AKAM 14

Pol Lapen Barnabas Ikoniam Arongsopi Along Birta Keme Kepachethang

1Ikoniam arongsopi alongta lasonthotsi plang-lo. Pol lapen Barnabas Jihudi atum a-Sinagog along dunsi lam than pajume-olo. Lasi Jihudi atum lapen Jihudi kalidet ake-ongpi atum kroilo. 2Bonta kekroikre a-Jihudi atum hala Jihudi kalidet atum aphan chorung chojarsi kekroitang atum aphan palangselet-lo. 3Pol lapen Barnabas hadak penang arni keding dosi phererepin pen Hemphu alamjir thanbomlo, lapen Hemphu alanglitum aphan kemanghumeme akam lapen kematha thekthedet akam keklemji ajakong pisi, alanglitum Hemphu akangjinso alamjir kethan alam ke ahok-lo pu aporman paklang-lo. 4Rongsopi amonit atum angbong abe hini dokok-lo. Penang atum ke Jihudi atum abe dunlo, lapen akaprek atum ke Pol lapen Barnabas abe dunlo.

5Ansi Jihudi atum lapen Jihudi kalidet atum hala keja atum pen pen la ketoitang atum aphan kepatherakjisi lapen arlong pen karbujisi chepathik-lo. 6Bonta ketoitang atum labangso alam chinisi Likonia adet Listra lapen Derbe arongsopi lapen tebok terai alongri katjuilo. 7Haladak alanglitum Birta Keme than-pachethang-lo.

Listra Lapen Derbe Arongsopi Along Pol Lapen Barnabas Birta Keme Kepachethang

8Listra arongsopi inut akeng ketekok amonit dolo. Alangli amahang kethek ahut penta akeng tekokjoksi kengkam chejor thekthepinlo. 9Alangli hadak ingnilunsi Pol kethan alam arju dun lo. Pol alangliphan langding-lo, lapen alangli kroilo lapen me unpo thek-longsi, 10Pol alangliphan ase kethe pen pulo, “Thurra arjapthernon!” Ansi alangli chonkang kangsi akengkam kechejorji pangcheng-lo.

11Armu atum Pol keklem akam thek-longsi Likonia alam pen hangjo si pulo, “Arnam atum monit arje cheparjansi etum angbong nanghirtang lo.” 12Halatum Barnabas aphan Zeus pusi amen irlo, lapen Pol aphan ke Harmes pusi irlo, pima alangli ke lam kethan ahut keja abang-lo. 13La Zeus pu arnam aphan kardom ahem ke rongsopi angtan si dolo. Halabangso akurusar abang ke chainong alo, lapen mir alek hei hei inghap an vanlo, pima alangli lapen armu atum la ketoitang atum aphan athok kethokjisi aning hang-lo.

14Pol lapen Barnabas labangso alam arjulongsi amethang methang ape chingsek-lo, lapen armu atum angbong katvirsi, hangsi pulo, 15“Nanglitum kopichonghoisi lapuson keklemloma? Nelitumta nanglitum asonthak thak monitchot-lo! Nanglitum la thangta kalidet a-arnam hei hei aphan o-ra hala sining, pirthe, talo lapen lahei hei angbong kedo amar an kepinchong abang, kerengver Arnam anatthu kechetevarji aphansi nelitum nanglitum aphan Birta Keme kethan-jisi ladak vang-lo. 16Hako ahut ke alangli kadokave amonit aphanta amethang methang aning kehang aling paklem long-lo. 17Bonta alangli keme akam hei hei klem si amethang kerengver angthek paklangbomlo: atheke alangli nanglitum aphan sining pen arve pajang-lo lapen abotor ahut sok sang nangpi olo, lapen kecho ahormu padorphlupsi nanglitum aning parong-lo.” 18Lapu-an alam pudet aphita armu atum latum aphan athok kethokji aning hang-lo. Lasi ketoitang atum la armu atum aphan khang chetorok-lo.

19Antiok lapen Ikoniam arongsopi pen penang a-Jihudi atum vangsi armu atum aphan amethang abe cheponlo. Halatum Pol aphan arlong pen arbulo, lapen alangli thilot-lo pu mathasi alangliphan rongsopi angtan chethurponlo. 20Bonta kekroitang atum alangliphan kekomjai ahut alangli thursi rongsopi lutdamthulo. Puthot arni alangli Barnabas pen Derbe arongsopi damlo.

Pol Lapen Barnabas Antiok Arongsopi Kechevoi

21Pol lapen Barnabas Derbe arongsopi Birta Keme than-pache-thangsi sangho ake-ongpi paplang-lo. Ansi alanglitum Listra, Ikonia, lapen Pisidia adet Antiok arongsopi chevoilo. 22Alanglitum kekroitang atum aning pathirbomlo, lapen halatum kekroi angkang kedobomji aphan aning pathelo. Alanglitum thansi pulo, “Arnam a-Rat angbong kelutdunji aphan ilitum jasemet kesung pho nangji.” 23Alanglitum mondoli alongtinta mondoli akesar atum battekang-lo, lapen alanglitum Arnam ardomsi lapen an humsi halatum aphan halatum kekroi a-Hemphu arideng hodai tekang-lo.

24Alanglitum Pisidia adet dongpon-putsi Pamphilia adet damlo. 25Hadak Perga arongsopi along alanglitum than-pachethang-lo, lapen labangso aphi Atalia arongsopi damlo. 26Hadak pen alanglitum telongpi pen Antiok arongsopi damlo. Hadaksi aphrangke non alanglitum keklem akam kepaklemji aphan alanglitum aphan Arnam akangjinso angkang hodailo.

27Alangli Antiok arongsopi nanglesi mondoli amonit atum aphan pangrumpet-lo, lapen Arnam alangli-tum pen ajok keklemtang akam, lapen alangli kopusonsi Jihudi kalidet atum aphan kekroi atovar ingpupitang-loma, la kadokave alam halatum aphan thanlo. 28Lapen hadak alanglitum sangho atum along penang arni keding dodunlo.

Currently Selected:

AKAM 14: KARBIBSI

Highlight

Copy