JON 11

1Lazarus pu Bethani arongsopi asor inut sodet-lo. Bethanike Meri lapen akorte Martha atum arongsopilo.#Luk 10.38-39 2Hemphu akeng athak jangthu nempru kedung lapen achu pen keven abang ke labangso a-Meri helo. Kesodet abang, Lazarus-ke labangpi acheklepolo.#Jon 12.3 3Lasi hala angjir atum Jisu adung monit toisi papulo, “Nangli kechinghon abang sodet-lo, Hemphu!”

4Jisu labangso alam arjulongsi pulo, “Labangso akeso penke Lazarus thithe. Bonta labangso pen ajok Arnam a-Sopo anong ketheji aphan Arnam adak atur keklangjisi la plang-lo.”

5Martha, Martha akorte Meri lapen Lazarus aphan Jisu chinghon-o. 6Bonta Lazarus sodet pu arjulong-lok aphita alangli aphrang adim nini dothukok-lo. 7Ansi alangli amethang asangho atum aphan pulo, “Etum Judia adet damthulonang.”

8Asangho atum alangliphan thakdunsi pulo, “Nonhetsi Jihudi atum nangliphan arlong pen nangkarbuji abidi rilo. Tangte nangli kopusi hadak kedamthu-jilangma, Kuru!”

9Jisu thakdunsi pulo, “Arni isi angbong porphai krehini do, kalima? Anerlo akethe-ang angbong kedam abang ke patekungke. Pima alangli labangso apirthe akethe-ang thek-long. 10Bonta ajole damlote alangli patekungji, pima alangli long akethe-ang ave.” 11Jisu labangso alam pudet aphi puthulo, “Etum ajirpo, Lazarus amek jangtang-lo. Bonta ne damsi alangphan ingthurdampo.”

12Jisu asangho atum thakdunsi pulo, “Alangli ameksi kejangchot-le pute methuji Hemphu!”

13Lazarus thitang-lo pu alamsi Jisu pudamlo. Bonta asangho atum ke Lazarus amek kejang binong alamsi mathadamlo. 14Lasi Jisu halatum aphan than pachinidak-lo, “Lazarus thitang-lo. 15Bonta neke nangtum pen apot chehok-lo, pima nangtum kekroithekji aphan ne hadak alangli long kavedet ke mesenlo. Da etum alangli long damlonang.”

16Lasi kecherop pu abang a-Thomas ke hala akaprek asangho atum aphan pulo, “Da ilita dunra alangli long thidunlonangho.”

Kethi Pen Kethur Lapen Chetheke Jisu Helo

17Jisu nangkele ahut anke Lazarus aphan kepipdamtang niphli an dotang-lo pu alam chinilo. 18Bethani arongsopi ke Jerusalem pen kehelo mali hini anta avechot. 19Acheklepo kethi pen apot Meri lapen Martha aphan aning kepaplijisi Judia asor ake-ongpi atum hadak vang-lo.

20Ansi Jisu nangleji dokdok-lo pu alam arjulongsi Marthake alangliphan kangthumdunjisi hong nangbarlo. Bonta Meri ke hem arlosi dokok-lo. 21Ansi Martha Jisu aphan pulo, “Nanglile do asonte neli chekle thithedetji apot-lo, Hemphu! 22Bonta nonta nangli kehang aling Arnam nangliphan nangpiji, lake neli chini.”

23Jisu thakdunsi pulo, “Nangli cheklepo rengthupo.”

24Martha thakdunsi pulo, “Mo kejut arni alangli rengthusi thurji, lake nelita chinilo.”

25Jisu alangliphan pulo, “Kethi pen rengthusi kethur lapen chetheke neli helo. Neliphan kekroi abang aling ke thi setta rengthuji, 26lapen kereng-bomlang lapen neliphan kekroi abang aling ke kaiketa thithedetji. Nangli la kroiloma?”

27Labangpi thakdunsi pulo, “Kroilo Hemphu! Pirthe athak kevangji abang, Arnam a-Sopo, Khristo ke nangli helo, neli la kroilo.”

Jisu Kechiru

28Martha labangso alam pudet aphi damsi akorte Meri aphan hang-joisi pulo, “Kuru nangletang-lo; alangli nangphanta nangrilo.” 29Meri labangso alam karjulong pen mamat thurseraksi alangli pen kechetongjisi nangbarlo. 30Jisu halabangso ahut anta rong angbong nanglelelang, Martha pen kechetong adimsi dolang. 31Hem arlo Meri aphan aning kepapli amonit atum ke Meri thurseraksi lapen hem pen kebar thek-longsi alangli phi phi dunlo. Pima alangli thiri along kechirudamjisi hadak pen barlo pusi halatum mathalo. 32Meri Jisu kedo adim nanglesi Jisu aphan thek-long-lok pen alangli kengri domkhrup-lo lapen pulo, “Nanglile do asonte neli cheklepo thithedetji apot-lo Hemphu!”

33Meri kechiru, lapen Meri along nangkedun atumta kechiru thek-longsi Jisuta aning dukdunlo. 34Ansi alangli halatum aphan pulo, “Nanglitum alangliphan konatsi kebidamlo?”

Halatum thakdunsi pulo, “Vang-ra nanglangtha Hemphu!”

35Jisu chirulo. 36Monit atum pulo, “Langtha, alangli alangphan ko-an kechinghon!”

37Halatum angbong manene atum pulo, “Hala amek kave abang aphan amek kepachechar abang ke alangli helo, kalima? Lazarus kethithedetji aphanta alangli klem unji apot-lo, kalima?”

Lazarus Aphan Keparengthu

38Jisu aning runhupsi thiri along damlo. La Lazarus aphan kebi adim ke longkulo, lapen amangho along arlong bithip-lo. 39Jisu hukum pisi pulo, “Arlong tereknon.”

Hala kethitang abang angjir, Martha pulo, “Nonke nemthuhakpo Hemphu. Alangliphan ladak kebitang niphli an dotang-lo!”

40Jisu alangliphan pulo, “Nangli kroi lote nangli Arnam adak atur thek-longji pusi neli nangliphan nangpulo, kalima?” 41Ansi halatum arlong terek-lo. Jisu angsong anat langdingsi pulo. “O Po, nang nelam karju apot ne nangphan rolo. 42Nang kaiketa nelam arjuver, lake ne chinilo. Bonta nangsi nephan neketoi pu ladak karjapphrong amonit atum kekroithekji aphansi ne la pulo.” 43Labangso alam pudet aphi alangli ase kethe pen hangsi pulo, “Lazarus, ingtan nangbarnon!” 44Ansi Lazarus ingtan nangbarlo. Alangli ri lapen akeng hei hei ke keper-i ape pen perhet-lo, lapen amahang ke pe so pen phungthip-lo. Jisu halatum aphan pulo, “Alangphan phrira padamnon.”

Jisu Aphan Kepathijisi Kechingvai

(Mat 26.1-5; Mar 14.1-2; Luk 22.1-2)

45Meri along kevang angbong ake-ongpi atum ke Jisu keklem akam thek-longsi alangliphan kroilo. 46Bonta halatum angbong manene atum ke Pharisi atum along damsi Jisu keklem akam alam thandamlo. 47Lasi kurusar kethe atum lapen Pharisi atum kangsai amei pangrumsi pulo, “Labangso amonit ke ason ason akemanghumeme akam klem-olo. Ili kopisi klem apot-loma? 48Alangliphan lason paklem longbom lote kadokaveta alangliphan kroipetpo. Anke Roman atum angbong keja atum vangsi Kardomhemthepi lapen ilitum akhei aphan pavirdetpo!”

49Bonta halatum angbong pen Kaiaphas pu Kurusar Kethenei abang halatum aphan pulo, “Nanglitum lapu-an akeluma? 50Kadokave kevirdetji apar kadokave arat apharman inut abang kethisi keme, lake nanglitum chininema?” 51Alangli amethang aning kematha penle labangso alam kepu kali, bonta halabangso aningkan ke Kurusar Kethenei ke alangli helo apotsi, 52Jihudi atum aphanchot kali, bonta kehelo adet kepratsei, Arnam amonit atum aphan kepangrumpetji aphan Jisu thiji dokdok-lo pu alamsi alangli thanmek-lo. 53Lasi halabangso arni pen Jihudi atum angbong keja atum alangliphan kepathijisi chingvailo. 54Lasi Jisu chepaklangdak penke damdedet-lo. Alangli hadak pen damsi Kejejangtang ajo pen ketebok-het, Ephraim arongsopi damlo, lapen hadak alangli asangho atum along dodunlo.

55Kejok Kechemathadam Achojun a-Meipi tebok-het-lo. Labangso amei nanglele ako aron atang pen kechepangthirji aphan penang atum rong pen damsi Jerusalem arludamlo. 56Halatum Jisu aphan rilo, lapen halatum Kardomhemthepi arlo kechingrum ahut lahin lahin charjulo, “Alangli labangso Achojun a-Mei along nangdundedet binongjima? Nangli kematha kopuson?” 57Lasi Jisu aphan kenep longji aphan alangli kedo adim kechini abang aling ke halatum aphan than-pachinivek nangji pusi kurusar kethe atum lapen Pharisi atum kepu pasodak-lo.

Currently Selected:

JON 11: KARBIBSI

Highlight

Copy