KECHENG 14

Lot Aphan Abram Kepajok

1Recho bangphli, Bebilon adet arecho Amraphel. Ellasar arecho Ariok, Elam recho Chedorlaomer, lapen Goiim arecho Tidal, 2damsi akaprek bangpho arecho atum pen ron chedanlo: Sodom arecho Bera, Gomorrah arecho Birsha, Admah arecho Shinab, Zeboiim arecho Shemeber, lapen Bela arecho (mate Zoar.) 3La bangpho arecho chelangpetsi Siddim Arlok along asong chelangpet-lo, laso adim nonke Kethitang Atalo. 4Latum aphan Chedorlaomer si ningkan krehini pangrilo, bonta krekethom aningkan latum alangli be thurlo. 5Krephli aningkan Chedorlaomer lapen alangli pen kechelangpet asong vangpak si Rephaim atum aphan Ashteroth Karnaim adim along, Zuzim atum aphan Ham adim along, Emim atum aphan Kiriathaim athoi along, 6lapen Hor atum aphan Edom anglongpi-heihei along paremdet-lo, latum aphan ha Elparan asangtimili akung an hungdung-lo. 7Anke latum adung arei langsi nang chiruilo, ha Kadesh anat (Enmishpat pusi halaso ahut chethang-lo). Kedo-an adet Amalek atum aphuthak latum haidet-lo, lapen Amor atum aphan paremdet-lo, latum Hazazon Tamar adim si kedo atum lo.

8Anke Sodom, Gomorrah, Admah, Zeboiim, lapen Bela arecho atum halatum aron-armu kechedanjisi Siddim Arlok along patebok-lo, lapen, 9Elam, Goiim, Bebilon adet arecho, lapen Ellasar, recho bangpho pen ron chedanlo, recho bangpho pen recho bangphli, 10Arlok hilik-heihei si plengset, lapen Sodom lapen Gomorrah arecho atum ron pen kekatji bor-i ahut latum hilik-heihei arlo jangthot-lo; bonta akaprek bangkethom arecho atum ke ha inglongpi anat katjuilo. 11Bangphli arecho atum Sodom lapen Gomorrah along kedo-an amar pon et-lo, kecho ahormu an ta ponsi kat ponlo. 12Abram amu asopo Lot ke Sodom alongsi kedo, lasi latum laphan lapen la amar an ta pondet-lo.

13Bonta inut amonit joksi Abram aphan lahei alam an than et-lo, la Ibri, la Mamre along kedo thengpi kangthir adung kedo, la Amor atum kedo ajolo. Mamre lapen la akor Eshkol lapen Aner atum ke Abram pen kechelangpet atumlo. 14Abram amu asopo aphan bang pondet lo pu arjulongsi, alangli kedo-an ron kechedanthek amonit aphan pangrumsi amukam along hangpet-lo, kadokave 318 amonit lapen ha Dan atovar anat an bangphli arecho atum aphi aphi hungdunlo. 15Hadak alangli song thaksi hotur aphan ajo tengkheng-lo, lapen latum aphan paremdet-lo. Alangli latum aphan ha Hobah an phlungdunlo, la Damaskas anirep. 16Lapen kethipontang amar an chelongthu-et-lo. Alangli amu asopo Lot lapen la amar an vanpithu-et-lo, arloso atum lapen akaprek kenep pon amonit atum aphan anta van et-lo.

Abram Aphan Melkizedok Hirjume Kepi

17Ron Chedorlaomer lapen akaprek arecho atum aphuthak kehai pen Abram nangkechevoi ahut Shaveh Arlok (Recho arlok pusi chethang) along Sodom arecho alangliphan chetong damlo. 18Lapen Melkizedok ke Salem arecholo lapen alangli ke inut Kangtuinei Arnam akurusarlo, alangli Abram along him lapen drakha ahorlang vanlo,#Ibr 7.1-10 19lapen ahirjume pilo, lapen pulo, “Kangtuinei Arnam, sining lapen pirthe kepinchong abang, Abram aphan pahirmenang! 20Kangtuinei Arnam, nangphan nanghotur aphuthak nangkepahai abang, anong pathenang!” Anke Melkizedok aphan alangli kelongthu kethi pon amar an angbong pen phankep pen ephan pilo.

21Sodom arecho Abram aphan pulo, “Kethipon amar an chebinon, nephan nemonit-le nepichotnon.”

22Abram thak-lo, “Kangtuinei Arnam, Hemphu amen pen neli semetang-lo, Sining lapen pirthe kepinchong abang amen pen, 23neli nanglimar isita khangkhe, hon ejeng ta mate keng-op ari ejeng ta en-elo. Anke nangli pu un-elo, ‘Ne si Abram aphan paplang-lo’ pu. 24Nelimethang aphan neli thangnat ta chekhangkhelo. Nelimonit atum kopima ke-en lasi neli ke dengchotpo. Bonta nelilong kechelang dun Aner, Eskol, lapen Mamre, latum apharman pachepon nang.”

Currently Selected:

KECHENG 14: KARBIBSI

Highlight

Copy