Jenɨzɨzɨ 40

Jozepɨyai kalavuzaraarɨna kɨrɨmɨre waja wɨjɨwakyaa'.

(40:1-23)

1-4Jozepɨyai kalavuzavɨ mwaaidɨsɨyagaa' pɨgaa' gamɨre wawɨnya wɨdaayadisaraarɨna A'mwe Pero sɨnna tɨka davɨna kwia' kalavuzavɨ wɨmwaaihɨna ya'. A'mwe pwai Peroyare wapaayajɨ aalyasɨ wɨmaarina yadei, yɨ a'mwe pwai Peroyare gɨrɨkula yɨdɨka yadei saraalyɨ Jozepɨyalyɨ kalavuzavɨ mwaale'.

5-19A'mwe pwaraai sawɨsavɨ waja yɨna yagi. Waja yɨna kyagi mwanyavɨ Jozepɨyai wɨlaabɨna kya' jɨkurɨna mwaalɨna yagɨla “Sawɨsavɨ naarɨmɨ waja ya'nyawaaiholyainaalyɨra. Waja bewaja yɨvanɨgolya'na aai nehɨzɨwaakajɨwaka?” wɨdahi. Sara kudahi Jozepɨyai “Nɨmɨre Gotɨyai waja yawɨ'delyɨ. Kɨrɨmɨre waja nyɨji! Gotɨyai nyɨjɨwaakadeinyɨ,” wɨda'. A'mwe pwai Peroyare wapaaya wɨmaarina yadei gannya waja Jozepɨyarɨ wɨda' “Gɨraipɨwɨla taanya dawaai da' wa'dɨsɨ nɨmɨ wangamwa. Wangadaari purɨrya yɨ'nadaasɨ wanganyawaaihe' dahaa' mya mena yimwake' wangamwa. Mena kyimwa' Peroyare gulyavɨ marama'mwagikɨna yena wɨjaavɨna yɨwana.” Mi'na kuda' Jozepɨyai wɨdɨna “Waja sa' gɨzɨwaakɨ! Taanya dawaai dasa' sawɨta daryaai darɨ' sa'bɨsasɨra. Sawɨta daryaai darɨ' kajɨnnojɨ Pero ‘Nɨmɨre wapaaya dɨnyɨmaryaama! Aya' jɨthera,’ gɨthathera. Gɨmɨ sara ya'gɨzɨ nɨmɨnyɨna jawɨ'deigɨnyɨ. Yawɨra'gɨzɨ ‘Jozepɨyai kayaa'nanya' myakerɨ kalavuzavɨ wɨmwaaihava,’ duthathera.” wɨdɨna. A'mwe pwai Peroyare gɨrɨkula yɨdɨka yadei sara wɨ'naka Jozepɨyarɨ wɨda' “Nabaai nɨmɨ waja ya'nyawaaihe. Soigɨlya dawaai da' kinya yɨlamarina yɨvanɨgeinyɨ. Soigɨlya aaya a'banyavɨ gɨrɨkula ge ge mihɨnɨke yusara gɨrɨkula dapanadaapi baihanakeinyɨ,” wɨda'. Tɨvi'na kuda' Jozepɨyai “Gɨmɨre waja' gɨzɨwaakɨ! Soigɨlya akwalamwai sawɨta daryaai darɨ' sa'bɨsasɨra. Sawɨta daryaai darɨ' kagɨzɨnnojɨ Peroyai yɨsarɨ wɨla tɨdavojɨ gɨmɨnyɨ pɨgaa' wɨla kamaragɨrɨdavojɨ yusara gɨnɨpɨ'deigɨnyɨ,” wɨda'.

20-23Sawɨta daryaai darɨ' kajɨnna' Peroyai gannya wawɨnya wɨdaayadɨvɨsaraavɨne tɨka munne ya'. Sagaa' Jozepɨyai sara wɨdake'na Pero sara ya'. A'mwei gamɨre wapaaya wɨmaarina yaderɨna jaka wɨdɨna yaka “Gɨmɨre wawɨnya sɨnnawɨnya' jɨ!” wɨda'. A'mwei gamɨre gɨrɨkula yɨdɨka yaderɨ wɨla mararɨdava'. Peroyare wapaaya wɨmaaryadei gannya wawɨnya yɨna yada Jozepɨyarɨna Peroyarɨ mujaka navɨka mwaala'.

Currently Selected:

Jenɨzɨzɨ 40: byr

Highlight

Copy