LUKAS 13

Talikur kano intor ra tula kapoam matoi

1Paat ragili mokoondo' kukula' ngaulun ra giu' i nambala' ri Jisus ra saujor ru gabenor Pilatus namatoi ra kukula' ngaulun intor ra Galilia, paat ra ilo nangani' ra taak nilo ri Aki Kapuuno'. 2Indagu i Jisus risilo, “Guang min pinatayan ru ulun Galilia no tatandu' ra masuang tula nilo intor ra ulun Galilia ra bokon kia? 3Kalo! Balain takamin, amon ru kalo tumalikur kau intor ra tula mino, akau ngaangai' matoi koson risilo am pasubolon ra naraka. 4Ati kulaan ra mopor am balu' ngaulun ondo' minatoi giu' ra Siloam ra naabaan ilo ru manara? Guang min pinatayan nilai tatandu' ra masuang tula nilo intor ra ngaangai' ulun ra bokon ondo' soroi giu' ra Jirusalim kia? 5Kalo! Balain takamin, amon ru kalo tumalikur kau intor ra tula mino, akau pana matoi koson risilo am pasubolon ra naraka.”

Abig ra sampuun ara ondo' kalo mangkawa'

6Tunungo' boo ri Jisus abig ragitio risilo, “Mokoondo' sampuun ara timinuu' giu' ra umo ru anggur ru sangulun. Naguyum ulun no ra kawa' ru ara no, kaa' kolondo' natuum no. 7Ginio ra indagu io ra ulun magalung ra umo nano, ‘Ilai', talu ngambilor aku no minatong ragiti maguyum ra kawa' ru ara ti, kaa' kolondo' natuum ku. Tagaro' ayuk! Kolondo' onong no tumuu' ra tana' ti.’ 8Kaa' taam ulun magalung ra umo nali, ‘Tuan, polosoon io sambilor poyo. Liputon ku kalii' puun nano am taukin ku ra baja. 9Amon ru mangkawa' io bilor ra sumunu' ti, moonsoi. Amon ru kalo, bagu tagaron mu.’ ”

Namabas i Jisus ra sangulun ruandu' paat ra orou Sabat

10Paat ra rondo' orou Sabat, nangila' i Jisus giu' ra baloi sambayangan. 11Giu' i mokoondo' sangulun ruandu' ondo' sinubol ru riwato. Mopor am balu' ngambilor noyo io narualan saboi tangkuung inan nano am mailo migor ra mabanis. 12Kakito io ri Jisus, piawo' No, indagu Io, “Minan, nababas kono intor ra maruol muni!” 13Pabantaa' ri Jisus kalindu' Nali ra ruandu' no, am paat ragili niayuk nabanis inan nali am nongongompor io ri Aki Kapuuno'.

14 # Kai. 20:9-10; Sag. 5:13-14 Kaa' tingganai ru baloi sambayangan siminangit sabap ra namabas i Jisus paat ra orou Sabat. Indagu tingganai i ra ulun masuang no, “Onom ngoorou itakau makapangandoi, ratong kau pakibabas ra orou raginio am sala' ka paat ra orou Sabat!”

15Taam Tuhan ra tingganai no, “Okou ti maabau-abau! Ngaangai' ulun maaru' mampalabus ra kaladai kapoam sapi' nilo ongoyon painumo' kabalu' pana paat ra orou Sabat. 16Ilai' ruandu' papag ri Abragam ti, binangkil io ru Tingganai ru riwato buoi mopor am balu' ngambilor. Kalo kia bugalon babangkil nano paat ra orou Sabat?” 17Nangauyu' boo ngaangai' ulun minanggal ri Jisus ra taaman Nali, kaa' ngaangai' ulun ra bokon naansukan ra kaimuagan ondo' binaal ri Jisus.

Abig ra sangunor puun mustard#mustard: Mustard ondo' aration ragiti iono rondo' salinut ru tutuu' ondo' timinuu' mamaar 3 ngamito sawat nano.

(Mat. 13:31-32; Mrk. 4:30-32)

18Indagu i Jisus, “Masaga' Aku mapaintutun ramuyun ati kulaan i Aki Kapuuno' mamarinta. Atan papagandaan Kuno raginio? 19Baal nano koson ra sangunor mustard ondo' inalap ru sangulun am tonomo' no giu' ra umo. Kabalu' pana malumot unor no, tumuu' am masauk ra puun masawat saboi manabunsut susuit-susuit ra raan nano.”

Abig intor ra ragi

(Mat. 13:33)

20Indagu poyo i Jisus, “Atan papagandaan Kuno ri Aki Kapuuno' mamarinta? 21Baal nano koson ra ragi ondo' inalap ru sangulun ruandu'. Polotoko' no ra apat ngoopor ngakilo ra tapung, am samput boo tapung i!”

Kulobon ondo' mapisok

(Mat. 7:13-14, 21-23)

22Nangila' i Jisus ra kukula' bandar am pamagunan ondo' sinailan Nali paat Io mongoi ra Jirusalim. 23Pangkuot sangulun i Riso, “Tuan, kalo masuang kia ulun bayagon?”

Taam i Jisus risilo, 24“Kinami' min toojo sumubol ra kulobon ondo' mapisok no. Balain takamin, masuang ulun kuminam subol kaa' kalo makaumpos ilo. 25Mingkakat boo tatangan ra baloi no am angabin no kulobon. Migor kau ra liwar am manitik ra kulobon liliwa' mindagu, ‘Tuan, ukabi' ramon kulobon ti!’ Taam ru tuan no, ‘Kalo makapandai aku ati intor min!’ 26Tumaam kau, ‘Nangakan am nanginum akai no gulung rirun, am nangila' kou giu' ra intok mai!’ 27#Mzm. 6:8Kaa' indagu saguli' tuan no, ‘Kalo makapandai aku ati intor min. Pagiru' kau intor raki', akau ngaangai' ondo' mambaal ra kalaatan!’ 28#Mat. 22:13; 25:30 #Mat. 8:11-12Mumpara' boo sulaboi am kinuritot ru ripon min ra tauli no, paat makito min i Abragam, Isak, Jakub am ngaangai' nabi giu' ra Tana' Bagu ri Aki Kapuuno',#Tana' Bagu ri Aki Kapuuno'; Harfiah: Karajaan ri Aki Kapuuno'. kaa' akau patirin ayuk ra liwar! 29Matong ulun intor ra sirangon, kalasaan, ralayo am rabugus mantulibung ilo pangakan giu' ra Tana' Bagu ri Aki Kapuuno'.#Tana' Bagu ri Aki Kapuuno'; Harfiah: Karajaan ri Aki Kapuuno'. 30#Mat. 19:30; 20:16; Mrk. 10:31Totopot ra ulun ondo' raino ti makatauli, makasigulu ilo ra maagu no, am ulun ondo' raino ti makasigulu, makatauli ilo.”

Togom ri Jisus ra Jirusalim

(Mat. 23:37-39)

31Paat ragili niayuk, mokoondo' kukula' ngaulun ru Parisi minatong ri Jisus am pambala', “Iruani' intok ragitio. Ongoi no intok ra bokon, sabap ra raja' Irodis masaga' mamatoi Rirun.”

32Taam i Jisus, “Ongoi balai' ulun kolondo' onong no, ‘Orou raiti' am susuab mokoondo' Aku ra kandoi mampagiru' ra riwato am mamabas ra ulun, kaa' malaas no pongoonon Ku kandoi Kutu.’ 33Raiti', susuab am malaas tunggulin Ku pangkiralanan Kutu suku' ra Jirusalim sabap ra giu' ayuk pamatayan ra nabi-nabi.

34Jirusalim, Jirusalim! Namatoi kou ra nabi-nabi am binobol mu ra batu ulun ondo' sinusub ri Aki Kapuuno' mongoi rirun! Ingkula' Aku noyo masaga' mampalulur ra ngaangai' mamagun muno, koson ra sanginan manuk puunan mampagupu' ra gogol nano ra kawo nano, kaa' marara' kou! 35#Mzm. 118:26; Jir. 22:5Sotopot no iruanin boo ri Aki Kapuuno' Baloi Tuhan muno. Kalo boo makakito kou Raki' saboi mindagu kou, ‘Nabarakat noyo Io ondo' matong ralalom inggalan ru Tuhan.’ ”

Currently Selected:

LUKAS 13: TMT

Highlight

Copy