Maakɨ 4

Witɨzɨla pɨraihɨrakakesɨra.

(Matɨyui 13:1-9; Lukɨ 8:4-8)

1Pɨgaa' Jizaazai aalɨbumaangebaarɨ gaai wɨjɨwaakɨna. Wɨjɨwaakɨna yadaasɨ kwala yɨ'bwa'nemwaalesa'na sɨpɨyavɨ wɨlamwaaina kya' sɨpɨya' aalyavɨ a'ba yɨla'na yadɨsɨ kwala bwa'naanya yuya aalɨbumaangebaarɨ mwaalɨna. 2Sara mwaalɨna yadapi Jizaazai wɨjɨwaakya kwalaalya kumɨnyɨne'na yagaala ke'ba'na wɨdɨna ya' 3“Dɨnyu'nyɨla! Yɨthaanyi, pɨgaa' a'mwe witɨzɨla pɨraihɨrakya'nei kaanna wɨna ya'. 4Wawaka gannya wawɨnyavɨ sɨla kavɨraihɨraka' sɨla pɨnɨ tu'maangeba bwalaraawɨna kya' yusara bamaranyɨna ye'. 5Pɨba amwi sɨla naangejɨ' wa'dɨ'nyɨ a'ba kwaaka maalɨkejɨ' wa'dɨ'nyɨyaba sɨla pɨnɨ pɨraihɨrakake witɨzɨla yarai yɨrɨ'na ya'. 6Yɨrɨ'na kya' gannya mɨwɨrinya naanga magɨri kya' nyɨla naanga wɨdɨna yakegaa' yawaka baihinyɨna yaka yuya balɨna ya'. 7Kwaakevɨ lannake wa'dɨsɨ a'ba sɨla pɨnɨ pɨraihɨrakake yɨrɨ'na kya' lannake kɨnɨjɨ yɨrɨ'na yaka naanga gɨrina yaka kayaaka galadathɨwanna kya' kurɨjɨrɨka dɨna yaka gamɨre sɨla mi'nyɨ ya'. 8Sɨla pɨnɨ kwaaka tewaanyavɨ kavɨraihɨraka' sɨla sa tewaanya yɨrɨ'na yaka naanga gɨrina, sɨla tewaanya yɨ'nyɨna ya'. Yɨ'nyɨna yake pɨnɨ sɨla pɨrɨvɨdaa'nyɨ kɨbawe (30) yɨ'nyɨna ya'. Sɨla pɨnɨ sɨla pɨrɨvɨdaa'nyɨ naanga kɨbawe (60) yɨ'nyɨna ya'. Sɨla pɨnɨ sɨla pɨrɨvɨdaa'nyɨ naanga (100) yɨ'nyɨna ya',” sara wɨdɨna ya' Jizaazai. 9Yagaala ke'ba'na mi'na wɨdaka Jizaazai wɨdɨna ya' “Kadɨ'nakeinyɨ daakajɨ nayaa dɨnyu'nana!”

Yagaala ke'ba'na wɨdakebwinesɨ.

(Matɨyui 13:10-17; Lukɨ 8:9-10)

10A'mwe kwala bwa'naanya mena wɨna yesagaa' Jizaazare atɨraai yaka sɨvɨlyɨrɨdaasɨ pwaraai sarajɨ a'mwera gamɨjɨ mwaaidɨvɨsarajɨ sa Jizaazarɨ yɨwaara'na “Yagaala ke'ba'na dɨwaanya' dɨnejɨwaakya!” 11Sara yɨwaara'na kye' Jizaazai wɨdɨna “Yagaala nebulya' yoimavajalɨkurakya' Gotɨyai maremwaaide'ne' Gotɨyai yɨhɨzɨwaainɨwaka. A'mwe pwara mwasɨlaanyara yagaala yuya ke'ba'nanya gave pɨrɨvɨna wɨ'nɨvanɨga'. 12Sa'na yɨma'nya'ne' dɨnɨkesɨra.

Tɨnna sara wangadɨvɨ' kɨrɨ' sɨmunya myawɨranganyɨvanɨga'.

Kadɨka sara wɨ'nadɨvɨ' kɨrɨ' sɨmunya myawɨramaarivanɨga'.

Yawɨrapɨjɨ mudɨkebwi yawɨramaapɨjɨ kwajɨ

Gotɨyai kumɨre kayaa'nanyabwi kamarasɨ'nadɨka!

Yagaala pɨraihɨrakake'na Jizaazai wɨjɨwaaka'.

(Matɨyui 13:18-23; Lukɨ 8:11-15)

13Sai wɨdɨna “Yagaala ke'ba'nanya sa' myawɨryijɨwaava? Yagaala sa' myawɨri yeva yagaala ke'ba'nanya pɨnɨ gara jawɨryideihɨlaka? 14A'mwei yɨhɨthɨwei yɨsɨla pɨraihɨrakakei Gotɨyare yagaala wɨjɨwaakadelyɨra. 15Sɨla pɨnɨ tu'maangevɨ pɨraihɨrakake bwalaraawɨna kya' yusara maranyɨna yeta pwara Gotɨyare yagaala ku'napɨjɨ yɨme'nya'bɨ' Saataanɨ yarai bɨna yojɨ yagaala wɨ'nɨpɨja' yarai marasɨ'na yadengɨra. 16Sɨla amwi wa'dɨsɨ kwaaka maalɨkejɨkɨ yɨsɨla pɨraihɨrakake pwara sabaaibɨ' Gotɨyare yagaala yɨme'nya'bɨ' yɨlaaya'na wɨ'nyɨna yapɨjɨ 17kumɨ sara dɨragɨnya' kɨnɨnnakera mamwaalyɨ. Aawa. Dɨvi maalɨkegaa' a'mwera Gotɨyare yagaalya'na maanga wɨdɨna, taanginya wina kyapɨjɨ yɨme'nya'bɨ' Gotɨyarɨna yagalya'ma'na yɨpɨ'dengɨra. 18Kwaakevɨ lannake wa'dɨsɨ sɨla pɨnɨ pɨraihɨrakake pwara Gotɨyare yagaala nayaa wɨ'nyɨna yɨpɨ'dengɨra. 19A'mwe sara Kwaaka davakɨna yawɨ'na, nɨgwɨlalaakenna yawɨ'na, gɨlyɨvɨta naangenna yawɨ'dɨvɨsara sara yɨpɨ'de'na Gotɨyare yagaalya' kayaaka galadathɨwanna kyojɨ a'mwera navɨka mwaaipɨjara Gotɨyare yagaala navɨka yɨpɨ'dere waryaanyara. 20Kwaaka tewaanyavɨ sɨla pɨnɨ pɨraihɨrakake pwara Gotɨyare yagaala nayaa wɨ'nyɨna, daapɨna yɨpɨ'dengɨra. A'mwe sara Gotɨyarɨne tewaanya yɨpɨ'derera. Pwara tewaanya kɨbawe (30) yɨpɨ'de, pwara tewaanya naanga kɨbawe (60) yɨpɨ'de. Pwara tewaanya naanga (100) yɨpɨ'desɨra.”

Laamuyai maa'gulyavɨ marayulyakɨna yɨnɨke'nesɨ.

(Lukɨ 8:16-18)

21Sagaa' sai wɨdɨna “A'mwe pwai laamuyai maa'gulya' marirɨ'mwagakɨnɨkerɨ lɨka marulyakadei daaka! Nabaai se warya'ne yɨ'bɨnya dalaangevɨ laamuyai lɨka marulyakadei daaka! Aawa. Yɨ'bɨnyavɨ yɨlakade'nesɨra. 22Sare' dare'nesɨ. Nɨmɨre yagaala aane pɨrɨ' kɨrɨ' lɨka yulya'nɨke' dɨvi nayaa yɨbwarɨdaakwadesɨ. Dahaa' wɨjɨwaakɨyagaala wɨdadɨnya aane pɨrɨ' kɨrɨ' bwakakɨnɨke' a'mwera myawɨrivanɨgasa' ‘Dɨvi ku'maayaba yɨma'naabana!’ dena bwakake'nanyɨ. 23Kadɨ'nakeinyɨ daakajɨ nayaa du'nana!” 24Jizaazai wɨdɨna “Kadɨka wɨ'nɨvanɨgasa' nayaa jawɨrila! Yawɨbwasa' dɨrɨvɨkɨ'de' sa' gɨrɨvɨkɨradesɨ. Nabaai pɨrɨ' gye'mwagahɨzaavadesɨ. 25Sare' dara yɨhɨthɨvanɨge. A'mwe pwai ‘Jizaazare yagaala waburya nyɨwaka! Wɨ'nɨma!’ kadozɨ Gotɨyai yagaala pɨnɨ wɨjɨwaakadelyɨra. Pwai ‘Jizaazare yagaalya taanga nyɨwaka. Waramaryana!’ dazai Gotɨyare yagaalya myawɨri yajai nɨmɨre yagaalya' wasɨ'najarɨ Gotɨyai yagaala pɨnɨ mujɨwaaki yadelyɨra.”

Wɨjɨwaakɨyagaala sɨla yɨrɨta'nesɨ.

26Yagaala pɨrɨ' wɨdɨna “Gotɨyai a'mweraavɨ maremwaaide' naanga yɨma'nya'ne'na daresɨ. A'mwei wawɨnyavɨ sɨla pɨraihɨrakadevaaibɨsasɨ. 27Pɨraihɨrakadevɨ a'mwei sawɨsavɨ se wa'da yɨrɨka pu'daasɨyavɨ dɨkaa'na yada navɨka mwaaidɨ'nyɨ sɨla pɨraihɨrakadengɨdaa'nyɨ bilyɨrɨ'na. Bilyɨrɨ'na yadevɨ naanga sara bilyɨrɨ'daa'nyɨya'na myawɨri. 28Kwaaka gamɨ savɨdaasɨ yɨlaabɨna. Sɨnnawɨ witɨya maalɨke bilyɨrɨ'na, dɨvi purɨrya yɨ'nyɨna, dɨvi sɨla yawaka yɨna yadesɨ. 29A'mwei dara wangade' ‘Yawaka mi'na yɨwake' daaka!’ dada yɨme'nya'bɨ' kwaari'mata yadɨ'mwagakɨnɨkesɨ marawɨdɨlavamaa'na yade sɨla maaryagaa'nanyɨ. Gotɨyai a'mweraavɨ maremwaaide' naanga yɨma'nya'ne'na sahɨrɨsɨra. Sare'na a'mwera myawɨryarera.”

Wɨjɨwaakɨyagaala maazɨtetɨ sɨlyanna.

(Matɨyui 13:31-35; Lukɨ 13:18-19)

30Jizaazai wɨdɨna “Gotɨyai a'mweraavɨ maremwaaide'na be yagaala yɨhɨzɨwaakɨjɨwana? Sa'na ke'ba'nanya berɨvɨ wakaadevaka? 31Darebaaibɨsasɨ. Gotɨyai maremwaaide' sɨnnawɨ maalɨka warɨna, dɨvi naanga yɨma'nya'ne'na yɨsɨ' maazɨtetɨ wo'nɨkikɨne sɨla maazɨtetɨ maalɨkesɨra. Yuya pɨnɨ Kwaakevakɨ naangengɨra. Yɨsɨ' maazɨtetɨ aranya naange'bɨsɨkɨra. 32Yɨsɨla maalɨka sa' pwai kwaakevɨ maraburɨnna yada yɨsɨla maalɨtaayamɨlɨkɨdaa'nyɨ yɨsɨ' yɨrɨ'na yada naanga gɨrina yada sɨgya naange' waayadɨ'nyɨ yutara sɨgunyavɨyara gamɨre taanyangɨ arɨta yɨlyalaanna yadɨvɨ' kɨma'nyawɨ mwaaidɨvɨsare. Gotɨyai maremwaaide' sahɨrɨsɨra.” 33Jizaazai yawɨ'na “Kumɨre yawɨsa navɨla'mudɨka! Nayaa yawɨpɨnebaaibɨ' wɨjɨwaakɨma!” daka ke'ba'nanya kwalaalyangɨ gamɨre yagaala wɨdɨna. 34Wɨdɨna yakevɨ a'mweraavɨ ke'ba'nanyanna wɨdɨna. Kɨrɨ' kɨma'nyawɨ gannya gaveraavɨ aangyagaala nayaa wɨjɨwaakɨna ya'.

Jizaazai yɨhuta naange' wɨdaasa'.

(Matɨyui 8:23-27; Lukɨ 8:22-25)

35Yɨrɨka savɨ nyɨla kabwalaawa' aalɨbumaangevɨ Jizaazai gamɨreraavɨ wɨdɨna “Aalɨbunya davɨ kengihɨrɨ ga'makwawaana!” 36Wɨdɨna kya' kwala naangengɨ yagalya'ma'na yeva gamɨrera sɨpɨyavɨ Jizaazai wɨlamwaaidɨ'nyɨyavɨ wɨlamwaaina kye' gamɨ kwarɨjɨ makuna ya'. Nabaai sɨpɨya pɨnɨ aalyavɨ yɨlarake wɨna ye'. 37Kaanna kaanna wodaapi yɨhu'maanarya' kya' aalɨmavajɨnaaka sɨpɨyavɨ yɨlawɨresɨ'naabɨna kya' sɨpɨyavɨ aalya buladɨ'nyɨna ya'. Aalya naange' buladɨ'nyɨna kya' gamɨrera dara wanganesa' “O, we', nemɨ balaajɨwona!” 38Deva Jizaazai sɨpɨyavɨ lɨkimagɨ mwaalakei dɨhaihɨsavɨ se warakerɨ. Deva dɨthɨkavɨmwaaihɨna yeva yarai wɨdɨna “Aaka, Nejɨwaakadɨnyaigɨ, nemɨ yarai nyɨwawaadɨka! Nemɨnyɨna ‘Nabaipɨka!’ myawɨrijɨvanɨgɨ?” 39Sara wɨdɨna kye' Jizaazai dɨkaa'na yaka yɨhusavɨ maanga wɨdaka “Mi'nanyɨra,” aalyavɨ wɨdɨna “Aalya'gɨ jaka madɨnna! Kave warɨna ja!” Wɨdɨna yakevɨ yɨhu'maanarya' mi'na muda'na kya' aalya' kave warɨna ya'. 40Aalya' kave warɨna kya' Jizaazai wɨdɨna “Lɨka baa'na yɨvanɨga'! Gotɨyarɨ malɨmwagyɨvanɨga' lɨka yɨwaasa'!” 41Gamɨrera sara wanganeva lɨka naanga yeva dɨne' “Yɨhusasɨ aalyasɨ sawaai gamɨre yagaalya' wɨ'nɨwaalya' be a'mwelaka!”

Currently Selected:

Maakɨ 4: byr

Highlight

Copy