IJRA 3
3
Sambayang tinalimpuunan poyo
1Paat ra sila' katulu', ulun ru Israil namagun giu' ra bandar ru sigagama'. Kopongo raginio ilo ngaangai' timinimung giu' ra Jirusalim. 2 Ginio ra i Jisua anak ri Jojadak am kukula' ngaulun imam ra bokon, i Jirubabil anak ri Sialtiil am pabukat-pabukat nano, nambaal saguli' ra altar ri Aki Kapuuno' ru Israil. Koon raginio noyo ilo nokoponolob ra taak giu' ra rasawat ru altar no sumugut ra panuluan ondo' tinulisan ra ralalom kitab ru Ukum ri Musa, ulipon ri Aki Kapuuno'. 3 Kabalu' pana raginio malaa' ilo ra mamagun ru pagun raginio, kaa' binaal nilo saguli' altar no giu' ra intok kasaa' nali. Kopongo raginio timinalimpuun ilo nampataak ra taak simbalui koson mapabansuk ra guang ru Tuhan, paat ra susuab ti am mamai' ti. 4 Mangiantak ilo niayuk ra Pangiantakan Mangkalukub ra Raun sumugut ra aturan ondo' inaru' noyo; moonong orou mampataak ilo ra taak simbalui ondo' inaru' noyo tayar ru orou raginio. 5 Suai raginio, inaru' nilo noyo mampataak ra taak simbalui koson mapabansuk ra guang ru Tuhan am niayuk taak simbalui ondo' pataakon paat ra Pangiantakan Sila' Bagu, am paat ra ngaangai' pangiantakan ra bokon ondo' paugaron koson sumamba ra Tuhan. Ilo niayuk mampataak ra taak ayuk toojo ra Tuhan. 6Kabalu' pana mamagun kalo poyo timinalimpuun mambaal saguli' ra Baloi ru Tuhan, timinalimpuun ilo noyo monolob ra taak simbalui tayar ra Tuhan paat ra orou kasaa' ru sila' katulu'.
Pambaalan ra Baloi ru Tuhan patalimpuunon
7Mamagun nanaak ra ruit koson pambayar ra gaji' ru ulun manukang ra batu am ulun manukang ra tataun. Ilo niayuk nangator ra akanon, inumon am umau jaitun giu' ra bandar Tirus am Sidon koson aligin ra tataun sidar intor ra Libanon. Tataun no inibit ra Japo pinaaya' ra raat. Ngaangai' kandoi no binaal ra pangiawan intor ra Raja' Koris, raja' ru Pirsia. 8Paat ra sila' karuo, ralalom ru bilor karuo kalupus ulun ru Israil siminaguli' ra Jirusalim, timinalimpuun ilo nambaal saguli' ra Baloi ru Tuhan. I Jirubabil, Jisua am ulun rondo' bansa' nilo, imam-imam am ulun-ulun ru Liwi, ontoson ragu, ngaangai' ulun ragili pinatiran, minaya' nangandoi. Ngaangai' ulun ru Liwi ondo' makaumur nasailan 20 ngambilor pinangandoi magalung ra pambaalan ra Baloi ru Tuhan. 9I Jisua, ulun ru Liwi no, nabaya' ra anak-anak am niayuk pabukat-pabukat nano, am niayuk i Kadmiil am niayuk anak-anak nano (bansa' ru Godawya) minaya' nagalung ra kandoi pambaalan ra Baloi ru Tuhan. Inindangan ilo ru ulun ru Liwi intor ra bansa' ru Ginadad.
10 Paat ra ulun-ulun mangngandoi ra pambaalan timinalimpuun napabanta' ra batu maatang ru Baloi ru Tuhan, imam-imam ondo' nambayang ra sukub am nagibit ra bujung minongoi ra intok ru sigagama'. Ulun ru Liwi intor ra bansa' ru Asap niayuk minigor ra giu' no liliwa' nagibit ra agung-agung boborok. Nongompor-ngompor ilo ra Tuhan siminugut ra aturan ondo' inaru' intor ra paat ru Raja' Daut. 11 Narimbai ilo ra pangamparan ra Tuhan, am sinaguli' tayar ra rimbai ra pupus toojo, ondo' bolos no koon ragitio:
“Tuhan no moonsoi, togom Nano ra Israil mantilayun.”
Mamagun maya' magilakup am mongompor ra Tuhan sabap ra batu maatang ru Baloi ru Tuhan pinabanta' noyo. 12Masuang intor ra imam, ulun ru Liwi am tingganai ru bansa' ondo' mangatutuo noyo igondo' nakakito ra Baloi ru Tuhan ragili. Paat ilo nakakito ra batu maatang ru Baloi ru Tuhan ondo' gitio pinabanta', nantangi' ilo ra mosongou. Kaa' ulun ra bokon ondo' siminaang ra giu' no nangilakup sabap ra naansukan. 13Sabap raginio bolos magilakup ra maansukan kalo maalap katalinaasi' intor ra bolos ru tangi'; ginia' no morongog saboi ra maalur.
Currently Selected:
IJRA 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
