alamjir montri atum ketok alam an chekokpetji. 32Alangliphan Jihudi kalidet atum arideng hodai detji lapen halatum alangliphan pinremji, patherakji lapen abang athak ingthokji. 33Halatum champre abu pen choksi alangliphan pathiji, bonta nithom arni aphi alangli kethi pen thur thuji.”
34Sangho atum lahei hei alam thangta chinine det-lo; labangso alam athe hei hei halatum pen patu det-lo.
Amek Kave Kechorek Abang Aphan Jisu Kepame
(Mat 20.29-34; Mar 10.46-52)
35Jisu Jeriko kele ahut amek kave abang inut tovar akung ingnisi chohang-lo. 36Alangli armu ake-ongpi kedam arki arjulongsi, athe kopima pusi arjulo. 37Nazareth a-Jisusi labangso atovar kevang, pusi halatum alangliphan thanlo. 38Alangli hang charbusi pulo, “David a-Sopo! Jisu! Nephan ingjinsotha!” 39Aphrang kedam atum alangliphan ingchek-lo, lapen dojoinon pusi thanlo. Bonta alangli ase pathe muchot pen hang charbulo, “David a-Sopo! Nephan ingjinsotha!” 40Lasi Jisu sangkok-lo, lapen amek kave abang alangli dung kevangji aphan hukum pilo. Alangli Jisu adung nanglesi alangli arjulo, 41“Nangli neliphan kopi kepaklemjisi nangli ning kehangma?”
Alangli pulo, “Hemphu, neli kechechar thuji aphan ning hang-lo.”
42Jisu alangliphan pulo, “Tangte, checharnon! Nangli akekroisi nangli-phan pame tang-lo.”
43Halabangso ahut mamat alangli chechar unlo. Armu atum la thekdun longsi Arnam aphan anong pathelo.
Currently Selected:
LUK 18: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
