Maakɨ 7

Juya sɨnnawɨnyaraavɨrebulyɨ.

(Matɨyui 15:1-9)

1A'mwe Perɨzɨyarajɨ yagaaikɨwɨjara Jeruzaalemɨdaasara pwarajɨ sara gamɨnyawɨnna yɨbwaramakabɨna yeva 2dara bwanganesa' “Gamɨre pwara ata gɨrɨkita'nanyara asangɨ aalya minyara wapaaya danɨvanɨgava!” 3Sare' dare'nesɨ. Perɨzɨyarajɨ Juya yuyarajɨ sara dɨnyɨna “Ne sɨnnyawɨnyara sara dɨnɨke'na nemɨ sara yaana!” Dɨnyɨna yadɨvɨ' asangɨ aalya minyara wapaaya nadɨvɨtara mɨ'. 4Sara wapemubyasɨyara kunnya angevɨ wɨleva aalya minyevera wapaaya manyɨ ye'. Ne sɨnnawɨnyaraavɨrebwi kumɨre sɨmunyangɨdaasɨ maalɨkebwina mɨ'. Naangebulyɨ pɨburajɨ lɨmwadɨvɨ' “Nemɨre kuryara gɨrɨkita'nanya nyɨpɨdɨka!” deva kaapɨvananya maa'gula paletɨya aalya yɨna ye'.

5Sara yadɨvɨsara Perɨzɨyarajɨ yagaaikɨwɨjarajɨ sara yɨkabɨna yeva yɨwaara'na “Gɨmɨrera ‘Ne sɨnnawɨnyaraavɨrebwi yaana!’ majara ata gɨrɨkita'nanyajɨ nɨvanɨga'. Ne sɨnnawɨnyaraavɨreburɨ kaanya myamarivanɨga'. Aawa. Ata gɨrɨki'nakera wapaaya nɨvanɨga'. Sabwi be'na yɨvanɨgava?” 6Tɨvi'na yɨwaara'na kye' wɨda' “Aazaayai Gotɨyarɨ wɨ'nawɨjɨwaakadei pɨropetɨyai sarɨmɨnyɨna kwaasɨyabwi yadɨvɨsaihɨrɨna nayaa dɨnɨkabaaibɨsasɨra.

A'mwera nayaa maangi'na nyɨdɨvanɨgasa'

Kumɨre sɨmunyabwi menyaba warɨ'.

7Gazare yɨlaaya nyɨdɨvanɨgasangɨ mu'nyɨvanɨge.

A'mweraavɨrebwi yaasɨwa'na wɨjɨwakadaapɨri

‘Gotɨyarebulyɨra,’ yawɨ'na yɨvanɨga'.

Sara dɨnɨkesɨra. 8Sarɨmɨ Gotɨyare yagaaikɨwɨnya yagalya'ma'manɨgasa' a'mweraavɨrebwi nayaa lɨmwamanɨga'.” 9Nabaai wɨdɨna “Nawɨ'nyɨna Gotɨyare yagaaikɨwɨnya wasɨ'na yadɨvɨ' sarɨnnyabwi mɨdɨnya'neihi yɨvanɨgasaihɨlyɨra. Be'na yɨvanɨgava! 10Sare' dare'nesɨ. Mozɨzai wɨjaa' ‘Gɨmaamaangelyɨ gwaangesɨ sayorɨ nayaa kadɨka dɨvada'galawɨ'nana!’ Nabaai ‘Pwai yuyagaa' ganɨmaangerɨna ganaangevɨna bɨrala yadei yuna balana!’ 11Mozɨzai sara wɨdɨna yaaka kɨrɨ' sarɨmɨ dadɨvɨ' ‘Pwai wɨdaza' “Nɨmwai pwai nɨwaa' kɨrɨ' kamaaradɨke nɨmɨre Kovanɨya' warɨkengɨra.” ’ (Kovanɨya' yagaala sa' “Gotɨyarɨna wɨjaaya'neva dɨnɨke'.”) 12Sara kudozɨ ‘Kovanɨya' mi'na waka'gɨzɨ gɨmaamaanga pwarɨna gwaanga kɨrɨvɨna mujaavɨnna!’ sarɨmɨ sara dakadɨvɨ' a'mwe sai navɨka mwaaladelyɨ. Sara yadɨvɨ' ‘Nemɨrebura nemɨre kaimɨraayaraavɨ wɨjɨwakaana!’ 13Sara dadɨvɨsa'na ‘Gotɨyai wɨjaake' gesɨra,’ yawɨ'dɨvɨtabaaibɨsasɨ. Nabaai avaalyabɨta kwalaalya sana sana yadɨvɨsaihɨlyɨra.”

Yuya gɨrɨkita'nanya.

(Matɨyui 15:10-20)

14Sagaa' kwala bwa'naanyavɨ jaka ayɨna jɨvwaramaa'na yaka wɨdɨna “Yuyangihi, nyu'napi sɨmunya nayaa jawɨrila! 15Mwasɨmagɨnya aane pɨrɨ' kɨrɨ' a'mwe pwarɨ kulaabozɨ gɨrɨka yɨma'nannei mɨka. Aawa. Yuya a'mwe sare kusɨmagɨnyavɨdaasa kwalyaabozɨ gɨrɨka yɨma'nadengɨra. 16A'mwei kadɨ'nakei nayaa wɨ'nana!”

17Kwala bwa'naanyavɨ yagalya'mavaka angevɨ wɨlɨna yakegaa' gamɨrera yagaala ke'ba'nanya'na wɨdɨna. 18Sara wɨdɨna kye' wɨdɨna “Nabaai pwarajɨ sarɨmɨjɨ sara myawɨrijɨwaava! ‘Yuya kamaranojɨ mwasɨmagɨnya a'mwerɨ kulaabozɨ gɨrɨka yɨma'nannei mɨka,’ myawɨrijɨwaava! 19Wapaaya sa sɨmunyavɨ mulyɨ yade'nanyɨ. Aawa. Gamɨre sɨngwalɨkerɨ bwalaawɨna kyojɨ lɨka wɨrasɨ'na yadengɨra.” Sara wɨdake' “Tɨka wapaaya yuya kɨmaaka mɨka.” 20Sai wɨdɨna “A'mwere kusawɨnyavɨdaasa' walyaabɨna kyojɨ sa' gɨrɨka yakadesɨra. 21Sare' dare'nanyɨ. A'mweraavɨre sɨmunyavɨdaasɨ yawɨta kayaa'na naanga yɨna, gamɨ marɨdaakunyɨna, kuka yɨna, a'mwerɨ tamakɨna, 22a'mwevɨ ata lɨmwanna, gɨlyɨvɨsangɨ wabarɨnna yɨna, yɨ sɨnna tɨka wɨdaya'nebwi yɨna, kwaasɨ yɨna, jɨlɨkera yadɨvɨsabaaibɨ' yɨna, tɨganaarya yɨna, pwarɨna kwaasɨ yagaala dɨna, bɨrala yɨna, pihadɨka yɨna, yɨ yaasɨwa'yamarya yɨna yadɨvɨsangɨra. 23Kayaa'nanya yuya davura kusawɨnyavɨdaa'nyɨ walyaabɨna, a'mwere sɨmunyavɨdaa'nyɨ walyaabɨna kyojɨ gɨrɨka yakɨna yadengɨra,” Jizaazai wɨdɨna ya'.

“Jizaazai dɨragɨnaangelyɨ,” a'mwe' wɨda'.

(Matɨyui 15:21-28)

24Sabadaasai angeba Taayaa sabannei wɨna. Anga saba Kwaaka Sɨrɨya mannɨkeba. Sai wɨna yakei “Aane pwai kwai aane pɨrɨ' kɨrɨ' nanyanganadɨka!” daka angevɨ kave mwaalɨna yada lɨka yulya'dɨ'nyɨ kɨrɨ' a'mwera dara wangane' “O, dava sahwai damwaalɨka!” Mi'na kade' lɨka myulyari yakelyɨ. 25Yɨme'nya'bɨ' taaya' yɨmaka widevɨ ganaange' “Sahwai mwaalɨka,” wɨ'naka bɨna yaka gamɨre sɨvɨlyɨraaryaba a'mwe sa' bularutawa'na ya'. 26A'mwe sa' Gɨrikɨyagaala dade' Kwaaka Sɨrɨya mwaalya Pɨnɨzɨyaraavɨre' a'mwe sa' naanga yɨwaara'na “Nyɨraavaangavɨre munyɨkɨ yɨmakerɨ duthasaawadeigɨ daaka?” 27Yɨwaara'na kya' Jizaazai Juyaraavɨ wɨgaimwadei wɨjɨwaakɨyagaala wɨdɨna “Sɨnnawɨ kaimɨraayangɨna wapaaya wɨjaavɨpɨka! Sare' dare'nesɨ. Sɨnnawɨ jɨlɨkeraavɨna kaimɨraayangɨre wapaaya namarasɨ'nɨpɨdɨka!” Sa'na wɨdake' sɨnnawɨ Juyaraavɨ wɨgaimwadelyɨra. 28Sara wɨdɨna kya' a'mwe sa' daka “Juya'nyɨ mɨka. Maave'nyɨra. Jɨlɨka sarabɨsa'nyɨ,” daka wɨdɨna “Yo, Naangeigɨ sa'na kaimɨraayangɨre wapepwaka kabwalaraawojɨ jɨlɨkera yɨ'bɨnyavɨ dalaangevɨ mwaalapɨjɨ maribwaranɨpɨ'derera.” 29“Gɨmɨ nyɨdɨwaanyavɨna gɨnnya angebanna wawo'gɨzɨ taayavɨ dangadera. Dahaa' yɨmakai taayavɨre munyɨkɨdaa'nyɨ mena wɨwaka.” 30A'mwe' wɨ'naka gannya angebanna wɨna kya' taaya' yɨ'bɨnyavɨ wa'dɨ'nyɨ dara wanganake' “Yɨmaka marawɨnaangɨ'dei mena davwalyuwaka!”

Kadɨkɨryai yagaala majai tewaanya yɨma'na'.

31Anga Taayaa sabadaasai Saaithonɨ angeburɨna yɨ'mavaawɨna yaka pina lavɨta'na yaka Atɨraalyaba angeburaavɨ gɨ'mavamaryaka aalɨbunya Galɨlina yɨ'ma'na ya'. 32Yɨ'ma'na kya' gamɨnyawɨnna a'mwe pwara a'mwe kadɨkɨryai taalɨ'mabyarɨ jɨvwaramakabɨna yeva naanga wɨdɨna “Kadɨkɨryare mɨnyagɨnyavɨ ata dɨthathɨwana!” 33Sara wɨdɨna kye' sahwai kadɨkɨryarɨ sangineba makuna kya' gaveraai mwaaidakɨlyɨ Jizaazai gamɨre kadɨkikaarɨ asɨraai tɨlavalɨmwaga'nyɨna yaka asɨrɨ maagwala yɨnyɨna yaka kadɨkɨryare taalɨsarɨ dathakɨna yaka 34sɨgunyayɨna maranganaka sɨmudɨngwaimale yaka wɨdɨna Juyaraavɨre yagaalyavɨ “Epaata!” Yagaala sa' “Kadɨka dɨvaaso!” kadɨka tewaanya wɨ'nya'na dɨnɨkesɨ. 35Wɨdɨna kya' kadɨkɨryare kadɨka tewaanya wɨ'nyɨna yaka gannya taalɨsalyɨ yagaala tewaanya dɨna sagaa'. 36Kadɨkɨryai tewaanya mwaaidɨ'nyɨ Jizaazai a'mwe pwaraavɨ wɨdɨna “Nɨmɨ yɨwe'na aane pwarɨ kwarɨ yagaala mudɨpɨnera!” wɨda' yagaala naanga. Dɨragɨnna sara wɨdake sa'na wɨdɨwɨja yesara dɨragɨnaanga sara ye'. 37Pwara wɨ'neva atɨka maru'nareva “Sahwai yuyangɨ tewaanya yɨwakelyɨra. Kadɨkɨryara nayaa wɨ'nya'neraavɨ wɨmwaaihada taalɨ'mabyara nayaa wɨja'neraavɨ wɨmwaaihadei,” dɨne'.

Currently Selected:

Maakɨ 7: byr

Highlight

Copy