LUK 13

Aning Kepachiruiji Aphan Aning Keparung

1Halabangso ahut manene atum vangsi Galili asor Arnam aphan kethok kejir ahut Pilat kepathi atum alamjir Jisu aphan thanlo. 2Jisu halatum aphan thak-lo, “Lapuson kethinang apotsi labangso a-Galili asor ke kadokave a-Galili asor apar hingno muchot apapi pusi nangtum matha loma? 3Chenamsi lapu kali, lapen ne nangpulang, nangtum apap pen ning chiruirete nangtumta lasonthotsi thinangpo. 4Hala Siloam apaisong keklijap ahut bang kre nerkep amonit atum thikoilo; latum ke Jerusalem kedo atum an apar hingno muchot pusi nangtum mathaloma? 5Chenam, lapu kali, ne nangtum aphan nangpulang, nangtum pap pen ning chiruirete latum ason thak-thaksi kadokaveta thi nangpo.”

Athe Kepathethe Athebo Arong

6Lapen Jisu lamlir pen thanlo: “Inut amonit adrakha apai beri angbong thebo erong dolo. Alangli athe kerijisi vang-lo, bonta longle det-lo. 7Lasi alangli beri kehon abang aphan pulo, ‘Langtha, ne ningkan kethom dak vangbomlo, lapen labangso athebo athe ribom setta longledet-lo, la pipetnon!’ 8Bonta kehon abang alangliphan pulo, ‘Hemphu, paningkan isi ke pado sinang. Ne akung arei tuksi orpo lapen ho-or pipo. 9La athe patheji mene. Jongsi pathethe tangte nangli pipet tamelo.’ ”

Kesang Arni Jisu Karjap Thekthe Arloso Aphan Kepame

10Arni isi Sabbath arni Jisu Sinagog ahem arlo lam thanbomlo. 11Hadak inut arloso hi-i kepho pen ajok ningkan kre nerkep akeso dolo. Alangli ingkupdisi arjap thekthedet-lo. 12Jisu alangliphan thek longsi alangliphan hang-lo, “Pei! Nangli keso pen joktang-lo!” 13Jisu alangli phuthak ari bat-lo, lapen hala mamat alangli karjap pakengdong-lo, lapen Arnam aphan kero pilo.

14Bonta Jisu Sabbath arni keso abang aphan keso kepame apotsi Sinagog#Sinagog= 4.4 along langnon ahemphu aningthisi rat atum aphan pulo, “Nithrok kam keklemme arni do; labangso angbongle vang-ra keso chepamenon, bonta Sabbath arni kali!”#Keba 20.9-10; Keth 5.13-14

15Hemphu alangliphan thak-lo, “Nang angthin ke-ik atum, nangtum abangphutin setta Sabbath arni amethang methang achainong, mate agadha aroi pen losi lang kepajun damjisi ponbom. 16Tangte, ningkan kre nerkep pen Soitan kekokdong, Abraham asupi Sabbath arni kejok kelongji aron avema?” 17Alangli kethakdun alam pen apot ahotur atum an therakduk-lo, lapen rat atum do-an alangli keklem akemanghumeme akam pen apot aning arong chepilo.

Hanjang Amu Alamlir

(Mat 13.31-32; Mar 4.30-32)

18Jisu arjulo, “Arnam arat kopuson? Ne kopi pensi pangbar-i poma? 19Lake hanjang emu asonlo. Inut amonit hanjang amu ponsi arit rikdamlo. Arong vangsi thengpi cheplang-lo, lapen nampi avo atum aro along atar chepatarlo.”

Thap Alamlir

(Mat 13.33)

20Puthot Jisu puthulo, “Ne kopi pensi Arnam Arat pangbar poma? 21Lake thap asonlo. Inut arloso thap ensi him tonthom kangpet petik ke patip bomlo.”

Bihek Anghap

(Mat 7.13-14,21-23)

22Ansi Jisu rongsopi rongsopi lapen arong arong damsi monit atum aphan thanponbomsi Jerusalem anat dambomlo. 23Mane abang alangliphan arjulo, “Hemphu, kejokji atum ong-e ma?”

Jisu halatum aphan thak-lo, 24“Nanglitum anghap angho bihek anat kelut damjile jasemet chepaduknon; pima penang atum kelut damjisi bor-iji bonta un-edetji. 25Hem ahemphu thursi inghap inghapdetpo; anke nangtum ingtan arjapthersi inghap pachengpo, ‘Hemphu, nelitum aphan inghap ingpu iktha!’ pusi nangtum pupo, alangli nanglitum aphan thakpo, ‘Nanglitum konat pensi kevangma, neli chinine!’ 26Ansi nanglitum thakthupo, ‘Ilitum chorap rap-lo, junrap rap-lo, lapen nangli nelitum arongsopi angbong lam ta thanlo!’ 27Bonta alangli puthuji, ‘Nanglitum konat pensi kevang, lake neli chinine! Nedung pen damnon, kehingno keklem atum!’#Lun 6.8 28Hadak Abraham, Isaak lapen Jakob lapen montri atum do-an Arnam Arat angbong doji, lapen nangtum aphan ke ingtansi varchorji; lason kechethek-long ahut nangtum chiru chernapsi aso chardengji!#Mat 22.13; 25.30 29Monit atum nihang, nichi lapen nirep, nitur pen vangsi Arnam arat angbong kechopi amei along ingniji.#Mat 8.11-12 30Lapen non kepaphi atum paphrangji, lapen non kepaphrang atum paphiji.”#Mat 19.30; 20.16; Mar 10.31

Jisu Jerusalem Aphan Kanghon

(Mat 23.37-39)

31Halabangso ahut mamat manene a-Pharisi atum Jisu along vangsi pulo, “Nangli dak pen katnon, pima Herod nangliphan kepathiji aning hang-lo.”

32Jisu halatum aphan thak-lo, “Damra halabangso asirung aphan than non: ‘Neli pini panapta hi-i atum aphan phlungbom, lapen keso atum aphan pamebom jilang, lapen nithom arni anke neli kam plengpo.’ 33Bonsetta neli pini, penap lapen penapdik angbong damnangji, pima Jerusalem along apar ke akaprek adim ke badu amontrita thi nangne.

34“O Jerusalem, Jerusalem! Nang montri atum aphan pathilo, Arnam nang ketoitang atum aphanta nangtum arlong pen arbubop-lo! Vopi avengkong arum amethang asomar kechenom asonthotsi ne batai ko-ansi nang somar atum aphan kepangrumbomjisi nening hang-lo, bonta nang ne paklem longle! 35La apotsi nang a-Kardom ahem aphan ke obup po. Ne nangtum aphan nangpulang, ‘Hemphu amen pen kevang abang ahirjume atheng-lo’ pu nangtum pupetik ke nangtum nephan thekthu longledetji.”#Lun 118.26; Jer 22.5

Currently Selected:

LUK 13: KARBIBSI

Highlight

Copy