RUT 3
3
Nokoowot i Rut ra ralaki
1Tauli no indagu i Naomi ri Rut, “Moonsoi uyumin tokou ra ralaki, koson makabaloi kou galama' am moonsoi kaayagan. 2Karaa', ulun tatangan ra umo intok nangandayan muno am ngaangai' mangngandoi ruandu' no pabukat to poyo. Raino rongogo'! Maino no mangagik io ra barli. 3Pariu' no raino am pagumau ra umau maamis owou am pambayang ra bayang moonsoi kaga' muli. Mopongo raginio ongoi no ra pangagikan no ra barli no, pai' antal saboi makaakan am makainum io. 4Kuliararin mu intok luyaan nano. Makalunus io, sukiapon mu bajang nano am luya' no ra maar ra tupakon nano. Mambala' io boo rirun ra atan musiti' muno baalon.”
5Taam i Rut, “Maya' aku ayuk ra ngaangai' raguon muno ina'.”
6Kopongo raginio ongoi boo i Rut ra pangagikan ra barli am nambaal ra koson ra nanusuban ru iwan nano. 7Pakaakan am pakainum i Boas, naansukan io. Ongoi io ra tinuntur ra barli, luya' am pombolong. Sinok-sinok boo i Rut mininggaar riso. Sukiapo' no bajang ri Boas am pombolong maar ra tupakon nano. 8Olo'-olo' mampayung rondom, nangkailan i Boas am pambuir. Naliangan io nakakito ra sangulun ruandu' nombolong maar ra tupakon nano. 9“Osoi kou?” kuot ri Boas.
“Aku i Rut, tuan,” taam nano. “Kasaga' no mamingkal ra sukub koson mangampin raki'; kasaga' no manangandu' raki'. Sabap okou no pabukat mamaar ramon, okou noyo napalansanan ra bayag kuno.”
10“Mambarakat Tuhan rirun,” kon ri Boas. “Ra binaal mutu, napakito kou ra gagaya' ondo' maayo poyo intor ra atan ondo' binaal mu noyo ra iwan muno. Sotopot no makauyum kou ra sangulun buayoi, ondo' langkaya' kapoam ondo' musikin. Kaa' kalo binaal muno ginio. 11Pai' kaimamang, Rut. Suguton ku ngaangai' kitaakon muno. Ngaangai' ulun ru bandar nakapandai ra okou ruandu' ondo' moonsoi paliso. 12 Sotopot no aku ti pabukat molongkot muno am magalung rirun, kaa' mokoondo' poyo sangulun pabukat muno molongkot poyo intor raki'. 13Kaa' ayan ayuk poyo ragiti. Susuab no, amon ru pabukat raginio masaga' magalung rirun, moonsoi niayuk. Amon ru kalo mambaal aku ra bantu' sabap ri Aki Kapuuno' ondo' maayag ra magalung aku rirun. Raino pombolong no saboi ra susuab.” 14Nombolong i Rut ra tupakon ri Boas, kaa' suabon no, nakarat i Rut ra lakat poyo molondom. Marara' io makito ru ulun, sabap marara' i Boas mapandayan ru ulun ra soroi i Rut ra giu'. 15Indagu i Boas riso, “Paguso' sakiking muno am pabingkalo' ragiti.” Ginagaya' ri Rut susuban raginio. Pabuuro' boo ri Boas olo'-olo' ruo ngoopor ngakilogram barli ra sakiking no. Kopongo raginio pasaano' ri Boas ra limbawo ri Rut. Minuli' i Rut liliwa' nansaan ra barli no. 16Pakasaboi i Rut ra baloi, pangkuot iwan no ra ruandu' riso, “Atan boo kulaan ru ugar muni?”
Tinunung ngaangai' ri Rut ondo' binaal ri Boas riso. 17Kon poyo ri Rut, “Kon ri Boas, kalo sumaguli' aku rirun amon ru kolondo' ibiton. Taaki' no boo raki' ngaangai barli ti.”
18Indagu i Naomi riso, “Kulimani' ayuk, Rut. Mapandayan mu niayuk ra kapupusan ru ngaangai' ti. Kalo mongkoror i Boas amon ru kalo masalasai baal ragitio ra orou raiti' niayuk.”
Currently Selected:
RUT 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.