GALATIA 4
4
1Tungguli' ku poyo: buoi ru sangulun lakat ayuk poyo lalaing, mangandoi io ra ama' nano koson ayuk ra ulipon, kabalu' pana ngaangai' tungkuson no io makaalap. 2Kaa' paat ra io mamulok, am saboi nasuku' nangaruan ru ama' nano, anak raginio alungin am indanganon ayuk poyo ru ulun ra bokon mampaugar ra ngaangai' kondoyon intor ra tungkuson nano. 3Koson niayuk ritakau ra galing i, buoi itakau kalo poyo nasukor, inulipon takau ru riwato ondo' nanguasa' ra tana' ti. 4Kaa' paat ra nasuku' nangaruan Nali, nangator i Aki Kapuuno' ra Anak Nano galama'. Io ti inanak ru sangulun ruandu' am giminagaya' Io niayuk ra Ukum ri Musa, 5 maa' raginio makapampalabus Io risilo ondo' mampagagaya' ra Ukum ri Musa ti, maa' raginio masauk takau koson ra anak ri Aki Kapuuno'.
6Sabap ra totopot anak kau ri Aki Kapuuno', ginio ra nanusub Io ra Ambiluo ru Anak Nano, sumoroi ra guang takau, koson mampiau, “Ama', Ama' kuno.” 7Intor raginio, akau sala' ka boo ulipon, kaa' anak. Sabap ra akau ti noyo anak Nano, aniin kau ri Aki Kapuuno' ra ngaangai' ondo' pinongo Nano ra anak Nano.
Maimamang i Paulus ra ulun ru Galatia
8Ra galing i, paat ra akau kalo poyo nakaulig ri Aki Kapuuno', akau inulipon ru riwato ondo' karaan ra tuhan, ondo' kuasa' nilo sala' ka intor ri Aki Kapuuno'. 9Kaa' raino nakaulig kano ri Aki Kapuuno', kapoam matanda' poyo raguon ra i Aki Kapuuno' nakaulig ramuyun. Kua saguli' kau poyo ra tuhan-tuhan ondo' kalo maikang am niayuk kolondo' onong? Kua guat kasaga' kau makiulipon poyo risilo? 10Koson ra suguton min poyo toojo manguma' ra orou, bulan, bilor am paat ondo' inatang ru ugama Jaudi no. 11Maimamang aku ramuyun ra ati lair ngaangai' atan ondo' pinirot kuno kondoyo' koson ramuyun, kolondo' onong?
12Pabukat kau ngaangai', ondo' kitaakon kuno ramuyun am tilu kano raki' koson kalo boo sumugut ra kaulayan ru ugama Jaudi. Sabap ra aku pana koson ramuyun raino ra maayag aku koson ra sangulun sala' ka Jaudi. Kalo igondo' kau makasala raki'. 13Makara' min poyo kia sabap ra kinibit ra aku narualan ragili, io no kasaa' ra aku nakapampasaboi ra Tanou Moonsoi ramuyun? 14Kabalu' pana maruol kuli rondo' pangkinaman toojo ra pangkaraan min, kalo nagasab kapoam nanginggalar kau raki'. Kaa' inuma' min aku koson akau manguma' ra malaikat ri Aki Kapuuno'. Inapu min aku koson akau mangapu ri Kristus Jisus. 15Ragili naansukan kau kaga' kaa' raino kalo boo. Nakapandai aku ra maayo toojo guang min mangindangan raki' ragili, saboi utakon mato min galama' ra pataakin raki'. 16Kaa' raino aku ti pantula' min kia sabap ra nambala' ramuyun ra atan ondo' motopot ti?
17Ulun ra bokon mirot mangkimait ramuyun, kaa' pagibitan nilono kalo moonsoi. Masaga' ilo ayuk mampatuliar ramuyun intor raki', maa' raginio malansan kau ayuk risilo. 18Moonsoi niayuk masalok mirot mangkimait ra ulun am sala' ka ayuk paat ra aku soroi ramuyun, ondo' ak am amon ru pagibitan no moonsoi. 19Anak-anak ra tagamin ku! Mapara' boo imamang kuno ramuyun sabap ra paliso ri Kristus kalo poyo norondon toojo ra guang min. Gitio koson ra ruol ru sangulun ruandu' matipaganak. 20Moogot toojo guang kutu koson sumimpung ramuyun raino, maa' raginio kalo boo maraguan takamin ra masingat, sabap ra maimamang aku toojo ramuyun!
I Agar am i Sara inalap ra popogondoon
21Akau ondo' mirot toojo mampagagaya' ra Ukum ri Musa, masaga' aku mangkuot ramuyun: kalo kia norongog min atan ondo' rinagu ru Ukum ri Musa no? 22 Mokoondo' tinulisan ra makaanak i Abragam ruo ngaulun ungkuyon; sangulun i inanak ri Agar, ulipon nilai, am sangulun i poyo inanak ri Sara, andu' ri Abragam. 23Anak ra nasimpungan no ra ulipon i inanak maya' ra kasagaan nano ayuk, kaa' anak ra nasimpungan no ra andu' no inanak maya' ra nabantuan ri Aki Kapuuno'. 24Gitio koson ra rondo' pagabigan. Ruo ngaulun ruandu' no popogondoon koson ra ruo nabantuan. Rondo' no am i Agar. Io ti koson ra nabantuan ondo' binaal giu' ra Gunung Sinai am ondo' papag nano ulipon ayuk. 25Ginio boo ri Agar ti noyo nogondo' ra Gunung Sinai giu' ra pagun ru Arab am mogondo' io niayuk ra bandar Jirusalim ra raino ti ondo' ngaangai' mamagun nano nasauk ra ulipon ilo ngai'. 26Kaa' bandar Jirusalim ondo' popogondoon ra suruga' kalo inulipon, am io noyo koson ra ina' takau. 27 Mokoondo' tinulisan ra Buuk Kitab ra:
“Pakaansuk no, ruandu' ondo' tabanang!
Pagitatapap am pampiau mabaya' ra kaansukan,
okou ondo' kalo igondo' karuali' ra maganak!
Ruandu' inimpayan makaanak ra masuang intor ra ruandu' ondo' masimpung ra ralaki nano.”
28Pabukat kau ngaangai', itakau ti anak ri Aki Kapuuno' sabap ra nabantuan Nano, nogondo' ri Isak, anak ri Sara no. 29 Koson niayuk paat ragili ra io ondo' inanak sumugut ra kasagaan ayuk ru ulun nangimbolo' ra io ondo' inanak sumugut ra nabantuan ru Ambiluo ri Aki Kapuuno', nogondo' niayuk boo ra raino ti. 30 Kaa' atan tinulisan ra Buuk Kitab? Kono, “Paugaro' ulipon ra ruandu' no mabaya' ra anak nano, sabap ra anak raginio kalo noyo makaapu ra patungkuson, ondo' ayuk makaalap am anak intor ra andu' nano toojo.” 31Ginio boo pabukat kau ngaangai', itakau ti sala' ka koson ra anak ru ruandu' inulipon, kaa' anak takau ru ruandu' ondo' kalo inulipon no.
Currently Selected:
GALATIA 4: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.