KECHENG 17

Arengkerot, Kechejok Angthek

1Abram arta ningkan 99 ahut, alangliphan Hemphu cheklang-lo, lapen pulo, “Ne helo Jakongkethenei a-Arnam lo. Nephan kroinon lapen kaita kopisi kechok ma lale klemnon. 2Nang pen Ne kechejok Aloh pathikpo, lapen ongdung nangso-nangsu nangpipo.” 3Longle papho si Abram angphun tongkilo, lapen Arnam pulo, 4“Laso akechejok aloh nangpen Ne chepathik-lo: Nang ke ke-ongdung akhei atum aphusar plangpo pusi Ne chechak-lo. 5Nang men Abram pupelo, bonta Abraham#Ibri pen “ke-ongdung akhei atum aphusar” pupo, pima nangphan Ne ke-ongdung akhei atum aphusar nangpaplang-lo.#Rom 4.17 6Nangphan Ne ongdung nangso-nangsu nangpipo, latum khei-heihei plangpo.”

7“Nangphan lapen nangso-nangsu aphan mo-aphi a-ove-ove anta isi kaike-kedover akechepathik aloh ason Nelamchak chebilo. Ne ke nang Arnam lapen nangso-nangsu atum a-Arnam plangpo.#Luk 1.55 8Non nangkedo bang adet alongle Ne nangphan lapen nangso-nangsu aphan nangpidetpo. Kaike aphan Kanaan alongle adang bithe nangso-nangsu atum chepahemphu longpo, lapen Ne ke latum a-Arnam plangpo.”#Akam 7.5

9Abraham aphan Arnam pulo, “Ne penpen nangta kechechak aloh kekroiji aphan nang chedondun nangpo, nang lapen nangso-nangsu atum anta, mo aphi a-ove-ove anta. 10Nang lapen nangso-nangsu atum areng-kecherotji aphan nangtum angbong pinso atum an chedon-dunsar nangji.#Akam 7.8; Rom 4.11 11Non pen apar pinsomar abangphutin ni nerkep kechok ahut areng-rot nangji, ban aso nanghem mahang kethek atum an, lapen bang adet pen kenamdet aban atum anta. 12La pen ajok nang lapen Ne angbong kechejok aloh chepathik-lo pu pachinipo. 13Abangphutin ta arengcherot nangji, la ke Ne pen nang angbong kaike kedover akechejok aloh dolo pu kepaklang isi abang angthek. 14Badu apinso a-oso tame arengkerot-re abang ke Ne rat aso lo pu pupelo, pima alangli Ne pen kechejok aloh chebibe det-lo.”

15Abraham aphan Arnam pulo, “Nang nangpiso aphan Sarai pu hanglonglelo; pini pen bangpi amen Sarah pupo. 16Bangpi Ne pahirjumeji, lapen bangpi pen Ne nangphan inut sopo nangpipo. Bangpi aphan Ne pahirjume po, lapen bangpi ke khei atum apei plangpo, lapen bangpi aso-asu pen recho atum plangpo.”

17Longle paphosi Abraham angphun patongki lo, bonta alangli kematha un ahut la chingnek-lo, “Inut amonit arta ningkan pharo dolote la oso inut longjilangma? Sarah ningkan 90 ahut oso inut long unjilangma?” 18Alangli Arnam aphan arjulo, “Kopisi Ishmael aphan Nepoton paplangple det-lo?”

19Bonta Arnam thak-lo, “Kali, nangpiso Sarah nangphan inut pinso a-oso amahang nang pathek pipo lapen laphan nang Isaak#Ibri penke “la ingnek-lo” pule amen irnon. Alangli pen lapen alangli aso-asu pen Ne kechejok aloh pathikpo kaiketa. La ke isi kejut un-epin akechejok. 20Ishmael aphuthak nang kechoningri alam ne arjulong-lo, la apotsi alangphan ta Ne pahirjumepo lapen ongdung a-osomar lapen aso-asu laphan Ne pipo. La bangkrehini arechoso apo plangpo, lapen la aso-asu isi thedung akhei paplangpo. 21Bonta Ne kechejok aloh nangsopo Isaak pensi chebi po, Sarah pen moning nonpu apor mahang kethekji a-oso pen chepathikpo.” 22Abraham aphan Arnam kethan pajut si, laphan otekangbub-lo.

23Halaso arni amat Abraham Arnam aphan kroilo, lapen asopo Ishmael lapen akaprek ahem kedo pinso a-osomar atum lapen ahem aban asomar lapen la kenamdet aban asomar atum aphan areng-rot-lo. 24Abraham areng-kecherot ahut alangli arta ningkan 99 dolo, 25lapen asopo Ishmael ke ningkan 13 dolo, 26Latum banghini ta arni isinatsi arengcherot-rappet-lo. 27Abraham aban atum an penpen arengcherot rappet-lo.

Currently Selected:

KECHENG 17: KARBIBSI

Highlight

Copy