Maleko' Maleko' Gizine' Luhuvo Nitekumu' Gomu' Gataa' Gamazi
Maleko' Gizine' Luhuvo Nitekumu' Gomu' Gataa' Gamazi
Mene buku ne'mo nene Izesu' Kilisito' monovo danava'vemu' lo soto' neive. Izesu' soto' ine' gameneloti' api' ogo lo soto' amine'za asi mono' noso holo-ngedaa' ive Zohane' aza api' ogo evene' mono' gamazi lo-ngemo alingumu' aka vele-didoti' nene api' ogo gize neive. Ido' aza inite' muki' ogo molo ingumukisi ido' evene' apize ngimine' inite' malatikisi nene lo soto' ine'za Mataio' nehe Luka' nehe Zohane' nehe nete li soto' ani' ne'mino vai' ma lo soto' amive. Zuda ve nabalite Izesu'ni ningi gosele' angumukisi lo soto' ogo ido' alinge' nene engi' ebe'ninguti' Lomaveti ngamanilo' gizebo ve naba nete bililizave li nadii li-ngidahe nemukisi lo neive. Ido' helavo gamene seto hamo ogo vavo O'moso'mo nado do ote-dihe nemukisi lo neive.
Mene buku gizive nene gulive ma sainimi amine' neine'za gamene gala'mudati' vomine evene' nete a'mine buku nene Maleko' gizine' ve lani' ve. Mono' noso holo-ngedaa' ive Zohaneki ido' aposolo Zohaneki gulive'ine ne'mino Maleko' gulive gohi ma nene Zohane' minine' ve. Ido' eze izelehi gulive nene Malia' minine'. Ido' a'mine izelehi numu've nene Zelusalemila minine' (Aposolo 12:12). Ido' Banabasiki Malekoki ingine hamo' zuho minasine' ve. (Kolosa 4:10) Ido' evene' ma nete gilani' nene Izesu'ni analo' dave nete ve goso've ma nesi analo' dalisa navo baka' mino golise loti' izo vive nene ei' Maleko' minine' noloseive li gilani' (Maleko' 14:51-52). Gana' api' igi mono' gamazi lamine' lilisa ebe' mala vadaa nene Maleko' aza Paulole Banabasilesi maka' vani'. Maka' vani'za aza gono'ine nene olihe osu' lamido' hulo-ngedo numu'vela tibizo vine'. Ne'mine ogavo Paulo' aza gohi gamene ma ele'mizo volosa gelamine'. Banabasi' ele'mizo volosa gilinekisi Paulo' aza ele'mizo volosa gelamine'. Ne'mine igi lolize gamazi lasidi'mo Pauloki Banabasiki ingine ho'lii mini eza ema asine' (Aposolo 13:5-13, 15:37-39). Paulo' aza Silasi'ni ele'mizo Siliala vi Kilikia nivasingumu' Maleko' aza Banabasikisi Kipilo ailanila vasine'.
Alinge' nene Maleko' aza Paulokisi monisa a'midoti' nene Petolokisi monasine' (Kol 4:10, Hilemoni' 24, 2 Timoteo' 4:11, 1 Petolo' 5:11). Gamene gala'mudati' vomine evene' nete ti' li lani': Maleko' aza Petolokisi bizi monaa' asive mino Izesu' gamazi line' ido' inite' ogo molo ingumu' Petolo' laa' ine' gamazi nene gizine' ve lani'.
Mene buku nene Zuda ve minamani' heta ato' vemu' Maleko' gize-ngidive lo mo soto' o neive. Nanitekumu', aza nene Zuda veliti gamazi'inemukisi monovo'inemukisi ne'mino neive lo laa' ive minine' ve. Evene' muki' nete gilani' nene Maleko' aza Loma vetingu' mino a'mingu' Izesu' evenele zuho minani' nene Izesu' amuzo've ngelebizelesamu' gizine' ve lani'.
Currently Selected:
Maleko' Maleko' Gizine' Luhuvo Nitekumu' Gomu' Gataa' Gamazi: aso
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.