KASAUKAN 23
23
Minatoi i Sara am nambali i Abragam ra tana' kalabangan
1I Sara naayag buoi 127 ngambilor. 2Intok pinatayan nano Gibron ra tana' ru Kanaan. Nangulir i Abragam ra pinatayan ru andu' nano.
3Kopongo raginio, iruani' ri Abragam baangkai ru andu' nano ra napalanganan i am ongoi io tuum ra ulun ru Git. 4Konilo, “Aku ti ulun bansa' ru bokon ragiti ondo' minayan ramuyun. Talano' min raki' sanganu ra tana' mino maa' raginio molobong ku andu' kuno.”
5Taam ilo, 6“Tuan, mangurumat akai rirun koson tingganai ondo' makakuasa' ramon. Ginio ra lobongo' andu' muno ra lobong ondo' moonsoi kaga' ra kalabangan maino. Akai ngai' maayo guang mai manaak rirun ra tana' kalabangan, maa' raginio molobong mu andu' muno.”
7Igulatur boo i Abragam ra tuma' nilono, 8am indagu, “Amon ru masaga' kau toojo ra andu' kuno lobongon ragiti, kitaakon ku ri Ipron anak ungkuyon ri Sogar, 9koson talanon no raki' Luang Batu Makpila ondo' nansiib ra umo nano. Patalani' riso tana' no raki' ragiti sabap makapabukat manginono'. Logo no ukopon ku toojo bayari' maa' raginio tana' no aku tatangan koson ra tana' kalabangan.”
10Paat raginio, tuturung i Ipron galama' nabaya' ra ulun-ulun ru Git no ra intok pagumaan ra kulobon garabang ru bandar. Ngaangai' ulun soroi ra giu' no mangining ra io timinaam, 11“Tuan rongogo', pataakon kuno rirun ngaangai' limayak am luang batu ondo' nakasimpung no ra inono' ru bansa' kuno galama', maa' raginio molobong mu andu' muno.”
12Igulatur boo i Abragam ra ulun ru Git no, 13indagu io ri Ipron ondo' maining niayuk ru ulun ra bokon, kono, “Rongogo' aku, balion ku ngaangai' umo no. Apuo' noyo pambayar kutu maa' raginio molobong ku andu' kuno ra giu' no.”
14Taam i Ipron, 15“Tuan, tana' ra mokologo apat ngaatus ruit pirok no ayuk, atan kia onong ru ginio rito? Lobongo' noyo andu' muno ra giu' no.” 16Nangiou i Abragam ra logo raginio. Io pana nanimbang ra suang ru ruit pirok ondo' sinabit ri Ipron, ioginio apat ngaatus ruit pirok, sumugut ra timbangan ru mantatalan. Pabayaro' no ri Ipron ruit no ondo' natainuan ru ngaangai' ulun ru Git no.
17Ginio noyo ati kulaan umo ri Ipron ondo' mamaar ra Makpila tampilon ra sirangon ru Mamri, i Abragam boo tatangan. Tana' no makaumo, luang batu am niayuk ngaangai' puun tataun polos ru makatataun ra pompor ru tana' ri Ipron no. 18Ngaangai' ulun ru Git no ondo' nakasaang ra pagugumaan raginio nangiou ra tana' no raino longgom noyo ri Abragam.
19Kopongo raginio, lobongo' ri Abragam andu' nano i Sara ra luang batu Makpila ra tana' ru Kanaan. 20Ginio ra umo am luang batu ondo' ragili ulun ru Git tatangan, kaa' raino ti longgom ri Abragam koson tana' kalabangan.
Currently Selected:
KASAUKAN 23: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
