IMAMAT 25
25
Bilor Katulu'
(Sag. 15:1-11)
1 Minindagu Tuhan ri Musa giu' ra tampak ru Gunung Sinai, am nanusub riso 2maa' raginio manaak ra ulun ru Israil ra aturan ragitilo. Paat ra akau mumpos ra pagun ondo' taakin ru Tuhan ramuyun, musiti' kau mangurumat ra Tuhan ra ralan ragitio: Paat ra moonong bilor katulu' kalo iowon kau magitanom. 3Buoi onom ngambilor musiti' kau magitanom ra umo, mangindaan ra puun ru anggur, am manimung ra ampos ru tinanom, 4kaa' moonong bilor katulu' musiti' timpokon ra Tuhan. Ginio ra buoi ru bilor raginio, tana' ti kalo malingon matanaman. Pai' tanami' umo am pai' indaani' puun ru anggur mino. 5Pai' pangkumos ra gandum ondo' tumuu' galama', am pai' pangupu' ra kawa' ru anggur intor ra puun ondo' kalo inindaanan, sabap ra paat ra bilor raginio tana' kalo noyo tanamin lingono'. 6Kabalu' pana raginio, tana' ondo' kalo tanamin min paat ra bilor raginio mangingkual ra ampos koson saukon ra akanon min, ulipon mino, ulun mangandoi mino, ulun bansa' ru bokon ondo' minayan ramuyun, 7bibiag tinambiag mino am bibiag masigo giu' ra pagun mino. Atan ayuk ondo' ampos ru tana' no, maakan.
Bilor papasagulian
8Untobo' intulu' tulu' ngambilor, iono apat ngoopor am siam ngambilor. 9Paat boo ra orou koopor ra sila' katulu', iono Orou Pangampunan ra Tula, susubo' ulun manamput ra bujung ra titikop pagun. 10Kon raginio ra akau palilion ayuk bilor ondo' kalimo ngoopor, am mapatanou ra kalabusan ra ngaangai' mamagun ru pagun. Paat ra bilor raginio ngaangai' rapu' ondo' natalan noyo musiti' pasagulion ra tatangan toojo kapoam ra papag ru tatangan no. Osoi ayuk ondo' tinalan noyo koson ra ulipon musiti' pasagulion ra sasambaloi nano. 11Pai' tanami' umo mino; pai' kumoso' gandum ondo' tumuu' galama' ra umo mino; pai' pangupu' ra kawa' ru anggur intor ra puun ru anggur ondo' kalo inindaanan giu' ra umo mino. 12Bilor raginio bilor ondo' mapasau ramuyun. Atan ondo' tumuu' galama' ra umo mino, am ondo' alapon mino galama', ginio ayuk maakan mino.
13Paat ra bilor raginio, ngaangai' tana' ondo' natalan noyo moonsoi pasagulion ra tatangan toojo no. 14Ginio sabap ra paat ra mantalan kau ra tana' ra gino ngai' ulun ru Israil, kapoam mambali ra tana' intor risilo, pai' baalo' mantalan am mambali no ra kalo matanda'. 15Musiti' aruon logo ru tana' no sumugut ra suang ru bilor ra tana' no nanangampos ra kalo poyo Bilor Papasagulian ra matong. 16Amon ru lakat poyo mabuoi, logo ru tana' no mologo poyo, kaa' amon ru lakat poyo soroi kukula' ngambilor ayuk, maaru' logo no maningka' poyo sabap ra ondo' tinalan no iono suang ru ampos ru tana' no. 17Pai' pamparuung ra gino ngai' ulun ru Israil, kaa' kalaa' noyo ra Tuhan i Aki Kapuuno' mino.
Kapaganan ru bilor katulu'
18Gagayaa' ngaangai' ukum am susuban ru Tuhan maa' raginio maayag kau ra namio-mio giu' ra pagun no. 19Tana' ru pagun no manangampos saboi makaakanon kau ra maukop am mayan ra giu' no ra namio-mio.
20Kaa' maaru' lair mokoondo' ulun mangkuot ra, “Atan kia akanon ondo' soroi ra bilor katulu' no, sabap ra tana' kalo tanamin am kalo kumoson ampos no?” 21Barakaton ru Tuhan tana' no ra bilor koonom, saboi manangampos ra akanon maukop buoi talu ngambilor. 22Paat ra akau mantanom ra umo mino ra bilor kabalu', lakat kau poyo mangakan ra ampos ru tinanom gili ra bilor koonom. Maukapan kau ra akanon saboi ra paat ra akau manimung ra ampos ru tinanom bilor raginio.
Papasagulian ra tana' am baloi
23Tana' mino kalo matalan ra mantilayun sabap ra sala' ka akau tatangan ra tana' no. I Aki Kapuuno' tatangan ra tana' no, am akau koson ra ulun bansa' ru bokon ondo' nakaalap ra pangiawan magitanom ra tana' no.
24Paat ra matalan sampila' tana', musiti' iowon kuasa' ru tatangan toojo ra tana' no koson mamuli' raginio. 25Amon ru sangulun Israil nasauk ra musikin am mantalan kalalaat ra tana' nano, pabukat nano ondo' mamaar kaga' musiti' mamuli' ra tana' no. 26Sasangulun ondo' kolondo' pabukat koson mamuli' ra tana' nano, maaru' lair paat ra orou matong masauk langkaya' am maalap no mamuli' raginio galama'. 27Amon ru ginio baal no, musiti' io mambayar ra ulun ondo' nambali ra tana' no, ngaangai' logo ondo' maaya' ra ampos ondo' moowot ra kalo poyo Bilor Papasagulian ra matong no. Koon raginio noyo io makaalap saguli' ra tana' nano. 28Kaa' amon ru kalo maalap no mamuli' raginio, tana' no magulayun ra ulun nambali saboi ra Bilor Papasagulian ra matong no. Paat ra bilor raginio, musiti' tana' no pasagulion ra tatangan toojo no.
29Paat ra talanon ru sasangulun rondo' baloi giu' ra ralalom bandar ondo' makarinding batu, makakuasa' io mamuli' ra baloi nano ra buoi sambilor, intor ra orou pantalanan ra baloi no. 30Kaa' amon ru kalo mapuli' no ra buoi sambilor, io kolondo' boo kuasa' mamuli' ra baloi no. Baloi no magulayun masauk ra longgom ru ulun mambali no, am papag ru ulun no. Paat ra Bilor Papasagulian, baloi no kalo pasagulion ra tatangan toojo. 31Kaa' aturan tayar ru baloi giu' ra pekan ondo' kolondo' rinding batu, nogondo' ra aturan ra tana'. Tatangan toojo makakuasa' mamuli' raginio, am musiti' pasagulion riso paat ra Bilor Papasagulian. 32Kaa' aturan tayar ru ulun ru Liwi nansuai. Paat ra sasanggilan ayuk, makakuasa' ilo mamuli' ra rapu' nilo giu' ra bandar ondo' inaru' noyo risilo. 33Baloi giu' ra ralalom ru rondo' bandar no, ondo' tinalan noyo ru sangulun Liwi am ondo' kalo pinuli' no, musiti' pasagulion riso paat ra Bilor Papasagulian. Baal no kon raginio sabap ra baloi longgom ru ulun ru Liwi giu' ra bandar-bandar raginio magulayun longgom nilo ra gino ngai' ulun ru Israil. 34Kaa' padang sakot giu' ra liliut ru bandar ru bansa' ru Liwi kalo talanon. Padang sakot no longgom nilo ra mantilayun.
Pairaan ra ulun musikin
35 Amon ru sasangulun gino ngai' ulun ru Israil, ondo' minayan ramuyun nasauk ra musikin am kalo makapaginakan, musiti' min indanganon io koson ra akau mangindangan ra ulun bansa' ru bokon kapoam ulun minatong, maa' raginio marayus io makaayan ramuyun. 36Pai' kitaako' bunga' ru ruit ra pairaan no, kaa' gagaya' ri Aki Kapuuno' polosoo' noyo gino ngai' ulun ru Israil mayan ramuyun. 37 Pai' kitaako' bunga' ru ruit ra ruit ondo' pairain min riso, am pai' pagantung intor ra akanon ondo' talanon min riso. 38Gitio noyo susuban ru Tuhan i Aki Kapuuno' min, ondo' nagibit ramuyun miningkual intor ra Misir koson mangani' ramuyun ra pagun Kanaan, maa' raginio masauk Io ri Aki Kapuuno' min.
Papalabusan ra inulipon
39 Amon ru sangulun ra gino ngai' bansa' ru Israil, ondo' minayan ramuyun nasauk ra musikin am nantalan ra inan nano ramuyun koson ra inulipon, pai' io susubo' mambaal ra kandoi ru inulipon. 40Polosoon io mayan simpung ramuyun koson ra ulun gajiin am mangandoi rirun polos ra Bilor Papasagulian ra matong no. 41Paat ra bilor raginio, io am anak-anak nano manatang ramuyun am muli' ra pabukat nano galama' am ra tana' longgom ru kinamatuaan nano. 42Ulun Israil iono ulipon ru Tuhan am nagibit Io noyo risilo miningkual intor ra Misir; ginio sabap boo ra kalo matalan ilo koson ra inulipon. 43Pai' kapuka' ra ulun ru Israil ondo' mantalan ra inan nilono ramuyun koson ra inulipon, kaa' kalaa' noyo ri Aki Kapuuno' mino. 44Amon ru manangulipon kau, mambali kau ra inulipon intor ra ulun bansa' ru bokon ondo' minayan ra liliut mino. 45Mambali kau niayuk ra anak ru ulun bansa' ru bokon ondo' minayan ramuyun. Anak nilo ondo' inanak giu' ra pagun mino masauk ra longgom min. 46Pataakon min ilo koson ra tungkus ra anak ungkuyon mino, koson masauk ra inulipon nilo buoi ru bayag, kaa' pai' kau kapuka' ra ulun ru Israil.
47Amon ru sangulun bansa' ru bokon ondo' minayan ramuyun masauk langkaya', am sangulun Israil gino kau po ngai' nasauk ra musikin, am nantalan ra inan nano koson ra inulipon ra ulun bansa' ru bokon no kapoam sangulun intor ra sasambaloi nano, 48lakat poyo makakuasa' ulun ru Israil no pulion. Sangulun intor ra pabukat ungkuyon nano, 49kapoam kamaman nano, kapoam pantukir nano, kapoam sangulun intor ra pabukat mamaar nano makapamuli' riso; kapoam amon ru makaruit io, io niayuk mipuli' io ra inan nano galama'. 50Musiti' io mansunur ra ulun ondo' nambali riso no, am musiti' ilo manguntob ra suang ru bilor intor io nantalan ra inan nano koson ra inulipon polos ra Bilor Papasagulian ra matong. Musiti' logo pamuli' no aruon maya' ra gaji' ondo' taakin ra ulun gajiin. 51-52Musiti' ulun no mapasaguli' ra logo nambalian riso ra suang ru gaji' ru ulun gajiin buoi ru bilor ondo' kalo poyo nasuku' nano, 53ilain koson mangandoi io koson ra ulun gajiin. Kalo iowon tuan nano mapuka' riso. 54Amon ru kalo mapuli' io ra rondo' intor ra ralan raginio, musiti' io am anak-anak nano palabuson paat ra Bilor Papasagulian ra matong no. 55Sangulun ru Israil kalo masauk ra inulipon ra mantilayun, sabap ra ulun ru Israil noyo ulipon ru Tuhan. Nagibit Io noyo risilo miningkual intor ra Misir; Io noyo Tuhan i Aki Kapuuno' nilo.
Currently Selected:
IMAMAT 25: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
