KECHENG 43

Joseph A-Ik Atum Benjamin Pen-pen Ijip Kechedam

1Anke Kanaan adet akhim kethur sikpik-lo, 2lapen Ijip pen kevan asok an Jakob ahemtun kecho pa-ik-et-si, Jakob abang asomar aphan pulo, “Chedamthura etum aphan asapbak asok namdamnon.”

3Alangphan Judah pulo, “Halaso amonit netum aphan nepudak-lo, jongsi netum nemu aphan ponlongletangte netum alangli ingno damlong le. 4Nang jongsi netum along nemu nang-lodun pulote, netum damji lapen nangphan sok nang nampi damji. 5Nang jongsi ning hanghe pulote, netum damde.”

6Jakob pulo, “Kopi si nangtum halaso amonit aphan nangkorte inut dolang pu kethan-ra nephan pasungthuloma?”

7Latum thak-lo, “Bangso amonit netum lapen hem isi alam netum aphan arjubom, ‘nangtum apo reng-et-langma? Nangtum akorte anut kaprek dolangma?’ alangli karju alam netum thakdun nangkok-lo. Netum along netum amu ponpinangji pu nanghangji pu netum kosonsi kechinipo.”

8Apo aphan Judah pulo, “Oso nelong nang-lo dunnon, lapen netum non amat dampo. Anke etum kadokaveta kangchirpen thinangnelo. 9Ne nemethang apran chepidetpo, alangphan apot nephan nang adai ne-ennon. Ne jongsi laphan a-ok apran mephun pen nanglong vanthekthe pulote, nesi kaiketa arpu archakpo. 10Netum jongsi lapu-an inghong nangne pulote, non an ke netum bataihini dam si vang long-etpo apot-lo.”

11Latum aphan apo pulo, “Lasonsi keklemnangji pulote, govornor aphan dan keponpijile det angbong akemenei amar ponpinon: asap-o ajangthu, pijo alang asap-o, mosola, pesta athe lapen badam. 12Nangtum phanni atangka chepontu, pima nangtum aphan thoila athaksi nangkevoi dun atangka nangtum chevoithu nangji. La kelet-lo tahai. 13Nangmu aphan ponnon lapen nangchirui dap-prang nangji. 14Jakongtheparpik a-Bang halaso amonit nangtum aphan nang-pajinsotoi lonang, anle alangli nangtum aphan Benjamin lapen nangmu nangpavoi lonang. Nephan ke nesomar jongsi pangbo nangji pulote latum pangbonang.”

15Lasi akorte atum dan-heihei lapen phanni atangka ponsi Benjamin penpen Ijip adet barlo. Hadak latum Joseph angno lelo, 16Latum along Benjamin aphan Joseph thek-longsi, ahem kehon ahemphu aban aphan alangli pulo, “Lahei amonit aphan nehem pontha. Latum anerlochitim ne penpen an chorap-rapji, lasi kesikjile pi ejon thatnon.” 17Aban abang alangliphan hukum kepi ateng klemlo, lapen akorte atum aphan Joseph ahem pondet-lo.

18Latum aphan hem kevan ahut, latum pherelo lapen mathalo, “Etum aphan ladak kevandet ke kechengsi etum athoila arlo nangkevoi atangka apot-lo. Latum etum aphan menmen etengkhengpo, etum agadha pon-etpo, lapen etum aphan alangli ban epaplangpo.” 19Lasi jakan along ban ahemphu aphan latum arjulo, 20“Nangli jongsi kanghonpen, akehai, ladak nelitum aphrang sok kenamji aphan vang-lo. 21Tovar nelitum kesang ahut, nelitum athoila chingpulo, lapen abangphutin ta athoila arlo athaksi atangka chelong-lo, kepi atengthot. Nelitum la nangli long vanlo. 22Ongmuchot asok kenamthujisi nelitum ajehak atangka chevanlo. Nelitum athoila arlo komat tong tangka kethapthot-lone nelitum chechinine.”

23Ban abang pulo, “Mathanangne, Phere ta nangne. Nangtum a-Arnam, Nanglitum apo a-Arnam, nanglitum aphan tangka kethapthot-lo tahai. Nanglitum atangka nelilong-lo.” Anke alangli Simeon aphan halatum angno vanpilo.

24Ban abang akorte atum aphan hem arlo pondet-lo. Halatum akeng kepa-chingroiji aphan la lang pilo, lapen la halatum agadha aphan ta a-an pilo. 25Anerlochitim Joseph nangle lote dan kepiji aphan latum chesikding-lo, pima alangli penpen kechorap-rapji aphan latum aphan thanlo. 26Joseph hem nangkele ahut, latum adan-heihei alangliphan kepijisi hem arlo ponlo, lapen alangli ingno latum angphun longle patongki si ardomlo. 27Alangli halatum a-ok-apran alam arju si pulo, “Nephan nangtum nangtum apo alam nethanlo, alangli kopusonlo? Alangli nonpu ta reng-et-langma lapen mesenlangma?”

28Latum thak-lo, “Nangliban asotdut abang, nelitum apo, reng-et-lang lapen mesenlang.” Lapen latum alangli ingno akengphu patongsi ardomlo.

29Joseph amu Benjamin aphan thek-longsi pulo, “Laheloma nangtum korte akebisi, nangtum nephan nekethan abangphu. Arnam nangphan pahir jumenang, sopo.” 30Anke Joseph menmen otekangbub-lo, pima amu aphan thek-longsi alangli-ning ingdukvok-lo. Alangli ning chekhang un-ejidokdok-lo, lasi alangli angdeng chelutdamsi chirulo. 31Alangli mahang chingmur-etsi, alangli nangbarlo, lapen aning cheberlo, an kepahekji aphan alangli hukumpilo. 32Joseph aphan isi atebul athak si an pilo, lapen akorte atum aphan ke along kaprek atebul alongsi an pilo. Hadak an kechodun Ijip aso atum aphan ta akaprek adim si an pilo, pima Ibri aso atum penpen an kecho rap-rap ke latum aman kedam asonsi mathalo. 33Joseph anat pangnosi a-ik atum ke tebul akung chongnipet-lo, latum aklengther pen akebisi an aren ingnilo. Latum kosonsi kangniloma la chethek-longsi, latum lahin lahin chelangphrongsi chemanghuloilo. 34Joseph atebul pen an horlo, akaprek apar Benjamin aphan ke phanpho hek-lo. Lasi latum Joseph penpen ingritham-thetik an cholo lapen junlo.

Currently Selected:

KECHENG 43: KARBIBSI

Highlight

Copy