TUNUNG RI SUSANA AM I DANIL 13
13
Ruo ngaulun akim nabunduk guang ra kinantalur ri Susana
1Giu' ra Babil naayag sangulun ondo' ininggalanan ri Joyakim. 2Andu' nano ininggalanan ri Susana, anak ri Ilkia. I Susana sangulun ruandu' mantalur kaga' am mapasau guang. 3Karuo matuo nano totopot mangintopot ra ugama am nangila' ra anak nilo sumugut ra Ukum ri Musa. 4I Joyakim ralaki ri Susana langkaya' kaga' am mokoondo' rondo' taman ondo' malangka' mamaar ra baloi nano. Masalok ulun ru Jaudi matong ra baloi nano, sabap ra io ulun nauligan kaga' intor risilo. 5-6Moonong ulun ondo' mokoondo' ra baal, mongoi ra ruo ngaulun akim ondo' masalok mambaal ra pantuuman ru pangakiman giu' ra baloi ri Joyakim. Karuo ngaulun akim no bagu ayuk pinili' intor ra ilo ngai' ulun matutuo ru Israil. Intor risilo noyo minindagu Tuhan, “Kalaatan natabual giu' ra Babil intor ra ilo ngai' ulun matutuo, ginio ra intor ra akim-akim ondo' musiti' no mangila' ra mamagun.”
7Paat ra orou ti amon ru nakauli' noyo ngaangai' ulun, maindalom i Susana mugar-ugar giu' ra taman ru ralaki nano. 8Moonong orou karuo ngaulun akim no makakito ri Susana sumubol ra taman am mugar-ugar ra giu' no. Ilo pana tumalimpuun malaai riso. 9Mangkara' ilo ra malaat am nanalikur ri Aki Kapuuno', saboi malilianan kandoi musiti' baalon nilo koson ra akim. 10-11Karuruo ngaulun no pinantuyangon ru guang kumambil, kaa' baal raginio kalo pinabala' nilo ra rondo' am bokon, sabap ra sigagama' mauyu' koson mangiou ra moogot io makaalap ri Susana. 12Ginio ra moonong orou bambal nilo mansigo ra ruandu' no.
13Paat ra sangarawan indagu ondo' sangulun no ra ondo' bokon, “Ibok uli' tano, sabap ra nasaboi paat koson mangakan ra tanga' orou.” Ilo pana nantuliar am ugar. 14Kaa' kalupus minongoi liput-liput, nakapantuum ilo poyo giu' ra nogondo' intok. Nangkuot ilo rondo' am bokon ra atan sasaban nano, ilo pana nangiou ra kasagaan nilo. Ilo ruo pana nampakat koson rondo' orou muma' ri Susana sangulun.
Karuo ngaulun akim mirot mangambi' ra guang ri Susana
15-16Paat ra sangarawan, liliwa' karuo ngaulun akim tatanga' manginaa ra kaluagan ondo' moonsoi, minugar-ugar i Susana giu' ra taman koson ra kaindalaman. Namparangan riso ruo ngaulun ulipon ruandu'. Kolondo' ulun ra bokon ra giu' ondo' ak am ruo ngaulun akim ondo' nansibuni liliwa' nansigo ri Susana. Orou malasu' kaga', am moogot i Susana mariu' giu' ra taman. 17Indagu io ra ruo ngaulun ulipon no, “Ongoi min alapo' umau am pampagamis ra owou am kaputo' min kulobon-kulobon ru taman maa' raginio makapariu' aku.” 18Ruo ngaulun ulipon no nangaput ra kulobon-kulobon ru taman am miningkual minaya' ra kulobon ra kiing koson mangalap ra atan ondo' kinitaak ri Susana. Kalo nakito nilo ruo ngaulun ondo' tatanga' nansigo no.
19Pakaugar ayuk ulipon-ulipon no, ruo ngaulun akim no miningkual intor ra intok nansibunian nilo am agou-agou minongoi ra intok ri Susana. 20Konilo, “Kulobon-kulobon ru taman kinaputan noyo, am kolondo' makakito ritakau. Pinatuyangon akai ra guang kumambil. Suguto' noyo kasagaan mai am rulug no ramon. 21Amon ru kalo, mangani' akai ra inono' giu' ra pangakiman ra akai nakakito rirun nanusub ra ulipon-ulipon muno mugar maa' raginio makapagiluur ra sangulun ungkuyon mamulok.”
22Mangiluk guang i Susana am indagu, “Kolondo' ralan mingkual raki'. Amon jumuung aku, ukumin aku ra matoi sabap ra nansawa'. Amon marara' aku, makasulung aku ra landak mino. 23Kaa' moonsoi poyo maratu' aku ralalom ru kalindu' mino ra kolondo' sala intor ra makatula ra Tuhan.” 24I Susana pana giminolok ra mosongou kaga', kaa' karuo ngaulun akim ni niayuk giminolok-golok minanggal ri Susana. 25Sangulun boo intor risilo nagiru' nangukab ra kulobon ru taman.
26Paat ra ulipon-ulipon giu' ra ralalom ru taman nokorongog ra golok no, nasimbul ilo minongoi ra taman minaya' ra kulobon ra kiing koson magilong ra atan nasauk ri Susana. 27Kopongo ruo ngaulun akim no nambala', ulipon-ulipon no nauyu' kaga', sabap kalo igondo' baal raginio rinagu intor ri Susana.
Ruo ngaulun akim nangani' ra inono' kalo motopot intor ri Susana
28Suabon no paat ra ulun-ulun natimung giu' ra baloi ri Joyakim, ratong niayuk ruo ngaulun akim ra inatang malaat koson mangukum ri Susana ra matoi. 29Giu' ra saang ru ngaangai' ulun indagu ilo, “Piawo' i Susana anak ri Ilkia, andu' ri Joyakim!” Piawo' nilo io, 30am ratong io nabaya' ra ruo ngaulun matuo nano, anak-anak nano am ngaangai' ru pabukat nano. 31Mantalur kaga' i Susana, 32saboi ruo ngaulun malaat no nanusub riso nangiru' ra rundung ru bulos nano, maa' raginio makailong ilo riso saboi majala'. 33Nantangi' ngaangai' pabukat nano am rangan nano am osoi ayuk ondo' nakakito riso.
34Ruo ngaulun akim no pana minigor giu' ra saang ru mamagun, am liliwa' nampabanta' ra kalindu' nilo ra rasawat ru ulu ri Susana, timinalimpuun ilo nanguu' riso. 35Nantingaa' i Susana giu' ra suruga' liliwa' nantangi', sabap ra nagulayun io mangintopot ra Tuhan. 36Kopongo raginio indagu ruo ngaulun akim no, “Paat ra akai tatanga' mugar-ugar giu' ra taman, siminubol ruandu' ti am ruo ngaulun ulipon ruandu'. Io pana nangaput ra kulobon-kulobon ru taman am nanusub ra ruo ngaulun ulipon nano minugar. 37Kopongo raginio sangulun ungkuyon mamulok ondo' nansibuni giu' ra taman no mininggaar riso am narulug ilo. 38Paat raginio soroi akai giu' ra pisuk ru taman, am paat akai nakakito ra kalaatan raginio, nasimbul akai ra intok nilo. 39Nakito mai ilo nansilar, kaa' kalo narakop ungkuyon mamulok no sabap ra maikang io poyo intor ramon. Inukaban no kulobon am pagiru'. 40Ruandu' ti boo naguut mai am kinuatan osoi ungkuyon mamulok no, 41kaa' marara' io mambala' raginio. Gitio noyo inono' mai.” Sabap ra ruo ngaulun no sala' ka ayuk intor ra gino ngai' ru ulun matutuo ru manampagun kaa' niayuk akim, mamagun mangintopot ra pambalaan nilo am i Susana inukum ra matoi.
Binayag ri Danil i Susana
42I Susana pana giminolok ra bolos matangil, “Iou Aki Kapuuno' ondo' mantilayun, Okou nakapandai ra atan nakasibuni am nakaulig ra ngaangai' no ra kalo poyo masauk. 43Nakapandai Kou niayuk ra ulun-ulun raginio nangani' ra inono' kalo motopot intor raki'. Raino musiti' aku matoi kabalu' pana kalo nambaal ra atan pana intor ra ngaangai' panguwan malaat no.”
44Nokorongog Tuhan ra pakiasian ri Susana. 45Paat ra io inibit mingkual koson ukumin ra matoi, nangani' Tuhan ra pamaguangan ra sangulun ungkuyon mamulok ininggalanan ri Danil, 46saboi io giminolok ra bolos matangil, “Marara' aku magibaya' mansaan ra patayan ru ruandu' no!”
47Ngaangai' ulun nangkaili riso am pangkuot, “Atan kon muno?”
48I Danil pana minigor ra saang nilo ngaangai' am indagu, “Akau ulun ru Israil, totopot sasambungon akau ti! Ukumin kia ra matoi ruandu' ru Israil ra kalo inimumuyan am kalo natuum inono'? 49Saguli' no ra intok pangakiman, sabap ra ruo ngaulun no nangani' ra inono' kalo motopot!”
50Mamagun pana nalingas siminaguli' ra intok pangakiman, am gino ngai' ru ulun matutuo minindagu ri Danil, “Nanaak i Aki Kapuuno' rirun ra kapintaran nasailan umur muno. Ginio ra panturung no ra gino ngai' mai am pabalaa' ra sailon baal raginio ramon.”
51Indagu i Danil risilo, “Pantuliaro' ruo ngaulun akim no ra maalur. Imumuyin ku ilo sangulun am sangulun.” 52Kopongo pinantuliar, piniau ri Danil ondo' kasaa' am indagu, “Okou ulun matutuo malaat! Raino nalumpa' kou ru tula-tula muno galama'. 53 Nangani' kou ra kapatasan-kapatasan ondo' kalo matimpok. Ulun ondo' kolondo' sala inukum mu am ondo' makasala pinalabus mu, kabalu' pana minindagu Tuhan, ‘Pai' ukumi' ra matoi ulun ondo' kolondo' sala.' 54Amon ru totopot kou nakakito ra ruo ngaulun no nansilar, raguo': Saau ru puun ru atan ilo nambaal raginio?”
Taam io, “Giu' ra saau ru puun ru gata ondo' boborok.”
55Taam i Danil, “Moonsoi. Abau raginio musiti' mu bayarin ra painawo muno galama'. Malaikat ri Aki Kapuuno' sinusub noyo koson mampalapak rirun masauk ruo!”
56Akim no pana inbit mingkual am ondo' bokon inibit siminubol minuma' ri Danil. Indagu i Danil riso, “Okou papag ri Kanaan am sala' ka papag ri Jiuda. Pinalayau kou ru kinantalur ru ruandu' ti, am pangkaraan muno pinandikong ru kasagaan ru guang muno galama'. 57Naindalom kono nambaal raginio ra ruandu'-ruandu' ru Israil, am binaya' nilo kasagaan muno sabap ra malaa' rirun. Kaa' ruandu' ru Jiuda ti kalo masaga' jumuung ra kalaatan muno. 58Raguo': Saau ru puun ru atan okou nakakito risilo nansilar?”
Taam io, “Giu' ra saau ru puun berangan.”
59Indagu i Danil, “Moonsoi. Abau raginio musiti' mu bayarin ra painawo muno galama'. Malaikat ri Aki Kapuuno' naginaa noyo ra ilang nano ra kalindu', nakatampos koson mamutul rirun masauk ruo, saboi mamuso io ra akau ruo.”
60Kopongo raginio ulun masuang no nagindii am nagilakup am nongompor ri Aki Kapuuno' ondo' namayag ra ulun ondo' lumansan Riso. 61-62Nagagampan ilo miningkakat am minanggal ra ruo ngaulun akim no sabap ra nampainono' i Danil ra ilo nangani' ra pambalaan kalo motopot. Sumugut ra Ukum ri Musa, ulun ondo' mangani' ra inono' kalo motopot musiti' mangapu ra ukuman ondo' tinampos kalalair pataakon ra ulun inuwan. Ruo ngaulun akim no pana pinatoi, am ruandu' ondo' kolondo' sala bayagon. 63Matuo ri Susana pana, ralaki nano am ngaangai' pabukat nano narimbai ra pangamparan ri Aki Kapuuno' sabap ra ngaangai' panguwan ri Susana sotopot no kalo motopot.
64Intor ra orou raginio i Danil urumaton kaga' ru mamagun.
Currently Selected:
TUNUNG RI SUSANA AM I DANIL 13: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.