AKAM 1

1Kechinghon a-Theophilas:

Neli aphrang ketok aloh along Jisu kam keklem kecheng pen alangliphan sining athak kepon arni an alangli keklem akam lapen kethan alam an tok-lo!#Luk 1.1-4 2Alangliphan sining athak ponpe ako, alangli ingvaisi ketoitang atum aphan alangli Karjong Kangthir ajakong pen ajok than-parelo. 3Alangli thidet aphi, jophlikep niphlikep an ketoitang atum aphan abatai batai cheklangsi alangli reng-et-lo pu aporman pipamelo. Halatum alangliphan thek-long-lo, lapen alangli halatum pen Arnam a-Rat alamjir chethanlo. 4Lapen alangli halatum angbong kedo un ahutta alangli halatum aphan hukum pisi pulo, “Nangtum Jerusalem pen damrinon. Bonta ne nangtum aphan nangkepu, ne-Po kechaktang adan aphan inghongnon.#Luk 24.29 5Jon ke lang pensi baptisom pilo, bonta penang arni aphi nangtum aphan Karjong Kangthir pensi Baptisom nangpiji.”#Mat 3.11; Mar 1.8; Luk 3.16; Jon 1.33

Jisu Aphan Sining Athak Kepon

6Ketoitang atum Jisu pen chingrumpet pen kedo un ahut halatum Jisu aphan arjulo, “Hemphu, non ahutsi nang Israel atum aphan Rat pithuvoipoma?”

7Jisu halatum aphan pulo, “Labangso ahut lapen apor ke ne-Posi pathik-lo, lapen lake nangtum chini longle. 8Bonta mo Karjong Kangthir nangtum aphuthak kevang ahutsi nangtum jakong longji, lapen Jerusalem, Judia lapen Samaria adet adang an, lapen pirthe kejut adim hei hei anta nangtum nehaki plangji.”#Mat 28.19; Mar 16.15; Luk 24.47-48 9Labangso alam pudet aphi halatum alangliphan kelangphrong un ahut mamat alangliphan sining athak rungpondet-lo, lapen inghun ephar vangsi alangliphan halatum amek angden pen binthip-lo.#Mar 16.19; Luk 24.50-51

10Alangli kedam un ahut halatum sining anat langdunphrong-lo. Ansi kelokkling ape kechepindeng, banghini amonit atum hadak men-men vangsi halatum adung arjaptherlo, 11lapen halatum aphan pulo, “Galili asor atum, nangtum kopi apotsi ladak karjapphrongra sining anat kelangphrong-loma? Labangso a-Jisu, atheke nangtum angbong pen sining athak kepontang abang non sining athak kedam, nangtum kethek-long asonthotsi alangli puthot vangthuji.”

Judas Adim Mathiu Aphan Kebat

12Ansi ketoitang atum Oliv anglong pen Jerusalem arongsopi nangchevoilo. Halabangso anglong pen Jerusalem kehelo kilo mitar isi anbaksi dolo. 13Halatum rongsopi nanglesi hala-tum kedo adim, angsong angdeng along arludamlo. Hadak Pitor, Jon, Jems, Andriu, Philip lapen Thomas, Bartholomeu lapen Mathiu, Alpheus asopo Jems, det kechinghon a-Simon lapen Jems asopo Judas atum dolo.#Mat 10.2-4; Mar 3.16-19; Luk 6.14-16 14Halatum kadokave ning isipet pen arloso atum, lapen Jisu apei Meri lapen akormar atum pen pen chingrumbomsi Arnam ardombomlo.

15Penang arni aphi kekroitang bang 120 anbak amonit atum chingrumpet-lo, lapen Pitor halatum angbong arjapsi pulo, 16“Kortemarli atum, Hastro alam, atheke Jisu aphan kenep atum aphan tovar nangkejadun abang, Judas alamjir David pen ajok Karjong Kangthir kepu alam chekok tang-lo. 17Judasta ilitum angbong inut abang-lo, pima ilitum aphan kepaklemtoi akam asonthot kepaklemjisi alangliphan ingvailo.”

18(Ansi hala kehingno akam keklem apot anam kelong atangka pen Judas longle emo namlo, bonta alangli hadak longle athak nangklo parlinsi apok inghangdak-lo, lapen aphek nang chonruilo.#Mat 27.3-8 19Jerusalem arongsopi kedo amonit atum an labangso alam arjulong-lo. Lasi halatum labangso alongle emo aphan amethang alam pen Akeldama pusi irlo. Labangso alam atheke, “Vi Alongle,” puhelo.)#Mat 27.3-8

20“Pima Lun aloh along labangso alam ketok do,

‘Alangli hem pangsamrinang;

lapen hadak baduta padodedetnang.’

Lapen labangso alamta tok-lo,

‘Komane abangle alangli keklem akam paklemnang.’#Lun 69.25; 109.8

21“Lasi ilitum inut amonit aphan ingvai nangji. Alangli ke ilitum along nangkedodunver abang nangji, atheke Jon baptisom kepi ahut pen Jisu aphan sining athak kepon arni anta, Jisu ilitum angbong kedo-kedam ahutta ilitum along nangkedodun abang nangji. 22Pima alangli ilitum pen pen Jisu kethi pen kethur ahaki plang nangji.”#Mat 3.16; Mar 1.9-16,19; Luk 3.21—24.51

23Lasi halatum banghini amonit amen paklang-lo. Inut ke Barsabas pu a-Joseph, (alangliphan Jastas puta pu) lapen anut kaprek abang ke Mathiu helo. 24Ansi halatum Arnam aphan kechoningri pen ardomlo, “O Hemphu, nangke kadokave amonit aningta chinilo. Lasi Judas adular ketoitang akam kepaklemji aphan la banghini angbong nang komat aphansi ingvaitang-loma, la netum aphan nepaklangtha. 25Pima Judas ke amethang adim kechedamji aphan pap klemsi la ketoitang akam che-otekangtang-lo.” 26Ansi halatum hala banghini angbong inut aphan kangvaiji aphan khadot pathulo, lapen Mathiu amen klang-lo, lapen alangliphan hala ketoitang bang kre isi atum along lakhaponlo.

Currently Selected:

AKAM 1: KARBIBSI

Highlight

Copy