TINGGANAI RU BANSA' 21
21
Ralaa-ralaa ondo' paanduin ra ulun ru Binjamin
1Paat ra ulun ru Israil natimung giu' ra Mijpa, Nagibot ilo. Konilo, “Kolondo' sangulun pana intor ramon ti mangiou ra anak ruandu' mai pawatin ra ulun ru Binjamin.” 2Raino minongoi ulun ru Israil ra Bitil am panturung ra saang ri Aki Kapuuno' saboi ra rondom. Nantangi' ilo am nampiau, 3“Iou Tuhan, i Aki Kapuuno' ru Israil, kua kia baal ragitio nasauk? Kua kia Israil matatakan ra bansa' ru Binjamin?”
4Suabon no ra iosusuab, nambaal ilo ra rondo' altar ra giu' no. Napataak ilo ra taak simbalui koson mapabansuk ra guang ru Tuhan am taak simbalui koson makibarakat ra Tuhan. 5Pangkuot ilo boo, “Mokoondo' kia bansa'-bansa' ra gino ngai' ru ulun ru Israil ondo' kalo maya' sambayang ra Tuhan giu' ra Mijpa ragili?” (Nakapagibot noyo ulun ru Israil ra osoi kalo mongoi ra Mijpa paat raginio musiti' ukumin ra potoyon). 6Makaasi' ilo ra bansa' ru Binjamin am indagu, “Paat ra raiti' natatakan ulun ru Israil ra rondo' intor ra bansa' nano. 7Atan kia musiti' baalon takau koson mokoowot ra andu' ru tayar ru bansa' ru Binjamin ondo' soroi no? Nakapagibot takau noyo ra Tuhan ra kalo iowon takau anak ruandu' takau pawatin risilo.”
8Paat ilo nangkuot ru lakat poyo mokoondo' bansa' ra gino ngai' ru ulun ru Israil ondo' kalo minaya' sambayang ra Tuhan giu' ra Mijpa, katutuni' nilo ra kolondo' sangulun pana intor ra bansa' ru Jabis giu' ra Giliad minongoi ra Mijpa. 9Paat inilayan nanulisan ra inggalan, natutun ra kolondo' sangulun pana intor ra Jabis ondo' siminaang. 10Ginio sabap ra ulun ondo' timinimung ra Bitil no nangator ra 12,000 ngaulun ondo' baani kaga' ra Jabis, nabaya' ra susuban, “Potoyo' moonong ulun giu' ra Jabis, makaaya' ruandu' am lalaing. 11Potoyo' ngaangai' ungkuyon am moonong ruandu' ondo' sala' ka ralaa.” 12Intor ra bansa' ondo' minayan ra Jabis no, natutun nilo ra 400 ngaulun ralaa ondo' lakat poyo mamulok. Nagibit ilo ra ngaangai' ralaa no ra pangkiman giu' ra Silo, giu' ra tana' ru Kanaan.
13Kopongo raginio ngaangai' ulun ru Israil nangator ra ulun sinusub ra bansa' ru Binjamin ondo' giu' ra gunung batu giu' ra Rimon koson makimobonsoi. 14Ginio ra bansa' ru Binjamin pana siminaguli', am pataako' ru ulun ru Israil risilo ralaa intor ra Jabis ondo' kalo pinatoi ra paanduin risilo. Kaa' suang no kalo naukop.
15Makaasi' ulun ru Israil ra bansa' ru Binjamin sabap jinajou ru Tuhan pasimpungan ru bansa'-bansa' ru Israil. 16Ginio sabap ra indagu tingganai-tingganai giu' ra pantimungan no, “Kolondo' boo kia ruandu' ru bansa' ru Binjamin. Atan musiti' takau baalon maa' raginio bala ru ungkuyon ondo' lakat poyo soroi ti mokoowot ra andu'? 17Pai' masaboi ra Israil ti matatakan ra rondo' pana intor ra mopor am ruo bansa' nano. Musiti' takau maguyum ra ralan maa' raginio bansa' ru Binjamin mokoowot ra papag am magulayun manungkus ra titikop ru tana' nilo; 18kaa' kalo mangiou takau ra anak ruandu' takau pawatin risilo, sabap ra nakapagulas takau noyo ra osoi ayuk ondo' mangiou ra ulun ru Binjamin maguot ra anak ruandu' takau.”
19Kakara' nilo boo pangiantakan kabilaran tayar ru Tuhan ondo' paugaron giu' ra Silo maar noyo. (Silo ti giu' tampilon ralayo ru Bitil, giu' ra tampilon rabugus ru Libona am giu' ra tampilon sirangon ru ralan pangkilolot ru Bitil am Sikgim). 20Indagu boo tingganai-tingganai ra ulun ru Binjamin ondo' lakat poyo soroi, “Pansibuni giu' ra umo ru anggur giu' ra Silo 21am paginaa ra giu'. Paat ralaa ru Silo matong mansayau paat ra pangiantakan no, ingkual intor ra umo ru anggur no, am sigagama' jumajal mangalap ra ralaa-ralaa no. Saukon ilo ra andu' min am ibiton ilo muli' ra wilayah ru Binjamin. 22Amon ama' kapoam pabukat ungkuyon nilo matong am mansang, paraguon min, ‘Iowo' akai no manangandu' ra ralaa mino, sabap kalo tinalingaau mai ilo ralalom ru pangayawan. Mulu' poyo ra kalo pinataak min ilo ramon. Ginio ra kolondo' sala min sabap kalo liminungkang kau ra ibot.’ ”
23Bansa' ru Binjamin pana nambaal boo raginio. Sigagama' nampili' ra andu' intor ra ralaa ondo' nansayau giu' ra Silo, am nagibit risilo minuli'. Kopongo raginio siminaguli' ilo ra wilayah ru sigagama' am nambaal saguli' ra bandar nilo am niayuk minayan ra giu' no. 24Ulun ru Israil ra bokon pana minuli' ra bansa' am niayuk sasambaloi ru sigagama', am ra tana' longgom nilo.
25 Paat raginio kolondo' poyo raja' ru Israil. Moonong ulun mambaal ra atan ondo' karaan ra motopot.
Currently Selected:
TINGGANAI RU BANSA' 21: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
