Mataio' 27

Izesu'ni Pilato' Neida Ele'mizi Vani' Gamazi

(Maleko' 15:1; Luka' 23:1-2; Zohane' 18:28-30)

1Nedenga' go' nolivo eveneto' medeli O'moso inite' lehizi-daa' ave naba muki' ido' Zuda veti gizebo ve'ine nesi ingine mulise mili Izesu'ni bili hililizangumu' gamazi li li volelo' melo' igi minani'. 2Li mini analo' nala' di ele'mizi vi Zuda veti misubola Loma vete di soto' milani' ngamanilo' gizebo o minine' guvelesi ve Pilato' neida ele'mizi vi ei' anau' milani' ve.

Zuda' Aza Izesu'ni Biluvaliti A'ningu' Molavo Bele Helelone Langumu' Geni Belavo Vo Nala' Ine' Gamazi

(Aposolo' 1:18-19)

3Vikevo Zuda' aza Izesu'ni hulo biluvaliti a'ningu' ive'mo Izesu'ni goni' i-di helelive lani' nene ningo gelo muluno do velepe' izo a'mine siluva' moni teoti (30) nene ihe' do vo eveneto' medeli mini O'moso inite' lehizi-daa' ave nabasi ido' Zuda veti gizebo ve'inesi do tine' molo nongemo 4ti' lo line': Naza lihime do ve lamine' lihime've nomine' mene hulo biluvaliti adingu' okuvo bili hililisa naze. Lavo ingine olo. Lihime dabe. Neve ne leli' gono nomive. Gei' gonoka ve lani'. 5Likevo Zuda' aza a'mine siluva' moni nene mono' numungu' hulo molo mono' numunguti' lemo vine'. Lemo vosa vo nala' ine'. 6Ne'mine ogavo ingine eveneto' medeli mini O'moso inite' lehizi-daa' ave naba a'mine moni di ne'mine lani': Mene moni nene evene' ma bele helelone lo hulune' nenako nemu' ne'mi lihime a'mido' neinako nemu' O'moso'mi gonomu' hulani' monisi do hamo' ogo molalonido' nomive. 7Ne'mine li a'mine monimu' gamazi li volelo' melo' igisa misubo somo lolo' oga' ive'mi misubo've ma hetati' ve ma a'mida hililiza aleve galese izilizani' ebe' meni hizani'. 8Meni hizi a'mine misubo nene evene' ma bele helo vanise've leke-delone li hulani' monidunu' meni hizanako nemu' nene a'mine misubo nene vanise misubo ve li milani'. Ne'mine li milikevo idisesi nene vanise misubo ve lo ha laa' none. 9Ne'mine ikevo O'moso'mi veleti' gamazi lo soto' oga' ive gozopo' ma minive Zelemia' aza gamazi mono' godolou' gizekine' ma nene gihile izine'. Ti' lo gize neive: A'mine siluva' moni teoti (30) nene Isilaele' aleve malite a'mine dize minivemu' ei' oko'nolo' meni hizilizangumu' ei' meni've ve lani' moni nene di 10Guvelesi ve'mo lo-nimido' a'mine monitunu' nene misubo somo lolo' oga' ive'mi misubo ma meni hizani'.

Pilato' Izesu' Monovomu' Longo' O-dine' Gamazi

(Maleko' 15:2-5; Luka' 23:3-5; Zohane' 18:33-38)

11Ido' Izesu'ni ele'mizi vi ngamanilo' gizebo ve naba'mi velelo' di vi oti-dani'. Oti-dikevo ve naba ne'mo longo' o-do ti' line': Gaza nene Zuda veti guve'inesi ve naba nabe. Olo. Ne'mine lavo Izesu' aza ti' lo lo-imine': Mo gasika nene nolaine' ve. 12Ido' ingine eveneto' medeli mini O'moso inite' lehizi-daa' ave nabasi evenelite gizebo ve'inesi inite' mukikumu' goni' i-dani'za aza gamazi hamokisi mo lo-ngemamine'. 13Ne'mine ogavo Pilato' aza ti' lo lo-imine': Gamazi ma lo-ngemamaine' nenako gamazi muki' geito' li mili nilani' nene mo gelabe gelamane 14Ne'mine line'za aza gamazi hamokisi a'mido' mo lo-emamine'. Gamazi lo-emamivo ngamanilo' gizebo ve Pilato' aza gala muki' goloso giline'.

Izesu'ni Bili Hililizave Li Goni' I-dani' Gamazi

(Maleko' 15:6-15; Luka' 23:13-25; Zohane' 18:39–19:16)

15Ido' kilisimasilo' kilisimasilo' O'moso'mo Zuda veti avotemotine ise'ine izingumu' geloo holise' minaa' une' gamenelo' gamenelo' nene evenelite galapuso ve muki' minanguti' nene hamo' ma heta vilive li gulive ikevo ngamanilo' gizebo ve naba ne'mo a'mine ve nene nala' numunguti' hulo heta o-ngedaa' ine' ve. 16A'mine Izesu'ni goni' i-dani' gamenelo' nene Izesu' abalaho ma gizengize ve ma guvele buu lo monive gulive gohi ma Balabasi' aza nala' numungu' minine'. 17Neivo evene' mulise milikevo Pilato' aza ti' lo longo' o-ngidine': Lingine gilikevo zahine iseve izo hulo lengita olove. Izesu' evene' do ngu' izelive alosa neive lave ma nehe abalaho Balabasi' ma neve. 18Ido' Pilato' ne'mine lo longo' o-ngidine' nene nanitekumu' ve. Evene' vai' Izesu'ni e'metani' nenako nemu' nene ingine ezemu' mulu'ningu' goloso gilani' nemukovo' nene nezela gonito' ele'mizi milikeve lo giline' nemu' longo' o-ngidine'. 19Ido' Pilato' aza zasite minaa' ani' holomolo' mino Izesu' goni've nogilivo elenaho gamazi eita hulo molo line': Gaza ne mo a'mine ve lamine' lisihe' ogo neive'mi oko'nola mo gamazi lo molamiline' o neive. Holuka' eikumu' vamu' ma ninge emo mulumo naba goloso nogele-duve lo line'.

20Pilato' aza zahine apase lengemelove lo longo' o-ngedavo eveneto' medeli mini O'moso inite' lehizi-daa' ave nabasi mono' gizebo ve'inesi ingine mulu'ningu' hizikevo evenelite Balabasi'ni nene apase-ledo Izesu'ni bele helelesane li li-imani'. 21Li-imikevo ve naba'mo gohi longo' o-ngedo line': A'mine ve sitakuti' mene zahine apase hulo-lengedekuvo lengita vilive. Lavo ingine Balabasi' ve lani'. 22Likevo Pilato' ti' lo lo-ngimine': Ido' evene' O'moso'mo do lu' izelive lo imiselelesa live ve lave Izesu'ni mene nadi' o-delove. Lavo evene' mukilite ti' li lani': Gaza lanivo lohoto' zalo' bili hililizave. 23Likevo aza lo-ngimine': Nanitekumu' lohoto' zalo' bele helelone. Inite' goloso ine' nene nanite' nolive. Ti' lo lo-ngimine'za ingine amuzo mili lohoto' zalo' bele' navo li gohi geligelinga lani'. 24Likevo Pilato' aza gamazi line' mo ana damivo a'mingu' lovo naba mo soto' iline' ogavo nene ningo lihime ezela minamilive lo ngelebizelesa noso ma do eveneliti ve'nido' ana noso' noizo ti' lo lo-ngimine': Mene lengi' initetine ve. Lingine lihime've nomive lisihe' lamine' mene bililizaha nenita ei' lihime minamoloseive. 25Ne'mine lavo evene' mukito' lani': Bele helelone' nene a'mine lihime lelitasi mino leze zuho alinge' soto' ilizavelasi havo' mine do vo mineleseive. 26Ne'mine likevo Pilato' aza Balabasi'ni hulo heta o-davo engita vine'. Ne'mine ogo Pilato' aza lavo ngibilaa' ani' gavosodunu' Izesu'ni mehene izivi' ledivi' igi bilikevo di vi lohoto' zalo' bililizave lo Loma veti ami pilisi ve neti a'ningu' molani' ve.

Ami Pilisi Ve Nete Izesu'ni Goboni Mili-dani' Gamazi

(Maleko' 15:16-20; Zohane' 19:2-3)

27A'ningu' molavo a'mine ngamanilo' gizebo ve naba'mi ami pilisi velite Izesu'ni ele'mizi ngamani numuno naba'mi lulou' dizi vi a'mingu' minani' ami pilisi ve linge mamu' vise likevo mukito' Izesu' velelo' di gese' ani'. 28Ne'mine igi a'mine ngolokine' genegana ne di huli-di guve'inesi ve naba nete ngilaa' ani' ne'mine gele minelive li lehoko' ne'mine gulehe' lavolavo di ngili-di 29uhoni nala' di gangi guve'inesi ve nabalite madu'nido' gihaa' ani' inite' ne'mine apa nite' igi lili' igi madunolo' gihi-di ana zamela angaba gavoso ne'mine imani'. Imi velela obuvo'ine hizi imi Zuda veti guve'inesi ve ma gopo'ni nolo-gimune li golo izi gize zohi' i-dani'. 30Gize zohi' i-di gituho' i-di a'mine angaba gavoso imikadunu' godololo' bili minani'. 31Ne'mini golo izani' ne osu' lavo genegana di ngili-dani' nene apasi di huli-di ei' oko'nolo' inite've nene gohi di izi-di lohoto' zalo' bililisa ele'mizi vani'.

Izesu'ni Lohoto' Zalo' Bilani' Gamazi

(Maleko' 15:21-32; Luka' 23:26-43; Zohane' 19:17-27)

32Ele'mizi vi numuno ebe' nihuli Kilene ebekuti' ve ma gulive Simoni'ni nene ningi Izesu' lohoto' za'velo' gehe-delive li amuzonga li-imikevo gihine'. 33Gehavo vi ebe' ma minine' gulive Goligota nene leli' gamazikoti' godolo amuzo ebe' nela vi hetelani'. 34Vi heteli vaini noso a'mingu' mulumo mate-ngedaa' inite' ekese' ine' nene di gopo ikeni' nene nalive li imani'za ngomo no geleko namolosuve lo o'ove line'. 35Ne'mine ogavo lohoto' zalo' bili gili' li di oti badani'. Di oti badi genegana've ize' mili dalisa zohi' igi geheni mulo ngomo ma hulika' hulika' ikevo ngivile' ogo hulive'mo doka' doka' ine'. 36Ne'mine igi a'mida mini gizebo i-di minani'. 37Ido' lohoto' zalo' bilisa goni' i-dani' lihime ne li soto' igi me ve Izesu' nene Zuda veti guve'inesi ve ve li luhuvo gizi godolo veleto' nene di badani'. 38Ido' gizengize ve sita' ezesi maka' lohoto' zalo' ngibili ma ne ana zamela di oti-di ma ne ana adavala di oti-dani'. 39Ne'mine ikevo evene' igi vigi ave nete ungumu' izi divi' ledevika li-di 40ti' li lani': Mono' numuno naba izo kuso hulo gamene sitohamo novivo gohi gizelove laa' anive gaza O'moso'mi gipele noo ma gei' okonga nene do gu' izo lohoto' zaloti' apaso lemevo. 41Nilavo eveneto' medeli mini O'moso inite' lehizi-daa' ave nabasi mono' apizi ngimaa' avesi mono' gizebo ve'inesi ingine a'mine a'mine igi gize' i-di li volelo' melo' igi ti' li lani': 42Aza evene' linge ma nene do ngu' izive lani'za ei' oko'no nene ngelo do u' izamiline' ogave. Isilaele' aleveti guvetesi ve naba ma ne ngelo minelihe. Lohoto' zaloti' lemo ano lovo. Lemavo eito' gele ele'vole' olone. 43O'mosolo' gele medele mino O'moso'mi gipele nouve laa' neine' nenako nemu' nene O'moso'mo ezemu' umo helavo ma alo' do u' izezo lovo. 44Likevo gizengize ve sita' lohoto' zalo' maka' ngibilavesi a'mine a'mine igi gamazi goloso li-dasine' ve.

Izesu' Hiline' Gamazi

(Maleko' 15:33-41; Luka' 23:44-49; Zohane' 19:28-30)

45Ido' holise' tuvelu (12) kilokuloti' ebe' mukiku' nene liti'muso ize gese' ogo mine do vo tili (3) kiloku nivenga' ogavo gohi labana' iline'. 46Ido' tili kiloku ne'mido' nene Izesu' aza amuzo molo asi naba lo ti' lo line': Eli, Eli lema sabahatani. Leli' gamazikoti' nene ne'mi monovo ne'mino neive: O'mosoo O'moso'ne make, nanitekumu' hulo-nedane. 47Lavo eze minine' gahevela minave linge ma nete nene gili ti' li lani': Polohete Elia'nimu' asi nolive. 48Likevo ve mali'mo a'mido' geto loti' izo vo nosou' lupizisa lipi naa' ani' inite' ma do ekese' oga' ine' vaini noso mau' lupizo vai' lavo viliki' viliki' lo nalive lo ngongo'nolo' izo imine'. 49Emavo evene' malite ti' li lani': Elia' lemo do u' izelihe ninge minelone. 50Likevo Izesu' aza gohi asi naba nolo Sikalahu've nohulo hiline'. 51Nohilivo mono' numuno nabau' izi hukikani' lavolavo nene veletati' gala'muda limivo izo ho'lo sita' neivo misubo mimi' noogo meni naba lemo geheni naba nene izivi' ho'livi' ani'. 52Ne'mine neivo gonoso galese ma nene ngolo' lani' nene O'moso'mi evenele zuho gozopo' hili minanguti' muki' ma oti gese' ani'. 53Oti gese' ikevo alinge' Izesu' hilinguti' otavo a'mine gomu' hilave gonoso galese huli Zelusalemi numuda vi evene' muki' soto' pizi ngimani'. 54Ido' a'mine mimi' ogavo ami pilisi veti gizebo ve'inesi ido' a'mida ami pilisi ve Izesu'nimu' gizebo minavesi mimi' ine' nene niningi a'mida inite' ine' nene ningi ngehelele goloso izavo ti' li lani': Lamineto' me ve nene mo O'moso'mi gipele gihile minani' neive lani'. 55Ido' vene' muki' nGalilaia misubokoti' Izesu'ni e'meti vi nasahili' idi'mi vani' nete hota gidini mini ningi minani'. 56A'mine vene' muki' minangu' nene Mangadala numudoti' Malia' nene minine' ido' Malia' abalaho Zakobongi Zosehengi ize'nibosi ido' Zebedaio' gipele zuhoti ize'nibosi nene minani'.

Izesu'ni Galese Izi-dani' Gamazi

(Maleko' 15:42-47; Luka' 23:50-56; Zohane' 19:38-42)

57Nivenga' molavo Alimataia ebetati' heneni ve ma gulive Zosehe' nene aza Izesu'ni e'metaa' ive nene ani'. 58Aza Pilato' neida vo Izesu' oko'nomu' longo' ine'. Longo' ogavo Pilato' aza Zosehe'ni di imilizave lo ami pilisi ve lo-ngedavo 59gonoso nene Zosehe'ni mo imikevo aza do lavolavo mokono' lamineku' do molo asese ize-dine'. 60Ize-do asi've Zosehe' lavo ei' gonoso galese've gosoho' gehengu' ma golo'vati-mikangu' nene do vo molo-do a'mine gonoso galese velelo' nene geheni naba ma do velehe' molo do tileko vine'. 61Ne'mine neivo Malia' Mangadala numudoti' nesi Malia' ma nesi a'mine gonoso galese gahevela nene mini ningi minasine'.

Gonoso Galeselo' Gizebo I-dani' Gamazi

62Ido' aize' holise' gamene ve li a'mine gamenemu' nene noso' nite' di va'va' iga' ani' gamene vavo gamene malo' eveneto' medeli mini O'moso inite' lehizi-daa' ave nabasi ido' Halisaio' mono' laa' avesi vi Pilato' neidaa di gese' igi 63ti' li lani': Guvekasi ve, velesi ha mino a'mine O'moso'mo evene' do ngu' izeline lo nimiselelesa live nouve lo gote izaa' ive'mo helo gamene sitohamo mino gohi otelesuve line' nene ha gele none. 64Nemu' nene izipahala zuhote igi a'mine gonoso nene gumine di vi gonoso galeseti' mo otave li evene' li-ngimikevo gomu' gote izo O'moso'mo nimiselelesa live nouve line' gamazi nene ivile' ogo ingine alinge' soza lilizani' ne'mo evene' ngele'mize gopo ogalive. Nemu' nene lo-ngemanivo ami pilisi vete vi a'mine gonoso galeselo' gamene sitohamo mini gizebo lamine' ilizave losa nolune. 65Ne'mine likevo Pilato' aza ti' lo lo-ngimine': Ti' li ma a'mida gizebo ilizave ami pilisi ve ne'mine ma di a'mida huli-ngidi lingine a'mine gonoso galeseti' nene gonoso gumine di vikelizave li aka'ine hizi tililizani' aka ma gili nii ma ha hizi tililisave. 66Ido' ne'mine lavo vi gonoso galese velelo' hizi tilani' gehedo' nala' di gili' li humo izi a'mido' kekeize luhuvo bili gi'mizi a'mido' gizebo minilizave li ami pilisi ve huli-ngidani' ve.

Currently Selected:

Mataio' 27: aso

Highlight

Copy