Maakɨ 5

Jizaazai yɨmaka widerɨ tewaanya yavada'gaina ya'.

(Matɨyui 8:28-34; Lukɨ 8:26-39)

1Aalɨbunya pimagɨnna A'mwe Geraaza mwaalyara mwaaidapɨjɨyabanna yɨ'mavaawɨna kye' 2sahwai sɨpɨyavɨdaa'nyɨ walamwaaina yadɨ'nyɨ yɨme'nya'bɨ' a'mwe pwai simaanga gɨlaaya wakesabadaa'nyai yɨmaka widei gamɨnyɨna wɨjɨma'naabɨna ya'. 3A'mwe sai yuyagaa' gɨlaaya wakesaba mwaalakelyɨ. A'mwe aane pwai kwai gamɨnyɨ senɨyabaalyɨ wɨla mavwɨyɨ yannei. 4Sare' darevɨnyɨ. Kwalaalyagaa' a'mwera senɨyabara maareva asɨraarɨ wɨla pwekɨpwekya sɨvɨlyɨraarɨ wɨla pwekɨpwekya kye' gamɨ sai asɨraarɨ wɨla pwekɨnɨke galayesɨwɨ'na yaka sɨvɨlyɨraarɨ wɨla pwɨyɨnɨke sɨlyalyɨ lɨvatamayesɨ'nyɨna ya'. Sare' aane pwai kwai dɨragɨnnakei sahwarɨ madathɨvalyɨ yannelyɨ. 5Yuyagaa' yɨrɨkevɨ sawɨsavɨ gɨlaaya wakadɨvɨsabajɨ mugunyabajɨ kaanya yamaryada jaka naanga dada gannya kɨlaakejɨkɨ sɨlyajɨ lɨvadaidaarivainyɨna ya' yɨmaka widei.

6Sai saamɨnyabadaa'nyɨ daavakei Jizaazarɨ tɨnna wanganakegaa' yarai kaanyave'na walyaabɨna yaka “Sahwai naangelyɨ,” daka gamɨnyawɨ kwadaai gɨlaka 7jaka naanga wɨdɨna “Jizaazai, Gotɨyai Sɨgunyavɨ munya ke'mwɨ mwaaidereigɨ midaaka! Nɨmɨnyɨna berɨ' jɨzɨwaana? Gotɨyarɨne'na naange' gɨthɨvanɨge. Daanga manyɨjaavɨnnera! Mala manyɨradɨnnera!” 8Sare' dare'nesɨ, Jizaazai “Yɨmakaihi, a'mwere munyɨkɨdaa'nyɨ dɨwila!” wɨdake'na. 9Sai yɨwaara'na yawalyaadɨ' “Gɨmɨnyɨne yaya' berɨvaka?” Yɨwaara'na yawalyaadɨke' yɨmaka widei wɨdɨna “Nɨmɨnyɨne yaya' Kwala Naangeinyɨ. Sare' nemɨ kwala naangeina mwaaiho'nanyɨ.” 10Sara wɨdaka yagaala dɨragɨnna dɨza ya' “Kwaaka davɨdaasɨ yɨmakeraavɨ mudaasɨnna!” 11Mugunya sakyavɨ yaawaryara kwala naanga nɨdaa'nyɨna yadaapɨjɨ 12yɨmakera dɨragɨnna wɨdɨna “Yaawaryaraayabanna dɨnedaasa! Yaawaryaraavɨre munyɨkaavɨ wimɨlaade'na dɨnedaasa!” 13Yɨmakera sara wɨdɨna kye' Jizaazai “Yo, dɨwila!” Wɨdɨna kya' yɨmakera a'mwerɨdaa'nyɨ bwalyuna yeva yaawaryaraavɨ wɨlɨna kye' yaawaryara kwala naanga (2,000) mwaaidapiyara davaanyavɨ yarai walaawɨna yeva aalɨbunyavɨ wala'na yeva yuyara balɨna ye'.

14Saba yaawaryaraavɨ yɨ'dɨvaidɨvɨsara dara wanganesa' “O, akai, nemɨre yaawaryara mena davaimwaava!” Deva yarai wɨna yɨna yeva angebajɨ wawɨnyangɨjɨ saraavɨ wɨde' yagaala sa'. Wɨdesa'na a'mwera dɨnyɨna “Sara yɨma'nɨwake' nemɨ walyanganaana!” dɨneva walyaabɨna. 15Jizaazaryawɨnna walyaabɨna yeva dara wanganesa' “A'mwei kwaabɨhannya marira'nakei sɨduta nayaa yawɨ'manɨkei kɨgaa' yɨmaka kwalaalyara mwaalesai tewaanyai damwaalɨka!” Deva lɨka naanga ye'. 16Lɨka kye' a'mwera yuya wanganesara mudɨkeraavɨ yɨmaka wɨlakerɨ sara yɨma'nakevɨnajɨ yaawaryaraavɨnajɨ wɨjɨwaakɨna. 17Sara wɨjɨwaakɨna kye' sabanyara sarɨ naanga wɨdɨna “Nemɨreba davɨ namwaaidɨka! Dɨwona!” 18Wɨdɨna yesavɨ sai sɨpɨyavɨ yɨladaa'dɨ'nyɨ yɨmaka wɨlakei naange' widaanganna “ ‘Gɨmɨjɨ mwaaimuneinyɨ wɨma!’ gɨthɨwa.” 19Sara wɨdɨna kya' Jizaazai wɨdɨna “Aawa. Sare kɨrɨ' gɨnnya angevɨna wawa'gɨzɨ gɨnnya jɨlɨkaimɨraayangɨ Gotɨyai sara nayaa gyɨwakenna gɨmɨnyɨna Gotɨyare kale yɨwake'na sara duzɨwaakya!” 20Wɨdɨna yake'na sai kaanna wɨna yaka Angaba Atɨraalyaba saba Jizaazai gamɨnyɨna sara yakenna sara kujɨwaaka' a'mwe yuyara atɨka maru'na'na yɨna ye'.

Jaarazare garaavaangesɨ a'mwe pɨrɨ' Jizaazare yɨvɨsavɨ ata yɨme'nakesɨ sawaarɨnesɨ.

(Matɨyui 9:18-26; Lukɨ 8:40-56)

21Jizaazai sɨpɨyavɨ wɨlamwaaidɨsɨ ayɨhɨrɨna sɨpɨya' ayɨna makuna yakegaa' gamɨnyawɨnna kwala bwa'naanya naange' yɨ'bwa'namwaaina yadapi sai aalɨbumaangevɨ mwaalɨna. 22Mwaalɨna yadɨ'nyɨ Lotuangevɨ maremwaaide pwai Jaarazai wo'nɨkei bwanganna yaka gamɨre sɨvɨlyaraaryaba kwadaai gɨlɨna yaka 23yagaala dɨragɨnna wɨdɨna “Nɨnnya taaya nabalɨnake' balade'na. ‘ “Tewaanya' yɨma'nana! Gaala mwaalana!” da'mujɨ “Nɨmɨre asɨraai dathɨwagaawɨma!” ’ da'gi dulaama!” 24A'mwei sara wɨdɨna kya' gamɨjɨ wawagi. Kaanya wodaakɨlyɨ kwala naange' wawesara gamɨnyawɨ galyɨtata ye'. 25Galyɨtata kye' a'mwe nalaavɨnake' mwaalake' baizaaka ma'nade' yuyagaa' kwarame atɨraai sɨvɨlyɨrɨdaa'nyɨ pɨrɨwaalya wavɨla'nɨke' mwaalakesɨra nalaavɨnake'. 26Nalaaya maalɨka wa'dɨ'nyɨ nalaavɨnakevɨ dotarava yaamɨjɨ yɨya kye' daanga naanga wɨvɨnake'. Gamɨre yuyajɨya mena wɨjaavɨna yake'. Tewaanya aane pɨrɨ' kɨrɨ' mi wiake'. Aawa. A'mwe nɨgwɨmaaya' sɨnnawɨ nalaaya maalɨke' kɨnɨnnake', sagaa' nalaaya naange' kɨnɨnnake'. 27Sare' Jizaazarɨne'na wɨ'naka kwala naangevɨ dusɨdaa'nyɨ lɨka yulyaraabɨna yaka gamɨre kwaabɨyɨvɨsavɨ yɨme'nyɨna. 28Sare' dare'nesɨ. “Gamɨre kwaabɨyɨvɨta gavevɨ yɨme'nɨwɨja' nɨmɨ tewaanya yɨma'nɨma!” dake'nanyɨ. 29Yɨme'nya'bɨ' kurabala yaalɨka mi'na yɨna. Mi'na yɨna yaka dara wanganake' “Nɨmɨre nabalya' mi'na daaka!” 30Sare' yɨlaaya kya' yɨme'nya'bɨ' Jizaazai sahwai dara wanganake' “Nɨmɨnyɨ dɨragɨnya' nyalyɨwake' daaka!” Dakegaa' kwala naangevɨ yarai gɨnyɨwannaka wɨdɨna “Nɨmɨre kwaabɨyɨvɨsavɨ aai yɨme'nɨwaka?” 31Sara wɨdɨna kya' “Kwala bwa'naanya datha' gɨmɨnyɨ galyɨtata yɨvanɨgasa'na gara nedɨwaa? ‘Aai yɨme'nɨwa'?’ ” wɨde' gamɨrera. 32Wɨdesa' sahwai sare' yake' tɨnna wanganya'nei tɨnna wanganaasɨna. 33Wanganasadaa'nyɨ a'mwe sa' “Nɨmɨre kɨlaakejɨ' tewaanya' yɨma'nɨwaka,” daka lɨka yɨna, bɨ'bɨta yaka gamɨnyabanna bula'na yaka yuya sanna wɨdɨna. 34Yuya sanna wɨdɨna kya' sai wɨdɨna “Nyɨraavɨ, nɨmɨnyɨna nayaa yawɨralɨmwamwaanya'na gɨmɨ maamɨdarya yɨma'nɨwaa. Gɨmɨre kɨlaake' kuna warade' kwaamu'na dɨmwaihwode'gɨnyɨ,” wɨdɨna ya'.

35Kuna wɨdɨna yadaa'nyɨ Lotuangevɨ maremwaaiderera angevɨdaasɨ bwalyuna yeva kaanna bɨna yeva wɨdɨna “Gɨnnya taaya' mena baimwaka. Gotɨyare yagaala wɨjɨwaakaderɨ wawɨnya naanga kuna minna! Taanga wɨjaavanɨgɨnya' kabaimwakɨra.” 36Sahwara wɨdadaapi Jizaazai yagaala sa' kadɨka wɨ'nada Lotuangevɨ maremwaaiderɨ wɨdɨna “Lɨka minna! Nɨmɨnyɨna sɨmunyavɨ dɨragɨnna dɨlɨmwana!” 37Sara wɨdɨna yaka a'mwe pwaraavɨ wɨdɨna “Sarɨmɨ dɨmwaalyi! Nɨmɨjɨ Pitalyɨ Jemɨzalyɨ Jonɨ Jemɨzare gya'mwelyɨ gave saina wawaana! Aane pwaigɨ kwaigɨ aawa.” 38Wɨdɨna yaka kaanna wɨna yeva Lotuangevɨ maremwaaidere angevɨna yɨ'mavaawɨna kye' dara wanganake' “A'mwemɨlɨka yagaala naanga bazɨwodaapi pwara kɨnna dathɨvanɨgava! Jakɨnna dathɨvanɨgava!” 39Mi'na wanganaka angevɨ wɨlɨna yaka wɨdɨna “Yagaala naangesɨ jakɨnnyasɨ baa'na dɨvanɨgava! Taaya' balya myɨwa'. Aawa. Se warɨ'.” 40Sara wɨdɨna kya' gamɨnyɨna mayagaaijɨka kamaregye' kɨrɨ' sahwai yuyaraavɨ mwasawɨnna maratɨvatawaasɨna yaka taayavɨ ganaangesɨ ganɨmaangelyɨ gamɨnyawɨ mwaalesarajɨ sa makuna kya' taayayabanna wɨlɨna ye'. 41Mi'na wɨlɨna kye' gɨlaayavɨ ata lɨmwanna yaka kunnya yagaala wɨdɨna ya' “Talitha kumi!” aangyagaala dɨna “ ‘Taaya'gɨ dɨthɨkaaka!’ gɨthɨwa.” 42Sara wɨdɨna kya' yɨme'nya'bɨ' taaya' dɨkaa'na yaka kaanya dɨkavayamarina ya'. Sare' dare'nesɨ. Taaya sa' kwarame atɨraai sɨvɨlyɨrɨdaasɨ pwaraalya wavɨlavakesɨra. Kaanya dɨkavayamarina kya' yɨme'nya'bɨ' atɨka kamaru'nare' 43sai dɨragɨnna wɨdɨna ya' “Sarɨmɨ nayaa dɨnyu'nyɨla! Nɨmɨ yɨwe sa' a'mwe pwai kwai a'mwe pɨrɨ' kɨrɨ' nyu'nadɨka! Dahaa' taayavɨne wapaaya nya'ne dumaarila!”

Currently Selected:

Maakɨ 5: byr

Highlight

Copy